1-3. (a) Eaa ta tatou ka tau kia apii ei irinakianga maata? (e) Eaa ra te tuakaouanga i puapinga ai? (Akara i te tutu mua.)

ME UI mai tetai tangata eaa tikai te tumu manako maata o ta kotou irinakianga, eaa taau ka pau? Papu e ka pau koe, e te irinaki ra koe e ko Iehova Tei Anga, e tei oronga mai i te ora kia tatou. Penei ka taiku katoa koe e te irinaki ra koe ia Iesu Karaiti, tei mate ei atinga oko. Papu e ka tuatua koe no runga i te Parataito i te enua nei i te tuatau ki mua, te ngai ka noo te iti tangata o te Atua e tuatau ua atu. Inara ka taiku ainei koe e ko te tuakaouanga tetai o te au irinakianga tei akaperepereia?

² E au tumu meitaki ta tatou kia kapiti mai i te tuakaouanga ei irinakianga puapinga kia tatou, noatu me ka manakonako atu tatou kia ora i te mate maata e kia noo i te enua nei e tuatau ua atu. Kua akaari mai te apotetoro ko Paulo i te puapinga o te tuakaouanga. Karanga aia: “Kare e tuakaouanga to tei mate ra, kare katoa te Mesia i tu ki runga.” Naringa kare a Iesu i akatuakaouia mai, kare aia e tutara ei Ariki  i te rangi, e ka puapinga kore ta tatou tutu aere anga. (E tatau ia 1 Korinetia 15:12-19.) Inara, kua kite tatou e kua akatuakaouia mai a Iesu. No te mea te irinaki ra tatou ki roto i te tuakaouanga, kare tatou e aite ana mei te au Sadukea ngati Iuda, tei patoi pakari e kare te mate e ora akaou. Noatu e ka aviri mai te tangata ia tatou, ka vai ketaketa to tatou akarongo e ka akatuakaou mai te Atua i tei mate.​—Mareko 12:18; Angaanga 4:2, 3; 17:32; 23:6-8.

³ Karanga a Paulo e ko “te tuakaouanga o tei mate ra,” te apiianga maata o “te tuatua mua o te Mesia.” (Ebera 6:1, 2) Kua irinaki tikai aia i te tuakaouanga. (Angaanga 24:10, 15, 24, 25) Noatu e e au tuatua mua teia o te au apiianga tumu ta tatou ka apii mei te Tuatua a te Atua, ka anoanoia rai tatou kia apii meitaki i te tuakaouanga. (Ebera 5:12) Eaa te tumu?

4. Eaa te au uianga ta tatou ka ui no te tuakaouanga?

⁴ Me akamata te tangata i te apii i te Pipiria, te maata anga o te taime ka tatau ratou i te au tua taito no te tuakaouanga, mei te tuakaouanga o Lazaro. E ka apii katoa ratou no runga ia Aberahama, Iobu, e Daniela, tei papu e ka ora akaou tei mate a te tuatau ki mua. Noatu ra, eaa taau ka tuatua me ui mai te tangata kia akapapu atu koe i roto i te Pipiria te tumu ka irinaki ei tatou i te au taputou o te tuakaouanga tei akakiteia e anere ua atu mataiti i topa? Te akakite ra ainei te Pipiria e aea te tuakaouanga i te tuatau ki mua e tupu ei? Ka riro te au pauanga ki teia au uianga ei akaketaketa i to tatou akarongo.

5. Eaa ta tatou ka uriuri na mua?

⁵ Penei e māmā ua ia tatou kia akamanako i tetai tangata tei akaoraia mai mei te mate. (Ioane 11:11; Angaanga 20:9, 10) Inara ka irinaki ainei tatou i te taputou e ka akatuakaouia mai tetai tangata e anere ua atu mataiti i te tuatau ki mua? Ka irinaki ainei tatou me kua akakiteia te reira no tetai tangata tei mate i te tuatau i topa me kore tei mate ua akenei? E tikai, kua irinaki takere koe i te tuakaouanga tei tupu e anere ua atu mataiti i topa i muri ake i te taputou anga. Eaa te reira tuakaouanga? Eaa te pirianga o te reira ki toou manakonakoanga o te tuakaouanga i te tuatau ki mua?

