Ka mārama tatou me akara i te papaanga tuatua ta Paulo e tuatua ra no te karere a te Atua no tona akakoroanga, ka kite tatou i roto i te Pipiria.

E taiku putuputu ana tatou ia Ebera 4:12 i roto i ta tatou au puka ei akaari e e mana to te Pipiria te taui i te oraanga, e e tika te reira. Inara, kia mārama tatou i ta Paulo e uriuri ra i tona tata anga i te au tuatua a Ebera 4:12. Te akamaroiroi ra aia i te au Kerititiano Ebera kia taokotai ki te akakoroanga o te Atua. Ka kitea te manganui o taua au akakoroanga i roto i te au tataanga tapu. Kua taangaanga a Paulo i tetai akaraanga o te ngati Iseraela ta te Atua i akarangatira mei Aiphiti. E manakonakoanga to ratou kia aere ki roto i te “enua e taʼe a vai ua te u, e te meli,” te ngai e rekareka ai ratou i te akangaroi anga mou.​—Exodo 3:8; Deuteronomi 12:9, 10

To te Atua akakoroanga teia. Inara kua kopae te ngati Iseraela i te arataki anga a Iehova e kare i taangaanga i te akarongo, no reira kare ratou i tomo ki roto i te reira akangaroi anga. (Numero 14:30; Iosua 14:6-10) Inara, karanga a Paulo “ko te tuatua oki i vaooia e ka o tatou ki roto i te akaangaroianga o te Atua ra.” (Ebera 3:16-19; 4:1) Kua riro te reira “tuatua” ei tuanga no te akakoroanga ta te Atua i akakite mai. Mei te au Kerititiano Ebera, ka tatau tatou e ka taokotai ki te reira akakoroanga. Tei maata atu, kua akatumuia teia taputou ki runga i te au Tuatua Tapu, kua taiku a Paulo i tetai tuanga o Genese 2:2 e Salamo 95:11.

Pakia to tatou ngakau te kite “ko te tuatua oki i vaooia e ka o tatou ki roto i te akaangaroianga o te Atua.” Te irinaki nei tatou i ta te Pipiria e apii ra no runga i te tomo anga ki roto i te akangaroi anga o te Atua, e kua rave tatou i te au takainga no te tomo atu ki roto. Kare tatou e rave i teia na te aru anga i te Ture a Mose e na te rave anga i te au mea meitaki kia mareka a Iehova. Mari ra, no to tatou akarongo i te Atua, kua mataora ua tatou i te taokotai ki tona akakoroanga e te rave i te reira. E tauatini ua atu tangata i teianei ao tei akamata katoa i te apii i te Pipiria e te apii i ta te Atua i akakite mai no runga i tona akakoroanga. Kua akakeu teia i te maataanga ia ratou kia taui i to ratou oraanga, te akaari te akarongo, e kia papetitoia. Na ta ratou rave anga i te reira e akapapuanga “e mea ora oki te tuatua a te Atua, e te ririnui.” Kua riro ta te Atua e akakite ra i roto i te Pipiria no tona akakoroanga ei akakeu i to tatou oraanga, e ka riro ua rai ei mea ora e te ririnui i roto i te oraanga.