1, 2. Eaa ta Ebera 13:4 e akakeu maira ia tatou kia rave?

KA INANGARO tatou pouroa i te akangateitei ia Iehova. Kua tau aia kia akangateiteiia, e te taputou maira aia e ka akangateitei aia ia tatou. (1 Samuela 2:30; Maseli 3:9; Apokalupo 4:11) Ka inangaro katoa aia ia tatou kia akangateitei i tetai ke, mei te aronga akatere o te kavamani. (Roma 12:10; 13:7) Inara te vaira tetai ngai ka anoano tikaiia tatou kia akaari i te tu ngateitei. Koia oki i roto i te oraanga akaipoipo.

² Tata te apotetoro ko Paulo: “Kia akameitakiia te akaipoipo i te tangata ravarai, e te viivii kore oki te roi.” (Ebera 13:4) Kare teia i te mea tuatua vaa ua na Paulo no runga i te akaipoipo. Te akakite ra aia ki te au Kerititiano e kia akangateitei ratou i te turanga akaipoipo, koia oki, kia akaperepere i te reira. Ko toou manako ainei tera no te akaipoipo, i toou tikai me kua akaipoipo koe?

3. Eaa te akoanga puapinga no te akaipoipo ta Iesu i oronga mai? (Akara i te tutu mua.)

³ Me te akaperepere ra koe i te oraanga akaipoipo, te aru ra  koe i tetai akaraanga meitaki tikai. Kua akangateitei rai a Iesu i te oraanga akaipoipo. Te uianga te au Pharisea kiaia no runga i te tatara, kua taiku aia i ta te Atua i karanga no te akaipoipo mua: “No reira e akaruke ei te tangata i tona metua tane e tona metua vaine, ka topiri atu ei ki tana vaine; E riro oki raua ei kopapa okotai.” Karanga katoa a Iesu: “E ta te Atua i topiri ra, auraka te tangata e akataka ke atu.”—E tatau ia Mareko 10:2-12; Genese 2:24.

4. Eaa te akakoroanga o Iehova no te akaipoipo?

⁴ Kua akatika a Iesu e na te Atua i akamata i te akaipoipo e kia riro te akaipoipo ei mea tinamou. Te rave anga te Atua i te akaipoipo mua, kare aia i akakite ana kia Adamu e Eva e ka rauka ia raua i te tatara. Mari ra, tona akakoroanga kia “riro oki raua” ei kopapa okotai i roto i te akaipoipo e tuatau ua atu.

5. Akapeea te mate te akatuke anga i te oraanga akaipoipo?

⁵ Inara kua kite koe, e i to Adamu ara anga, e manganui te au mea tei taui. Tetai o teia au taui anga, kua akamata te tangata i te mate, e kua riro teia ei akatuke i te oraanga akaipoipo. Akamārama te apotetoro ko Paulo ki te au Kerititiano, e na te mate e akaoti i te akaipoipo e ka rauka ua i te tokorua e ora nei i te akaipoipo akaou.—Roma 7:1-3.

6. Eaa ta te Ture a Mose e apii maira ia tatou no to te Atua manako i te akaipoipo?

⁶ Kua oronga mai te Ture a te Atua ki te ngati Iseraela, te au akakiteanga no te oraanga akaipoipo. Ei akaraanga, ka akatikaia tetai tangata ngati Iseraela kia noo e tere atu i te okotai vaine akaipoipo. Kua matauia teia peu i mua ake ka oronga mai ei te Atua i te  Ture. Inara, kua paruru te Ture i te vaine e te tamariki kia kore e takinokinoia. Ei akaraanga, me kua akaipoipo tetai tangata ngati Iseraela i tetai vaine tavini e i muri ake kua akaipoipo i te rua o te vaine, ka anoanoia rai aia kia akono i tana vaine mua mei tana i rave i mua ana. Kua umuumu te Atua i te tane kia paruru e kia akono ua rai iaia. (Exodo 21:9, 10) Kare tatou e aru ana i te Ture a Mose i teia tuatau. Inara te apii maira teia ia tatou e te akaperepere tikai ra te Atua i te akaipoipo. Ka tauturu teia ia tatou kia akangateitei i te oraanga akaipoipo.

7, 8. (a) Eaa ta te Ture i karanga no te tatara, kia tau kia Deuteronomi 24:1? (e) Eaa to Iehova manako no te tatara?

