E te au Mapu—“E Rave Akaoti ua i to Kotou Uaorai Ora”
“Kare akenei kotou i tivata i te akono . . . e rave akaoti ua i to kotou uaorai ora ma te mataku e te rutetetete.”—PHILIPI 2:12.
1. Eaa te papetitoanga i riro ei ei takainga puapinga? (Akara i te tutu mua.)
I TE au mataiti ravarai e tauatini ua atu aronga apii Pipiria e papetitoia ana. Te maata anga e au tamariki, e au mapu me kore e aronga rikiriki. Penei kua utuutuia mai ratou i roto i te tuatua mou. Ko koe ainei tetai? Me ko koe tetai, e mea meitaki taau i rave. Ka anoanoia te au Kerititiano kia papetitoia. E ka anoanoia te papetitoanga kia rauka te ora e kia noo e tuatau ua atu.—Mataio 28:19, 20; 1 Petero 3:21.
2. Eaa ra koe kare e mataku i te akatapu i toou oraanga kia Iehova?
2 I toou papetito angaia, kua akamata a Iehova i te akameitaki ia koe na roto i te au mataara tukeke. Inara e au apainga katoa taau ka rave. Na roto i teea mataara? I te rā i papetitoia ai koe, kua ui te taeake tei oronga i te ako papetito: “Akatumuia ki runga i te atinga o Iesu Mesia, kua tataraara ainei koe i taau au ara e kua akatapu i toou oraanga kia rave i to
Iehova anoano?” Kua pau atu koe, ae. Kua taputou koe kia inangaro ia Iehova e kia riro taau tavini anga iaia ei mea puapinga rava atu i roto i toou oraanga. Ka tataraara ainei koe i teia taputou naau? Kare rava! Kare rava koe e tataraara i te tuku ia Iehova kia arataki i toou oraanga. Te aronga kare i kite ia Iehova, e tuanga ratou no to Satani ao. Kare te Tiaporo e manako mai ana ia ratou me kore ia koe. E tika, ka mataora aia me ngere koe i te manakonakoanga kia noo e tuatau ua atu no te mea kua iki koe iaia e kua patoi ia Iehova.3. Akapeea a Iehova te akameitakianga ia koe no te mea kua akatapu koe ia koe uaorai kiaia?
3 E akamanako ana akapeea a Iehova te akameitakianga ia koe no te mea kua akatapu koe ia koe uaorai kiaia e kua papetitoia. Kua oronga koe i toou oraanga kia Iehova, no reira ka rauka ia koe i te tuatua ma te papu: “Tei iaku a Iehova, kare au e mataku; eaa ta te tangata kia rave mai iaku?” (Salamo 118:6) Kare e akangateitei anga maata atu i te piri atu ki te Atua e te kite anga e te ngakau parau maira aia ia koe.
TAAU UAORAI APAINGA
4, 5. (a) Eaa tatou ka karanga ai ko te akatapuanga e apainga teia naau uaorai? (e) Eaa te au akaaoanga ka tupu ki te au Kerititiano noatu to ratou mataiti?
4 Auraka koe e akariro i toou pirianga kia Iehova mei tetai tutaki anga tereponi apaipai rai ta toou nga metua i tutaki. Noatu e te noo ra rai koe ki ko i toou nga metua, ko toou pirianga kia Iehova e apainga te reira naau uaorai. Eaa ra i puapinga ai kia akamaara i te reira? Kare tatou i kite tikai akapeea to tatou akarongo me timataia a te tuatau ki mua. Ei akaraanga, penei kua papetitoia koe i mua ake ka riro mai koe ei mapu. Inara i teianei e mapu koe, e au manako ou e e au manamanata ou toou. Karanga tetai tamaine mapu: “Te maata anga o te taime kare tetai tamaiti e akamoupuku noatu e Kite aia no Iehova me kare aia e kai i te keke akamaara anga rā anau i te apii. Inara i te au mataiti ka aereia me pakari mai te pirianga ainga, ka anoanoia aia kia papu meitaki e ko te akarongo i te ture a Iehova te ikianga meitaki rava atu.”
5 Kare ko te tamariki anake ua te ka kite i te au akaaoanga ou. Pera katoa te aronga kua papetitoia i to ratou mamaata anga ka timata katoaia to ratou akarongo na roto i te tu kare ratou e tapapa atu. Penei ka tupu te au timataanga i roto i to ratou akaipoipoanga, oraanga kopapa me kore ta ratou ngai angaanga. Noatu to tatou mataiti, ka anoanoia tatou tataki tai kia vai tiratiratu kia Iehova i roto i te au turanga tukeke.—Iakobo 1:12-14.
