Angaanga Kapiti Anga ki te Atua Ma te Rekareka
“E teianei, te ako katoa atu nei matou te rave angaanga kapiti nei, ia kotou, e auraka kotou e āriki puapinga kore ua i te aroa ua o te Atua ra.”—2 KORINETIA 6:1.
1. Noatu e ko Iehova te Atua Teitei Rava Atu, eaa tana i pati ki tetai ua atu kia rave?
KO IEHOVA te Atua Teitei Rava Atu. Nana i anga i te au mea ravarai, e kare i kotingaia tona pakari e te mana. Te mārama anga a Iobu i teia, kua tuatua aia kia Iehova: “Kua kite au e, e tika ia koe te au mea katoatoa, e kare taau i manako ra e tika kia akakore.” (Iobu 42:2) Ka rauka ia Iehova i te rave i tetai ua atu angaanga ma te kore e inangaro tauturu. Inara kua akaari mai aia i te tu aroa na te patianga i tetai ua atu kia angaanga kapiti kiaia i te akatupuanga i tana i akakoro.
2. Eaa te angaanga puapinga ta Iehova i pati ia Iesu kia rave?
2 Kua anga te Atua i tana Tamaiti ia Iesu i mua ake i te tangata e te au mea ravarai. No teia, kua akatika a Iehova i tana Tamaiti kia tauturu iaia i te anga i te au mea ravarai. (Ioane 1:1-3, 18) Kua tata te apotetoro ko Paulo no runga ia Iesu: “E nana oki i anga i te apinga tini ravarai nei, ko to te rangi, e to te enua nei, ko tei akaraia nei e te kore e akaraia, te au terono, e te aronga tutara, te ui ariki, e te aronga mana, nana ïa i anga, e nona anake: Ko mua rai aia i te au mea ravarai nei, koia oki tei mou i te au mea katoa nei.” (Kolosa 1:15-17) No reira kare a Iehova i oronga ua i tetai angaanga puapinga ki tana Tamaiti, mari ra kua akakite katoa aia i te reira ki te katoatoa. E tu ngateitei tikai teia!
3. Eaa ta Iehova i pati kia Adamu kia rave, e no teaa ra?
3 Kua pati katoa a Iehova i te tangata kia angaanga kapiti kiaia. Ei akaraanga, kua akatika Aia ia Adamu kia tapa i te ingoa o te au manu. (Genese 2:19, 20) Akamanako ana i to Adamu rekareka i te rave anga i teia angaanga! Kua akara meitaki aia i te tu o te au manu e ta ratou e rave ana, e oti, iki aia i to ratou ingoa. Kua anga a Iehova i te au manu katoatoa, e ka rauka rai iaia i te tapa i to ratou ingoa. Inara, no tona inangaro ia Adamu, kua tuku aia e nana e tapa i te ingoa o te au manu. Kua oronga katoa te Atua i te au angaanga kia Adamu kia akariro i te enua ei parataito. (Genese 1:27, 28) Inara, kua iki a Adamu i te akamutu i te angaanga kapiti ki te Atua, e i te openga, kua tupu te mamae maata kiaia e tana uanga katoatoa.—Genese 3:17-19, 23.
4. Akapeea tetai aronga i te angaanga kapiti anga ki te Atua i te akatupu anga i tona anoano?
4 I muri mai, kua pati te Atua i tetai aronga ke atu kia angaanga kapiti kiaia. Kua akatu a Noa i tetai araka tei akaora iaia e tona ngutuare tangata mei te Vaipuke. Kua akaora a Mose i te ngati Iseraela mei to Aiphiti mai. Kua arataki a Iosua i te ngati Iseraela ki roto i te Enua Taputouia. Kua akatu a Solomona i te iero i Ierusalema. Kua riro mai a Maria ei metua vaine no Iesu. Kua angaanga kapiti teia aronga tiratiratu kia Iehova i te akatupu i tona anoano.
5. Eaa te angaanga ka rauka ia tatou i te rave, e kua anoano ainei a Iehova kia rave tatou i te reira angaanga? (Akara i te tutu mua.)