6. Akapeea a Iesu te ō anga ki roto i te totou o Salamo 118?

⁶ Na te akara anga ia Salamo 118, tei tataia e Davida, ka uriuri ana tatou i teianei i tetai tuakaouanga tei totouia i mua roa ake ka tupu ei. Ia Salamo, teia te au tuatua: “Kia ora i teianei, e Iehova, te pati atu nei au”! pera katoa “Kia ora aia, ko tei aere mai ma te ingoa o Iehova.” Kua taiku te tangata i teia totou no runga i te Mesia te aere anga a Iesu ki Ierusalema ia Nisana 9, i nga rā i mua ake i tona mate anga. (Salamo 118:25, 26; Mataio 21:7-9) Inara akapeea a Salamo 118 te akakite anga i tetai tuakaouanga te ka tupu no tetai tuatau roa ki mua? Ka akara ana eaa atu ta teia salamo i karanga: “Ko te toka i akarukeia e te aronga patu are ra, ko tei akariroia ei toka tiavā.”​—Salamo 118:22.

7. Akapeea te ngati Iuda te kopae anga ia Iesu?

⁷ “Te aronga patu are ra” tei kopae i te  Mesia, ko te au arataki ngati Iuda. E maata atu ta ratou i rave i te kopae anake ua ia Iesu e tei kore i āriki iaia e ko Karaiti. E manganui te ngati Iuda tei kopae iaia na te akaue pakari anga ia Pilato kia tamate iaia. (Luka 23:18-23) Ae, no ratou katoa te apa i mate ei a Iesu.

8. Akapeea a Iesu te riro anga mai “ei toka tiavā”?

⁸ Mei te mea kua kopaeia e kua tamateia a Iesu, akapeea aia te riro anga mai “ei toka tiavā”? Ka tupu anake ua te reira me akatuakaouia mai aia. Kua akataka meitaki a Iesu i teia te akakite anga i tetai tua no runga i te tangata kainga tei tono mai i te aronga apai karere ki te aronga tanutanu e angaanga ra nana. Kua takinokino te aronga tanutanu i te aronga apai karere. Kare i roa, kua tono mai te tangata kainga i tana uaorai tamaiti, te manako anga e ka akarongo mai te aronga tanutanu kiaia. Inara kua tamate ratou i te tamaiti a te tangata kainga. I muri akera i te akakite anga i teia tua, kua taiku a Iesu i te totou ia Salamo 118:22. (Luka 20:9-17) Kua taangaanga te apotetoro ko Petero i taua irava i tona tuatua anga, “kua ruru akera to ratou au tutara [ngati Iuda], e te aronga pakari, e te au tata tuatua, i Ierusalema.” Kua tuatua aia ia “Iesu Mesia no Nazareta, ta kotou i akasatauro io nei, ko tei akatuia mai e te Atua mei te mate maira.” I reira karanga aia: “Ko te toka teia i akarukeia e kotou, e te aronga patu are, e kua akariroia io nei ïa ei toka tiavā.”​—Angaanga 3:15; 4:5-11; 1 Petero 2:5-7.

9. Eaa te tupuanga umere roa atu tei akakiteia ia Salamo 118:22?

⁹ Taka meitaki e kua akakite te totou ia Salamo 118:22 i tetai tuakaouanga te ka tupu e anere ua atu mataiti i muri mai. Ka kopaeia te Mesia e ka tamateia. Inara ka akatuakaouia mai aia kia ora ei toka tiavā. I tona tuakaouanga, no Iesu anake te ingoa “i akakiteia mai ki te tangata i raro ake i teianei rangi, e oraʼi tatou nei.”​—Angaanga 4:12; Ephesia 1:20.

