1, 2. (a) Eaa te au manamanata ta te manganui e aro atura i teia tuatau, e eaa tei tupu mai? (e) Eaa te manakonakoanga papu ta Isaia 41:10, 13 e oronga maira?

KARANGA tetai tuaine e painia tamou tei akaipoipo i tetai tangata pakari e: “Noatu kua akamou au i toku oraanga i te tavini i te Atua, kua roa te tuatau i toku apiapi anga. Kare au e moe meitaki ana, kua kino toku oraanga kopapa e kare au e akono meitaki i tetai ke, e tetai taime ka inangaro au i te tuku i te au.”

² Te mārama ra ainei koe i te manako o teia tuaine? Te mea maromaroa, i te mea te noo nei tatou i roto i to Satani ao kino, ka aro atu tatou i te au taomi anga maata. Mei tetai tutau rai tei tāpū i te poti kia kore e tere, ka riro te manako apiapi ei akateiaa e te akataitaia ia tatou. (Maseli 12:25) Eaa koe ka manako apiapi ei? Penei te mii nei koe no tei mate toou akaperepere me kore te akakoromaki nei koe i tetai maki kino me kore te takinokino. Penei e ngata ia koe te akono i toou ngutuare tangata no te turanga ngata i te pae o te moni. I te tuatau ka aereia, ka riro te ngakau taitaia ei akaparuparu ia koe e ka ngere koe i te rekareka. Inara, ka papu ia koe e kua papa ua te Atua i te tauturu ia koe.​—E tatau ia Isaia 41:10, 13

3, 4. (a) Akapeea te Pipiria me taangaanga i te tuatua “rima”? (e) Eaa te ka akatupu i to tatou rima kia parukaua?

 ³ E taangaanga putuputu ana te Pipiria i te au mero o te kopapa ei akataka i te au tu tukeke e ta tetai tangata e rave ra. Te rima, ei akaraanga, e anere ua atu taime te taikuia anga. Me karanga te Pipiria e kua akaketaketaia te rima o tetai tangata, tera te aiteanga kua akamaroiroiia aia, akaketaketaia e kua papa no te angaanga. (1 Samuela 23:16; Ezera 1:6) Pera katoa ka manako papu aia e e manakonakoanga tona no te tuatau ki mua.

⁴ Tetai taime, ka akataka te Pipiria i tetai tangata kua parukaua tona rima. Te akataka ra teia i tetai tangata kua taitaia e kua ngere i te manakonakoanga. (2 Paraleipomeno 15:7; Ebera 12:12) Me taitaia koe, roiroi e me manako e kua paruparu toou pirianga kia Iehova penei ka inangaro koe i te tuku i te au. Ka kimi koe i te akamaroiroianga kiea? Akapeea koe me akakeuia e te akamaroiroiia kia akakoromaki e kia rekareka?

5. (a) Eaa to tatou manako me tupu te au manamanata, inara eaa ta tatou ka akamaara? (e) Eaa ta tatou ka uriuri?

⁵ E tatau ia Zephania 3:16, 17 Me tupu te au manamanata, auraka tatou e mataku e te taitaia, e kia parukaua to tatou rima. Te pati nei to tatou Metua aroa ko Iehova, ia tatou kia uri i to tatou tumatetenga katoa ki runga iaia. (1 Petero 5:7) Te manako maira a Iehova ia tatou mei tana i rave no te ngati Iseraela. Akakite aia kia ratou kare tona rima “i poto i kore ei e tika iaia kia akaora.” Kua papa ua aia i te akaora i tona au tavini tiratiratu. (Isaia 59:1) I teia atikara, ka uriuri tatou e toru akaraanga Pipiria meitaki tikai tei akaari i to Iehova inangaro e te mana i te akamaroiroi i tona iti tangata kia rave i tona anoano noatu te au turanga ngata tikai. Ka akara ana tatou akapeea teia au akaraanga me akamaroiroi ia koe.

6, 7. Eaa ta tatou ka apii mai mei to Iseraela autu anga i to Amaleka?

⁶ I muri poto ake i te akarangatiraia anga te ngati Iseraela mei te tuikaa i Aiphiti, kua tamaki to Amaleka ia ratou. Akakite a Mose kia Iosua, e tangata ngakau toa, kia arataki i to Iseraela i roto i te tamaki. E oti kua apai a Mose ia Aarona e Hura ki runga i te tuaivi vaitata ia ratou. I runga i reira, kite atura ratou i te ngai tamaki. Te oro ra ainei teia au tangata e toru mei te tamaki no te mea kua mataku ratou? Kare rava!