5 I teia tuatau, te pati mai nei a Iehova ia tatou kia rave i ta tatou ka rauka i te turuturu i tona Patireia. E maata te au mataara ka rauka ia tatou te tavini i te Atua. Noatu e kare e aiteite ana te tu e tavini ana tatou iaia, ka rauka ra ia tatou i te tutu aere i te nuti meitaki o te Patireia. Ka rauka anake ua ia Iehova i te rave i teia angaanga. Ka rauka ua iaia i te tuatua tika atu ki te tangata mei te rangi mai ki te enua nei. Karanga a Iesu e ka rauka ia Iehova i te maani i te au toka kia tutu aere no runga i te Ariki o Tona Patireia. (Luka 19:37-40) Inara kua akatika a Iehova ia tatou kia riro ei “oa rave angaanga” nona. (1 Korinetia 3:9) Kua tata te apotetoro ko Paulo e: “Te ako katoa atu nei matou te rave angaanga kapiti nei, ia kotou, e auraka kotou e āriki puapinga kore ua i te aroa ua o te Atua ra.” (2 Korinetia 6:1) E tika anga ngateitei teia kia patiia i te angaanga kapiti ki te Atua. Ka akara tatou i te au tumu ka riro teia ei rekareka anga maata no tatou.
MATAORA TATOU I TE ANGAANGA KAPITI KI TE ATUA
6. Akapeea te Tamaiti anau tai a te Atua i te akamārama anga i tona angaanga kapiti anga ki te pae i tona Metua?
6 E mataora ua ana te au tavini o Iehova i te angaanga kapiti ki te Atua. I mua ake ka aere mai ei te Tamaiti anau tai a te Atua ki te enua nei, karanga aia e: “Ia Iehova ra au i Maseli 8:22, 30) I to Iesu angaanga kapiti anga ki tona Metua, kua mataora ua aia no te mea e maata tana au mea i akatupu, e kua kite aia e te inangaro maira a Iehova iaia. Inara akapeea tatou?
akamataʼi aia i tana angaanga; . . . Tei vaitata katoa uaorai au iaia i reira mei te tamaiti angai ra: e te mataora ua ra au i te au rā katoa ra, i te rekareka tamou marie anga ki mua i tona aroaro.” (7. No teaa ra te angaanga tutu aere ka akatupu ei i te mataora kia tatou?
7 Karanga a Iesu e ka rekareka tatou i te oronga atu e te āriki mai. (Angaanga 20:35) E mea mataora i te āriki i te tuatua mou, inara eaa i riro e ei mea mataora katoa i te oronga i te tuatua mou ki etai ke? No te mea ka kite tatou i to ratou mataora me mārama ratou i ta te Pipiria e apii maira, e kia rauka tetai pirianga ki te Atua. Ka rekareka tatou i te kite i to ratou manako e to ratou oraanga i te tauianga. Ko te tutu aere te angaanga puapinga roa atu e te mataora kia rave tatou. I reira e rauka ai te ora mutu kore ki te aronga te ka riro mai ei oa no te Atua.—2 Korinetia 5:20.
8. Eaa ta tetai pae i karanga no runga i te rekareka i te angaanga kapiti anga kia Iehova?
8 Me tauturu tatou i tetai ke kia kite i te Atua, te akamareka ra tatou ia Iehova e te akaperepere ra aia i ta tatou tauta anga i te tavini iaia. E ka rekareka katoa tatou. (E tatau ia 1 Korinetia 15:58.) Akakite a Marco, tei noo ki Itaria e: “Te rekareka maata nei au i te kite e te oronga nei au i toku maroiroi kia Iehova e kare ki tetai ke te ka akangaropoina i taku i rave.” Pera katoa, karanga a Franco, iaia e tavini ra i Itaria e: “Na roto i tana Tuatua e tana au mea pae vaerua, kua akamaara mai a Iehova ia matou i te au rā ravarai, e te inangaro maira aia ia matou, e e puapinga ta matou angaanga kiaia, noatu e meangiti ua te reira. Te tumu teia i mataora ai au i te angaanga kapiti ki te Atua, e kua puapingaia toku oraanga.”
ANGAANGA KAPITI ANGA KI TE ATUA, KA AKAVAITATA IA TATOU KIAIA E TETAI KE
9. Eaa te pirianga i rotopu ia Iehova e Iesu, e no teaa ra?
9 Me angaanga kapiti tatou ki te aronga ta tatou i inangaro, ka akavaitata atu tatou kia ratou. Ka mārama maata atu tatou i to ratou tu. Ka kite tatou i to ratou au akakoro anga e akapeea e rauka ai ia ratou te reira. Kua angaanga kapiti a Iesu kia Iehova no tetai pirioni tuma mataiti. E kua ketaketa tikai to raua inangaro no tetai e tetai, e kare rava to raua pirianga e rauka kia takoreia. Kua akamārama a Iesu i te aiteanga o to raua pirianga te karanga anga e: “Ko au e te Metua ra, okotai ïa.” (Ioane 10:30) E tu okotai tikai to raua, ma te taokotai meitaki me angaanga kapiti.
