1-3. Eaa te au tupuanga tei akariro ia Penetekote ei rā puapinga, e akapeea teia te akatupu anga i ta te au Tuatua Tapu i akakite? (Akara i te tutu mua.)

E POPONGI Tapati teia i Ierusalema. E rā meitaki e te rekareka. Te akamaara ra te tangata i te Penetekote, e oroa tapu ïa i te akamataanga o te tuatau mou sitona. I te reira popongi i roto i te iero, te oronga ra te taunga maata i te au atinga matauia. I reira, mei te ora iva, kua oronga aia e rua varaoa akaopue tei maaniia ki te sitona mua, me kore te au popo mua o te mou. Kua rūrū te taunga maata i nga varaoa mei tetai tua ki tetai no te oronga kia Iehova. Ko te Penetekote teia i te mataiti 33.​—Levitiku 23:15-20.

² I te au mataiti ravarai, no tetai anere tuma mataiti, kua rave te taunga maata i teia atinga rūrū. Te piri vaitata ra te atinga ki tetai apinga puapinga maata tei tupu ia Penetekote mataiti 33. E kua tupu teia ki te 120 pipi a Iesu te pure kapiti  anga i te pia i runga i Ierusalema. (Angaanga 1:13-15) E varu anere mataiti i mua atu, kua tata te peroveta ko Ioela no runga i tei tupu. (Ioela 2:28-32; Angaanga 2:16-21) Eaa te mea puapinga maata tei tupu?

³ E tatau ia Angaanga 2:2-4. Ia Penetekote mataiti 33, kua oronga te Atua i tona vaerua tapu ki taua au Kerititiano ra, e kua akatainu ia ratou. (Angaanga 1:8) I reira, kua akamata te urupu tangata i te akaputuputu mai takapini ia ratou, e kua akamata te au pipi i te tuatua i te au mea umere ta ratou i kite e i rongo ana. Kua akamārama te apotetoro ko Petero i tei tupu e no teaa i puapinga roa ai te reira. I reira, kua akakite aia ki te urupu: “E tataraara, e kia bapetizoia, kotou ravarai, i roto i te ingoa o Iesu Mesia, kia matara te ara; e ka orongaia mai ïa te Vaerua Tapu kia kotou.” I te reira rā, e 3,000 tangata tei papetitoia, e kua tō katoaia ratou e te vaerua tapu.​—Angaanga 2:37, 38, 41.

4. (a) No teaa ra tatou ka inangaro ei i te kite eaa tei tupu i Penetekote? (e) Eaa tetai atu tupuanga puapinga tei tupu i taua rā rai i te au mataiti i mua atu? (Akara i te manako poto.)

⁴ Eaa te akatutu ra i te taunga maata e te atinga tana i oronga i te au Penetekote ravarai? Te akatutu ra te taunga maata ia Iesu. Te akatutu ra te varaoa i te au pipi akatainuia a Iesu. Kua ikiia taua au pipi ra mei roto mai i te au tangata ara ua tei kapikiia ko “te popo mua.” (Iakobo 1:18) Kua āriki te Atua ia ratou ei tamariki nana e kua iki kia tutara ei au ariki ma Iesu katoa i te rangi ei tuanga no te Patireia o te Atua. (1 Petero 2:9) Ka taangaanga a Iehova i tona Patireia ei akameitaki i te aronga akarongo katoatoa. No reira me ko te rangi to tatou kainga ma Iesu katoa me kore i te enua parataito, e mea puapinga rava te Penetekote o te mataiti 33 kia tatou. ^[1]​—Akara i te manako poto.