⁷ Kua akanoo a Mose i tetai parani tei tauturu i te ngati Iseraela kia autu i te tamaki i to Amaleka. Kua mou aia i te rakau no te Atua mou i roto i tona nga rima e kua taaki i te reira ki runga. I te akapera anga a Mose, kua akamana a Iehova i te ngati Iseraela kia tamaki atu i to Amaleka. Inara, kia teiaa te nga rima o Mose e kua akamata i te topa ki raro, kua akamata to Amaleka i te autu. Kua viviki a Aarona raua ko Hura i te tauturu ia Mose. “Kua rave iora raua i tetai toka, tuku iora ki raro ake iaia, e kua noo iora aia ki rungao; e kua mou akerā Aarona raua ko Hura i tona rima, okotai i tetai pae, okotai oki i tetai pae; kare akera tona rima i keukeu e topa ua atura te rā.” Ae, no te rima mana o te Atua, kua autu to Iseraela i te tamaki.​—Exodo 17:8-13.

8. (a) Eaa ta Asa i rave i te tamaki anga to Kusa i to Iuda? (e) Akapeea tatou me aru i te akaraanga o Asa?

 ⁸ Kua papa katoa a Iehova i te taangaanga i tona rima mana ei tauturu i tona iti tangata i te tuatau o te Ariki ko Asa. E maata te au nuku vaeau tei taikuia i roto i te Pipiria, inara ko te nuku maata roa atu na Zera i Kusa, e 1,000,000 vaeau tukatau. E rua taime te maata o te nuku vaeau o Kusa i to te nuku vaeau o Asa. Kua apiapi ainei a Asa, mataku e te taitaia? Kua parukaua ainei tona rima? Kare! Kua pati viviki a Asa ia Iehova no te tauturu. Mei te akaraanga o te turanga tamaki, kare e autu me tamaki atu i to Kusa. “E tika ra te au mea katoa i te Atua.” (Mataio 19:26) No tona mana maata “mate iora to Kusa ia Iehova i mua i te aroaro o Asa,” no te mea kua “tika rava ra to Asa ra ngakau ia Iehova e ope rava akera ona au rā.”​—2 Paraleipomeno 14:8-13; 1 Ariki 15:14.

9. (a) Eaa tei kore i arai ia Nehemia mei te akatuakaouanga i te au patu o Ierusalema? (e) Akapeea te Atua te pauanga i ta Nehemia pure?

⁹ I te aere anga a Nehemia ki Ierusalema, eaa tana i kite? Kua kite aia i te au enemi no te au pa enua ke ke e tamataku ra i te ngati Iuda, no reira kua akamutu ratou i te akatu i te au patu o Ierusalema. Kare te oire i paruruia, e kua taitaia te ngati Iuda. Eaa to Nehemia manako? Kua taitaia ainei aia e kua parukaua tona rima? Kare! Mei ia Mose, Asa, e te au tavini tiratiratu o Iehova, kua irinaki ua rai a Nehemia ia Iehova. I teia turanga katoa, kua pure a Nehemia kia Iehova no te tauturu, e kua pau mai a Iehova iaia. Kua taangaanga te Atua i tona “mana maata” e te “rima marōrō” ei akamaroiroi i te ngati Iuda. (E tatau ia Nehemia 1:10; 2:17-20; 6:9.) Te irinaki ra ainei koe e te taangaanga ra a Iehova i tona “mana maata” e te “rima marōrō” ei akamaroiroi i tona au tavini i teia tuatau?

10, 11 (a) Akapeea a Satani te akakeuanga ia tatou kia parukaua? (e) Eaa ta Iehova e taangaanga ana ei akamaroiroi e te akaketaketa ia tatou? (ng) Akapeea koe te puapinga anga mei ta Iehova au ikuikuanga?

