1. Eaa ta Mareta i papu e ka tupu ki tona tungane? (Akara i te tutu mua.)

TE AUE ra a Mareta, e oa piri mou e e pipi na Iesu. Kua mate tona tungane ko Lazaro. E akapumaana anga ainei tetai nona? Ae. Taputou a Iesu kiaia: “Ka tu akaou mai ïa to tungane.” E tika, kare teia au tuatua e akakore i tona tu maromaroa. Inara, kua irinaki a Mareta i ta Iesu taputou, e kua karanga: “Kua kite au e, ka tu akaou maira aia i te tuakaouanga i te rā openga ra.” (Ioane 11:20-24) Kua papu iaia e tuakaouanga tetai i te tuatau ki mua. Inara, kua rave a Iesu i tetai temeio. Kua akatuakaou aia ia Lazaro i taua rā rai.

2. Eaa koe ka irinaki ei mei ia Mareta rai?

² Kare e tumu no te tapapa atu ia Iesu me kore tona Metua kia akatuakaou mai i to tatou au akaperepere mei te mate i teia taime. Te papu ra ainei ia koe mei ia Mareta rai e ka tupu tetai tuakaouanga o to tatou au akaperepere i te tuatau ki mua? Penei kua takake atu taau tane me kore vaine, toou metua vaine, toou metua tane e te nga metua ruau e tetai tama akaperepereia. Kare e rauka ia koe i te tiaki kia takave,  tuatua atu e kia katakata ki teia aronga akaperepereia. Ma te mataora, mei ia Mareta rai, e au tumu meitaki taau kia karanga, ‘Kua kite au e ka tu akaou mai toku au akaperepere i te tuakaouanga.’ Noatu rai, e mea meitaki kia akamanako tetai Kerititiano i te au tumu ka irinaki tatou i te reira.

3, 4. Eaa ta Iesu i rave i ou akenei, e akapeea te reira te akamaroiroi anga ia Mareta?

³ Kua noo a Mareta ki Ierusalema, no reira kare aia i kite ana ia Iesu te akatuanga mai i te tamaiti a te vaine takaua i Naina i Galilea. Inara, penei kua rongo aia i te reira. E kua rongo katoa aia e kua akatu mai a Iesu i te tamaine a Iairo. Pouroa te tangata i ko i te are o te tamaine, “kua kite oki ratou e kua mate aia.” Noatu rai, kua mou a Iesu i tona rima e kua karanga: “E maine, ka tu.” E kua tu maira aia. (Luka 7:11-17; 8:41, 42, 49-55) Kite a Mareta raua ko Maria, e ka rauka ia Iesu i te rapakau i te maki. No reira, irinaki raua e naringa tei reira a Iesu, kare rai a Lazaro e mate. Inara kua mate aia i teianei, eaa i reira ta Mareta ka tapapa atu? E akamaara, kua karanga aia e ka ora akaou mai a Lazaro i te tuatau ki mua, “i te rā openga ra.” Eaa aia i papu ei? E eaa koe ka papu ei e ka tupu te tuakaouanga penei ka kapiti mai toou au akaperepere a te tuatau ki mua?

⁴ E au tumu meitaki teia kia rauka te akarongo i roto i te tuakaouanga. Ka uriuri tatou i tetai pae. Te tika, penei ka kite koe i te au manako i roto i te Tuatua a te Atua kare koe e akamanako putuputu ana, inara ka akaketaketa i toou akarongo e ka kite akaou koe i toou au akaperepere.

5. Eaa a Mareta i papu ei e ka akatuakaouia mai a Lazaro?

⁵ Kare a Mareta i karanga ana: ‘Te manakonako nei au e ka tu akaou mai toku tungane.’ Karanga ra aia: “Kua kite au e, ka tu akaou maira aia.” Eaa ra a Mareta i papu ei? No te mea kua kite aia i te au tuakaouanga tei tupu i mua ana. Penei kua kite aia i te reira i tona tamariki anga i te kainga e i ko i te sunago. Ka akara matatio tatou i teianei e toru au tuakaouanga tei taikuia i roto i te Tuatua Tapu.