6. (a) Eaa te aiteanga e kua papu tikai toou akatapuanga kia Iehova? (e) Eaa taau ka apii mai mei ia Philipi 4:11-13?
6 Kia tauturu ia koe kia vai tiratiratu, e akamaara ua rai e ko taau taputou kia Iehova e mea papu tikai te reira. Ko te aiteanga kua taputou koe i te tavini i Tei Teitei noatu eaa te ka tupu, e noatu me ka akamutu toou au oa e toou nga metua i te tavini iaia. (Salamo 27:10) I roto i te au turanga ravarai, kia papu i te pati i ta Iehova tauturu kia rauka ia koe i te akono i taau taputou.—E tatau ia Philipi 4:11-13.
7. Eaa te aiteanga kia rave akaoti i toou uaorai ora “ma te mataku e te rutetetete”?
7 Te inangaro maira a Iehova ia koe ei oa nona. Inara ka anoanoia te tu maroiroi kia Philipi 2:12: “E rave akaoti ua i to kotou uaorai ora ma te mataku e te rutetetete.” Te aiteanga ka anoanoia tatou kia akamanako meitaki akapeea tatou me piri vaitata e kia vai tiratiratu kia Iehova noatu eaa te ka tupu. Kare tatou e manako ua e ka rauka ia tatou i te rave i teia. E akamaara kare tetai pae tei tavini ana i te Atua no tetai tuatau roa i vai tiratiratu. Eaa te au mea te ka tauturu ia koe i te rave akaoti i toou uaorai ora?
ketaketa toou pirianga kiaia e kia rave akaoti ua i toou uaorai ora. Karanga aE PUAPINGA TE APII PIPIRIA
8. Eaa te ō maira ki roto i taau apii naau uaorai? Eaa ra i puapinga ai te reira?
8 Kia riro mai ei oa no Iehova, ka anoanoia tatou kia akarongo e kia tuatua kiaia. Te mataara maata no tatou kia akarongo kia Iehova koia na te apiianga i te Pipiria. Kapiti mai te tatau anga e te akamanako oonu anga i te Tuatua a te Atua e te au puka Pipiria. Inara ko te apii Pipiria, kare ua kia tamou ngakau i te au tika mei taau ka rave i roto i tetai tarere i te apii. Mari ra, ka aite te reira mei tetai tere mataora me tutaka aere kia kite i te au mea ou no runga ia Iehova. Ka akavaitata atu koe ki te Atua, e ka akavaitata katoa mai aia kia koe.—Iakobo 4:8.
Mei teaa te meitaki o toou pirianga kia Iehova? (Akara i te parakarapa 8-11)
9. Eaa te au apinga apii te ka tauturu ia koe i roto i taau uaorai apii?
9 E maata te au apinga apii ta te akaaerenga a Iehova i oronga mai i te tauturu ia koe i taau apii. Ei akaraanga, e au tuanga apii tetai ko te “Bible Study Activities” i roto i te tuanga “Teenagers” o te jw.org te ka tauturu ia koe kia taangaanga i taau i apii mai mei te au tua Pipiria. Ka kite katoa koe i runga i te jw.org, i te au arataki anga apii “What Does the Bible Really Teach?” Ka tauturu teia ia koe i te akamatutu i toou akarongo e kia akamārama i toou irinakianga ki tetai ke. Ka kite katoa koe i tetai au manako ke no taau uaorai apii i roto i te atikara “Young People Ask . . . How Can I Make Bible Reading Enjoyable?” i roto i te makatini Awake! o Aperira 2009. E puapinga te apii e te akamanako oonu anga no te rave akaoti i toou uaorai ora.—E tatau ia Salamo 119:105.
E PUAPINGA TE PURE
10. Eaa tetai Kerititiano tei papetitoia ka anoanoia ai kia pure?
Me manako taitaia koe no tetai ua atu tumu, “e tuku koe i taau apainga kia Iehova”
10 Me apii tatou i te Pipiria, te akarongo ra tatou kia Iehova, e me pure tatou te tuatua ra tatou kiaia. Eiaa tatou e manako i te pure ei peu me kore ei ‘apinga manamana’ kia manuia tatou. Na roto i te pure, te tuatua tika ra tatou ki Tei Anga mai. E akamanako: Te inangaro maira a Iehova i te akarongo i taau ka tuatua! (E tatau ia Philipi 4:6.) No reira me manako taitaia koe no tetai ua atu tumu, karanga te Pipiria “e tuku koe i taau apainga kia Iehova ra.” (Salamo 55:22) E mirioni ua atu au taeake e te au tuaine te ka akakite atu e kua tauturu teia ako ia ratou. Ka tauturu katoa teia ia koe!