⁷ Eaa ta te Ture e karanga ra no te tatara? Noatu kare a Iehova i akakoro ana i tetai tane e tetai vaine kia tatara, kua akatika ra te Ture i tetai tangata ngati Iseraela kia tatara i tana vaine mei “te mea kua kitea iora e ia tetai kino i rungao iaia ra.” (E tatau ia Deuteronomi 24:1.) Kare te Ture i akakite ana eaa tei tamanakoia e e mea “kino.” Inara, penei e mea akama te reira me kore e mea kino tikai e kare i te apa rikiriki ua. (Deuteronomi 23:14) Te mea taitaia ra, i to Iesu tuatau, e maata te ngati Iuda tei tatara i ta ratou vaine no “te au apa katoa nei.” (Mataio 19:3) Kare tatou e inangaro i te akatupu i teia tu.

⁸ I te tuatau ko te peroveta ko Malaki, e mea matau no tetai tangata kia tatara i tana vaine mua, penei kia akaipoipo i tetai vaine mapu ua kare e tavini ana ia Iehova. Inara kua akataka meitaki te Atua i tona manako no runga i te tatara. Karanga aia: “E mea riri oki naku te kopae.” (Malaki 2:14-16) Mei te akamataanga, kare to te Atua manako i taui no te akaipoipo, i tona karanga anga no te tane e “ka piri atu ei ki tana vaine; e ka riro oki raua ei kopapa okotai.” (Genese 2:24) E kua turu a Iesu i te manako o tona Metua no te akaipoipo, i tona karanga anga: “Ta te Atua i topiri ra, auraka te tangata e akataka ke atu.”—Mataio 19:6.

9. Eaa te aiteanga o ta Iesu tuatua ia Mareko 10:11, 12?

⁹ Penei ka ui tetai pae, ‘E tumu ainei tetai no tetai Kerititiano kia tatara e kia akaipoipo akaou?’ Akamanako ana i ta Iesu i karanga: “Ko te kopae atu i tana vaine, ka akaipoipo ei i tetai, kua akaturi aia iaia. E kia kopae atu te vaine i tana tane, ka akaipoipo ei i tetai, kua akaturi aia.” (Mareko 10:11, 12; Luka 16:18) Taka meitaki, te akangateitei ra a Iesu i te akaipoipo, e te inangaro ra aia i tetai ke kia pera. Me tatara tetai tane i tana vaine e ka akaipoipo akaou, kua rave aia i te akaturi. Pera katoa te vaine tei tatara i tana tane tiratiratu. No te mea kare te tatara anake e taopenga i te akaipoipo. Te manako ra rai te Atua i te nga tokorua “ei kopapa okotai.” Karanga katoa a Iesu e me tatara tetai tane i tana vaine tiratiratu, ka ō rai aia ki roto i te tumatetenga o te rave anga i te akaturi. Akapeea ra te reira e tupu ei? I te reira tuatau, penei ka manako tetai vaine tei tatara e ka akaipoipo akaou aia no  te au tumu anga o te pae moni. Ka aite rai te reira akaipoipo ki te rave anga i te akaturi.

10. Eaa te tumu anake no tetai Kerititiano kia tatara e kia akaipoipo akaou?

¹⁰ Kua apii a Iesu e te vaira okotai tumu e ka rauka i tetai tangata i te tatara: “Te karanga atu nei au kia kotou, Tei kopae i tana vaine, auraka ra no te akaturi, ka akaipoipo ei i tetai, kua akaturi ïa.” (Mataio 19:9) Kua tuatua katoa aia i teia i te Akoanga i te Maunga. (Mataio 5:31, 32) E rua taime, to Iesu taiku anga i te “akaturi.” Ko te ainga tau kore, ka kapiti mai te au ara mei te akaturi, te moeaana, te pirianga ainga i rotopu i te aronga kare i akaipoipo, te sodoma, e te ainga ki te manu. Ei akaraanga, me akaturi tetai tangata akaipoipo, ka rauka i tana vaine i te iki kia tatara iaia e me kare. Me ka tatara aia i tana tane, kare te Atua e akara akaou ia raua ei nga tokorua akaipoipo.

11. No teaa ra penei kare tetai Kerititiano e iki kia tatara noatu e kua akaturi tana tane me kore vaine?

¹¹ Ka akara ana e kare a Iesu i karanga ana, e me akaturi tetai tangata akaipoipo, ka anoanoia te tokorua tiratiratu kia tatara. Ei akaraanga, penei ka iki te vaine kia noo akaipoipo ua ki tana tane noatu e kua akaturi tana tane. No teaa ra? Penei te inangaro ra rai aia i tana tane e penei ka puareinga ua i te akakore i tana ara e ka angaanga kapiti i te akameitaki mai i to raua oraanga akaipoipo. Pera katoa, me kua tatara te vaine e kare i akaipoipo akaou, ka tupu tetai au tu ngata kiaia. Ei akaraanga, akapeea tona au anoano i te pae kopapa e te pae o te ainga? Ka maromaroa ainei aia? Eaa ta te tatara ka akatupu ki tana tamariki? Ka ngata atu ainei i te utuutu ia ratou i roto i te tuatua mou? (1 Korinetia 7:14) Taka meitaki, ko te tokorua tiratiratu tei iki kia tatara, ka tupu te au tu ngata kiaia.

