1, 2. (a) Eaa ta Iehova i tuatua e ka tupu i to tatou tuatau? (e) Eaa te au uianga ka pauia i roto i teia atikara? (Akara i te tutu mua.)

KARANGA a Iehova e i to tatou tuatau, “E opu mai ei nga tangata tino ngauru, no roto i te au reo katoa o te pa enua ra, i te tapa kakau o tetai ngati Iuda ta ratou e opu, ka na ko atu ei, Ka aere katoa tatou: kite akenei oki matou e tei ia kotou te Atua.” (Zekaria 8:23) Te akatutu ra te “ngati Iuda” i te aronga ta te Atua i akatainu ki te vaerua tapu. Kua kapiki katoaia ratou e ko “te Iseraela o te Atua.” (Galatia 6:16) Te akatutu ra te ‘tino ngauru tangata’ i te aronga e manakonakoanga to ratou kia noo i te enua e tuatau ua atu. Kua kite ratou e kua akameitaki a Iehova i teia pupu aronga akatainuia, e e mea ngateitei i te akamori kapiti Iaia ma ratou.

² Mei te peroveta rai ko Zekaria, karanga a Iesu e ka taokotaiia te iti tangata o te Atua. Kua akataka aia i te aronga e tapapa atura kia noo i te rangi ko te “anana iti” e te aronga e tapapa atura kia noo i te enua nei ko te “mamoe ke atu.” Inara karanga a Iesu e, ka riro ratou ei “okotai oki anana” e ka aru iaia ei “okotai oki tiaki” no ratou. (Luka 12:32; Ioane 10:16) I  te mea e e rua nga pupu, penei ka manako tetai pae: (1) Ka anoanoia ainei te mamoe ke atu kia kite i te au ingoa o te aronga pouroa tei akatainuia? (2) Akapeea te aronga akatainuia me manako ia ratou uaorai? (3) Me akamata tetai i roto i taku putuputuanga i te kai i te varaoa e te inu i te wina i ko i te Akamaaraanga, akapeea au me manako iaia? (4) Ka manata ainei au me te maata atura te numero o te aronga e kai ra i te varaoa e te inu ra i te wina i ko i te Akamaaraanga? Ka pauia teia au uianga i roto i teia atikara.

3. No teaa ra kare e papu ia tatou koai ma te 144,000?

³ Ka anoanoia ainei te mamoe ke atu kia kite i te ingoa o te aronga pouroa tei akatainuia e vai nei i te enua i teia rā? Kare. No teaa ra? No te mea kare i papu me ka rauka ta ratou tutaki anga. ^[1] (Akara i te manako poto.) Noatu e kua pati te Atua ia ratou kia aere ki te rangi, ka rauka ta ratou tutaki me vai tiratiratu ratou. Kua kite a Satani i teia, e te taangaanga nei aia i te au “peroveta pikikaa” kia ‘akavare’ ia ratou. (Mataio 24:24) Kare e papu i te au Kerititiano akatainuia e ka rauka ta ratou tutaki, kia akapapu roa mai a Iehova e kua vai tiratiratu rai ratou. Ka oronga mai a Iehova i teia akapapu anga openga, me kore te akairo openga, i mua ake ka mate ei ratou, me kore i mua ua ake ka akamata ai te “mate maata.”​—Apokalupo 2:10; 7:3, 14.

4. I teia ra, me kare e rauka kia kitea te au ingoa o te aronga pouroa tei akatainuia i te enua nei, akapeea tatou te “aere katoa” anga ma ratou?

⁴ I teia ra, me kare e kitea te ingoa o te aronga pouroa tei akatainuia i te enua nei, akapeea i reira te mamoe ke atu i te “aere katoa” anga ma ratou? Te karanga ra te Pipiria e “e opu mai ei nga tangata tino ngauru, no roto i te au reo katoa o te pa enua ra, i te tapa kakau o tetai ngati Iuda ta ratou e opu, ka na ko atu ei, Ka aere katoa tatou: kite akenei oki matou e tei ia kotou te Atua.” Te taiku ra te irava i tetai ngati Iuda. Inara me karangaia e ko “kotou,” te akakite ra e tere atu i te okotai tangata. Tera te aiteanga, kare tetai ngati Iuda i te okotai tangata mari ra te akatutu ra i te katoa anga o te pupu aronga akatainuia. Kua kite te mamoe ke atu i teia, e te tavini kapiti ra ratou ia Iehova. Kare ratou e anoanoia kia kite i te ingoa o te au mema pouroa o te reira pupu me kore kia aru ia ratou tataki tai. Ko Iesu to tatou Arataki, e te akakite maira te Pipiria, kia aru tatou iaia anake.​—Mataio 23:10.