5. Akapeea tatou e kite ei e kare i aiteite te akatainuanga o te katoa anga o te aronga akatainuia?

⁵ Kare rava te au pipi i roto i te pia i runga e ngaropoina i te reira rā. Kua tō ki runga i to ratou upoko te akaraanga mei te aʼi rai. Kua oronga a Iehova i te ravenga kia kite ratou i te tuatua i te au reo ke. Kare ratou e ekoko kua akatainuia ratou ki te vaerua tapu. (Angaanga 2:6-12) Inara kare teia au mea umere e tupu ana ki te au Kerititiano pouroa me akatainuia ratou. Ei akaraanga, kare te Pipiria e karanga ra e kua tō tetai apinga mei te aʼi rai ki runga i te upoko o te tauatini tangata i Ierusalema tei akatainuia i muri mai i te reira rā. Kua akatainuia ratou i to ratou papetitoia anga. (Angaanga 2:38) Pera katoa, kare te katoa anga o te au Kerititiano i akatainuia i te taime i papetitoia ai ratou. Kua akatainuia to Samaria i muri ake i to ratou papetito anga. (Angaanga 8:14-17) Pera katoa i roto i tetai tupu anga tuke, kua akatainuia a Korenelio e tona ngutuare tangata i mua ake ka papetitoia ai ratou.​—Angaanga 10:44-48.

6. Eaa te ka orongaia ki te aronga akatainu katoatoa, e akapeea teia i te akakeu anga ia ratou?

⁶ Te taka meitaki ra, e tukeke te au mataara te kite ra te au Kerititiano e kua akatainuia ratou. Penei kua kite viviki tetai pae e kua akatainu a Iehova ia ratou. E tetai pae kua kite ratou no tetai tuatau roa. Inara kua akamārama te apotetoro ko Paulo eaa  te ka tupu kia ratou tataki tai. Karanga aia: “E kotou katoa i akarongo, i akairoiaʼi kotou e ia, i te Vaerua Tapu i tuatuaia maira, Ko te akakite ïa o ta tatou tuanga.” (Ephesia 1:13, 14) No reira kua taangaanga a Iehova i tona vaerua tapu kia papu meitaki i teia au Kerititiano e kua ikiia ratou no te rangi. Na teia tu, “ko te akakite ïa” o te vaerua tapu, me kore e akapapu anga kia ratou e i te tuatau ki mua ka noo ratou i te rangi kare i te enua nei.​—E tatau ia 2 Korinetia 1:21, 22; 5:5.

7. Eaa ta tetai Kerititiano akatainuia ka rave kia rauka tana tutaki anga i te rangi?

⁷ Me akatainuia tetai Kerititiano, ko te aiteanga ainei e ka papu tana tutaki anga? Kare. Kua papu iaia e kua patiia aia kia aere ki te rangi. Inara ka rauka anake tana tutaki me vai tiratiratu aia kia Iehova. Kua akamārama a Petero na teia tu: “E teianei, e aku au taeake, ka akamaroiroi, kia kitea tikaia to kotou kapiki angaia e te iki angaia; kia pera oki kotou, kare ua ïa e inga: Ka oronga uaia mai oki te o no kotou ki roto i te basileia mutu kore o to tatou Atu o Iesu Mesia to tatou Ora ra.” (2 Petero 1:10, 11) No reira auraka te Kerititiano akatainu tataki tai e tāpu iaia uaorai mei te tavini anga ia Iehova. Noatu e kua patiia aia me kore kua kapikiia, kia aere ki te rangi, me kare aia e vai tiratiratu, kare e rauka tana tutaki anga.​—Ebera 3:1; Apokalupo 2:10.

8, 9. (a) No teaa ra i ngata ai no te maata anga o te tangata kia mārama eaa te tupu ana ki tetai me akatainuia? (e) Akapeea tetai tangata te kite anga e kua patiia aia kia aere ki te rangi?

⁸ Penei ka ngata i te maata anga o te au tavini o te Atua i teia rā i te mārama eaa te tupu ana ki tetai tangata me akatainu te Atua iaia. E mea matauia teia, no te mea kare ratou uaorai i akatainuia. Kua anga te Atua i te tangata kia noo i te enua e tuatau ua atu, kare i te rangi. (Genese 1:28; Salamo 37:29) Inara kua iki a Iehova i tetai pae ei au ariki e te kau taunga i te rangi. No reira me akatainu aia ia ratou, ka taui to ratou manakonako anga e ta ratou ka manako, e raukaʼi ia ratou i te akara ki mua ki te oraanga i te rangi.​—E tatau ia Ephesia 1:18.

