1, 2. (a) Eaa te kapiti maira ki roto i ta te Atua apinga “oronga kare e tika kia tuatua?” (e) Eaa te au uianga ka uriuri tatou i roto i teia atikara?

KUA ORONGA mai a Iehova i te apinga aroa maata roa atu na te tono anga mai i tana Tamaiti akaperepere, ko Iesu, ki te enua nei! (Ioane 3:16; 1 Ioane 4:9, 10) Kua karanga te apotetoro ko Paulo i teia apinga aroa e e “oronga kare e tika kia tuatua ra.” (2 Korinetia 9:15) Eaa a Paulo i tuatua akapera ai?

² Kua kite a Paulo e e akapapuanga to Iesu atinga e ka akatupu te Atua i tana au mea katoa i taputou mai. (E tatau ia 2 Korinetia 1:20.) Tera te aiteanga, ko ta te Atua i “oronga kare e tika kia tuatua,” ka kapiti mai te atinga o Iesu e te au mea meitaki pouroa e te aroa tiratiratu ta Iehova e akaari maira kia tatou. E mea ngatā i te akamārama i teia apinga aroa kia mārama meitaki tatou. Eaa toou manako no runga i teia apinga aroa? Akapeea teia apinga aroa i te akakeu anga ia tatou kia akapapa meitaki no te Akamaaraanga i to Karaiti matenga a te Ruitoru, rā 23 o Mati, 2016?

3, 4. (a) Eaa toou manako me oronga mai tetai tangata i tetai apinga aroa naau? (e) Akapeea tetai apinga aroa takake i te tauianga i toou oraanga?

³ E mea mataora me oronga mai tetai tangata i tetai apinga aroa na tatou. Inara te vai nei te au apinga aroa puapinga tikai e te takake te ka akatuke i to tatou oraanga. Ei akaraanga, akamanako ana e kua rave koe i tetai angaanga kino. Te utunga o teia kino e mate. Inara kite ua ake koe, kua inangaro tetai tangata, kare koe i kite, i te apai i taau utunga. E kua inangaro aia kia mate noou! Eaa toou manako no teia apinga aroa takake?

⁴ Ka akakeu teia apinga aroa takake ia tatou kia rave i te au taui anga i roto i to tatou oraanga? E mea papu, ka akakeu katoaia koe kia oronga maata atu e kia aroa i etai ke e te akakore i te ara a tetai tei rave i te kino kia koe. I toou oraanga toe, ka inangaro koe i te akaari i te akameitakianga no te atinga tei orongaia.

5. Akapeea ta te Atua apinga aroa ko te atinga oko i maata rava atu ei i tetai ua atu apinga aroa?

⁵ Ko ta te Atua apinga aroa ko te atinga oko te mea maata rava atu i te apinga aroa tei taikuia i roto i teia akaraanga. (1 Petero 3:18) Akamanako ana i teia: Kua ara te katoatoa no Adamu, e te utunga o te ara, e mate. (Roma 5:12) No te aroa ua o Iehova, kua tono mai Aia ia Iesu ki te enua nei kia mate no te tangata katoatoa, “koia i akakoromaki i taua mate ra.” (Ebera 2:9) Inara e maata atu ta te atinga oko o Iesu ka rave! Ka akakore rava te reira i te mate e tuatau ua atu. (Isaia 25:7, 8; 1 Korinetia 15:22, 26) Te aronga pouroa tei akaari i te tu akarongo kia Iesu, ka noo au ua e ka mataora e tuatau ua atu, ei ui ariki ma Karaiti i te rangi me kore ei iti tangata no te Patireia o te Atua i te enua nei. (Roma 6:23; Apokalupo 5:9, 10) Eaa te au akameitaki anga te ō maira i roto i te apinga aroa a Iehova?

6. (a) Eaa te akameitakianga mei te apinga aroa a Iehova taau ka anoano atu? (e) Akakite mai e toru apinga ka riro ta te Atua apinga aroa ei akakeu ia tatou kia rave.