10. (a) Eaa ta Salamo 16:10 i totou? (e) Eaa tatou i papu ei e kare a Salamo 16:10 e tuatua ra no runga ia Davida?

¹⁰ Ka uriuri ana tatou i tetai akaou irava tei akakite i tetai tuakaouanga. Tei akatupuia e tere atu i te tauatini mataiti i muri mai. Ka riro teia ei akapapu anga e ka tupu tetai tuakaouanga i muri roa ake ka akakiteia ai me kore i taputouia ai te reira. Ia Salamo 16, ka tatau tatou i te tuatua a  Davida: “Kare oki koe e vaoo i toku vaerua i ade; kare oki koe e tuku i to Mea Tapu ra kia kite i te pe.” (Salamo 16:10) Kare a Davida e tuatua ra e kare rava aia e mate e ka vaio ua aia ki roto i te Vaarua. Te taka meitaki ra te Tuatua a te Atua na te karanga anga e kua ruaine a Davida e kua mate e “moe aturā Davida e tona ai metua katoa, e tanumia iora ki roto i te oire o Davida.” (1 Ariki 2:1, 10) No reira koai ta teia irava e tuatua ra?

11. I naea a Petero te akamārama anga ia Salamo 16:10?

¹¹ Tere atu i te okotai tauatini mataiti i muri ake i to Davida tata anga i taua au tuatua, akamārama a Petero koai ta Salamo 16:10 e tuatua ra. I nga epetoma i muri ake te mate anga a Iesu e kua akatuakaouia, kua tuatua a Petero ki te tauatini ua atu ngati Iuda e te au pipi akarongo mou. (E tatau ia Angaanga 2:29-32.) Kua akamaara aia ia ratou e kua mate a Davida e kua tanumia. E kare te Pipiria i karanga ana e kua patoi ratou i ta Petero i tuatua no Davida “koia ra i kite takere ana i te reira, i tuatuaʼi i te tuakaouanga o te Mesia.”

12. Akapeea a Salamo 16:10 te akatupuia anga, e eaa ta te reira e akapapu maira no te taputou o te tuakaouanga?

¹² Kua turu a Petero i tona manako te taikuanga i te au tuatua a Davida ia Salamo 110:1. (E tatau ia Angaanga 2:33-36.) Kua riro ta Petero akamārama anga i te au Tuatua Tapu ei akapapu ki te urupu e “ei Atu e ei Mesia” a Iesu. Kite te tangata e kua akatupuia a Salamo 16:10 te akatuakaouia mai anga a Iesu mei te mate. I muri mai, kua taangaanga te apotetoro ko Paulo i taua akapapu anga i tona tuatua anga ki te ngati Iuda i te oire o Anetioka i Pisidia. Kua umere tikai ratou i teia akapapu anga, e kua inangaro i te akarongo maata atu. (E tatau ia Angaanga 13:32-37, 42) E akapapu anga katoa teia kia tatou e ka irinakiia taua au totou Pipiria no tetai tuakaouanga a te tuatau ki mua noatu e ka akatupuia te reira e anere ua atu mataiti i muri roa ake.

13. Eaa te au uianga penei ka ui tatou no runga i te tuakaouanga?

¹³ E akamaroiroi anga tikai i te kite e ka tupu tetai tuakaouanga e anere ua atu mataiti i muri ake i te totouia anga te reira. Noatu ra, ka ui tetai pae: ‘Ko te aiteanga ainei e ka roa taku tiaki anga kia kite i toku akaperepere? Aea te tuakaouanga e tupu ei?’ Kua akakite a Iesu ki tana au apotetoro e te vaira tetai au mea kare ratou i kite e kare ratou e mārama. Te vaira te au akakite anga no runga i “te taime e te tuatau, ta te Metua i vaoo iaia uaorai.” (Angaanga 1:6, 7; Ioane 16:12) Inara, e akakite anga ta tatou e aea te tuakaouanga e tupu ei.

