1, 2. Eaa ra tetai au metua ka manata ai me inangaro ta ratou tamariki i te akatapu ia ratou uaorai kia Iehova e kia papetitoia?

E TAUATINI ua atu aronga apii Pipiria tei akatapu ia ratou uaorai kia Iehova e kua papetitoia. Te maata anga e au mapu tei utuutuia mai i roto i te tuatua mou e kua iki i te oraanga meitaki rava atu. (Salamo 1:1-3) Me e metua Kerititiano koe, penei ka tapapa atu koe ki te rā e papetitoia ai taau tamaiti me kore tamaine.​—Akaaite ia 3 Ioane 4.

² Inara, ka manata rai koe. Penei kua kite ana koe i tetai au mapu kua papetitoia inara i muri mai kua akamata i te ekoko me e meitaki rai to te Atua turanga no ratou. Kua akaruke tetai pae ia ratou i te tuatua mou. No reira penei ka manata koe e ka akamata taau tamaiti me kore tamaine i te tavini ia Iehova e oti penei ka ngaro tona inangaro mua no te tuatua mou. E penei ka riro mai aia mei tetai o te au Kerititiano i Ephesia i te anere mataiti mua. Karanga a Iesu no ratou: “I te mea kua vaoo koe i to inangaro mua ra.” (Apokalupo 2:4)  Akapeea koe me tauturu i taau tamaiti kia vai ketaketa ua tona inangaro e kia ‘pakari e tae ua atu ki te ora’? (1 Petero 2:2) Ka apii tatou mei te akaraanga o Timoteo.

3. (a) Akapeea a Timoteo te riro mai anga ei Kerititiano, e eaa tana i rave mei tana i apii mai? (e) Eaa te au tuanga no te apiianga e toru ta Paulo i akakite kia Timoteo?

³ Kua atoro mua te apotetoro ko Paulo ia Lusetera i te mataiti 47. Penei ko te taime teia i apii ei a Timoteo i tona mapu anga i te au apiianga a Iesu. Kua taangaanga aia i tana i apii mai, e e rua mataiti i muri mai kua akamata aia i te aru ia Paulo. Mei te 16 mataiti i muri mai, kua tata a Paulo kia Timoteo: “Kia mou marie ra koe i taau i apii ra, i tei tukuia atu ia koe ra, kua kite oki koe i toou kite i kite ei koe ra; E mei to tamariki anga mairai toou kite i te tuatua tapu i tataia ra [te au Tuatua Tapu Epera], ko te tuatua ïa i pakari ei koe e tae ua atu ki te ora i te akarongo i te Mesia ra ia Iesu.” (2 Timoteo 3:14, 15) Akara ana i ta Paulo i karanga kia Timoteo, e kua (1) kite aia i te tuatua tapu i tataia ra, (2) kua tukuia atu kia irinaki i te au mea tana i apii mai, e te (3) kua pakari e tae ua atu ki te ora i te akarongo i te Mesia ra ia Iesu.

4. Eaa taau i taangaanga no te apii i taau tamariki rikiriki? (Akara i te tutu mua.)

⁴ Ei metua Kerititiano, ka inangaro koe i taau tamaiti kia kite i te au tuatua tapu i tataia, tei kapiti mai te au Tuatua Tapu Epera e te Tuatua Tapu Ereni Kerititiano. Ka rauka katoa i te au tamariki rikiriki i te apii no runga i te au tangata e te au tua i roto i te Pipiria. E maata te au puka, poroutia e te au vitio ta te akaaerenga a Iehova i oronga mai te ka rauka i te au metua i te taangaanga i te tauturu i ta ratou tamariki. Tei roto ainei tetai o teia au mea i toou reo? Ka anoanoia taau tamaiti kia kite i te Pipiria kia rauka iaia i te akamatutu i tona pirianga kia Iehova.

5. (a) Eaa te aiteanga kia “tukuia atu” kia irinaki? (e) Akapeea tatou i kite ei e kua tukuia atu kia Timoteo kia irinaki i te nuti meitaki no runga ia Iesu?

