1, 2. Eaa te au putōtō anga o te au tavini o Iehova?

KUA putōtō pouroa ana te au tavini tiratiratu o te Atua mei ia Abela tuatua tika ki te aronga tiratiratu i teia tuatau. Akakite a Paulo ki te au Kerititiano Ebera e ko ratou “i akakoromaki ei i te au tamaki mamae maata ra” i te tauta anga kia rauka ta Iehova marekaanga e tana akameitakianga. (Ebera 10:32-34) Kua akaaite a Paulo i te tamaki anga a te au Kerititiano ki te aronga e piri atura ki te au taemoemo Ereni, mei te oroanga, te kukumi, e te moto. (Ebera 12:1, 4) I teia tuatau, tei roto tatou i te oroanga no te ora, e te vaira te au enemi te ka tavarenga ia tatou e ka apai ke i to tatou rekareka i teianei e ta tatou tutaki i te tuatau ki mua.

² Ko te putōtō anga ngata roa atu, koia “ta tatou e kukumi nei,” ko Satani e tona ao. (Ephesia 6:12) E mea puapinga tikai kia patoi tatou i te au apiianga o teianei ao, te kite tangata, e te au peu kino mei te raveanga i te ainga tau kore, kai avaava, e te inu maata i te kava e te kai apinga akakona. Ka anoano katoaia tatou kia tamaki ua atu i te manako taitaia e to tatou tu paruparu.​—2 Korinetia 10:3-6; Kolosa 3:5-9.

3. Akapeea te Atua me tereni ia tatou kia tamaki i to tatou au enemi?

 ³ Ka rauka tikai ainei i te autu i te tamaki i teia au enemi ririnui? Ae, inara ka ngata te reira! Kua akaaite a Paulo iaia uaorai ki tetai tangata moto i te na ko anga e: “Te moto nei au, kare ra mei te mea e, e moto ki te matangi.” (1 Korinetia 9:26) Mei te tangata moto e moto ra i tetai, ka anoanoia tatou kia tamaki atu i to tatou au enemi. Te tauturu nei e te tereni ra a Iehova ia tatou kia pera. Ka rave aia i teia na roto i te Pipiria. Ka tauturu katoa aia ia tatou na roto i te au puka Pipiria, te au uipaanga Kerititiano, te au akaputuputuanga, e te au uruoaanga. Te taangaanga ra ainei koe i te au ikuikuanga taau i rauka mai? Me kare, penei kare koe e patoi tikai ra i toou enemi, mei tetai tangata e moto ra i te matangi.

4. Akapeea tatou me kopae i te kino?

⁴ Ka anoanoia tatou kia matakite i te au atianga ravarai. No teaa ra? Penei ka tamaki mai to tatou enemi ia tatou e kare tatou e manako atu e kua paruparu tatou. Te oronga maira te Pipiria i teia akamatakiteanga e te akamaroiroianga: “Auraka e mate i te kino, kia mate ra te kino ia koe i te meitaki.” (Roma 12:21) Me tamaki ua atu tatou i te kino, ka autu tatou! Inara, me kare tatou e paruru ia tatou uaorai e te akamutu i te tamaki, penei ka upokotu atu a Satani, tona ao, e to tatou tu paruparu ki rungao ia tatou. No reira auraka e tuku i te au. Auraka e taitaia e auraka e parukaua toou rima!—1 Petero 5:9.

5. (a) Eaa ta tatou ka akamaara me inangaro tatou i to te Atua marekaanga e te akameitakianga? (e) Koai ma te aronga i roto i te Pipiria ta tatou ka akamanako?

⁵ Kia autu tatou, ka anoanoia kia akamaara i te tumu e putōtō ra tatou. No te mea ka inangaro tatou kia rauka to te Atua marekaanga e te akameitakianga. Te na ko ra a Ebera 11:6 e: “Ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” Ko te kimi tikai ia Iehova, tona aiteanga kia angaanga pakari tikai me inangaro tatou i tona marekaanga. (Angaanga 15:17) I roto i te Pipiria, e maata te au akaraanga meitaki no te au tane e te au vaine tei akapera. Kua aro atu a Iakoba, Rahela, Iosepha, e Paulo i te au turanga ngata i te pae o te manako ngakau e te pae kopapa. Inara kua puapingaia ratou. Te akapapu nei to ratou akaraanga e me angaanga pakari tatou, ka rauka katoa te akameitakianga a Iehova. Ka akara ana tatou akapeea.

