1, 2. Akapeea a Iehova te oronga ua mai anga kia tatou?

E ATUA oronga ua a Iehova. Pouroa ta tatou au mea ravarai no ko mai iaia. Nana te au apinganui ravarai o te enua, e te taangaanga ra aia i te reira kia meitaki te oraanga. (Salamo 104:13-15; Hagai 2:8) Mei roto i te Pipiria, ka kite tatou akapeea a Iehova i tetai taime me taangaanga i te apinganui na roto i tetai ravenga temeio kia oronga ki tona iti tangata.

² Ei akaraanga, kua oronga mai a Iehova i te māna e te vai ki te iti tangata Iseraela, ia ratou i roto i te metepara no tetai 40 mataiti. (Exodo 16:35) Tei tupu, kua rauka ia ratou te au mea ravarai tei anoanoia. (Nehemia 9:20, 21) I muri mai, kua oronga a Iehova i te mana ririnui ki te peroveta ko Elisaia kia akamaata i te inu tunu kai a te vaine takaua tiratiratu. Kua riro teia apinga aroa mei ko mai i te Atua ei tauturu iaia kia tutaki i tana au kaiou e kua rava rai tana moni kia ora aia e tana tamariki. (2 Ariki 4:1-7) Ma te turu anga a Iehova, kua oronga temeio ua mai a Iesu  i te kai pera katoa te moni i te ngai tei anoanoia.—Mataio 15:35-38; 17:27.

3. Eaa ta tatou ka uriuri i roto i teia atikara?

³ Ka rauka ia Iehova i te taangaanga i tetai ua atu apinga i te tauturu i te au mea tana i anga. Noatu ra, te pati nei aia i tona au tavini kia oronga i ta ratou ka rauka ei turu i te angaanga a tona akaaerenga. (Exodo 36:3-7; e tatau ia Maseli 3:9.) Eaa a Iehova i anoano ei kia taangaanga i ta tatou apinganui ei oronga kiaia? Akapeea te au tavini o Iehova i te tuatau o te Pipiria te turu anga i tana angaanga? Akapeea te akaaerenga me taangaanga i te moni tei oronga uaia mai i teia tuatau? Ka pau teia atikara i teia au uianga.

4. Eaa ta tatou ka akaari kia Iehova me turu tatou i tana angaanga?

⁴ Ka oronga tatou kia Iehova no te mea te inangaro tikai ra tatou iaia. Me akamanako tatou i te au mea ravarai ta Iehova i rave, ka akakeu tikai ia to tatou ngakau. Kua akakeu katoaia te Ariki ko Davida i tona akamārama anga i tei anoanoia ei akatu i te iero. Karanga a Davida, pouroa te au mea tei rauka ia tatou mei ko mai ia Iehova e tetai ua atu apinga ta tatou ka oronga kiaia, nana rai te reira.—E tatau ia 1 Paraleipomeno 29:11-14.

5. Akapeea te Pipiria te apiianga ia tatou, e tuanga puapinga te tu oronga ua i roto i te akamori anga mou?

⁵ Ka oronga katoa tatou kia Iehova no te mea ko tetai tu teia o te akamori anga. I roto i tetai orama, kua rongo te apotetoro ko Ioane i te au tavini o Iehova i te rangi te na ko anga: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (Apokalupo 4:11) Papu roa, ka tau rai te kaka e te ngateitei no Iehova, no reira ka inangaro tatou i te oronga i te mea meitaki tikai kiaia. Na roto ia Mose, kua akaue a Iehova i te iti tangata o Iseraela kia rave e toru oroa i te mataiti. Tetai tuanga o ta ratou akamori anga i teia au oroa, ka ō mai te oronga apinga kia Iehova. Kua akakiteia ki te tangata, “auraka oki ratou e aere puapinga kore ua ki mua i te aroaro o Iehova.” (Deuteronomi 16:16) I teia tuatau, e tuanga puapinga katoa te tu oronga ua i roto i ta tatou akamori anga. Na teia tu, ka akaari tatou e te turu tikai ra tatou i te angaanga a te akaaerenga a Iehova.