6. Eaa te temeio ta Mareta i kite tikai?

⁶ Kua tupu te tuakaouanga mua i te tuatau i oronga ai te Atua i te mana ki te peroveta ko Elia kia rave i te au temeio. I te tua tokerau ia Iseraela, i roto i te oire ko Zarephata i Phenia, te vaira te vaine takaua e te putaua tei akamanuiri i te peroveta. I reira, kua rave a Iehova i tetai temeio. Kua akapapu aia e kare rava tana varaoa mata e te inu e pou kia ora ua atu raua. (1 Ariki 17:8-16) I muri akera, kua rokoia tana tamaiti e te maki e kua mate. Inara kua tauturu a Elia iaia. Iaia e amiri ra i te tamaiti, kua pure a Elia kia Iehova: “E taku Atua, e Iehova e, teia taku tuatua kia koe, e akaoki mai koe i te vaerua o teianei tamaiti ki roto iaia.” E kua tupu te reira! Kua akarongo mai te Atua ia Elia, e kua ora mai te tamaiti. Ko te tuakaouanga mua teia tei tataia i roto i te Pipiria. (E tatau ia 1 Ariki 17:17-24.) Papu, kua kite a Mareta i te reira tupuanga umere.

7, 8. (a) Akapeea a Elisaia te akapumaana anga i tetai metua vaine e aue ra? (e) Eaa te akapapu anga no Iehova, te tupu anga te temeio a Elisaia?

⁷ Te rua o te tuakaouanga tei tataia i roto  i te Pipiria, kua raveia e te peroveta ko Elisaia. I roto i te oire ko Sunema, te noo ra tetai vaine Iseraela kare ana tamariki. No tei akaari aia i te tu takinga meitaki kia Elisaia, kua akameitaki a Iehova i teia vaine e tana tane ruau na te oronga anga i tetai tamaiti na raua. Inara, i nga mataiti i muri mai, kua mate te tamaiti. Akamanako ana i te tu maromaroa o teia metua vaine. No te pakari o tona aue anga, kua aaere aia no tetai 30 kiromita te mamao i te kimi ia Elisaia i te maunga i Karamela. Kua tono a Elisaia i tona tavini ko Gehazi ki Sunema i mua ake ia ratou kia akatu mai i te tamaiti. Inara kare i rauka ia Gehazi i te akaora mai iaia. No reira kua tae mai te metua vaine ma te aue, raua ko Elisaia ki te kainga.​—2 Ariki 4:8-31.

⁸ Kua aere a Elisaia ki roto i te are te ngai tei reira te tamaiti tei mate, e kua pure. Kua pau mai a Iehova i te pure a Elisaia e kua akaora mai i te tamaiti na roto i te temeio. Te kite anga te metua vaine i tana tamaiti, kua rekareka tikai aia! (E tatau ia 2 Ariki 4:32-37.) Penei kua maara iaia te au tuatua i roto i ta Hana pure. Kare a Hana i anau tamariki kia tae roa ki te taime i akameitaki ei a Iehova iaia ma te tamaiti, ko Samuela. I reira kua akapaapaa a Hana ia Iehova “ko tei apai ki raro i te vaarua, e tei akatu mai ki runga.” (1 Samuela 2:6) Na te akatuanga mai i te tamaiti i Sunema, kua akapapu te Atua e e mana tona no te akatuakaou mai i tei mate.

9. Akataka mai i te toru o te tuakaouanga tei tataia i roto i te Pipiria.

⁹ Kua tupu akaou tetai tupuanga umere i muri ake te mateanga a Elisaia. Kua tere atu i te 50 mataiti tona tavini anga ei peroveta, e oti kua makiia aia e “te maki i mate ei aia ra.” Kua pou tetai tuatau, e ivi ua to Elisaia tei vai mai. I tetai rā, te tanu ra etai ngati Iseraela i tetai tangata. Kua kite atu ratou i te au enemi e aere viviki maira. Kua tauta te au ngati Iseraela i te oro viviki atu, no reira kua titiri ratou i te tangata mate ki roto i te vaarua o Elisaia. Te karanga ra te Pipiria: “E tukuia atura i te au ivi o Elisaia, te ora ua aia ra, e kua tu ua maira ki runga i tona vaevae.” (2 Ariki 13:14, 20, 21) Te akapapu maira teia au akapapaanga kia Mareta e e mana ririnui to te Atua i rungao i te mate. Ka akapapu katoa teia kia koe i te mana maata o te Atua, e kare i kotingaia te reira.

10. Akapeea a Petero te tauturu anga i tetai tuaine Kerititiano tei mate?

¹⁰ Tei roto katoa i te au Tuatua Tapu Ereni Kerititiano te au tuakaouanga tei raveia e te au tavini tiratiratu o te Atua. Kua taiku takere tatou i te au tuakaouanga ta Iesu i rave i te oire o Naina e i ko i te kainga o Iairo. I muri roa mai, kua akatuakaou mai te apotetoro ko Petero ia Doreka, tei kapiki katoaia ko Tabita. Kua aere mai a Petero ki roto i te pia te ngai tei reira to Tabita kopapa, kua pure aia, e kua karanga: “E Tabita, ka tu.” “Kua ora rava  akera” aia e kua tuku atura a Petero iaia ki te au Kerititiano i reira. Kua riro teia tupuanga ei akapapu anga ki te maata anga i roto i te reira oire “tei akarongo i te Atu.” Ka rauka i teia au pipi ou i te akakite ki tetai ke te nuti meitaki no runga ia Iesu e te akakite katoa ki te katoatoa e ka rauka ia Iehova i te akatuakaou mai tei mate.​—Angaanga 9:36-42.