6. Eaa tei tauturu ia Iakoba kia tauta pakari, e akapeea aia i te akameitakiia anga? (Akara i te tutu mua.)

⁶ Kua putōtō e te akakoromaki te tangata tiratiratu ko Iakoba no te mea kua inangaro aia ia Iehova e kua akaperepere i tona pirianga kiaia. Kua irinaki pu tikai aia i ta Iehova taputou no te akameitaki i tana uanga. (Genese 28:3, 4) Te vaitata anga a Iakoba i te 100 mataiti, kua kukumi katoa aia ki tetai angera kia rauka mai tetai akameitakianga no ko i te Atua. (E tatau ia Genese 32:24-28.) Kua rava ainei to Iakoba ririnui i te kukumi i teia angera mana ririnui ma tona uaorai maroiroi? Kare rava! Inara kua tauta pakari aia, e kua akapapu e ka angaanga pakari aia no tetai akameitakianga! Kua akameitaki a Iehova ia Iakoba no tana tauta pakari e kua kapiki  iaia ko Iseraela, te aiteanga “Tei Kukumi, me kore Tei Aruaru, ma te Atua.” Kua rauka ia Iakoba te tutaki ta tatou e kimi nei, koia oki, te marekaanga e te akameitakianga a Iehova.

7. (a) Eaa te turanga taitaia tei tupu kia Rahela? (e) Eaa ta Rahela i rave, e akapeea aia i te akameitakiia anga?

⁷ Ko te vaine akaperepere a Iakoba, ko Rahela, kua inangaro katoa aia i te kite akapeea Iehova me akatupu i tana i taputou ki tana tane. Inara e manamanata tetai. Kare e rauka ia Rahela i te anau tamariki. I te tuatau Pipiria, ka riro teia turanga ei akatupu i te mamae maata ki te vaine. Akapeea a Rahela te tauta ua atu anga noatu tona turanga taitaia? Kare rava aia i tuku ana i te au. Mari ra, kua tauta ua atu aia na te pure anga kia Iehova ma te aruaru. Kua akarongo aia ki ta Rahela pure ngakau tae, e i te openga kua akameitakiia aia ma te tamariki. No reira aia i tuatua ai: “E tauetono maata toku nei tauetono . . . e kua riro mai kiaku.”​—Genese 30:8, 20-24.

8. Eaa te au turanga ngata tei tupu kia Iosepha, e akapeea aia te riro anga ei akaraanga meitaki no tatou?

⁸ Penei kua riro te akaraanga tiratiratu o Iakoba raua ko Rahela ei akakeu i ta raua tamaiti ko Iosepha e kua tauturu iaia i te tuatau i tupu ei te manamanata kiaia. I to Iosepha 17 mataiti, kua taui takiri tona oraanga. Kua vareae tona ai tuakana iaia e kua oko iaia ei tuikaa. I muri mai kua akapou aia i tetai tuatau roa i roto i te are auri i Aiphiti, noatu e kare ona apa. (Genese 37:23-28; 39:7-9, 20, 21) Inara kare a Iosepha i taitaia ana e te riri kino, e kare aia i kimi ravenga no te akaoko atu. No teaa ra? No te mea kua akaperepere a Iosepha i tona pirianga kia Iehova e kua akamou ki runga i te reira ma tona ngakau katoa. (Levitiku 19:18; Roma 12:17-21) Ka riro te  akaraanga o Iosepha ei tauturu ia tatou. Noatu e e tuatau kino to tatou tamariki anga e kare o tatou manakonakoanga i teianei, kia tauta e kia aruaru ua atu tatou. Me akapera tatou, ka papu ia tatou e ka akameitaki mai a Iehova ia tatou.​—E tatau ia Genese 39:21-23.

