ME AKONO mai tetai ke ia tatou ma te takinga meitaki, ka mareka rai tatou. Ka akapumaanaia tatou kia kite e te manako maira ratou ia tatou. Mei te mea ka mareka tatou me takinga meitaki mai tetai ke ia tatou, akapeea tatou me apii kia rauka te takinga meitaki?

Te akono tikai ra tetai tangata takinga meitaki i tetai ke e te akaari ra na roto i tana e tuatua ra e e rave ra. Kare aia e rave ua i te reira. Mari ra ka akono aia i tetai ke ma te takinga meitaki no te mea te inangaro ra aia ia ratou e te mārama ra i to ratou manako. Te mea puapinga maata atu, ko te takinga meitaki tetai tuanga o te ua o te vaerua tapu o te Atua. (Galatia 5:22, 23) Te inangaro ra a Iehova ia tatou kia takinga meitaki, no reira ka akara tatou akapeea aia e tana tamaiti me akaari i te tu takinga meitaki e akapeea tatou me aru i to raua akaraanga.

Kua takinga meitaki a Iehova i te katoatoa, pera katoa te “aronga mareka kore e te tangata kikino.” (Luka 6:35) Ei akaraanga, “te akaiti nei [a Iehova] i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.” (Mataio 5:45) Pera katoa te tangata kare e irinaki ana ia Iehova e koia Tei Anga, ka puapingaia rai ratou mei tona tu takinga meitaki e ka mataora te oraanga.

Tetai akaraanga maata o to Iehova tu takinga meitaki, koia oki, ko tana i rave kia Adamu e Eva. Muri poto ua ake i to raua ara anga, “kua tui iora raua i te rau suke, ei pareu no raua.” Inara, kua kite a Iehova e i vao ake i te kainga i Edene ra, ka anoano raua i te kakau ei paruru ia raua, no te mea kua taumaaia te enua e kua ki i “te rakau taratara e te tataramoa.” No reira ma te takinga meitaki, kua maani a Iehova i tetai “kakau kiri” no raua.—Genese 3:7, 17, 18, 21.

Noatu e tu takinga meitaki to Iehova “ki rungao i te [aronga] kino e te meitaki,” te takinga meitaki tikai ra aia i tona au tavini tiratiratu. Ei akaraanga, i te tuatau o te peroveta ko Zekaria, kua taitaia tetai angera no te mea kua akamutu te ngati Iseraela i te patu i te iero o Iehova i Ierusalema. Kua akarongo a Iehova ki ta te angera i tuatua e kua pau atu kiaia i te “tuatua meitaki e te pumaana.” (Zekaria 1:12, 13) Kua akono a Iehova i te peroveta ko Elia na roto i teia ravenga mei teia te tu. Kua tupu tetai tuatau i taitaiaia ei te peroveta ma te maromaroa, e kua pati ia Iehova kia mate aia. Kua akaari a Iehova e te akono ra aia i te manako ngakau o Elia e kua tono mai i tetai angera kia akamaroiroi iaia. Kua akapapu katoa aia e tei te pae aia i te peroveta. Kua akaketaketa to Iehova tu takinga meitaki ia Elia kia rave ua atu i tana angaanga. (1 Ariki 19:1-18) Inara, i te au tavini pouroa o Iehova, koai i toou manako, tei aru i tona tu takinga meitaki?

Ia Iesu i te enua nei, kua kite te tangata i tona tu takinga meitaki. Kare rava aia i kino ana e kare rava i maro ana i tetai ke kia rave ua i ta ratou i manako. Kua akono aia ia ratou e kua karanga: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. . . . Te maru nei taku amo.”  (Mataio 11:28-30) No te mea e tu takinga meitaki tona, kua aru te tangata iaia i tana ngai ka aere. No tona tangi aroa, kua oronga a Iesu i te kai na ratou, kua akaora ia ratou, e kua apii ia ratou “i te au tuatua e manganui” no runga i tona Metua.—Mareko 6:34; Mataio 14:14; 15:32-38.