6. Eaa ra i meitaki ei no tatou kia oronga? (Akara i te tutu mua.)

⁶ E mea meitaki tikai kia oronga ua tatou e kare kia rauka ua mai. (E tatau ia Maseli 29:21.) Akamanako ana i tetai tamaiti tei rauka te manga moni mei tona nga metua e kua taangaanga i tetai tuanga o te reira ei oko i tetai apinga aroa na raua. Eaa te manako o te nga metua i tana apinga aroa? Me kore, akamanako ana i tetai painia mapu e noo ra ki ko i tona nga metua e kua oronga i te moni kia tauturu i te tutaki i te are tārau me kore te oko kai na te ngutuare tangata. Penei kare tona nga metua e anoano iaia kia rave i te reira, mari ra ka āriki ua raua i tana apinga aroa. No teaa ra? No te mea e ravenga te reira i te akaari i tona mareka anga no te au mea pouroa ta raua i rave. Pera katoa, kua kite a Iehova e mea meitaki tikai kia oronga i ta tatou apinganui.

7, 8. Akapeea to Iehova iti tangata i te tuatau Pipiria te akanoo anga i te akaraanga no te tu oronga ua (a) no te au angaanga takake? (e) no te turu i tana angaanga?

⁷ I roto i te Pipiria, ka kite tatou e e oronga ana te iti tangata o Iehova i te au moni tauturu ei turu i tana angaanga. Tetai taime ka oronga ratou i te moni tauturu no tetai angaanga takake. Ei akaraanga, kua akamaroiroi a Mose i te ngati Iseraela kia oronga i te moni no te pātu i te tapenakara. I muri mai, kua pera katoa te Ariki ko Davida i te akatu i te iero. (Exodo 35:5; 1 Paraleipomeno 29:5-9 ) I te tuatau te tutara ra te Ariki ko Ioasa, kua akaou te au kau taunga i te iero na te taangaanga anga i te moni tei orongaia mai e te tangata. (2 Ariki 12:4, 5) I te anere mataiti mua, kua kite te au Kerititiano e kua tupu te onge i Iudea e te inangaro tauturu maira te au taeake i reira. No reira kua iki te au Kerititiano tataki tai i te tuku i tana ka rauka i te oronga ki te au taeake i reira.—Angaanga 11:27-30.

⁸ Kua oronga katoa to Iehova iti tangata i tetai moni tauturu ki te aronga e arataki ra i tana angaanga. Ei akaraanga, i raro i te Ture a Mose, kare a te ngati Levi tuanga i orongaia mei ta tetai au kopu rai. No reira kua oronga te toenga o te ngati Iseraela i te ngauru o ta ratou i rauka ki te ngati Levi. Kua rauka i reira i te ngati Levi i te akamou ki runga i ta ratou angaanga i ko i te tapenakara. (Numero 18:21) Mei te reira rai, kua taangaanga te au vaine tu oronga ua i ta ratou apinga ei tauturu ia Iesu e tana au apotetoro.—Luka 8:1-3.

9. I mua ana, noea mai te au moni tauturu tei rauka?

⁹ Tukeke te ngai i aere mai ei te moni tauturu. Penei kua oronga te au ngati Iseraela i te tauturu no te pātu i te tapenakara mei te au apinganui ta ratou i rauka mei Aiphiti. (Exodo 3:21, 22; 35:22-24) I te anere mataiti mua, kua oko atu tetai au Kerititiano i ta ratou apinga, mei te enua tanutanu me kore au are, e kua oronga i te moni ki te au apotetoro. Kua taangaanga i reira te au apotetoro i tera moni no te au taeake e te au tuaine tei inangaro i te tauturu. (Angaanga 4:34, 35) Kua akapae putuputu tetai au Kerititiano i te moni kia rauka ia ratou i te turu i te angaanga. (1 Korinetia 16:2) No reira mei te aronga apinganui ki te aronga putaua, ka rauka ia ratou i te oronga ua.—Luka 21:1-4.

10, 11 (a) Akapeea tatou me aru i te akaraanga o te au tavini oronga ua o Iehova i te tuatau Pipiria? (e) Eaa toou manako no te turu anga i te angaanga Patireia?

¹⁰ I teia tuatau, penei ka patiia mai tatou kia oronga ua i te moni tauturu no tetai akakoro anga takake. Penei te tapapa nei taau putuputuanga i te akaou i to kotou Are Uipaanga Patireia me kore i te akatu i tetai mea ou. Me kore penei ka anoanoia kia akaouia to kotou opati Betela. Penei ka rauka katoa ia koe i te tauturu i te au akapou anga moni i ko i ta tatou uruoaanga. Me kore kua rokoia to tatou au taeake i te enua ke i te tumatetenga natura e te inangaro maira i ta tatou tauturu. Ka tauturu katoa ta tatou moni tauturu i te  au mitinari, te au painia takake, te au akaaere kotinga, te aronga angaanga i ko i te opati maata o teianei ao e i ko i te au opati Betela takapini i te ao. Penei te tuku putuputu ra taau putuputuanga i te moni tauturu no te pātu i te au Are Akaputuputuanga e te au Are Uipaanga Patireia no te au taeake i te ngai tukeke o te ao nei.