9. Akapeea tatou me aru i te akaraanga o Iakoba, Rahela e Iosepha?

⁹ I teia tuatau katoa, ka anoanoia kia akakoromaki i te au akaaoanga ngata. Penei te mamae ra koe no tetai turanga tau kore, te papakitai, te aviri me kore kua vareae tetai ia koe. Auraka e taitaia mari ra, kia akamaara eaa tei tauturu ia Iakoba, Rahela, e Iosepha kia tavini ua atu ia Iehova ma te rekareka. Kua akamaroiroi e kua akameitaki te Atua ia ratou no te mea kua akaperepere maata ratou i to ratou pirianga kiaia. Kua putoto ua atu ratou e kua tauta i te rave i te au mea tei rotai ki ta ratou au pure. No te mea te noo nei tatou i te tuatau openga, e mea puapinga kia akaketaketa ua rai i to tatou manakonakoanga no te tuatau ki mua! Ka puareinga ainei koe i te kukumi, koia oki te angaanga pakari, kia rauka ta Iehova marekaanga?

10, 11 (a) Eaa ra tatou ka anoanoia ai kia kukumi no te akameitakianga a te Atua? (e) Eaa te ka tauturu ia tatou kia rave i te ikianga meitaki?

¹⁰ Eaa ra tatou ka anoanoia ai kia kukumi no te akameitakianga a te Atua? No te mea e tu apa ua to tatou, penei e ngata ia tatou i te kopae i te au anoano tau kore. Ka ngata i tetai pae i te manako papu no runga i te angaanga tutu aere e e ngata i tetai pae no te au maki e te maromaroa. Tetai pae e ngata ia ratou i te akakore i tetai tei tamamae ia ratou. Noatu eaa te roa i ta tatou tavini anga ia Iehova, ka anoanoia tatou pouroa kia tamaki i te au mea tei ngata i te tavini i te Atua, ko tei akameitaki i te aronga tiratiratu.

¹¹ Te tika, ka ngata tikai kia riro ei Kerititiano e kia rave i te au ikianga meitaki, me tamaki tatou i te au anoano tau kore. (Ieremia 17:9) Me manako akapera koe, e pure kia Iehova i te pati i tona vaerua tapu. Ka tauturu te pure e te vaerua tapu ia koe kia maroiroi i te rave i te mea tika, e oti ka rauka te akameitakianga a te Atua. E tauta i te akarotai i toou oraanga ki taau pure. E tauta i te tatau i te Pipiria i te au rā, e kia akanoo i te tuatau no taau uaorai apii e te akamorianga ngutuare.​—E tatau ia Salamo 119:32.

12, 13 Akapeea tetai nga Kerititiano te tauturuia anga kia akatere i to raua au anoano tau kore?

¹² E maata te au akaraanga akapeea te Tuatua a te Atua, tona vaerua tapu, e te au puka Kerititiano i te tauturu anga i te au taeake e te au tuaine kia autu i te anoano tau kore. Kua tatau tetai mapu ou i te atikara “How Can You Resist Wrong Desires?” i roto i te Awake! o Titema 8, 2003. Eaa tona manako? “Te tauta nei au i te akatere i toku au manako tau kore. I te tatau anga au i roto i te atikara e ‘no te manganui, ka riro te tamaki anga i te au anoano tau kore ei mea ngata tikai,’ kua tauturu iaku kia kite e tuanga au no te taokotaianga taeake. Kua kite mai au e kare ko au anake ua.” Kua puapinga katoa teia mapu ou mei te atikara “Alternative Life-Styles—Does God Approve?” i roto i te Awake! o Okotopa 8, 2003. I teia atikara kua kite mai aia, e no tetai pae ka riro te tamakianga mei “tetai  tara i roto i taku kopapa nei.” (2 Korinetia 12:7) Noatu ra, ia ratou e tauta ua atu ra kia mā to ratou oraanga, e manakonakoanga papu to ratou no te tuatau ki mua. “Ko teia te tumu,” i nana ai, “I manako ei au e i te au rā ka aereia, ka rauka iaku i te vai tiratiratu. Te āriki rekareka nei au ia Iehova no te taangaanga i tona akaaerenga ei tauturu ia tatou kia ora i te au rā katoa i roto i teia akatereanga kino.”

