E 80 tuma o Diana mataiti e kua mamae tikai i te au mataiti i aereia mai. Kua mate tana tane, e maki Alzheimer tona, ki roto i tetai ngutuare tei akonoia no te aronga pakarikari. Kua mate katoa tana nga tamaiti, e kua akakoromaki aia i te maki cancer o te u. Inara me kite mai te au taeake e te au tuaine ia Diana i ko i te au uipaanga, me kore i te ngai tutu aere, e rekareka ua ana aia.

E akaaere kotinga a John no tetai 43 tuma mataiti. Reka tikai aia i tana angaanga e kare i manako atu i tetai angaanga ke. Inara, kua anoanoia aia kia akamutu i te angaanga tutaka aere no te akono i tetai o tona kopu tangata makimaki. Me kite te au taeake e te au tuaine tei kite ia John i ko i tetai akaputuputuanga me kore uruoaanga, kua kite ratou e kare a John i taui. Te rekareka ua ra aia.

Akapeea e rauka ai ia Diana e John teia tu rekareka? Akapeea tetai tei mamae ra e rekareka ai? Akapeea tetai tangata e mataora ai me akamutu aia i tana angaanga i inangaro? Te oronga maira te Pipiria i te pauanga. Karanga te reira: “Ka rekareka te aronga tuatua-tika ra ia Iehova.” (Salamo 64:10) Ka mārama atu tatou i teia me kua kite tatou eaa te ka akatupu i te rekareka mutukore e eaa tei kore.

Ka akatupu ua rai tetai au mea i te rekareka. Ei akaraanga, ka akamanako ana i tetai nga tokorua tei inangaro ia raua uaorai e kua akaipoipo. Me kore e akamanako ana i tetai tangata tei riro mai ei metua me kore tetai tei rauka te tuanga angaanga ou no te tavini ia Iehova. Ka tupu te rekareka no te mea e au apinga aroa teia mei ko mai ia Iehova. Kua oronga mai aia kia akaipoipo tatou, kia anau tamariki, e kia angaanga i roto i tana akaaerenga.—Genese 2:18, 22; Salamo 127:3; 1 Timoteo 3:1.

Inara, e rekareka poto ua to tetai au mea. Ma te maromaroa, ka tiratiratu kore tetai tokorua akaipoipo me kore ka mate. (Ezekiela 24:18; Hosea 3:1) Ka akarongo kore te tamariki ki to ratou metua e te Atua, e penei ka akaateaia ki vao i te putuputuanga. Ei akaraanga, kare te tamariki tamaroa a Samuela i tavini meitaki ana ia Iehova, e e maata to Davida au manamanata i roto i te  ngutuare no te mea kua ara raua ko Bate-seba. (1 Samuela 8:1-3; 2 Samuela 12:11) Me tupu teia au mea, kare te reira e akatupu i te rekareka mari ra te taitaia e te mamae maata.

Aiteite rai, me kare e rauka ia tatou i te rave ua atu i ta tatou angaanga tavini ia Iehova, no te mea kua tuia tatou e te maki me kore kua anoanoia tatou kia akono i to tatou ngutuare tangata, me kore e taui anga tetai i roto i te akaaerenga. Karanga te aronga tei akaruke i ta ratou tuanga angaanga e kua mii ratou i te tuatau i mataora ai ratou i te reira.

Te kite ua ra tatou e kare teia au tumu no te rekareka e tupu ua atu. No reira te vaira ainei tetai tu rekareka te ka vai ua rai noatu te oraanga ngata? Papu roa, no te mea kare a Samuela, a Davida, e tetai ke i ngere ana i te rekareka i to ratou mamae anga i te au timata anga.

Kua kite a Iesu eaa tikai te rekareka. I mua ake ka aere mai ei aia ki te enua nei, akakite te Pipiria e kua “rekareka tamou marie [aia] ki mua i [to Iehova] aroaro.” (Maseli 8:30) Inara, i tona aere anga mai ki te enua nei, kua aro atu aia i te au tu ngata. Noatu rai, kua kite a Iesu i te rekareka i te rave anga i te anoano o tona Metua. (Ioane 4:34) Akapeea te tuatau o tona mamae openga anga? Tatau tatou: “Ko tei akakoromaki i te satauro, kare i akono i te akama, i te meitaki i tukuia mai ki mua i tona aroaro.” (Ebera 12:2) No reira ka apii tatou e rua apinga ta Iesu i karanga no te tu rekareka tikai.

I tetai atianga, kua oki mai te 70 pipi kia Iesu i muri ake i tetai angaanga tutu aere. E rekareka tikai to ratou no te mea kua rave ratou i tetai au mea, mei te tuaru anga i te au temoni. Inara akakite a Iesu kia ratou: “Auraka ra kotou e rekareka i te mea i vi te au vaerua kino ia kotou: e rekareka ra i to kotou ingoa i tataia ki runga i te ao ra.” (Luka 10:1-9, 17, 20) Ae, e mea puapinga rava me rauka ta Iehova mareka anga e ka akatupu i te rekareka tei maata atu i tetai ua atu tukuanga angaanga.