Akaketaketa te tutu aere i to tatou akarongo no te mea ka akamaara mai kia tatou i te au taputou a te Atua e tana au turanga aroa ua
10. No teaa ra te tutu aere ka akavaitata ai ia tatou ki te Atua e ki etai ke?
10 Kua pati a Iesu kia Iehova kia paruru i tana au pipi? No teaa ra? Kua pure aia e: “Kia okotai ake ratou, mei ia taua katoa nei rai.” (Ioane 17:11) Me akono tatou i te au turanga o te Atua e te piri ki te angaanga tutu aere, ka mārama meitaki tatou i tona au tu manea. Ka kite tatou i te tu pakari, te irinaki anga kiaia e te aru i tana arataki anga. E me akavaitata tatou ki te Atua, ka akavaitata mai aia kia tatou. (E tatau ia Iakobo 4:8.) Ka akavaitata katoa tatou ki to tatou au taeake e te au tuaine no te mea te aiteite nei to tatou au manamanata e te au rekareka anga pera katoa to tatou akakoroanga. E angaanga, e rekareka, e e akakoromaki kapiti ana tatou. Karanga a Octavia, tei noo i Peritane: “Te angaanga kapiti anga kia Iehova, ka akavaitata roa atu iaku ki etai ke.” Akamārama aia e, kua akatumuia tona pirianga oa ki runga i te “akakoroanga e te arataki anga okotai.” Papu roa e, te manako akapera ra tatou. Me kite tatou i te au taeake e tauta ra i te akamareka ia Iehova, ka akavaitata roa atu tatou kia ratou.
11. No teaa ra tatou ka akavaitata atu ei kia Iehova e to tatou au taeake i roto i te ao ou?
11 Te ketaketa nei to tatou inangaro no te Atua e to tatou au taeake, inara ka ketaketa atu te reira i roto i te ao ou. Akamanako ana i ta tatou angaanga mataora ka rave a te tuatau ki mua! Ka āriki rekareka tatou i te aronga tei akatuia mai e ka apii ia ratou no runga ia Iehova. Ka angaanga kapiti tatou i te akariro anga i te enua ei parataito. E rekareka anga maata ïa i te angaanga kapiti e rauka ua atu te tu apa kore i raro ake i ta Karaiti tutara anga. Ka akavaitata atu te tangata katoatoa ki tetai e tetai e kia Iehova, ‘tei akamerengo i te kaki o te au mea ora katoa nei.’—Salamo 145:16.
KA RIRO TE ANGAANGA KAPITI KI TE ATUA EI PARURU ANGA
12. Akapeea te angaanga tutu aere e riro ei ei paruru anga?
12 Ka anoanoia tatou kia paruru i to tatou pirianga kia Iehova. Te noo nei tatou i roto Philipi 4:8) Ka akaketaketa te tutu aere i to tatou akarongo no te mea ka akamaara mai te reira i te au taputou a te Atua e tana au turanga aroa ua. Ka tauturu katoa teia kia akono tamou i te au tu tei anoanoia kia paruru ia tatou uaorai mei ia Satani e tona ao.—E tatau ia Ephesia 6:14-17.
i to Satani ao e e tu apa ua to tatou, no reira ka māmā ua i te manako e te rave i te au mea o teianei ao. Ka aiteia teia mei tetai e kau ra i roto i te kauvai e kua pākokoia ki te ngai kare tatou e inangaro i te aere. No reira kia maroiroi tatou i te kau kia kore e pākokoia. Mei te reira katoa, ka angaanga pakari tatou kia kopae i te au akakeu anga o to Satani ao. No reira akapeea te tutu aere te paruru anga ia tatou? Me tuatua tatou no runga ia Iehova e te Pipiria, ka akamou tatou ki runga i te au mea puapinga e te meitaki, kare ki runga i te au mea te ka akaparuparu i to tatou akarongo. (Me angaanga ua tatou na Iehova, kare o tatou taime te manata atu i to tatou uaorai manamanata
13. Eaa te manako o tetai Kite i Autireria no runga i te tutu aere?
13 Me tutu aere ua tatou, te apii, e te rave i te au mea na tetai ke i roto i te putuputuanga, ka paruruia tatou no te mea kare e taime te manata atu i to tatou uaorai manamanata. Akakite a Joel, tei noo i Autireria e: “Te tauturu nei te angaanga tutu aere iaku kia kore e paruparu toku manako. Te akamaara mai nei teia iaku i te au akaaoanga ta te tangata e aro atura e te au puapinga taku i kite me aru au i te au kaveinga Pipiria. Te tauturu nei te angaanga tutu aere iaku kia vai akaaka ua; kia rauka iaku te irinaki ki runga ia Iehova e toku au taeake e te au tuaine.”