¹³ Akamanako katoa ana i te akaraanga o tetai tuaine i Marike. Tata aia: “Ka inangaro au i te akameitaki ia kotou no te angai ua mai ia matou i ta matou e anoano ra i te tuatau tau tikai. E manako ua ana au e kua tataia teia au atikara noku tikai. No tetai tuatau roa, kua tamaki ana au i te anoano pakari no tetai apinga ta Iehova e rikarika ra. Tetai taime ka inangaro au i te tuku i te au e te akamutu i te tamaki. Kua kite au e Atua aroa ua a Iehova e te akakoreanga ara, inara no toku anoano tau kore e i roto tikai i toku ngakau kare au e makitakita ana i te reira, kare au e manako ana e ka rauka tona tauturu. Kua riro teia tamakianga roa ei akakeu i te au tuanga ravarai o toku oraanga. . . . I muri ake i te tatauanga i te atikara ‘E “Ngakau Kite” Ainei Toou ia Iehova?’ i roto i Te Punanga Tiaki o Mati 15, 2013, kua irinaki tikai au e ka inangaro a Iehova i te tauturu iaku.”

14. (a) Eaa to Paulo manako no runga i tona au putōtō anga? (e) Akapeea tatou me autu i te tamaki atu i to tatou tu paruparu?

¹⁴ E tatau ia Roma 7:21-25. Kua kite a Paulo mei teaa tikai te ngata i te tamaki atu i te au anoano tau kore e te tu paruparu. Inara, kua papu iaia e ka autu aia i teia tamaki me pure kia Iehova, me irinaki ki runga iaia no te tauturu, e me akaari i te akarongo ki roto i te atinga o Iesu. Akapeea tatou? Ka autu ainei tatou i te tamaki atu i to tatou tu paruparu? Ae, me aru tatou i te akaraanga o Paulo i te irinaki pu tikai kia Iehova, kare ia tatou uaorai, e me tuku i te akarongo ki roto i te atinga oko.

15. Akapeea a Iehova me tauturu ia tatou kia vai tiratiratu e kia akakoromaki i te timataanga?

¹⁵ I tetai taime ka akatika te Atua ia tatou kia akaari mei teaa te maata i to tatou manako no runga i tetai mea. Ei akaraanga, me tupu te maki kino me kore te turanga tau kore kia tatou e ki tetai o te ngutuare, ka akapeea tatou me ariu atu? Me irinaki pu tikai tatou ia Iehova, ka pati akatenga tatou iaia no te maroiroi kia vai tiratiratu e kia tamou ua rai i te rekareka e te pirianga kiaia. (Philipi 4:13) Te akaari maira te au akaraanga e manganui i te tuatau i topa e i teia tuatau, e ka akamaroiroi te pure ia tatou e ka akangakau toa kia akakoromaki ua atu rai.

16, 17 Eaa taau ka tauta i te rave?

¹⁶ Ka inangaro te Tiaporo ia koe kia taitaia, kia tuku i te au e kia parukaua toou rima. No reira “te meitaki ra e tāpu marie” i te reira. (1 Tesalonia 5:21) Ka autu rai koe i te tamaki atu ia Satani, tona ao kino, e tetai ua atu anoano tau kore! Ka autu koe me irinaki pu tikai e ka akamaroiroi te Atua ia koe e ka tauturu ia koe.​—2 Korinetia 4:7-9; Galatia 6:9.

¹⁷ No reira kia tamaki ua rai. Kia putōtō ua rai. Kia kukumi ua rai. Kia aruaru ua rai. Ka papu ia koe e “ka riringi atu ei [a Iehova] i te apinga maata ua atu, kare e ngai e o ei, ei meitaki no kotou.”​—Malaki 3:10.