5. Eaa te akamatakiteanga kia manako meitaki te aronga akatainuia, e no teaa ra?

⁵ Kia akamanako meitaki te aronga akatainuia i te akamatakiteanga i roto ia 1 Korinetia 11:27-29. (E tatau.) Akapeea tetai tei akatainuia te kai anga i te varaoa e te inu i te wina “ma te tau kore” i ko i te Akamaaraanga? Me kare aia e vai tiratiratu, e kia akono i tetai pirianga meitaki kia  Iehova, me kai te reira tangata i te varaoa e te inu i te wina, kare aia e akangateitei ana ia Iehova. (Ebera 6:4-6; 10:26-29) Te akamatakite maira teia i te aronga akatainuia kia vai tiratiratu me ka inangaro ratou kia rauka “te tutaki i ta te Atua ra kapiki anga no runga maira i te Mesia nei ia Iesu.”​—Philipi 3:13-16.

6. Akapeea te au Kerititiano akatainuia te manako anga ia ratou uaorai?

⁶ Kua akakite a Paulo ki te au Kerititiano akatainuia: “E TEIANEI te ako atu nei au, te tangata i tapekaia nei i te Atu, kia kotou, kia tau to kotou aerenga i te kapikianga i kapikiia mai ei kotou na.” Akapeea ratou me rave i teia? Akamārama a Paulo e: “Ma te ngakau akaaka roa, e te maru, ma te akakoromaki, i te tauturu anga atu tetai i tetai ma te aroa; Ma te matakite tikai oki kia vai rai te taokotaianga a te Vaerua ra i te ruru o te au.” (Ephesia 4:1-3) E tauturu ana te vaerua tapu o Iehova i tona au tavini kia akaaka, kare kia ngakau parau. (Kolosa 3:12) No reira kare te aronga akatainuia e manako ana e e meitaki atu ratou i tetai atu. Kua kite ratou e kare a Iehova e oronga ana kia maata atu tona vaerua tapu ki te aronga akatainuia i to te au tavini ke atu. E kare katoa ratou e manako ana e e maata atu to ratou mārama i te au tuatua mou Pipiria i to tetai atu. Kare katoa ratou e akakite ki tetai atu e kua akatainuia ratou e ka tau ratou kia kai i te varaoa e te inu i te wina i ko i te Akamaaraanga. Mari ra, e tu akaaka to ratou te kite anga e na Iehova anake e iki i te tangata kia aere ki te rangi.

7, 8. Eaa ta te au Kerititiano akatainuia kare e tapapa atu, e no teaa ra?

⁷ Noatu e te manako ra te aronga akatainuia e e mea ngateitei kia patiia kia aere ki te rangi, kare ratou e tapapa atu i tetai ke kia akono ia ratou ma te tu takake. (Ephesia 1:18, 19; e tatau ia Philipi 2:2, 3.) Kua kite katoa ratou e me akatainu a Iehova ia ratou, kare aia i akakite i te reira ki te katoatoa. No reira kare te tangata tei akatainuia e poitirere me kare tetai pae e irinaki ana e kua akatainuia aia. Kua kite aia i ta te Pipiria i akakite, e auraka tatou e viviki i te irinaki i tei karanga mai e kua oronga mai te Atua i tetai apainga takake kiaia. (Apokalupo 2:2) No te mea kare tei akatainuia e tapapa atu i tetai pae kia akamanako maata mai iaia, kare aia e akakite ki tetai ua atu tangata tana ka aravei e kua akatainuia aia. Tika anga, kare aia e taiku i teia ki tetai ua atu. Kare katoa aia e akapaapaa i te au mea umere tana ka rave i te rangi.​—1 Korinetia 1:28, 29; e tatau ia 1 Korinetia 4:6-8.

⁸ Kare te au Kerititiano akatainuia e manako e kia akapou ratou i to ratou taime kia ratou uaorai, mei te mea e e au mema ratou no tetai pupu takake. Kare ratou e kimi i te aronga akatainuia kia tuatua atu no runga i to ratou turanga akatainuia e kia apii kapiti i te Pipiria ei pupu. (Galatia 1:15-17) Kare te putuputuanga e taokotaiia me rave te aronga akatainuia i teia. Te akataka ke ra ratou ia ratou mei te vaerua tapu, tei tauturu i te iti tangata o te Atua kia rauka te au e te tu taokotai.​—E tatau ia Roma 16:17, 18.

9. No teaa ra koe ka matakite ei i taau akono anga i te aronga e kai ra i te varaoa e te inu i te wina i ko i te Akamaaraanga? (Akara i te pia “ ‘Kare [te Aroa] e Rave i te Mea Tau Kore.’”)