11. Eaa koe ka akameitaki ua ai ia Iehova?
11 Inara, eiaa tatou e pure me ka inangaro ua tatou ia Iehova kia tauturu ia tatou. Te akamaara maira te Pipiria ia tatou: “E kia mareka oki kotou.” (Kolosa 3:15) Tetai taime ka manata roa tatou i to tatou au manamanata e kare i kite i te au mea meitaki i rauka ia tatou. No reira e tamata i teia: I te au rā ravarai, e akamanako e toru au apinga kia akameitaki koe, e oti e akameitaki ia Iehova no te reira. Karanga a Abigail e mapu tei papetitoia i tona 12 mataiti: “Toku manako kia orongaia ta tatou akameitakianga kia Iehova ki rungao i tetai ua atu tangata i te ao katoa e pini ua ake. Kia akameitaki ua rai tatou iaia i tetai ua atu atianga no te au mea aroa tana i oronga mai.” Tetai taime ka ui a Abigail kiaia uaorai i teia uianga tana i akarongo: “Me ara mai au apopo ma te au mea anake taku i akameitaki ia Iehova i teia rā, eaa tikai taku i rauka?” *—Akara i te tataanga rikiriki i raro.
TE PUAPINGA O TAAU I KITE MAI
12, 13 Eaa taau i kite tikai no runga i to Iehova meitaki, e eaa ra i puapinga ai kia akamanako akapeea a Iehova te tauturu anga ia koe?
12 Kua tauturu ana a Iehova i te Ariki ko Davida kia akakoromaki i te au turanga ngata. No reira kua tuatua a Davida mei tana i kite mai: “Ka tongi ana kia kite i te meitaki o Iehova! e ao to te tangata i irinaki iaia ra.” (Salamo 34:8) Te akaari maira teia irava e ka anoano tatou kia kite tikai i to Iehova meitaki. Me tatau koe i te Pipiria, e ta tatou au puka e me aere ki ta tatou uipaanga, ka kite koe akapeea te Atua te tauturu anga i tetai ke kia vai tiratiratu. Inara me ketaketa mai toou pirianga kia Iehova ka anoanoia koe kia kite akapeea a Iehova te tauturu anga ia koe. Eaa taau i kite tikai no runga i te meitaki o Iehova?
Kia akaperepere ua rai koe i te tuanga ta Iehova i oronga kia koe i roto i tana akaaerenga
13 Kua kite tikai te au Kerititiano ravarai i to Iehova meitaki na roto i tetai turanga takake. Kua pati mai aia ia tatou tataki tai kia akavaitata atu kiaia e ki tana Tamaiti. Karanga a Iesu: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” (Ioane 6:44) Toou manako kua akavaitata ainei a Iehova ia koe kiaia? Me kore i toou manako, ‘Kua akavaitata ainei a Iehova i toku nga metua kiaia e te aru ua nei au ia raua’? E akamaara i te taime i akatapu ei koe ia koe uaorai kia Iehova e kua papetitoia, kua rauka i reira ia koe tetai pirianga takake kiaia. Te akakite maira te Pipiria: “Te inangaro ra tetai tangata i te Atua, koia tei kiteia mai e ia.” (1 Korinetia 8:3) Kia akaperepere ua rai koe i te tuanga ta Iehova i oronga kia koe i roto i tana akaaerenga.
14, 15 Akapeea te angaanga tutu aere me tauturu ia koe kia ketaketa te akarongo?
14 Ka kite katoa koe i to Iehova meitaki me oronga mai aia i te tu ngakau toa kia koe kia tuatua no runga i toou akarongo ki tetai ke, i te ngai tutu aere me kore i te apii. Kare i te mea māmā i te tutu aere ki toou au oa apii. Penei ka manata koe e akapeea ratou me ariu mai. Ka riro te reira ei mataku anga kia koe kia akamārama i toou irinakianga i mua i tetai urupu tangata. Eaa te ka tauturu ia koe?
15 Akamanako ana eaa te tumu i irinaki ei koe i taau i irinaki. Me te vaira te au arataki anga apii i runga i te jw.org i roto i toou reo, e taangaanga i te reira. Ka tauturu te reira ia koe kia akamanako i taau e irinaki ra, te tumu i irinaki ei koe i te reira, e akapeea koe me akamārama i toou irinakianga ki tetai ke. Me papu meitaki ia koe i teia au mea e kua akapapa meitaki, ka inangaro rai koe i te tutu aere no runga ia Iehova.—Ieremia 20:8, 9.