⁵ Kare e rava ua te apii i taau tamariki no runga i te au tangata e te au tua o te Pipiria. Akamaara e kua “tukuia atu” kia Timoteo kia irinaki aia. Te aite anga o te tuatua Ereni ta Paulo e taangaanga nei koia oki “kia akapapu” me kore “kia papu tikai e kua tika tetai apinga.” Kua apii a Timoteo i te au Tuatua Epera “mei to tamariki anga mairai” koia oki, mei tona rikiriki anga mai. I muri mai, kua papu meitaki iaia e ko Iesu te Mesia. Kua ketaketa tikai to Timoteo akarongo e kua papetitoia i te rave angaanga kia Paulo ei mitinari.

6. Akapeea koe me tauturu i taau tamariki kia akaketaketa i to ratou akarongo ki roto i te Tuatua a te Atua?

⁶ Akapeea koe me tauturu i taau tamariki kia matutu to ratou akarongo mei to Timoteo rai, kia “tukuia atu” kia irinaki ratou? Mea mua, kia akakoromaki. Ka pou te tuatau  e ketaketa ai te akarongo. Ko te tika me irinaki koe i tetai apinga, kare te aiteanga e ka irinaki ua taau tamariki i te reira. Ka anoanoia te au tamariki tataki tai kia taangaanga i “te akamori e tau ïa” kia matutu to ratou akarongo i roto i te Pipiria. (E tatau ia Roma 12:1.) Ei metua, e maata taau ka rauka i te rave i te tauturu i taau tamariki kia ketaketa to ratou akarongo, me ui tikai ratou i tetai au uianga. Akara tatou i te apiianga mei te akaraanga o tetai metua tane.

7, 8. (a) Akapeea tetai metua tane Kerititiano te akaari anga i te tu akakoromaki me apii i tana tamaine? (e) I naea koe i anoanoia ai kia akakoromaki i taau tamariki?

⁷ Karanga a Thomas no runga i tana tamaine e 11 mataiti, tetai taime ka ui tana tamaine i te au uianga mei te: “Kua taangaanga ainei a Iehova i te au mea tupu ua ei anga i te au mea ora i te enua nei?” me kore “Eaa ra tatou kare e piri atu ki te au angaanga a te oire mei te iki anga e kia akameitaki i te au mea?” Tetai taime, ka patoi aia i te manako no te akakite kiaia i te au mea ka tau kia irinaki aia. Kua kite mai a Thomas e e rauka ai i tetai tangata te irinaki i te tuatua mou, kare kia kite okotai anake tika mari ra kia kite i te au akapapu anga rikiriki.

⁸ Kua kite katoa a Thomas e ka anoanoia aia kia akakoromaki me apii aia i tana tamaine. Te tika, ka anoanoia te au Kerititiano pouroa kia akakoromaki. (Kolosa 3:12) Kua mārama a Thomas e ka pou te tuatau e te au pukapuka anga no te tauturu kia ketaketa te akarongo o tana tamaine. Ka anoanoia aia kia uriuri kiaia i tana e apii maira mei te Pipiria. Karanga a Thomas: “No runga tikai i te au manako puapinga, ka inangaro maua ko taku vaine i te kite me te irinaki tikai ra ta maua tamaine i te au mea tana e apii ra e me te marama katoa ra aia i te reira. Me e au uianga tana, e mea meitaki te reira. E tikai, ka manata au me āriki ua aia i tetai apinga ma te kore e ui mai i te au uianga.”

9. Akapeea koe me tauturu i taau tamariki kia irinaki i te Tuatua a te Atua?

⁹ Me apii te au metua ma te akakoromaki, kare e roa ka akamata ta ratou tamariki i te marama “i te tipoto, e te tiroa, e te oonu, e te teitei” o te akarongo. (Ephesia 3:18) Ka rauka ia tatou i te apii ia ratou i te au mea tei tau ki to ratou mataiti e to ratou mārama. Me matutu mai to ratou akarongo i roto i ta ratou e apii ra, ka mama i reira ia ratou i te akamārama i to ratou irinakianga ki tetai ke, kapiti mai to ratou au oa apii. (1 Petero 3:15) Ei akaraanga, ka rauka ainei i taau tamariki i te taangaanga i te Pipiria no te akamārama eaa te ka tupu me mate tetai tangata? Te mārama ainei ratou i ta te Pipiria akamārama anga? * (Akara i te tataanga rikiriki i raro.) E  akamaara ka anoanoia koe kia akakoromaki te tauturu anga i taau tamaiti kia akamatutu i te akarongo i roto i te Tuatua a te Atua, e ka puapingaia te reira.​—Deuteronomi 6:6, 7.