⁹ Inara akapeea tetai tane me kore vaine te kite anga kua patiia aia kia aere ki te rangi? Ka akara ana i ta Paulo i tuatua ki te au taeake akatainuia i Roma, tei “akonoia ei aronga tapu.” Akakite aia kia ratou: “Kare oki te vaerua tuikaa tei rauka ia kotou kia mataku akaou; ko te Vaerua akatamariki ra tei rauka ia kotou, i karangaʼi oki tatou e, E Aba, e taku Metua. Ko te Vaerua uaorai oki, e to tatou katoa nei oki vaerua, tei akakite ïa e, e tamariki tatou na te Atua.” (Roma 1:7; 8:15, 16) Na roto i tona vaerua tapu, te akataka meitaki ra te Atua ki tetai tane me kore vaine e kua patiia aia kia tutara ei ariki i te rangi ma Iesu katoa.​—1 Tesalonia 2:12.

10. Eaa te aiteanga o ta 1 Ioane 2:27 e tuatua ra e kare te Kerititiano akatainuia e anoano i tetai ke kia apii iaia?

 ¹⁰ Ki te aronga tei rauka te pati anga mei ko mai i te Atua kare e anoanoia tetai ke kia akakite kia ratou e kua akatainuia ratou. Na Iehova e akapapu kia ratou. Akakite te apotetoro ko Ioane ki te au Kerititiano akatainuia: “E akatainuanga tei rauka ia kotou, no ko mai i te Vaerua Tapu; e kua kite kotou i te au mea katoa ra.” Karanga katoa aia e: “Kareka kotou, ko taua akatainu i rauka ia kotou iaia ra, te vai ra ïa ki roto ia kotou, eiaa atu kotou e apiiia mai e etai ke: mei ta taua akatainu ra e apii mai ia kotou i te au mea ravarai, e e mea mou oki te reira, kare i te pikikaa, mei te reira i apii mai ia kotou na, ka topiri atu rai kotou iaia.” (1 Ioane 2:20, 27) Ka anoanoia te au Kerititiano akatainu kia apiiia e Iehova mei te katoatoa. Inara kare ratou e anoano i tetai uatu kia akapapu e kua akatainuia ratou. Kua taangaanga a Iehova i te mana ririnui roa atu, koia tona vaerua tapu, kia akataka meitaki kia ratou e kua akatainuia ratou!

11, 12. Eaa ta tetai Kerititiano akatainuia penei ka manako, inara eaa tana kare rava e ekoko?

¹¹ Me akatainuia te au Kerititiano ki te vaerua tapu, ka taui takiri ratou. Te tika, karanga a Iesu e kua “anau akaou” ratou, me kore kua anau “mei runga mai.” (Ioane 3:3, 5; tataanga rikiriki i te pae) I reira kua akamārama aia: “Eiaa koe e poitirere ua, ko au i karanga atu kia koe e, Kia anau akaou kotou e tikaʼi. Te arara ua nei te matangi i tana ngai e anoano ra, te kite ra koe i tona aruru, kare ra koe i kite i te ngai no reira mai aia ra, e te ngai e aereia atu e ia ra: koia tika oki te tangata katoa ta te Vaerua e anau ra.” (Ioane 3:7, 8) Te taka meitaki ra, kare e rauka i te akamārama tikai ki tetai tangata kare i akatainuia mei teaa rai te tu me akatainuia. ^[2]—Akara i te manako poto.