16. Akapeea e rauka ai ia koe te ngakau toa kia tuatua no runga i toou irinakianga?
16 Noatu kua akapapa meitaki rai koe, penei ka ru rai koe i te akamārama atu i toou irinakianga. Karanga tetai tuaine e 18 ona mataiti, tei papetitoia i tona 13 mataiti: “Kua kite au i taku e irinaki nei, inara i tetai taime ka ngata iaku i te tuatua i toku au manako.” No reira kua tauta aia i te tuatua i te tuatua mou na roto i te tu natura e te maru. Karanga aia: “Ka tuatua va ua tona au oa apii no runga i te au apinga ta ratou e rave ra. Ka rauka katoa iaku i te rave i te reira. No reira kua taiku ua au i tetai mea mei, ‘Te apii ra au i te Pipiria i tera atu rā, e te . . . ’ E oti ka oronga au i te manako maata o taku tua. Noatu e kare te manako no runga i te Pipiria, inara te maata anga o te taime ka inangaro ratou i te kite eaa taku e rave ana me apii au i te Pipiria. Tetai taime ka ui mai ratou i tetai uianga no runga i te reira. Me taangaanga
putuputu au i teia ravenga, ka māmā atu te reira. E i muri mai, ka mataora ua rai au!”17. Eaa atu tetai ka tauturu ia tatou kia tuatua ki tetai ke?
17 Me kite tetai ke e te inangaro ra e te akangateitei ra koe ia ratou, ka māmā ua ia ratou i te akangateitei ia koe e toou irinakianga. Karanga a Olivia, e 17 ona mataiti tei papetitoia i tona tamariki anga: “E mataku ua ana au me akamata i tetai pukapuka anga Pipiria, ka manako mai te tangata e kua nenevaia au.” Inara kua taui aia i tona manako no runga i te reira. Ma te kore e akamanako maata ki runga i tona tu mataku, kua manako aia: “E maata te au mapu kare a ratou apinga i kite no runga i te Au Kite o Iehova. Ko tatou ua rai te Au Kite ta ratou i kite. No reira ka riro to tatou tu i te akakeu ia ratou. Akapeea i reira me e akama to tatou me kore kare e rauka ia tatou i te tuatua no runga i to tatou akarongo, akapeea me ka tapupu tatou i te tuatua ua atu? Penei ka akara mai ratou e kare tatou e ngakau parau ana e koai tatou. Penei kare ratou e āriki meitaki mai no to tatou tu papu kore. Inara, me tuatua tatou ma te maru e te papu i ta tatou e irinaki ra ei pukapuka anga, papu roa e ka akangateitei mai ratou ia tatou.”
E RAVE AKAOTI I TOOU UAORAI ORA
18. Eaa taau ka anoanoia kia rave ei akaoti i toou uaorai ora?
18 Kua kite mai tatou e e apainga pakari teia kia rave akaoti i toou uaorai ora. I te rave atu i teia, ka anoanoia koe kia tatau e kia akamanako oonu i te Tuatua a te Atua, te pure kia Iehova, e kia akamanako oonu i te au mea pouroa tana i rave i te tauturu ia koe. Me rave koe i teia, ka tauturu te reira ia koe kia papu meitaki e e Oa a Iehova noou. Ka akakeu teia ia koe kia tuatua ki tetai ke no runga i toou irinakianga.—E tatau ia Salamo 73:28.
19. Eaa i puapinga maata ai kia rave akaoti i toou uaorai ora?
19 Karanga a Iesu:“Ko tei inangaro i te aru mai iaku, e akaruke aia iaia uaorai, e rave i tana satauro, ka aru mai ei iaku.” (Mataio 16:24) Ae, kia aru ia Iesu, ka anoanoia te au Kerititiano tataki tai kia akatapu iaia uaorai kia Iehova e kia papetitoia. Inara ko te akamata anga teia o tetai oraanga meitaki rava atu i teianei, e ka taki atu te reira ki te ora mutukore i roto i te ao ou o te Atua. No reira e rave i te au mea ravarai ka rauka ia koe kia rave akaoti i toou uaorai ora!
^ para. 11 No tetai au manako ke, akara i te “Young People Ask—Why Should I Pray?” e te pepa apii i runga i te jw.org.