⁶ Tetai tuanga o te apinga aroa a te Atua koia oki, ka riro te enua ei parataito, ka akaoraia tei maki, e ka tuakaou tei mate. (Isaia 33:24; 35:5, 6; Ioane 5:28, 29) Te inangaro nei tatou ia Iehova e tana Tamaiti no teia apinga “oronga kare e tika kia tuatua.” Eaa ta teia apinga aroa ka akakeu ia tatou kia rave? Ka akakeu te reira ia tatou kia (1) aru i te akaraanga o Iesu Karaiti, (2) aroa atu i to tatou au taeake, e te (3) akakore i te ara a etai ke ma te ngakau tae.

7, 8. Eaa to tatou manako no runga i te aroa o Karaiti, e eaa ta te reira ka akakeu ia tatou kia rave?

⁷ Te mea mua, kia akakeuia tatou i te taangaanga i to tatou oraanga i te akangateitei ia Iesu. Karanga te apotetoro ko Paulo e: “Te riro nei oki matou i te aroa o te Mesia ra.” (E tatau ia 2 Korinetia 5:14, 15.) Kua kite a Paulo e me āriki tatou i te aroa maata o Iesu, ka akakeu te reira ia tatou kia inangaro e kia akangateitei ia Iesu. Ae, me mārama tikai tatou i ta Iehova i rave no tatou, ka akakeu tona aroa ia tatou kia akangateitei ia Iesu. Akapeea tatou me rave i te reira?

⁸ Ka akakeu to tatou aroa no Iehova kia aru i to Iesu akaraanga e tona takainga vaevae. (1 Petero 2:21; 1 Ioane 2:6) Me akarongo tatou ki te Atua e Karaiti, te akapapu ra tatou i to tatou aroa no raua. Akakite a Iesu e: “Tei iaia taku au akauenga, e kua akono aia i te  reira ra, koia tei anoano mai iaku; e tei anoano mai iaku ra, ka akaperepereia mai aia e taku Metua ra; e ka akaperepere oki au iaia, e ka akakite oki au kiaia iaku uaorai.”​—Ioane 14:21; 1 Ioane 5:3.

9. Eaa te au taomianga ta tatou e aro atura?

⁹ I teia Akamaaraanga, e meitaki i te akamanako oonu e akapeea tatou e taangaanga nei i to tatou oraanga. No reira e ui kia koe uaorai: ‘Eaa taku e rave nei e te aru ra au i to Iesu akaraanga? Eaa atu te ngai ka rauka iaku kia akameitaki atu?’ E puapinga i te ui i teia au uianga kia tatou uaorai no te mea te anoano maira teia ao kia aru i ta ratou e rave ra. (Roma 12:2) Me kare tatou e matakite, penei ka taomiia tatou kia aru i te akaraanga o teianei ao, o te au puapii, te aronga rongonui, e te aronga tarekareka rongonui. (Kolosa 2:8; 1 Ioane 2:15-17) Akapeea tatou me patoi atu i teia au taomianga?

10. Eaa te au uianga ka ui tatou i te tuatau o te Akamaaraanga, e eaa ta te au pauanga ka akakeu ia tatou kia rave? (Akara i te tutu mua.)

¹⁰ E mea meitaki i te akapou i tetai taime i te tuatau o te Akamaaraanga kia akara matatio i to tatou kakau, te teata e te au imene, pera katoa to runga i ta tatou komupiuta, tereponi apaipai e te tablet. E ui kia koe uaorai: ‘Me tei konei a Iesu e kua kite mai i toku kakau, ka akamā ainei au?’ (E tatau ia 1 Timoteo 2:9, 10.) ‘Te akaari ra ainei toku kakau e e pipi au na Iesu? Ka inangaro ainei a Iesu i te akarakara i taku au teata? Ka akarongo ainei aia i taku au imene? Me pati mai aia i taku tereponi apaipai me kore te tablet, ka akamā ainei au i tana ka kite i runga i te reira? Ka ngatā ainei iaku i te akamārama kia Iesu te tumu i reka ai au i taku au kanga vitio?’ Kia riro to tatou aroa no Iehova ei akakeu ia tatou kia titiri i tetai ua atu apinga kare e tau ki tetai Kerititiano noatu te oko maata. (Angaanga 19:19, 20) Me akatapu tatou i to tatou oraanga kia Iehova, kua taputou tatou kia taangaanga i to tatou oraanga ei akangateitei ia Karaiti. No reira auraka tatou e akono i tetai apinga te ka tamanamanata ia tatou kia aru i to Iesu akaraanga.​—Mataio 5:29, 30; Philipi 4:8.