Kua mārama ua a Iesu i te au manako ngakau o te tangata e kua akono ia ratou ma te takinga meitaki. E tika, noatu e kare te reira i te taime tau, kua tauturu takinga meitaki aia i te katoatoa tei aere mai kiaia. (Luka 9:10, 11) Akamanako ana eaa tei tupu ki te vaine tei tuia e te maki atekeria. Kua inangaro aia kia akaoraia aia, no reira kua amiri aia i te tapa kakau o Iesu. Inara kia tau ki te Ture a Mose, kare aia e tau kia rave i tera, no te mea kua viivii aia. (Levitiku 15:25-28) Akapeea ra a Iesu te ariu anga atu? Kare aia i tuatua riri ana ki tera vaine. Kua kite a Iesu e mataku tona, e kua tangi aroa atu iaia no te mea kua makiia aia e 12 mataiti. Karanga a Iesu kiaia: “E taku tamaine, kua ora koe i toou akarongo, ka aere koe ma te au, e ma te ora i to maki.” (Mareko 5:25-34) E tu takinga meitaki tikai to Iesu!

I roto i te au akaraanga i uriuriia, ka apii mai tatou e me e tu takinga meitaki to tatou, ka rave tatou i te au mea ei tauturu i tetai ke. Kua akakite papu a Iesu i te puapinga o teia, i tona akakite anga i te parapore o te tangata Samaria meitaki. Kua keiaia tetai tangata ngati Iuda, kua papaia, e kua akarukeia kia mate i te pae mataara. Kua aere mai tetai Samaria e kua tangi aroa atu i teia tangata, noatu e e makitakita ana te au Samaria e te au ngati Iuda ia ratou uaorai. Kua riro tona tu takinga meitaki ei tauturu i te tangata tei kinokino. Kua tamā te tangata Samaria i tona au puta e kua apai atura iaia ki ko i te ngai tapae anga. Kua tutaki atura te tangata Samaria i te tangata o te are ra e kia utuutu i te tangata ngati Iuda e ka oki mai aia e tutaki iaia ra.—Luka 10:29-37.

Ka akakeu te tu takinga meitaki ia tatou kia manako meitaki e kia akamaroiroi na roto i ta tatou ka rave e ta tatou ka tuatua. Karanga te Pipiria: “E aue tei te ngakau o te tangata ra, e piko ïa ki raro: okotai rava ra tuatua meitaki ra, rekareka akera ïa.” (Maseli 12:25) Me akakeu te tu takinga meitaki e te meitaki ia tatou kia tuatua akamaroiroi ki tetai ke, ka akatupu tatou i te mataora kia ratou. * (Akara i te tataanga rikiriki i raro.) Ka akaari ta tatou tuatua takinga meitaki e te manako atura tatou ia ratou, e ka mama ua ia ratou kia akakoromaki i te au manamanata o te oraanga.—Maseli 16:24.

Ka rauka pouroa ia tatou i te akaari i te tu takinga meitaki, no te mea na te Atua i anga pouroa i te tangata i tona uaorai tu. (Genese 1:27) Ei akaraanga, e rangatira vaeau Roma ko Iulio tei apai i te apotetoro ko Paulo ki Roma, e “kua takinga-meitaki mairā Iulio ia Paulo, kua tuku ua atura iaia kia aere ua ana i tona au oa, kia akapumaana mai ratou iaia” i Sidona. (Angaanga 27:3) Te ngaa anga te pai o Paulo ma i to ratou teretere anga, kua “takinga-meitaki” te iti tangata o Melita ia ratou e kua taʼu iora i te ai kia maana ratou. (Angaanga 28:1, 2) Kua rave te tangata i te mea meitaki. Inara, ei akamareka ia Iehova, ka anoanoia tetai tangata kia takinga meitaki i te au taime ravarai.

Ka inangaro a Iehova i te tu takinga meitaki ei tuanga no to tatou tu e te oraanga. No reira aia i akakite mai ei kia tatou kia “akangakau aroa” ia tatou uaorai ki te takinga-meitaki. (Kolosa 3:12) Inara kare i te mea māmā kia takinga meitaki i te au taime ravarai. No teaa ra? Penei kare tatou e akaari ana i te tu takinga meitaki no te mea e akama to tatou, e mataku, me kore e karapii. Penei ka ngata ia tatou i te akaari i te tu takinga meitaki ki te aronga tei takinokino mai ia tatou. Inara me pure tatou no te vaerua tapu e kia tauta i te aru ia Iehova, ka tauturu aia ia tatou kia takinga meitaki tikai.—1 Korinetia 2:12.