¹⁰ Ka papu ia tatou e kare rava te Tiaporo e parukaua tona rima. Ka tamaki ua rai aia ia tatou, e ka tauta i te tāpū i ta tatou angaanga Kerititiano. E taangaanga ana aia i te au pikikaa e te tamataku anga a te au kavamani, te arataki akonoanga, e te aronga tei akaruke i te akarongo. Eaa tona akakoroanga? Ka inangaro aia ia tatou kia akamutu i te tutu aere i te nuti meitaki o te Patireia. Inara ka tauturu mai a Iehova ia tatou e ka oronga ua mai i tona vaerua tapu ei akamaroiroi ia tatou. (1 Paraleipomeno 29:12) E mea puapinga tikai no tatou kia pati no te vaerua tapu o te Atua kia tamaki atu ia Satani e tona ao kino. (Salamo 18:39; 1 Korinetia 10:13) E āriki rekareka ana tatou i te tauturu mei te Tuatua a te Atua. E akamanako katoa ana i te au mea ta tatou e apii ra i roto i ta tatou au puka i te au marama tatakitai. Kua taikuia te au tuatua ia Zekaria 8:9, 13  (e tatau) i te tuatau e akatuia ra te iero i Ierusalema, inara ka tau katoa teia au tuatua no tatou i teia tuatau.

¹¹ Ka akamaroiroi katoa a Iehova ia tatou na roto i te au ikuiku anga no ko mai i te au uipaanga Kerititiano, te au akaputuputuanga, e te au uruoaanga, pera katoa te au apii tereni orometua o Iehova. Ka tauturu teia au ikuiku anga ia tatou kia tavini i te Atua ma te tumu anga tau, kia akanoo i te au akakoro anga, e kia akono i ta tatou au apainga Kerititiano. (Salamo 119:32) Te inangaro ra ainei koe kia akamaroiroiia mei te au ikuiku anga a Iehova?

12. Eaa ta tatou ka rave kia vai ketaketa ua?

¹² Kua tauturu a Iehova i tona iti tangata kia autu atu i to Amaleka e to Kusa, e kua akaketaketa ia Nehemia e te ngati Iuda kia akaoti i te au patu o Ierusalema. Mei te reira katoa, ka akamaroiroi te Atua ia tatou kia rave ua atu i te angaanga tutu aere noatu to tatou manako apiapi e te patoi anga e noatu kare tetai ke e akaari i te inangaro. (1 Petero 5:10) Kare a Iehova e tangaro i to tatou manamanata na roto i te ravenga temeio. Mari ra, e tuanga ta tatou ka rave. Akapeea ra? Ka anoanoia tatou kia tatau i te Tuatua a te Atua i te au rā ravarai, kia akapapa e kia aere ki te au uipaanga i te au epetoma, kia rave ua rai i ta tatou uaorai apii e te akamorianga ngutuare, e kia irinaki ki runga ia Iehova na roto i te pure. Auraka tatou e tuku i tetai ua atu apinga ei tavarenga ia tatou mei te au mea ta Iehova i oronga mai ei akaketaketa e te akamaroiroi ia tatou. Me manako koe e kua parukaua toou rima i tetai o teia au ngai, e pati i te tauturu a te Atua. E oti i reira, akara akapeea te vaerua o te Atua me “angaanga ki roto ia kotou, i te inangaro e te rave, mei tana i anoano ra.” (Philipi 2:13) Inara, ka rauka ainei ia koe te akamaroiroi i te rima o tetai ke?

13, 14 (a) Akapeea tetai taeake te akamaroiroiia anga i te mate anga tana vaine? (e) Akapeea tatou me akamaroiroi i tetai ke?

¹³ Te oronga maira a Iehova i tetai taokotaianga taeake i te ao katoa o te au taeake e te au tuaine te ka akamaroiroi ia tatou. Karanga te apotetoro ko Paulo: “‘E apai i te rima i tautau ana ki raro ra i runga, e e akapakari i te turi paruparu;’ ‘E akatika ua oki i te ara o to kotou vaevae.’” (Ebera 12:12, 13) E maata te au Kerititiano mua tei rauka taua tauturu ra mei to ratou au taeake e te au tuaine. Pera katoa i teia tuatau. Akamanako ana i tetai akaraanga. I muri ake i te mate anga te vaine a tetai taeake e kua na roto aia i te au turanga mamae, karanga aia e: “Kua apii au e kare e rauka ia tatou te iki i ta tatou au timata anga, pera katoa te tuatau e tupu ei te reira e te putuputu. Kua riro te pure e taku uaorai apii mei tetai paruru anga kia kore au e maremoia. E kua riro te tauturu a toku au taeake e te au tuaine pae vaerua ei akapumaana iaku. Kua kite mai au i te puapinga no te akatupuanga i te pirianga meitaki kia Iehova i mua ake ka tupu ei te au turanga ngata.”