14. Eaa te tuke i to Iesu tuakaouanga ki te tuakaouanga o te aronga i mua ake iaia?

¹⁴ Te tuakaouanga puapinga rava atu tei tataia i roto i te Pipiria koia ko te tuakaouanga o Iesu. Naringa kare aia i akatuakaouia mai mei te mate, kare okotai o tatou manakonakoanga no te kite akaou i to tatou akaperepere tei mate. Te aronga tei akatuakaouia mai i mua ake ia Iesu, mei te aronga ta Elia e Elisaia i akatuakaou, kare ratou i ora ana e tuatau ua atu. Kua mate akaou ratou e kua riro ei one pueu i roto i te vaarua. Inara “ko te Mesia  [te]i akatuia [mai] mei te mate maira.” E “kare ïa e mate akaou, kare oki e mana akaou te mate iaia.” I te rangi, ka ora aia “e tuatau ua atu.”​—Roma 6:9; Apokalupo 1:5, 18; Kolosa 1:18; 1 Petero 3:18.

15. Eaa a Iesu i kapikiia ai e ko “te momua”?

¹⁵ Te tuakaouanga o Iesu ki te rangi ei vaerua, ko te tuakaouanga mua teia e te puapinga rava. (Angaanga 26:23) Inara, kare koia anake ua te ka akatuakaouia ki te rangi. Kua taputou a Iesu e ka tutara tana au apotetoro tiratiratu ma ïa ki reira. (Luka 22:28-30) Inara ka rauka anake ta ratou tutaki i muri ake i to ratou mateanga. I reira, ka akatuakaouia mai ratou ma te kopapa vaerua mei ia Iesu rai. Tata a Paulo, “kua tu akaou tikai ra te Mesia mei te mate maira, kua riro ïa ei momua no te aronga i topa te moe ra.” Karanga i reira a Paulo, te vaira tetai pae te ka akatuakaouia mai e ka aere ki te rangi. “E akonoia ra te tangata ravarai i tona uaorai pupu; ko te Mesia te momua; e i muri ake, ko to te Mesia ïa, kia mama mai aia ra.”​—1 Korinetia 15:20, 23.

16. Eaa te akapapu anga tei rauka ia tatou e aea te tuakaouanga ki te rangi e tupu ei?

¹⁶ Te oronga maira te au tuatua a Paulo i te akakite anga e aea te tuakaouanga ki te rangi e tupu ei. Ka tupu te reira i te tuatau e mama mai ei a Karaiti. Kua roa te tuatau, te akapapu anga te Au Kite o Iehova mei te Pipiria i to Karaiti “mama mai” anga tei akamata i te 1914. Te noo nei rai tatou i te tuatau o tona “mama” anga mai e te openga o teia akatereanga kino.

17, 18 Eaa te ka tupu ki etai pae o te aronga akatainuia i te tuatau o to Karaiti mama anga mai?

¹⁷ Te akamārama maata maira te Pipiria no runga i te tuakaouanga ki te rangi: “Kare au i inangaro e kia kore kotou e kite i te tuatua i te aronga i topa i te moe nei . . . Kua akarongo oki tatou e i mate a Iesu e i tu akaou akera ki runga, koia katoa te aronga e moe ki roto ia Iesu nei, na te Atua ïa e akaoki mai ma ia katoa . . . ko tatou ko te aronga e ora ko te toe i te ao, ka rokoia mai ei e te Atu, kare e na mua i te aronga e moe nei. Ko te Atu uaorai oki te ka eke mai mei te rangi mai ma te maeva, ma te reo . . . e te aronga i mate i roto i te Mesia ra, te ka tu mai ana ïa ki runga. E muri ake, ko tatou ko te aronga ora e toe ra, e rave katoaia mai e ratou katoa i reira, ka apaiiaʼi ki runga ki roto i te tiao, kia aravei atu i te Atu ki roto i te reva nei, ka noo mou atu ei tatou i vaitata uao i te Atu e tuatau ua atu.”​—1 Tesalonia 4:13-17.