10. Eaa te tuanga puapinga o taau apiianga?

¹⁰ Ae, e mea puapinga katoa toou akaraanga no te tauturu i te akamatutu i te akarongo o taau tamariki. Karanga a Stephanie, tetai metua vaine e toru ana tamariki tamaine e: “Mei te taime mai i rikiriki ei taku tamariki, e ui ana au kiaku uaorai, ‘I tuatua ana ainei au ki taku tamariki i te tumu eaa au i irinaki ei ia Iehova, tona aroa, e tona au tu tika? Te kite maira ainei taku tamariki e te inangaro tikai ra au ia Iehova?’ Kare e rauka iaku i te tapapa e ka irinaki taku tamariki i te reira kia papu roa iaku.”

11, 12 Eaa te pakari, e akapeea tatou e kite ei e kare te reira tei runga ua i te tu ruaine o tetai tangata?

¹¹ Kua apii mai tatou e kua rauka ia Timoteo te (1) kite no runga i te Tuatua Tapu e te (2) kia papu i tana e irinaki ra. Inara eaa te aiteanga o ta Paulo tuatua kia Timoteo e ka riro te tata anga tapu kia “pakari ei koe e tae ua atu ki te ora”?

¹² Te akamārama maira te puka Insight on the Scriptures, Volume 2, e i roto i te Pipiria, ko te pakari te kapiti maira “te rauka anga i te taangaanga meitaki i te kite e te mārama kia akatikatika i te au manamanata, te kopae i te au kino, kia rauka te au akakoroanga, me kore kia ako i etai ke kia rave i te reira. Me kopaeia teia ka tupu te tu neneva.” Karanga te Pipiria e “kua mou rava te neneva ki roto i te ngakau o te tamariki.” (Maseli 22:15) I te mea ko te tu pakari tei meitaki atu i te tu neneva, ko te akairo teia o te manako pakari. Ka pakari tetai tangata i te pae vaerua me mataku aia ia Iehova e me akarongo aia kiaia, kare e no te mea te ruaine ua maira.​—E tatau ia Salamo 111:10.

13. Akapeea te au tamariki me akaari e kua rauka ia ratou te pakari e tae ua atu ki te ora?

¹³ Te au tamariki manako pae vaerua, kare ratou “e tauriuriia, e akapeke aereia e te matangi ra,” e to ratou au anoano me kore te au akakeu anga a te au tamariki ke. (Ephesia 4:14) Mari ra, “no te mātau i kite ei” e “i kite ei to ratou ngakau i te meitaki e te kino.” (Ebera 5:14) I reira e rauka ai ia ratou te tuku i te au ikianga pakari, noatu kare to ratou metua me kore tetai aronga mamaata e kite mai. (Philipi 2:12) Ko te tu pakari teia te ka anoanoia no te ora. (E tatau ia Maseli 24:14.) Akapeea koe me tauturu i taau tamariki kia akatupu i teia tu pakari? Ka anoanoia koe kia akapapu kia ratou i taau e irinaki ra. Na roto i taau e tuatua ra e taau e rave ra, ka kite mai ratou e te tauta ra koe i te aru i te au turanga a te Pipiria.​—Roma 2:21-23.

14, 15 (a) Eaa ta tetai tamaiti ka akamanako me ka inangaro aia kia papetitoia? (e) Akapeea koe me tauturu i taau tamariki kia akamanako oonu i te au akameitakianga me akarongo ki te Ture a te Atua?

 ¹⁴ Inara, te tauturu anga i taau tamariki kia ketaketa to ratou akarongo, kare e rava ua i te akakite kia ratou i te au mea tika e te au mea tarevake. Ka anoano katoaia koe kia tauturu ia ratou kia akamanako i te au uianga mei te: ‘Eaa ra te Pipiria i arai ei i te au mea ka akara anga taurekareka? Akapeea e papu ei iaku e e meitaki tikai te au turanga Pipiria noku?’​—Isaia 48:17, 18.