¹¹ Ka rauka ia tatou katoatoa i te oronga kia tauturu i te angaanga ta te akaaerenga a Iehova e rave nei i teia au rā openga. Te maata anga o te moni oronga ua, kare i kitea e naai te reira. Me tuku tatou i te moni ki roto i te pia akaputuanga o te Are Uipaanga Patireia me kore na runga i te jw.org, kare tatou e akakite ki tetai ke i te maata ta tatou e oronga ra. Inara akapeea me te manako ra koe e meangiti roa taau moni tauturu e oronga ra? Te tika, te maata anga o te moni tauturu tei rauka mai i te akaaerenga, e au apinga aroa rikiriki kare i te mea mamaata. Noatu e meangiti ua te moni a te au taeake, kua aru ratou i te akaraanga o te au Kerititiano mua i Makedonia. E “maata ua rai to ratou putaua,” inara kua pati akatenga kia akatikaia ratou kia oronga ua atu rai.—2 Korinetia 8:1-4.

12. Akapeea te akaaerenga i te taangaanga meitaki anga i te au moni tei orongaia mai?

¹² Kua taangaanga meitaki te Pupu Akaaere tiratiratu e te pakari i te au moni tauturu. (Mataio 24:45) E pure ana ratou kia rave i te au ikianga meitaki, e ka parani meitaki akapeea me taangaanga i te moni. (Luka 14:28) I te tuatau Pipiria, te aronga tiratiratu na ratou e akono ana i te moni tauturu, ka akapapu ratou e kia taangaangaia teia i roto i te akamori anga ia Iehova. Ei akaraanga, kua oki a Ezera ki Ierusalema ma te apinganui tei orongaia mai e te ariki o Peresia, kapiti mai te auro, te ario, e tetai apinganui, tere atu i te $100 mirioni moni Marike i teia rā. Kua manako a Ezera i teia tauturu ei apinga aroa mei ko mai ia Iehova. No reira kua oronga aia i te akakite anga takake kia paruru i te reira e apainaia ra na roto i te au enua kino. (Ezera 8:24-34) I te au mataiti i muri mai, kua koi te apotetoro ko Paulo i te moni ei tauturu i te au taeake i Iudea. Kua akapapu aia ki te aronga e apai ra i te moni kia “akono atea marie anga i te mea tika, eiaa i mua i te aroaro o te Atu anake ra, i mua katoa ra i te aroaro o te tangata.” (E tatau ia 2 Korinetia 8:18-21.) I teia tuatau, te aru nei ta tatou akaaerenga i te akaraanga o Ezera e Paulo e te taangaanga meitaki nei i te au moni tauturu.

13. Eaa ra te akaaerenga i rave ei i te au taui anga i ou akenei?

¹³ Penei ka rave tetai ngutuare tangata i te au taui anga me taangaanga i ta ratou moni kia kore e maata atu te akapou anga i te ka rauka mai. Me kore ka kimi ratou i tetai ravenga no te akamāmā i to ratou oraanga kia rauka i te oronga maata atu kia Iehova. Mei te reira katoa te akaaerenga a Iehova. I ou akenei, e maata te tuanga angaanga ou, e i tetai taime, e maata atu te moni ka pou i te ka rauka mai. No reira ka kimi te akaaerenga, mei tetai ngutuare tangata rai, i te au ravenga kia akarava i te moni e te akamāmā i te angaanga, e rauka ai i te oronga maata atu i ta ratou moni oronga ua.

14-16. (a) Te taangaangaia nei taau moni tauturu kiea? (e) Akapeea teia au angaanga te tauturu anga ia koe uaorai?

¹⁴ E maata te aronga tei tavini ana no tetai au mataiti tei karanga e e maata atu ta ratou  apinga aroa tei rauka i teianei mei te akaaerenga, i to mua ana. Kua rauka ia tatou te jw.org e te JW Broadcasting. Kua uriia ta tatou Pipiria New World Translation of the Holy Scriptures i roto i te au reo e manganui. I te mataiti 2014/2015, kua raveia te uruoaanga Pa Enua “Keep Seeking First God’s Kingdom!” i te au ngai akaputuputuanga mamaata i roto i te 14 oire takapini i teianei ao. Kua mataora tikai te aronga tei tae atu ki reira!