¹⁸ Ka akamata te tuakaouanga mua i muri ake i to Karaiti mama anga mai. Te aronga akatainuia e ora ra i te tuatau o te mate maata “ka apaiiaʼi ki runga ki roto i te tiao.” (Mataio 24:31) Eaa te aiteanga o te reira? Te aronga te “ka apaiiaʼi ki runga” e “koia katoa te aronga e moe” i te mate, koia oki, kare ratou e vai mate ua no tetai tuatau roa. Mari ra, me mate ratou, “e ope ra tatou i te akatu keia, Kare e mamia, mei te kamo anga mata nei, kia tae ki te pu openga ra.”​—1 Korinetia 15:51, 52.

19. Eaa te ‘tuakaouanga meitaki rava’?

¹⁹ I teia rā, kare te maata anga o te au Kerititiano tiratiratu i akatainuia e kare i ikiia kia tutara ma Karaiti i te rangi. Mari ra, te tapapa atura ratou ki “taua rā o te Atu ra” ko Iehova. Kare e tangata okotai i  kite aea te openga e tae mai ei, inara te akaari maira te akapapu anga e te vaitata maira te reira. (1 Tesalonia 5:1-3) Me tae mai te ao ou o te Atua, ka tupu tetai tuakaouanga tuke. A te reira taime, ka akatuakaouia mai te tangata kia ora i te enua nei e ka rauka te manakonakoanga kia vai tiamā e kare e mate akaou. E ‘tuakaouanga meitaki rava’ teia i te au tuakaouanga o te aronga tei akatuia mai i te tuatau i topa, inara kua mate akaou i muri mai.​—Ebera 11:35.

20. Eaa tatou ka irinaki ei e ka akaaereia te tuakaouanga?

²⁰ Karanga te Pipiria e ka akatuakaouia mai te aronga te ka aere ki te rangi “i tona uaorai pupu.” (1 Korinetia 15:23) No reira ka rauka ia tatou i te irinaki e ka tupu rai te tuakaouanga i te enua nei ma tona uaorai pupu e te mako. Penei ka akakeu te reira ia tatou kia ui: Ka akatuakaouia mai ainei te aronga tei mate ua akenei kia vaitata ki te Tutaraanga Tauatini Mataiti o Karaiti e kia ārikiia e te au akaperepere tei kite ia ratou? Ka akatu vaveia mai ainei te au tane tiratiratu i taito tei riro ana ei arataki tukatau no te tauturu i te akaaere i te iti tangata o te Atua i roto i te ao ou? Eaa tei tupu ki te tangata kare rava i tavini ana ia Iehova? Aea e kiea ratou e akatuakaouia mai ei? E maata te au uianga ka tau tatou kia ui. Inara kare tatou e manamanata atu i teia au mea i teianei. E meitaki atu kia tiaki. Irinaki tatou e ka rekareka tatou i te kite akapeea a Iehova te raveanga i te reira.

21. Eaa toou manakonakoanga?

²¹ Tera ua, kia akaketaketa tatou i to tatou akarongo ki roto ia Iehova. Kua taputou aia na roto ia Iesu e te maara ra Iaia te aronga tei mate e ka ora akaou ratou. (Ioane 5:28, 29; 11:23) Ei akapapu anga katoa e ka akatuakaou mai a Iehova i tei mate, karanga a Iesu no Aberahama, Isaaka, e Iakoba e “te ora katoatoa ra iaia.” (Luka 20:37, 38) Te taka meitaki ra, e maata ta tatou tumu meitaki kia karanga, mei ta te apotetoro ko Paulo: “Te irinaki nei au ki te Atua, . . . e e tuakaouanga to tei mate.”​—Angaanga 24:15.