11. (a) Akapeea to tatou aroa no Iehova e Iesu i te akakeu anga ia tatou i roto i te angaanga tutu aere? (e) Akapeea to tatou aroa i te akakeu anga ia tatou kia tauturu i tetai i roto i te putuputuanga?

¹¹ To tatou aroa no Iesu, ka akakeu te reira ia tatou kia tutu aere e kia apii atu ma te maroiroi. (Mataio 28:19, 20; Luka 4:43) I te tuatau o te Akamaaraanga, ka rauka ainei ia koe te akatanotano i toou oraanga o te au rā kia rauka i te angaanga pania tauturu ma te akapou e 30 me kore e 50 ora i roto i te angaanga tutu aere? Manako tetai tane takaua e 84 ona mataiti e kare e rauka iaia i te painia no tona turanga makimaki e te ruaine. Inara kua inangaro te au painia i te tauturu iaia. Kua orongaia tetai mataara nona e kua iki i te ngai tau kia tutu aere aia. Tei tupu, kua taeria e te taeake e 30 ora i tei akakoroia. Ka rauka ainei ia koe i te tauturu i tetai i roto i taau putuputuanga kia angaanga painia tauturu ia Mati me kore Aperira? E tika kare e rauka i te katoatoa i te painia, inara ka rauka ia tatou i te taangaanga i to tatou taime e te maroiroi no te tavini maata atu ia Iehova. Me rave tatou i te reira, mei ia Paulo rai, te akaari ra tatou e te akakeuia nei tatou e te aroa o Iesu. Eaa atu ta te aroa o te Atua ka akakeu ia tatou kia rave?

12. Ka akakeu te aroa o te Atua ia tatou kia rave i teaa?

¹² Te rua, ka akakeu to te Atua aroa ia tatou  kia aroa atu i to tatou au taeake. Kua tata te apotetoro ko Ioane: “E aku au akaperepere e, i pera te Atua i te aroa anga mai ia tatou nei, kia aroa katoa tatou ia tatou uaorai e tikaʼi.” (1 Ioane 4:7-11) No reira me āriki tatou i to te Atua aroa, ka anoanoia tatou kia aroa atu i to tatou au taeake. (1 Ioane 3:16) Akapeea tatou i te akaari anga i te aroa kia ratou?

13. Eaa te akaraanga ta Iesu i akanoo no te aroa i etai ke?

¹³ Akaari mai to Iesu akaraanga e akapeea tatou me aroa atu i tetai ke. I tona tuatau i te enua nei, kua tauturu aia i te au tangata, te aronga akaaka tikai. Kua akaora aia i te maki, te pirikoki, te matapo, te turi, e te murare. (Mataio 11:4, 5) Kare i aite ki te au arataki akonoanga, kua mataora a Iesu i te apii i te tangata tei inangaro i te kite i te Atua. (Ioane 7:49) Kua aroa aia i te aronga akaaka e kua angaanga pakari i te tauturu ia ratou.​—Mataio 20:28.

14. Eaa taau ka rave kia akaari i te aroa ki toou au taeake?

¹⁴ E taime meitaki katoa te tuatau o te Akamaaraanga no te akamanako e akapeea me tauturu i te au taeake e te au tuaine i roto i taau putuputuanga, te aronga ruaine tikai. Ka atoro ainei koe i teia aronga tei akaperepereia? Ka apai ainei koe i tetai kai na ratou, te rave i te au angaanga i te kainga, te apai ki te uipaanga, e kia tutu aere kapiti? (E tatau ia Luka 14:12-14.) E tuku i te aroa o te Atua kia akakeu ia koe kia aroa i toou au taeake!

15. Eaa te mea ka anoanoia tatou kia kite?

¹⁵ Te toru, ka akakeu to Iehova aroa ia tatou kia akakore i te ara a to tatou au taeake e te au tuaine. Kua iri mai te ara e te mate a Adamu ki runga ia tatou katoatoa, no reira kare e rauka i tetai i te karanga e, “Kare au e anoano i te oko.” Ka anoano rai te tavini tiratiratu roa atu o te Atua i te apinga aroa o te oko. Kua akakoreia ta tatou kaiou maata! No teaa i puapinga ai kia kite i te reira? Ka kitea te pauanga i roto i tetai akatutuanga a Iesu.