12, 13. (a) Eaa tei tupu ki te oraanga akaipoipo o Hosea? (e) No teaa ra a Hosea i āriki akaou ei ia Gomera, e eaa ta tatou ka apii mai mei tona oraanga akaipoipo?

¹² Te apii maira te tupuanga o te peroveta ko Hosea ia tatou no to te Atua manako no te akaipoipo. Akakite te Atua kia Hosea kia akaipoipo i tetai vaine, ko Gomera tona ingoa, te ka riro mai ei “vaine akaturi” e ka anau mai i te “tamariki akaturi.” Anau maira ta Gomera raua ko Hosea e tamaroa. (Hosea 1:2, 3) I muri mai, anau mai a Gomera i te tamaine e tetai akaou tamaroa, na tetai tangata ke. Noatu e kua akaturi a Gomera e tere atu i te okotai taime, kua noo akaipoipo rai a Hosea kiaia. I te openga, kua akaruke aia ia Hosea e kua riro mai ei tavini vaine. Noatu rai, kua oko maira a Hosea iaia nana. (Hosea 3:1, 2) Kua taangaanga a Iehova ia Hosea kia akaari akapeea aia te akakore putuputu anga i te ara a Iseraela, i to ratou tiratiratu kore anga Kiaia e kua akamori i te au atua ke. Eaa ta tatou ka apii mai mei te oraanga akaipoipo o Hosea?

¹³ Me kua akaturi te tokorua o tetai Kerititiano, ka anoanoia te Kerititiano tiratiratu kia rave i tetai ikianga. Karanga a Iesu e e tumu anga tau ta te tokorua tiratiratu kia tatara e ka rauka i te akaipoipo akaou. Inara, kare i te mea tarevake me iki te tokorua tiratiratu i te akakore i te ara a tana tane me kore vaine. Kua āriki akaou a Hosea ia Gomera. I muri ake i tona oki anga mai kia Hosea, akakite aia ki tana vaine e kare aia e piri akaou ki tetai ua atu tangata. Kare a Hosea i piri ana kia Gomera no tetai tuatau  roa. (Hosea 3:3) Inara, i muri mai, kua piri akaou a Hosea ki tana vaine. Te akatutu maira teia, akapeea te Atua te āriki puareinga akaou anga i te ngati Iseraela e kua piri ua atu kia ratou. (Hosea 1:11; 3:3-5) Eaa ta teia e apii mai nei, no tatou i teia tuatau? Me akamata akaou te tokorua tiratiratu i te pirianga ainga ki tona tokorua tei apa, te akaari ra te reira e kua akakore te tokorua tiratiratu i te ara a tana tane me kore vaine. (1 Korinetia 7:3, 5) Kare i reira e tumu tau akaou kia tatara. I muri ake i te reira, ka tau te tane e te vaine kia angaanga kapiti e te tauturu i tetai e tetai kia akamanako i te akaipoipo mei ta te Atua i manako.

14. Kia tau kia 1 Korinetia 7:10, 11, penei eaa te ka tupu i roto i te oraanga akaipoipo?

¹⁴ Mei ia Iehova e Iesu, kia akangateitei te au Kerititiano katoatoa i te akaipoipo. Inara, i tetai au taime kare tetai pae e pera ana, no te mea e aronga ara ua tatou katoatoa. (Roma 7:18-23) No reira kare i te mea poitirere e kua tupu te au tu ngata tikai ki te oraanga akaipoipo o tetai au Kerititiano mua. Tata a Paulo “eiaa te vaine e akataka ke i tana tane.” Inara kua tupu teia i tetai au taime.—E tatau ia 1 Korinetia 7:10, 11.

15, 16. (a) Eaa te akakoroanga o tetai nga tokorua me tupu te manamanata i to raua oraanga akaipoipo, e no teaa ra? (e) Akapeea teia me taangaangaia me kare tetai tokorua e tavini ana ia Iehova?