14. Akapeea te tutu aere ma te aruaru i te akaari anga e tei ia tatou te vaerua o te Atua?
14 Te oronga katoa maira te tutu aere i te akapapu anga e, tei ia tatou te vaerua o te Atua. Ei akatutu anga: Akamanako e naau te apainga kia oronga i te kai ki te tangata i toou ngai. Kare koe e tutakiia no te rave i teia, e naau rai e tutaki i te au mea ravarai. Pera katoa, kare te maata anga o te tangata e inangaro i taau kai, e te ririia maira koe no te apai atu i te reira kia ratou. Eaa te roa ia koe me rave i teia angaanga? Kare e roa atu ana, ka paruparu toou manako e penei ka akamutu koe i teia angaanga. Inara, e maata tatou e rave ra i te angaanga tutu aere i te au mataiti ravarai, noatu e ka pou to tatou taime e te moni e ka aviriia mai me kore ka ririia mai e te tangata. Te akapapu mai nei teia e te tauturu maira te vaerua o te Atua ia tatou.
AKAARI TE ANGAANGA KAPITI KI TE ATUA, I TO TATOU AROA NONA E NO TETAI KE
15. Eaa te pirianga o te tutu anga nuti meitaki ki to te Atua akakoroanga no te tangata?
15 Eaa te pirianga o te angaanga tutu aere ki to Iehova akakoroanga no te tangata? To te Atua akakoroanga, kia noo te tangata e tuatau ua atu, e kare te reira i taui te ara anga a Adamu. (Isaia 55:11) Kua akanoo te Atua i tetai ravenga kia akaora ia tatou mei te ara e te mate. Akapeea ra? Kua aere mai a Iesu ki te enua nei e kua akaatinga i tona oraanga. Inara kia puapingaia mei tona atinga, ka anoanoia te au tangata kia akarongo ki te Atua. No reira, kua apii a Iesu i te tangata i ta te Atua e umuumu maira ia ratou, e kua akaue aia i tana au pipi kia pera katoa. I teia rā, me tutu aere tatou e te tauturu i tetai kia riro mai ei oa no te Atua, te angaanga kapiti ra tatou Kiaia i roto i tana akanoonooanga aroa no te akaora i te tangata mei te ara e te mate.
16. Eaa te pirianga o ta tatou angaanga tutu aere ki teia akauenga maata a te Atua?
16 Me tauturu tatou i tetai kia rauka te ora mutu kore, te akaari ra tatou i to tatou inangaro no ratou e no Iehova. Koia “tei inangaro i te tangata katoatoa kia ora, e kia rauka te kite i te tuatua-mou.” (1 Timoteo 2:4) Te uianga te Pharisea kia Iesu e ko teea te akauenga maata a te Atua, karanga a Iesu: “‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.’ Ko te akauenga mua teia e tei maata. E mei te reira katoa ra te rua, ‘E aroa atu koe i toou tangata tupu mei te aroa ia koe uaorai.’” (Mataio 22:37-39) Na te tutu aere anga i te nuti meitaki, te aru ra tatou i teia akauenga.—E tatau ia Angaanga 10:42.
17. Eaa toou manako no runga i te tika anga ngateitei kia tutu aere i te nuti meitaki?
17 E akameitakianga tikai teia kia tatou! Kua oronga mai a Iehova i tetai angaanga te ka akarekareka ia tatou, e ka akavaitata ia tatou kiaia e te au taeake, e na teia e paruru i to tatou pirianga kiaia. Te oronga katoa mai nei teia i te atianga kia akaari i to tatou aroa no te Atua e no tetai ke. E mirioni ua atu to Iehova au tavini i teianei ao, e e tuke tuke to ratou turanga. Inara me e mapu tatou me kore e ruaine, e tangata apinganui me kore e putaua, e maroiroi me kore e apikepike, ka rave tatou i te ka rauka i te akakite i to tatou akarongo ki tetai ke. Ka aite tatou kia Chantel no Varani tei karanga e: “Ko Tei ririnui rava atu i te ao katoa e pini ua ake, koia Tei Anga i te au mea ravarai, te Atua mataora, tei karanga mai: ‘E Aere! E Tuatua! E akakitekite noku, e tuatua atu ma te ngakau tae. Ka oronga atu au i toku ririnui, i taku Tuatua koia te Pipiria, te tauturu mei te rangi, te au oa i te enua nei, te terenianga tau, e te au ikuiku anga meitaki i te tuatau tau.’ E tika anga ngateitei tikai teia ta Iehova i pati mai ia tatou kia angaanga kapiti ma to tatou Atua!”