11. Eaa ta te taote ko Luka i akakite no te mapu tane, e akapeea te reira tupuanga i te akakeu anga i tetai ke?

¹¹ E aronga ke atu tetai tei kite mata i tetai akaou tuakaouanga. I tetai taime ke mai, tei ko te apotetoro ko Paulo i tetai uipaanga i runga i tetai pia are i Teroa, tei kiteaia i teia tuatau e ko te tua opunga o Turkey. Kua tuatua a Paulo e tae ua atu ki te turuaipo. Te akarongo ua ra tetai mapu tane ko Eutiko tona ingoa i runga i te ngutupa maramarama. Inara kua varea aia e te moe e kua topa mei te toru o te taua ki raro. Penei ko Luka te tangata mua tei tae kia Eutiko. Ei taote, kua kite aia kare teia mapu i kinokino ua. Mari ra kua mate aia! Kua aere katoa mai a Paulo ki raro. Kua takave aia ia Eutiko e kua akatupu i tetai mea umere ki te katoatoa, te na ko anga: “Te vai nei te aʼo i roto iaia.” Kua riro teia temeio ei akakeu tikai i te aronga tei kite i te reira. Te kite anga e kua mate teia mapu e kua akatuakaouia mai, “mareka rava akera ratou.”​—Angaanga 20:7-12.

12, 13 No runga i te au tuakaouanga ta tatou i uriuri, eaa te au uianga ta tatou ka ui?

¹² Ka riro te au tuakaouanga ta tatou i uriuri ei akapapu anga kia koe e Mareta. Ka papu katoa ia tatou no te Atua, tei oronga mai i te ora, e ka rauka iaia i te akaora akaou mai i tetai tangata mate. E mea mareka anga i te kite e tei reira tetai tavini tiratiratu o te Atua, mei ia Elia, Iesu, e Petero i taua au tuakaouanga. E kua tupu te reira i te tuatau i rave ei a Iehova i te au temeio. No reira, akapeea te aronga tei mate i tetai tuatau ke, i te tuatau kare te au temeio i raveia ana? Ka rauka ainei i te  au tane e te au vaine tiratiratu i te tapapa e ka akatuakaou mai te Atua i tei mate a te tuatau ki mua? Ka papu ainei ia ratou mei ia Mareta rai, i tona karanga anga no tona tungane: “Kua kite au e, ka tu akaou maira aia i te tuakaouanga i te rā openga ra”? No teaa aia ka irinaki ei e e tuakaouanga tetai a te tuatau ki mua, e no teaa koe ka irinaki katoa ai?

¹³ E maata te au papaanga i roto i te Tuatua a te Atua tei akaari e kua kite takere tona au tavini tiratiratu e ka tupu te tuakaouanga a te tuatau ki mua. Ka uriuri ana tatou i tetai.

14. Eaa ta te papaanga o Aberahama e apii maira ia tatou no runga i te tuakaouanga?

¹⁴ Akamanako ana i ta Iehova i pati kia Aberahama kia rave kia Isaaka, te tamaiti tana i tiaki no tetai tuatau roa. Karanga a Iehova: “Ka rave i taau tamaiti i tenana, i taau tamaiti okotai ra ko Isaaka, taau e akaperepere na, ka aere ki te enua ra kia Moria, ka apai mai ei iaia i reira, ei atinga karakaratio.” (Genese 22:2) Eaa toou manako te rongo anga a Aberahama i teia akaueanga? Kua taputou a Iehova e ka akameitakiia te pa enua katoatoa na roto i te uanga a Aberahama. (Genese 13:14-16; 18:18; Roma 4:17, 18) Pera katoa, karanga a Iehova e ka “na roto i ta Isaaka” te akameitakianga. (Genese 21:12) Inara akapeea te reira te tupuanga me akaatinga a Aberahama i tana tamaiti? Kua akauruia a Paulo kia akamārama e kua irinaki a Aberahama e ka rauka i te Atua i te akatuakaou mai ia Isaaka. (E tatau ia Ebera 11:17-19.) Inara, kare te Pipiria e karanga ra e kua manako a Aberahama e ka akaora vivikiia mai a Isaaka, penei i nga mea ora, okotai rā, me kore okotai epetoma. Kare a Aberahama i kite aea tana tamaiti e akatuakaouia mai ei. Mari ra, kua irinaki aia e ka akaora akaou mai a Iehova ia Isaaka.