¹⁵ E maata tei akaari i to ratou tu rekareka no te au apinga aroa mei ko mai i ta Iehova akaaerenga. Ei akaraanga, kua tata tetai tokorua e tavini ra i Asia: “E tavini ana maua i roto i tetai oire meangiti. Te ka tupu mai i tetai taime, ka manako maua e kua akatakakeia maua, e e mea māmā ua i te akangaropoina i te maata o ta Iehova angaanga. Inara me akara maua i te au porokaramu tukeke i runga i te JW Broadcasting, ka maara ia maua e e tuanga maua no tetai akataeake anga pa enua. Te mataora tikai nei to matou au taeake e te au tuaine i te JW Broadcasting. Ka akarongo putuputu maua ia ratou me tuatua i muri ake i te akara anga i teia porokaramu, e kua piri vaitata atu ratou ki te Pupu Akaaere. Teianei kua ngakau parau atu ratou i te riro ei tuanga o te akaaerenga a te Atua.”

¹⁶ Takapini i teianei ao, mei te 2,500 Are Uipaanga Patireia te akatuia ra me kore te akaouia ra. Karanga tetai pae i roto i tetai putuputuanga i Honduras e i moemoea ana ratou kia rauka tetai Are Uipaanga Patireia, e kua tupu te reira. Kua tata ratou: “Mataora tikai e tuanga matou no te ngutuare tangata o Iehova i teianei ao e te rekareka nei i to tatou taokotaianga taeake i te ao katoa.” Kua akaari katoa te maata anga i teia tu, te rauka anga ta ratou Pipiria e te au puka ke i to ratou reo, me tauturu te au taeake e te au tuaine ia ratou i muri ake i tetai tumatetenga natura, me kore me kite ratou i te au tupuanga meitaki o te angaanga tutu aere i roto i te oire e ta ratou ngai tutu aere.

17. Akapeea tatou e kite ei e te turu nei a Iehova i tana akaaerenga i teia tuatau?

 ¹⁷ E maata te aronga kare i te Au Kite o Iehova, kare ratou e mārama ana akapeea e rauka ai ia tatou te rave i teia au mea ravarai na roto anake i te au moni oronga ua. Kua atoro atu te pu akatere o te kamupani maata i tetai o to tatou ngai nenei anga puka. Umere tikai aia te kite e te raveia nei teia angaanga pouroa e te aronga tauturu, ma te au moni oronga uaia, e kare roa i akanoonoo ana i tetai kimi anga moni. Karanga aia e ko ta tatou e rave nei kare te reira e rauka i te rave. Ka akatika rai matou! Kite matou e kua tupu teia no te mea te turu ra a Iehova i teia angaanga.—Iobu 42:2.

18. (a) Eaa te au akameitakianga ka rauka mai me oronga ua tatou kia turu i te Patireia? (e) Akapeea tatou me apii i ta tatou tamariki e te aronga ou kia pera katoa?

¹⁸ Kua oronga mai a Iehova i te tikaanga ngateitei e te tuatau kia turu i te angaanga puapinga o te Patireia. Akapapu mai aia e me rave tatou i teia, ka akameitaki mai aia ia tatou. (Malaki 3:10) Taputou mai a Iehova e me oronga puareinga ua tatou, ka meitaki te au mea katoatoa. (E tatau ia Maseli 11:24, 25.) Akakite katoa mai aia e ka mataora tatou i te oronga ua, no te mea “e mea meitaki i te oronga atu i te rave mai.” (Angaanga 20:35) Na roto i ta tatou e tuatua ra e ta tatou ka rave, ka kite mai ta tatou tamariki e te aronga ou akapeea me oronga ua i te moni tauturu no teia angaanga e kia mataora i te au akameitakianga.

19. Akapeea teia atikara i te akamaroiroi anga ia koe?

¹⁹ No ko mai ta tatou au mea ravarai ia Iehova. Me oronga tatou kiaia, te akaari ra tatou e te inangaro tikai ra tatou iaia ma te akaperepere i te au mea pouroa tana i rave no tatou. (1 Paraleipomeno 29:17) Me oronga te ngati Iseraela i te moni no te pātu i te iero, “mareka rava akera te tangata i te mea kua oronga ua ratou; e ma te ngakau meitaki i te oronga ua anga kia Iehova.” (1 Paraleipomeno 29:9) Kia rekareka ua atu rai tatou i te oronga ua kia Iehova no te mea nana rai te reira au apinga.