I tetai akaou atianga, ia Iesu e tuatua ra ki tetai urupu tangata, kua umere tetai vaine ngati Iuda i tana au apiianga e kua karanga e te mataora tikai ra tona metua vaine i tetai tamaiti mei iaia rai.  Inara kua pau a Iesu: “Ko tei akarongo i te tuatua a te Atua e kua akono atura, ko ratou tei meitaki roa.” (Luka 11:27, 28) Me ngakau parau tatou i ta tatou tamariki ka mataora tatou. Inara me akarongo tatou kia Iehova ka tupu te rekareka mutukore e ka rauka tetai pirianga meitaki kiaia.

Ka tupu te rekareka maata me kite tatou e te mareka maira a Iehova ia tatou. E noatu kare te au timata anga i te mea marekaia, kare te reira e apai ke i to tatou rekareka. Me vai tiratiratu tatou i te tuatau timata anga, ka maata atu to tatou rekareka. (Roma 5:3-5) Pera katoa, kua oronga mai a Iehova i tona vaerua ki te aronga tei irinaki iaia, e ko te rekareka tetai tuanga o te ua o te vaerua. (Galatia 5:22) Ka tauturu teia ia tatou kia mārama i te tumu i karanga ai a Salamo 64:10 e: “Ka rekareka te aronga tuatua-tika ra ia Iehova.”

Te akamārama katoa maira teia i te tumu i vai rekareka ua ai a Diana e John, noatu to raua au tu ngata. Karanga a Diana: Kua kimi au i te akapuanga ki roto ia Iehova, mei tetai tamaiti ki te metua.” Karanga katoa aia: “Kite au e kua akameitaki mai aia iaku kia rauka iaku i te tutu aere tamou ma te mata katakata.” Eaa tei tauturu ia John kia rekareka ua e kia maroiroi i roto i te angaanga tutu aere i muri ake i te akaruke anga i tana tuanga angaanga? Karanga aia: “Mei te 1998 i toku apii anga i te Apii Tavini Anga Orometua, e maata atu taku apii naku uaorai.” Akamārama aia, e e māmā ake iaia e tana vaine kia akatanotano no te mea te puareinga ua ra raua i te rave i ta Iehova i tuku kia rave raua. Karanga akaou aia: “Kua āriki ua maua i te reira.”

E manganui tei kite i te tika anga o ta Salamo 64:10 i tuatua. Akara ana i te akaraanga o tetai nga tokorua tei tavini e 30 mataiti i Betela i Marike. Kua tukuia raua ei nga painia takake. Karanga raua: “Ka tupu ua te mii me akaruke koe i tetai apinga taau i reka,” inara karanga raua e: “Kare koe e anoanoia kia mii e tuatau ua atu.” Te rauka anga mai ta raua tukuanga angaanga ou, kua akamata raua i te tutu aere kapiti ki te putuputuanga. Karanga katoa raua: “Kua pure maua no tetai au mea takake. Te kite anga maua e kua pauia mai ta maua pure, kua akamaroiroi te reira ia maua e kua tupu te rekareka. I muri poto ua ake i to maua tae anga, kua akamata tetai pae i roto i te putuputuanga i te painia, e kua akameitakiia maua ki te nga apii Pipiria e rua.”

E tika, kare i te mea māmā kia rekareka ua rai. Te vaira te tuatau ka maromaroa tatou. Inara te akapapu maira a Iehova ia tatou ma te au tuatua ia Salamo 64:10. Noatu me ka manako apikepike tatou, papu e me vai tiratiratu tatou noatu eaa te tu, ka ‘rekareka tatou ia Iehova.’ Ka tapapa katoa atu tatou ki te taime me akatupu a Iehova i tana taputou no “te rangi ou e te enua ou.” Ka apa kore te katoatoa i reira e ka ‘rekareka e e rere ua i te rekareka e tuatau ua atu’ no te au mea pouroa ta Iehova ka rave no tatou.—Isaia 65:17, 18.

Ka akamanako ana i te aiteanga o teia. Ka rauka te oraanga tiama e ka ara mai tatou i te au rā ravarai ma te maroiroi. Noatu eaa tei akamaromaroa ia tatou i mua ana, kare te reira e akatupu akaou i te mamae kia tatou. Te akapapu maira a Iehova kia tatou e “kare oki tei muatangana ra e maaraia, kare e akamanako akaouia atu.” Ka turou mai tatou i to tatou au akaperepere tei mate e ka kite i te tu mei te nga metua o te tamaine e 12 mataiti, ta Iesu i akatu mai: “Va maata ua iora ratou.” (Mareko 5:42) Aere ua rai, ka riro te au tangata pouroa i te enua nei ei aronga tuatua tika e ka ‘rekareka ratou ia Iehova’ e tuatau ua atu.