15. Eaa te manakonakoanga tei rauka i te tangata tiratiratu ko Iobu?

¹⁵ Kua kite katoa te tangata tiratiratu ko Iobu e e tuakaouanga tetai a te tuatau ki  mua. Kua kite aia me tipuia tetai tumu rakau ki raro, ka tupu akaou te reira e ka riro ei tumu rakau ou. Inara kare te reira e tupu ki te tangata. (Iobu 14:7-12; 19:25-27) Me mate tetai tangata, kare e rauka iaia i te akaora akaou iaia uaorai. (2 Samuela 12:23; Salamo 89:48) E tika rai, kare te aiteanga e kare e rauka i te Atua i te akatuakaou mai i tetai tangata. Te tika, irinaki a Iobu e ka maara mai a Iehova iaia. (E tatau ia Iobu 14:13-15.) Kare a Iobu i kite aea teia e tupu ei i te tuatau ki mua. Noatu rai, irinaki a Iobu e ka rauka e ka maara i Tei Anga mai i te tangata i te akatuakaou mai iaia.

16. Eaa te akamaroiroi anga ta tetai angera i oronga kia Daniela?

¹⁶ Akamanako akaou ana i tetai tangata tiratiratu, ko Daniela. E tavini tiratiratu aia no Iehova i tona oraanga katoa, e kua turu a Iehova iaia. I tetai atianga, kua kapiki te angera ia Daniela e “tangata akaperepere maataia ra,” e kua akakite kiaia “kia ora na koe” e “e akamaroiroi.”​—Daniela 9:22, 23; 10:11, 18, 19.

17, 18 Eaa ta Iehova i taputou kia Daniela?

¹⁷ Te vaitata anga a Daniela ki te 100 mataiti e te vaitata maira tona openga, penei kua manako aia eaa te ka tupu kiaia. Kua tapapa ainei a Daniela kia ara mai e kia ora akaou mai aia? Tika rava! I te openga o te puka a Daniela, ka tatau tatou ta te Atua i taputou kiaia: “E aere ra koe i toou ra aerenga, e tae ua atu ki te openga: ka akaangaroi oki koe.” (Daniela 12:13) Kua kite meitaki a Daniela e te akangaroi ra tei mate e “kare e kimianga, kare oki e kite, kare oki e pakari, i roto i te vaarua taau e aere na.” (Koheleta 9:10) Inara, kare ko teia te openga no Daniela. Kua oronga a Iehova i tetai taputou manea no te tuatau ki mua kiaia.

¹⁸ Karanga te angera a Iehova kiaia: “E ka tu atu rai koe i to tuanga i te openga o te au rā ra.” Kare a Daniela i kite tikai aea te reira e tupu ei. Kua mārama aia e ka mate aia e ka akangaroi. Inara te rongo anga a Daniela i te taputou, “E ka tu atu rai koe i to tuanga,” kua mārama aia e ka akatuakaouia mai aia i te tuatau ki mua. Ka tupu te reira i muri roa ake i tona mateanga, “i te openga o te au rā ra.” Me kore, kia tau ki te Jerusalem Bible: “Ka tu rai koe ei tuanga naau i te tuatau openga.”

19, 20 (a) Eaa te pirianga o te au tupuanga ta tatou i uriuri ki ta Mareta i tuatua kia Iesu? (e) Eaa ta tatou ka uriuri i te atikara ka aru mai?

¹⁹ Taka meitaki, e au tumu meitaki to Mareta kia papu no tona tungane tiratiratu e “ka tu akaou maira aia [a Lazaro] i te tuakaouanga i te rā openga ra.” Ta Iehova taputou kia Daniela, pera katoa to Mareta akarongo ketaketa no tetai tuakaouanga i te tuatau ki mua, ka rauka te akapapu anga no tatou i teia tuatau. Ka tupu te tuakaouanga.

²⁰ Kua apii tatou i te au tuakaouanga tikai tei raveia i te tuatau taito. Te akapapu maira teia e ka ora akaou tei mate. Kua kite katoa tatou e te tapapa atura te au tane e te au vaine tei tavini tiratiratu i te Atua, i tetai tuakaouanga a te tuatau ki mua. Inara te vaira ainei tetai ua atu akapapu anga e ka tupu te tuakaouanga i muri roa ake i te tuatau i taputouia ai te reira? Me koia ia, ka riro te reira ei tumu maata kia tapapa atu i te tuakaouanga a te tuatau ki mua. Inara aea te reira e tupu ei? Ka uriuri tatou i teia au manako i te atikara ka aru mai.