⁹ Akapeea koe me akono atu i te au taeake e te au tuaine akatainuia? Kua akakite a Iesu ki tana au pipi: “E taeake anake oki kotou  katoa.” Karanga katoa aia: “Te akateitei iaia uaorai, e akamoraroia ïa; e te akamoraro iaia uaorai, e akateiteiia ïa.” (Mataio 23:8-12) No reira e mea tarevake kia akamanako maata i tetai tangata, noatu e e taeake akatainuia aia no Karaiti. Me tuatua te Pipiria no runga i te aronga pakari, te akamaroiroi ra te reira ia tatou kia aru i to ratou akarongo, inara kare te reira e akakite mai kia tatou kia akariro i tetai ua atu tangata ei pu arataki no tatou. (Ebera 13:7) E tika te karanga ra te Pipiria e “kia maata atu ïa i te akateitei atu” i tetai pae. Inara no te mea te “arataki meitaki ra” ratou e te “maata atura i tei angaanga i te ako e te apii,” kare no te mea e kua akatainuia ratou. (1 Timoteo 5:17) Me akapaapaa maata roa tatou i te aronga akatainuia, ka taakama tatou ia ratou. Tei kino roa atu, ka akatupu tatou ia ratou kia ngakau parau. (Roma 12:3) Kare tatou e inangaro i te akatupu i tetai mea kia rave te au taeake o Karaiti i tetai tarevake kino!​—Luka 17:2.

10. Akapeea koe me akaari e te akangateitei ra koe i te au Kerititiano akatainuia?

¹⁰ Akapeea tatou te akaari anga e te akangateitei ra tatou i te aronga tei akatainuia e Iehova? Kare tatou e ui atu e i akapeea ratou te akatainu angaia? Ko ratou rai i kite i teia mea, kare o tatou tika anga kia kite i te reira. (1 Tesalonia 4:11; 2 Tesalonia 3:11) Kare katoa tatou e manako e kua akatainu katoaia ta ratou tane me kore vaine, te nga metua, me kore tetai mema o te kopu tangata. Kare te manakonakoanga o tetai tangata e rauka mei ko mai i tona kopu tangata. (1 Tesalonia 2:12) Kare katoa tatou e ui i te au uianga te ka akamamae i etai ke. Ei akaraanga, kare tatou e ui ki te vaine a tetai taeake akatainuia, i tona manako no te nooanga i te enua nei e tuatau ua atu ma te kore tana tane. Mei tera te tu, kua papu meitaki ia tatou e, e na Iehova e ‘akamerengo i te kaki o te au mea ora katoa’ i roto i te ao ou.​—Salamo 145:16.

11. Akapeea te kopae anga i “te akarekareka anga i te tangata” ei paruru ia tatou uaorai?

¹¹ Me kare tatou e akono i te aronga akatainuia ei aronga puapinga maata atu i tetai ke, te paruru katoa ra tatou ia tatou uaorai. Akapeea ra? Te akakite maira te Pipiria kia tatou e, penei “e aronga taeake pikikaa” tetai i roto i te putuputuanga te ka karanga e ko ratou tetai tei akatainuia. (Galatia 2:4, 5; 1 Ioane 2:19) Pera katoa, penei kare tetai aronga akatainuia e vai tiratiratu. (Mataio 25:10-12; 2 Petero 2:20, 21) Inara me kopae tatou i “te akarekareka anga i te tangata,” kare tatou e aru i tetai ua atu, te aronga tei akatainuia, te aronga rongonui, me kore te aronga tei tavini ia Iehova no tetai tuatau roa. I reira, me kare ratou e vai tiratiratu e me akaruke ratou i te putuputuanga, ka vai rai to tatou akarongo ki roto ia Iehova e ka tavini ua atu rai Iaia.​—Iuda 16.

12, 13. No teaa ra tatou ka kore ei e manata atu i te numero o te aronga tei kai i te varaoa e te inu i te wina i ko i te Akamaaraanga?

¹² No tetai tuatau roa, kua meangiti mai te numero o te aronga tei kai i te varaoa e te inu i te wina i ko i te Akamaaraanga. Inara i teianei, te aere ua atura te numero ki runga i te au mataiti tataki tai. Ka manata ainei tatou i teia? Kare. Ka akara tatou e no teaa ra.