¹⁵ Kare a Paulo i akataka ana i te au turanga tei akatupu i te au tokorua kia akataka ke. Inara kua kite tatou e kare te manamanata, e kua akaturi te tane. Naringa kare, e tumu anga rai ta te vaine kia tatara e kia akaipoipo akaou. Tata a Paulo e ko te vaine tei akataka ke mei tana tane “e noo ua aia auraka e akaipoipo, e kia akaongiia aia e tana tane.” Te manako ra rai te Atua i te reira nga tokorua ei aronga akaipoipo. Karanga a Paulo e noatu te au manamanata me kore te au tu ngata o tetai nga tokorua, me kare tetai ia raua i akaturi, ka tau to raua akakoroanga kia akaongi, koia oki, kia rapakau i to raua manamanata e kia noo kapiti. Ka rauka ia raua i te pati tauturu ki te aronga pakari. Kare te aronga pakari e piri ki to tetai tua, inara ka oronga ratou i te akoanga tau mei te Pipiria.

¹⁶ Akapeea me kua akaipoipo tetai Kerititiano i tetai ke kare e tavini ana ia Iehova? Me e manamanata to raua i roto i te oraanga akaipoipo, ka tau ainei te akataka ke? Mei tei taiku takereia, karanga te Pipiria, ko te akaturi anake te tumu anga tau kia tatara. Inara kare te Pipiria i akakite ana i te au tumu, penei ka akataka ke te nga tokorua. Tata a Paulo: “E e tane akarongo kore ta  tetai vaine ra, e i tika i taua tane ra kia noo rai kiaia, eiaa aia e tuku ke atu iaia.” (1 Korinetia 7:12, 13) Ka tau rai teia i teia tuatau.

17, 18. No teaa ra tetai au Kerititiano ka noo akaipoipo ua ai noatu te au turanga ngata?

¹⁷ Te vaira tetai au turanga kua akaari te “tane akarongo kore” e kare i tika iaia “kia noo” ki tana vaine. Ei akaraanga, penei e tu kino tikai to te tane i te takinokino i tana vaine e kua rokoia aia e te tumatetenga. Penei ka patoi aia i te turu i tana vaine e te ngutuare tangata i te pae kopapa, me kore ka arai iaia kia kore e tavini i te Atua. I teia au tu, penei ka iki tetai vaine Kerititiano, noatu eaa ta tana tane ka tuatua mai e kare aia ‘i tika ra kia noo’ ki tana vaine e ka anoanoia te akataka ke. Inara kua iki tetai au Kerititiano tei aiteite te turanga kia noo ki to ratou tokorua. Kua akakoromaki ratou e kua tauta kia angaanga kapiti i te akameitaki mai i to ratou oraanga akaipoipo. No teaa ra ratou i iki ei kia pera?

¹⁸ Me akatakake tetai nga tokorua i roto i teia turanga, ka noo akaipoipo rai raua e ka tupu rai te au tu ngata tei taikuia i mua ake. Kua oronga katoa mai te apotetoro ko Paulo i tetai akaou tumu no te nga tokorua kia noo kapiti. Tata aia: “Kua tapu oki taua tane akarongo kore ra i te vaine, e kua tapu te vaine akarongo kore i te tane: naringa kare ra, kua noa ta kotou tamariki; i teianei ra, kua tapu ïa.” (1 Korinetia 7:14) E manganui te au Kerititiano tei iki kia noo tamou ki to ratou tokorua kare e tavini ana ia Iehova noatu te turanga ngata. Kua rekareka tikai ratou i te rave akaatinga ia ratou uaorai no te mea kua riro mai to ratou tokorua ei Au Kite no Iehova i muri mai.—E tatau ia 1 Korinetia 7:16; 1 Petero 3:1, 2.

19. No teaa i maata ai te au akaipoipo autu i roto i te putuputuanga Kerititiano?

¹⁹ Kua oronga mai a Iesu i te akoanga no te tatara, e kua oronga mai te apotetoro ko Paulo i te akoanga no te akataka ke. Kua inangaro raua i te au tavini o te Atua kia akangateitei i te oraanga akaipoipo. Takapini i teianei ao i teia tuatau, e maata te au akaipoipo autu i roto i te putuputuanga Kerititiano. Penei e maata taau au tokorua mataora i kite i taau putuputuanga, te aroa ra te au tane tiratiratu i ta ratou vaine e te akangateitei ra te au vaine tu aroa i ta ratou au tane. Te akaari pouroa ra ratou e e mea ngateitei te oraanga akaipoipo. E te mataora nei tatou e e mirioni ua atu au tane e te vaine tei akapapu i teia au tuatua a te Atua: “No reira oki e akaruke ei te tangata nei i tona metua tane e tona metua vaine, ka piri atu ei ki tana vaine, e ka riro oki raua ei kopapa okotai.”—Ephesia 5:31, 33.