¹⁵ Me ka inangaro taau tamaiti kia papetitoia, e tauturu katoa iaia kia akamanako meitaki i te au apainga no te papetitoanga. Eaa tona manako no runga i te reira? Eaa te puapinga ka rauka mai? Eaa te au ngai ngata? No teaa ra i maata atu ei te puapinga i te au ngai ngata? (Mareko 10:29, 30) E mea meitaki kia akamanako oonu ratou i teia au mea i mua ake ka papetito ei. Tauturu i taau tamaiti kia akamanako i te au akameitakianga o te akarongo e te au tupuanga kino o te akarongo kore. Ka papu maata roa atu iaia e me aruia te au turanga Pipiria ka riro te reira ei meitaki ua rai nona.​—Deuteronomi 30:19, 20.

16. Eaa ta te au metua ka tau kia rave me akamata te akarongo o tana tamaiti tei papetitoia i te akaparuparu?

¹⁶ Eaa taau ka rauka i te rave me akamata taau tamaiti i te ekoko no runga i te tuatua  mou i muri ake i te papetitoanga? Ei akaraanga, penei ka inangaro taau tamaiti me kore tamaine i te au mea o teianei ao. E penei ka akamata taau tamaiti i te ekoko e ko te aru anga i te au kaveinga Pipiria te mataara meitaki rava atu i te oraanga. (Salamo 73:1-3, 12, 13) Na roto i taau ariu atu anga, ka akakeu te reira iaia me ka tavini ua atu rai aia ia Iehova. E tauta kia kore e taumaro ki taau tamaiti no runga i teia, noatu me e tamariki ua me kore e mapu. Mari ra, e akapapu e te inangaro ra koe iaia ma te anoano i te tauturu iaia.

17, 18 Me e manako ekoko to te tamaiti, akapeea tona metua me tauturu iaia?

¹⁷ Tetai tamaiti kua papetitoia, kua akatapu aia i tona oraanga kia Iehova. E taputou teia e ka inangaro e ka tavini maata atu aia ia Iehova ki rungao i tetai ua atu apinga. (E tatau ia Mareko 12:30.) E taputou puapinga tikai teia akatapuanga i roto i te mata o Iehova, e kia tatou katoa. (Koheleta 5:4, 5) Kia akamaara i taau tamaiti no runga i teia. Inara te mea mua, kia tatau e kia tamouia te au apii ta te akaaerenga a Iehova i oronga ki te au metua. I reira, na roto i te tu maru e i te tuatau tau, e akakite ki taau tamaiti e ko tana ikianga kia akatapu iaia uaorai kia Iehova e kia papetitoia e manako pakari te reira te ka apai mai i te au akameitakianga.

¹⁸ Ei akaraanga, ka kitea te au arataki anga meitaki i roto i te appendix “Questions Parents Ask,” i muri roa i te puka Questions Young People Ask—Answers That Work, Volume 1. Ka tauturu teia i te au metua kia kore e manako ua e kua kopae ta ratou tamariki i te tuatua mou inara kia kimi eaa tikai te manamanata. Penei kua māroia ratou e to ratou au oa me kore kua maromaroa. Me kore kua manako te tamaiti e maata atu ta tetai ke e rave ra i te tavini ia Iehova i tana. Kua akamārama katoa mai te appendix e kare ko te aiteanga o teia e kare taau tamaiti e āriki ana i taau e irinaki ra. Te maata anga o te taime te na roto ra aia i tetai manamanata ke atu. Ka oronga mai te appendix i tetai au manako akapeea te au metua te tauturu anga i ta ratou tamariki tei ekoko i te tuatua mou.

19. Akapeea te au metua me tauturu i ta ratou tamariki kia ‘pakari e tae ua atu ki te ora’?

¹⁹ Ei metua, e apainga puapinga e te akameitakianga taau kia utuutu mai i taau tamariki “kia pakari ma te ako a te Atu ra.” (Ephesia 6:4) Mei ta tatou i apii mai, ka anoanoia koe kia apii i taau tamariki i ta te Pipiria e karanga ra e kia tauturu ia ratou kia papu i ta ratou e apii ra. Me ketaketa to ratou akarongo, ka akakeu teia ia ratou kia akatapu ia ratou uaorai kia Iehova e kia oronga i te mea meitaki rava atu kiaia. Kia riro ta Iehova Tuatua, tona vaerua, e toou maroiroi kia tauturu i taau tamariki kia ‘pakari e tae ua atu ki te ora.’