¹² Penei ka manako tetai tei akatainuia e, ‘No teaa ra a Iehova i iki ei iaku e kare i tetai ke?’ Penei ka manako katoa aia me kua tau aia no teia apainga. Inara kare aia e ekoko e na Iehova aia i iki. Mari ra, e mataora tikai tona e te rekareka maata i teia apinga aroa. Te aiteite ra te manako o te aronga akatainuia ki to Petero i tona karanga anga: “Kia akameitakiia te Atua te Metua o to tatou Atu ra o Iesu Mesia, ko te akaanau akaou ia tatou no te maata o tona aroa, kia rauka te manako ora i te tuakaouanga o Iesu Mesia mei te mate maira, Kia rauka te tuanga kino kore, e te viivii kore, e te mae kore, ko tei vaioia ki runga i te rangi na kotou.” (1 Petero 1:3, 4) Me tatau te aronga akatainuia i teia au tuatua, kare e ekoko kua kite ratou e te tuatua tika maira to ratou Metua kia ratou.

13. Akapeea te tu manako o tetai tangata te taui anga me akatainuia aia ki te vaerua tapu, e na teaa e akatupu i teia taui anga?

¹³ I mua ake ka pati mai ei a Iehova i teia au Kerititiano kia aere ki te rangi, e manakonakoanga to ratou kia noo i te enua e tuatau ua atu. Kua akara atu ratou ki te  tuatau e akariro ei a Iehova i te enua ei parataito e te takore atu i te kino katoatoa. Penei kua akamanako ratou ia ratou uaorai e turou maira i tetai oa me kore tetai o te kopu tangata tei mate. E kua akara ratou ki mua i te tuatau ka akatu i tetai are ma te noo i reira e te tanuanga i te rakau e te ua rakau ei kai na ratou. (Isaia 65:21-23) No teaa ra ratou i akamata ai i te manako tuke? Kua taui ainei ratou no te mea kua taitaia me kore kua mamae maata ratou? Kua manako viviki ainei ratou e e maromaroa te noo i te enua e tuatau ua atu e kare ratou e mataora i reira? Me kore ra kua inangaro ainei ratou i te kite mei teaa te tu i te noo i te rangi? Kare. Mari ra, na te Atua i iki i teia no ratou. Me pati aia ia ratou, ka taangaanga aia i tona vaerua tapu ei taui i to ratou tu manako e ta ratou tutaki ka tapapa atu.

14. Eaa te manako o te aronga akatainuia no runga i to ratou oraanga i te enua nei?

¹⁴ Ko te aiteanga ainei e ka inangaro te aronga akatainuia i te mate? Kua akataka a Paulo i te manako o te aronga akatainuia. Kua akaaite aia i to ratou kopapa tangata ki te “puakapa” i te na ko anga: “Tatou ra e noo i roto i teianei puakapa, te ngunguru nei ïa i te teiaa, kare ra no te mea te anoano nei tatou kia noo taaka ua, kia akakakauia ra, kia apuku uaia te mea mate ua nei e te ora.” (2 Korinetia 5:4) Kare teia au Kerititiano e inangaro i te mate. Te rekareka nei ratou i te oraanga e te inangaro ra i te tavini ia Iehova i te au rā ravarai ma to ratou kopu tangata e te au oa. Noatu eaa ta ratou e rave ra, kua maara ia ratou eaa ta te Atua i taputou kia ratou no te tuatau ki mua.​—1 Korinetia 15:53; 2 Petero 1:4; 1 Ioane 3:2, 3; Apokalupo 20:6.