¹⁴ Kua akaketaketa a Aarona raua ko Hura i to Mose rima na te mouanga i te reira i te tuatau e tamaki ra ratou i to Amaleka. I teia tuatau, ka rauka katoa ia tatou i te kimi ravenga ei turuturu e te tauturu  i tetai ke. Te mamae nei tetai pae o to tatou au taeake no te pakarikari, te maki, te takinokino anga mei to ratou ngutuare tangata, te maromaroa, e no tei mate to ratou akaperepere. E akamaroiroi katoa tatou i te au mapu, tei taomiia kia rave i te tarevake e kia kimi i te puapinga i roto i teianei ao. (1 Tesalonia 3:1-3; 5:11, 14) E kimi i te au ravenga kia akaari i te inangaro ngakau tae no tetai ke i ko i te Are Uipaanga Patireia, te angaanga tutu aere, me kaikai kapiti, e me tuatua i runga i te tereponi.

15. Eaa te au akakeuanga ta tatou tuatua papu ka akatupu ki runga i te au taeake e te au tuaine?

¹⁵ Muri ake i ta Asa autu anga umere ki rungao i te nuku maata o Kusa, kua akamaroiroi te peroveta ko Azaria iaia e tona iti tangata i te na ko anga: “E akamaroiroi ra kotou, auraka kia parukaua to kotou rima; ka tutakiia oki ta kotou angaanga.” (2 Paraleipomeno 15:7) Kua akakeu teia ia Asa kia rave i te au taui anga maata ei akaoki akaou i te akamorianga mou. Pera katoa, ka riro taau tuatua papu ei akamaroiroi i tetai ke e te tauturu ia ratou kia tavini ua atu ia Iehova. (Maseli 15:23) Auraka rava e ngaropoina ka akamaroiroiia toou au taeake me oronga koe i te au tuatua akamaroiroi i ko i te au uipaanga.

16. Akapeea te aronga pakari me aru i te akaaraanga o Nehemia? Oronga mai i te au akaraanga akapeea te au taeake e te au tuaine te tauturu anga ia koe.

¹⁶ Ma te tauturu a Iehova, kua akaketaketa a Nehemia e te ngati Iuda i to ratou  rima. Kua akaoti ratou i te patu o Ierusalema i roto i te 52 rā! (Nehemia 2:18; 6:15, 16) Kare a Nehemia i akara ua i te tangata e angaanga ra. Kua tauturu katoa aia i te akatu i te au patu o Ierusalema. (Nehemia 5:16) Pera katoa, te aru nei te maata anga o te aronga pakari i to Nehemia akaraanga me tauturu ratou i te angaanga patu e me tāmā e te akono i te Are Uipaanga Patireia. Ka akamaroiroi katoa teia au tane aroa i te au taeake e te au tuaine tei “ngakau taitaia” na te atoroanga ia ratou e te angaanga kapiti kia ratou i roto i te angaanga tutu aere.​—E tatau ia Isaia 35:3, 4.

17, 18 Me rokoia koe e te manamanata e me apiapi, eaa taau ka irinaki ma te papu?

¹⁷ Me angaanga kapiti tatou ki te au taeake e te au tuaine ka akaketaketa i to tatou tu taokotai. Ka tauturu katoa ia tatou kia akatupu i te au pirianga oa mou e te akaketaketa i to tatou irinaki ki roto i te au akameitakianga ta te Patireia o te Atua ka oronga mai kare e roa atu ana. Me akamaroiroi tatou i te rima o tetai ke, ka tauturu ia ratou kia akakoromaki i te au turanga ngata e kia manako papu no te tuatau ki mua. Pera katoa me tauturu tatou i tetai ke ka akamaroiroiia to tatou rima e ka tauturu ia tatou kia akamou ua ki runga i te tuatau ki mua.

¹⁸ Me akamanako tatou akapeea a Iehova te tauturu anga e te paruruanga i tona au tavini i te tuatau i topa ka akaketaketaia to tatou akarongo e te irinaki i roto iaia. No reira me tupu te manamanata kia koe e me manako apiapi koe, “auraka e parukaua to rima”! Ka papu ia koe me pure koe kia Iehova no te tauturu ka akamaroiroi tona rima mana ririnui ia koe e ka taki atu ia koe ki te au akameitakianga o te Patireia i te tuatau ki mua.​—Salamo 73:23, 24