16, 17. (a) Eaa ta tatou i apii mai mei ta Iesu akatutuanga no runga i te ariki e te nga tavini? (e) Muri ake i te akamanako oonu anga i ta Iesu akatutuanga, eaa taau ka tauta i te rave?

¹⁶ Kua oronga mai a Iesu i tetai akatutuanga no tetai ariki tei akakore i te kaiou maata a tona tavini e 60,000,000 denari. Inara, i muri mai, kare teia tavini i akakore atu i te kaiou meangiti ua a tetai taeake tavini e 100 denari. Tika anga, kua akakeuia teia tavini e te aroa ua o te ariki kia akakore atu i tona taeake tavini. Riri akera te ariki i tona rongo anga e kare tona tavini i akakore ana i teia kaiou meangiti. Karanga aia: “E teianei tavini kino e, i akakore ana au i taku ou katoatoa ia koe, ko koe i aue mai kiaku; E auraka koe e aroa katoa atu i te taeake tavini noou ra, mei iaku i aroa ia koe ra?” (Mataio  18:23-35) Mei teia ariki rai, kua akakore a Iehova i ta tatou kaiou maata. Eaa ta te aroa e te tu aroa ua o Iehova ka akakeu ia tatou kia rave?

¹⁷ Ia tatou e akapapa ra no te Akamaaraanga, penei e ui kia tatou uaorai: ‘Kua tamamae ainei tetai taeake iaku? E ngatā ainei iaku i te akakore atu i tana i rave?’ Me koia ia, e taime meitaki teia kia aru i to Iehova akaraanga, tei “tika [iaia] i te akakore mai i te ara nei.” (Nehemia 9:17; Salamo 86:5) Me āriki tatou i to Iehova aroa maata, ka aroa ua tatou i tetai ke e ka akakore atu ia ratou ma te ngakau tae. Me kare tatou e aroa e te akakore atu i to tatou au taeake, kare katoa a Iehova e aroa e te akakore mai ia tatou. (Mataio 6:14, 15) Me akakore tatou i tetai, kare te mamae e taui, ka tauturu ra te reira kia mataora tatou no te tuatau ki mua.

18. Akapeea to te Atua aroa te tauturu anga i tetai tuaine kia akakoromaki i te tu ara ua o tetai atu?

¹⁸ E mea ngatā i te akakoromaki i te tu ara o to tatou au taeake e te au tuaine. (E tatau ia Ephesia 4:32; Kolosa 3:13, 14.) Ko Lily tetai tuaine tei rave i teia. ^[1] (Akara i te manako poto.) Kua tauturu aia i tetai tuaine takaua ko Carol. Ei akaraanga, kua apai aia ia Carol ki te au ngai tana i anoano, te tauturu i tana apinga okooko, e kua rave i tetai atu au mea nana. Noatu ta Lily i rave nona, kua akaapa ua rai a Carol, e i tetai au taime kua ngatā i te tauturu atu iaia. Inara kua akamanako ua a Lily i to Carol au tu meitaki e kua tauturu iaia no tetai au mataiti, e mate ua atu a Carol. Noatu e ngatā ia Lily i te tauturu ia Carol, kua karanga aia e: “Te tapapa nei au i te kite akaou ia Carol me akatuia mai aia. Ka inangaro au i te kite iaia ma te tu apa kore.” Taka meitaki i reira, ka akakeu to te Atua aroa ia tatou kia akakoromaki i te tu ara ua o to tatou au taeake e te au tuaine e kia tapapa atu i te tuatau e akakoreia ai te tu ara ua e tuatau ua atu.

19. Akapeea ta te Atua apinga “oronga kare e tika kia tuatua” i te akakeu anga ia koe?

¹⁹ Kua oronga mai a Iehova i tetai apinga “oronga kare e tika kia tuatua.” Kia āriki rekareka tatou i te reira! E taime meitaki tikai te tuatau Akamaaraanga no te akamanako oonu i te au mea pouroa ta Iehova e Iesu i rave no tatou. Kia riro to raua aroa ei akakeu ia tatou kia aru vaitata i to Iesu akaraanga, te aroa e kia akakore atu i te ara a te au taeake ma te ngakau tae.