 ¹³ “Kua kite te Atu [ko Iehova] i tona uaorai.” (2 Timoteo 2:19) Kua kite a Iehova, kare ra te au taeake e tare ra i te au tangata e kai ra i te varaoa e te inu i te wina i ko i te Akamaaraanga i kite tikai koai ma tei akatainuia. No reira te kapiti maira i roto i teia tare anga, te aronga tei manako e kua akatainuia ratou, inara kare ko ratou tetai. Ei akaraanga, tetai pae kua kai ana i te varaoa e te inu i te wina, kua akamutu ratou i te rave i te reira. Penei e maki manako me kore e maki manako ngakau to tetai pae e te irinaki ra e ka tutara kapiti ratou ma Karaiti i te rangi. Te taka ua ra, kare i papu tikai ia tatou eia aronga akatainuia e noo nei rai i te enua.

14. Eaa ta te Pipiria e akakite maira no runga i te numero o te aronga akatainuia i te enua nei me akamata te mate maata?

¹⁴ Ka vai rai te aronga akatainuia i te au ngai ravarai o te enua nei me aere mai a Iesu i te apai ia ratou ki te rangi. Te karanga ra te Pipiria “e nana [na Iesu] e akaunga i tana au angela ma te pu tangi maata ra, e na ratou e akaputuputu i tona aronga ikiia ra, no nga rua matangi e a katoa, no tetai pae rangi, e tae ua atu ki tetai pae.” (Mataio 24:31) I te tuatau openga te akaari katoa maira te Pipiria e e toenga ua te aronga akatainuia ka vai rai i te enua nei. (Apokalupo 12:17) Inara kare te reira i akakite mai e tokoia ratou i te enua nei me akamata te mate maata.

15, 16. Eaa te anoanoia ra kia mārama tatou no runga i te 144,000 tei ikiia e Iehova?

¹⁵ Na Iehova e akapapu mai e aea aia e iki ei i te aronga akatainuia. (Roma 8:28-30) Kua akamata a Iehova i te iki i te aronga akatainuia i muri ake i to Iesu tuakaouanga.  I te anere mataiti mua, kua manakoia e kua akatainuia te au Kerititiano mou katoatoa. No tetai anere tuma mataiti i muri mai, te maata anga o te aronga tei karanga e e au Kerititiano ratou, kare ratou i aru tikai ana ia Karaiti. Noatu rai, kua akatainu ua a Iehova i te au Kerititiano mou tikai i taua tuatau ra. Kua aite ratou mei te sitona ta Iesu i karanga e ka tupu i rotopu i te au zizania. (Mataio 13:24-30) I teia tuatau openga, kua rave ua atu a Iehova i te iki i te tangata ei tuanga no te 144,000. ^[2] (Akara i te manako poto.) No reira me iki te Atua i tetai o teia aronga i mua ake ka ope ei te tuatau openga, papu rava e te rave ra aia i te mea tau. (Isaia 45:9; Daniela 4:35; e tatau ia Roma 9:11, 16.) ^[3] (Akara i te manako poto.) Kia matakite, auraka tatou kia riro mei te aronga angaanga tei urutoe i te tangata kainga, tei akono i te aronga tei angaanga okotai ua ora.​—E tatau ia Mataio 20:8-15.

¹⁶ Kare te katoa anga o te aronga e manakonakoanga to ratou no te rangi kia riro ko “te tavini akono meitaki e te pakari.” (Mataio 24:45-47) Mei te anere mataiti mua rai, kua taangaanga a Iehova raua ko Iesu e tokoiti ua tangata i teia tuatau kia angai e te apii i te manganui. Kua taangaangaia e tokoiti ua au Kerititiano akatainuia i te anere mataiti mua kia tata i te au Tuatua Tapu Ereni Kerititiano. I teia rā, e tokoiti ua au Kerititiano akatainuia, na ratou te apainga kia oronga i ‘te kai i te ora mou’ ki te iti tangata o te Atua.

17. Eaa taau i apii mai mei teia atikara?

¹⁷ Eaa ta tatou i apii mai mei teia atikara? Kua oronga a Iehova i te oraanga mutu kore i te enua nei ki te maata anga o tona iti tangata e te oraanga i te rangi no te aronga te ka tutara kapiti ma Iesu. Ka tutaki a Iehova i tona au tavini katoatoa, “tetai ngati Iuda” e te “nga tangata tino ngauru,” e te umuumu maira aia i te katoatoa kia aru i tana au ture e kia vai tiratiratu. Kia tu akaaka te katoatoa. Kia tavini kapiti te katoatoa Iaia ma te rotai. E kia tauta te katoatoa i te akatupu i te au i roto i te putuputuanga. Ia tatou e vaitata atura ki te openga, kia tavini tamou ua rai tatou ia Iehova e kia aru ia Karaiti ei anana okotai.