Akapeea tatou e kite ei eaa ta tatou ka rave kia takinga meitaki atu? E ui kia koe uaorai: ‘Te akarongo meitaki ra ainei au ki tetai ke e te tauta kia  mārama i to ratou manako? Te kite ra ainei au me anoano tetai ke i te tauturu? I naea toku taime openga te takinga meitaki anga i tetai kare i te kopu tangata e kare i te oa piri noou?’ E akanoo i te au akakoroanga, kia kite meitaki atu i te aronga i te pae ia koe, te aronga tikai i roto i te putuputuanga. Na teia tu, ka kite koe i to ratou au tu ngata e ta ratou ka anoano. Aru mai, e tauta i te akono ma te takinga meitaki i te tangata mei taau e anoano ra. (Mataio 7:12) Te mea openga, e pati i ta Iehova tauturu, e ka akameitaki mai aia i taau tauta anga kia riro mai ei tangata takinga meitaki.—Luka 11:13.

Te tata anga te apotetoro ko Paulo i te au mea tei akariro iaia ei orometua meitaki, koia oki ko te tu takinga meitaki. (2 Korinetia 6:3-6) E reka ana te tangata ia Paulo no te mea kua tuatua e kua rave aia i te au mea takinga meitaki, e te kite ra ratou e te akono maira aia ia ratou. (Angaanga 28:30, 31) Pera katoa, me e tu takinga meitaki to tatou, ka inangaro katoa tetai ke i te apii maata atu no runga i te tuatua mou. Me takinga meitaki tatou i te au tu tangata katoatoa, pera katoa te aronga tei takinokino mai ia tatou, penei ka pakia to ratou ngakau e ka inangaro i te taui i to ratou tu. (Roma 12:20) Penei i muri ake i tetai tuatau roa, ka inangaro ratou i te apii no runga i te Pipiria.

I roto i te Parataito, ka takinga meitaki te katoatoa i tetai e tetai. Ka akonoia te aronga te ka akatuakaouia mai ma te takinga meitaki, tetai ia ratou, no te taime mua. Papu e ka akakeu teia ia ratou kia takinga meitaki i tetai ke. E tika, ko te aronga kare e takinga meitaki ana e kare e inangaro i te tauturu i tetai ke, kare ratou e akatikaia kia noo i raro ake i te Patireia o te Atua. Ko te aronga anake e tu aroa e te takinga meitaki to ratou, ko ratou te ka noo i roto i te Parataito e tuatau ua atu. (Salamo 37:9-11) E ao ‘au tikai te reira e te meitaki! Inara, i mua ake ka tae mai ei taua rā ra, ka puapingaia rai tatou i teianei mei te tu takinga meitaki. Akapeea ra?

Karanga te Pipiria: “Te takinga-meitaki nei te tangata aroa i tona uaorai vaerua.” (Maseli 11:17) E reka ana te tangata i te noo ki te pae i tetai tangata takinga meitaki, e i te maata anga o te taime e akono ana ratou iaia ma te takinga meitaki. Karanga a Iesu: “Ko te aite ta kotou e aite atu, ko ta kotou rai ïa kia akaaiteia mai.” (Luka 6:38) No reira ka māmā ua i tetai tangata takinga meitaki kia kitea te au oa meitaki e kia akono ua ia ratou.

Akakite te apotetoro ko Paulo ki te putuputuanga i Ephesia “kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai.” (Ephesia 4:32) Me takinga meitaki e te tangi aroa te katoatoa i roto i te putuputuanga, ka ketaketa atu e ka rotai te putuputuanga. Kare rava tatou e inangaro kia akaapa ua i to tatou au taeake, te urutoe me kore te tuatua akakino e te tamamae ia ratou noatu e e tuatua kanga ua. Mari ra, kia riro ta tatou ka tuatua ei tauturu e te akamaroiroi ua rai ia ratou. (Maseli 12:18) Te ka tupu mai, ka tavini rekareka ua te putuputuanga ia Iehova.

Mei ta tatou i apii mai, e akaariia ana te tu takinga meitaki i roto i ta tatou au mea ravarai ka tuatua e te rave. E me takinga meitaki tatou, te aru ra tatou i to tatou Atua aroa e te oronga ua ko Iehova. (Ephesia 5:1) Ka riro teia ei akaketaketa i ta tatou putuputuanga e kia akakeu i tetai ke kia tavini iaia. No reira e rave ua rai i ta tatou ka rauka kia kite mai tetai ke e e iti tangata takinga meitaki te Au Kite o Iehova!