15. Eaa te mea kare e akapapu ana kua akatainuia tetai tangata ki te vaerua tapu?

¹⁵ Penei te manako ra koe me kua pati a Iehova ia koe kia aere ki te rangi. Me te manako ra koe kua pera aia, e akamanako i teia au uianga puapinga: Te manako ainei koe e maroiroi tikai toou i te tutu aere? Te rekareka ra ainei koe i te apii i te Pipiria e “te au mea oonu rai o te Atua”? (1 Korinetia 2:10) Te manako ra ainei koe e kua oronga mai a Iehova i te au tupuanga meitaki i taau angaanga tutu aere? Te inangaro ra ainei koe i te rave i ta Iehova i inangaro kia maata atu i tetai ua atu apinga? E inangaro oonu ainei toou i tetai ke ma te apainga maata kia tauturu ia ratou te tavini ia Iehova? I kite ana ainei koe i te akapapu anga e kua tauturu a Iehova ia koe na te au mataara takake i toou oraanga? Me ka pau koe ae ki teia au uianga katoatoa, ko te aiteanga ainei kua patiia koe kia aere ki te rangi? Kare. No teaa ra? No te mea te kite ra te au tavini pouroa o te Atua i teia tu, noatu me kua akatainuia ratou e me kare. E na roto i tona vaerua tapu, ka rauka ia Iehova i te oronga i taua ririnui ra ki tetai ua atu o tona au tavini, noatu eaa ta ratou tutaki. Te tika, me te manako ra koe me ka aere koe ki te rangi, te aiteanga i reira kare koe i patiia. Kare te aronga tei ikiia e Iehova e akamanako i teia! Kua kite ua ratou!

16. Akapeea tatou e kite ei kare te katoa anga tei rauka te vaerua o te Atua i patiia kia aere ki te rangi?

¹⁶ I roto i te Pipiria, e manganui te au akaraanga o te aronga tiratiratu tei rauka te vaerua tapu o Iehova inara kare i aere ki te rangi. E tai akaraanga ko Ioane Bapetizo.  Karanga a Iesu kare e tangata tei maata atu ia Ioane, inara karanga katoa aia kare a Ioane e tutara ei ariki i te rangi. (Mataio 11:10, 11) Kua arataki katoaia a Davida e te vaerua tapu. (1 Samuela 16:13) Kua tauturu te vaerua tapu iaia kia mārama i te au mea oonu no runga ia Iehova e kua arataki katoa iaia kia tata i tetai tuanga o te Pipiria. (Mareko 12:36) Noatu rai, karanga te apotetoro ko Petero e, “Kare oki a Davida i tae ki runga i te rangi.” (Angaanga 2:34) Kua taangaanga a Iehova i tona vaerua tapu kia akamana i teia aronga kia rave i te au mea umere, kare ra aia i taangaanga i te reira kia pati ia ratou kia noo i te rangi. Ko te aiteanga ainei kare ratou i tiratiratu roa ana me kore i tau meitaki te tutara i te rangi? Kare. Tera te aiteanga ka akaora mai a Iehova ia ratou ki roto i te Parataito i te enua nei.​—Ioane 5:28, 29; Angaanga 24:15.

17, 18. (a) Eaa te tutaki ta te maata anga o te au tavini o te Atua e tapapa atura i teia rā? (e) Eaa te au uianga ta tatou ka uriuri i te atikara ka aru mai?

¹⁷ I teia rā, kare te maata anga o te au tavini o te Atua e aere ki te rangi. Mei ia Aberahama, Davida, Ioane Bapetizo, e te aronga e manganui i te au tuatau Pipiria, te tapapa nei ratou kia noo i te enua me tutara te kavamani a te Atua ki rungao ia ratou. (Ebera 11:10) E 144,000 te ka tutara i te rangi ma Iesu katoa. Inara te tuatua ra te Pipiria no “te toenga” o te aronga akatainuia te vaira rai i te enua nei i teia tuatau openga. (Apokalupo 12:17) No reira kua mate takere te maata anga o te 144,000 e te noo ra i te rangi.

¹⁸ Inara me karanga mai tetai e kua akatainuia aia, akapeea te aronga e manakonakoanga to ratou no te enua i te ariu anga atu? Me akamata tetai tangata i roto i taau putuputuanga i te kai i te varaoa e te inu i te wina i ko i te Akamaaraanga, akapeea koe me manako atu iaia? E akapeea ra me tupu ua atu te numero o te aronga te karanga ra kua akatainuia ratou? Ka manata atu ainei koe i te reira? Ka pau tatou i teia au uianga i roto i te atikara ka aru mai.