1. Eaa te tumu puapinga ka mataora ai tatou?

TE REKAREKA nei tatou i te akarongo e te akakakā ra te au tavini o te Atua i to ratou mārama! I te mataiti i topa ake nei, kua rave te iti tangata o Iehova e tere atu i te 10,000,000 apii Pipiria. E mirioni ua atu aronga tei aere mai ki te Akamaaraanga e kua apii i ta Iehova apinga aroa o te atinga oko.—1 Ioane 4:9.

2, 3. (a) Eaa te mea kare e arai ia tatou kia ‘kakā mei te rama i teianei ao.’ (e) Eaa ta tatou ka uriuri i roto i teia atikara?

² I te pa enua ravarai, te tuatua ra te Au Kite o Iehova i te au reo ke ke. Inara kare teia e tāpu ana ia tatou mei te akapaapaa anga ia Iehova ei okotai ngutuare taokotai. (Apokalupo 7:9) Noatu eaa te reo e te ngai e noo ra tatou, ka ‘kakā tatou mei te rama i teianei ao.”—Philipi 2:15.

³ I ta tatou angaanga tutu aere, to tatou tu taokotai Kerititiano, e te tu rapurapu, ka akakakā pouroa te reira ia Iehova. Akapeea tatou me akakakā i to tatou mārama i teia au ngai e toru.—E tatau ia Mataio 5:14-16.

4, 5. (a) I te pae i te tutu aere, akapeea tatou me akakakā i to tatou mārama? (e) Eaa te au tupuanga meitaki mei te tu takinga meitaki? (Akara i te tutu mua.)

⁴ Na te tutu aere e te akariro anga i te tangata ei pipi, e mataara puapinga teia i te akakakā i to tatou mārama. (Mataio 28:19, 20) I te 1925, akakite te atikara “Light in the Darkness,” i te tuatau openga, kare tetai tangata e tiratiratu ana ki te Atu me kare aia e rave i “te tuatau no te akakakā i tona mārama.” E oti kua karanga: “Kia rave aia i teia na te tutu aere anga i te nuti meitaki ki te tangata ravarai i teianei ao, e te taui anga iaia uaorai kia aru i te mārama.” (The Watch Tower, Tiunu 1, 1925) I te pae i ta tatou tutu aere, ka riro to tatou tu ei akakakā ia Iehova. Te kite maira te tangata me tutu aere tatou. Me katakata tatou ma te aroa atu ia ratou, ka manako meitaki mai ratou ia tatou e te Atua ta tatou e akamori ra.

⁵ Akakite a Iesu ki tana au pipi: “E kia tomo atu kotou ki roto i te are, ka akaora atu i to reira.” (Mataio 10:12) I te ngai i tutu aere ei a Iesu, e mea matauia no te tangata kia āriki mai i te aronga ke ki roto i to ratou ngutuare. I te au ngai ke ke i teia tuatau, kare teia e tupu akaou ana. Te maata anga o te taime ka rū ma te riri te tangata me kite mai i tetai tangata ke i to ratou ngutupa. Inara me e tu oaoa e te takinga meitaki to tatou, penei ka marū mai ratou. Me ka taangaanga koe i te pereoo puka no te tutu aere ki te ngai tangata, kua kite ainei koe e me katakata koe ma te oaoa i te aravei i te tangata, ka reka ratou i te aere mai e te apai i tetai puka? Penei ka inangaro katoa ratou i te akamata i tetai pukapuka anga!

6. Eaa tei tauturu i tetai nga tokorua pakarikari kia vai maroiroi i te angaanga tutu aere?

⁶ Kare e rauka akaou i tetai nga tokorua pakarikari i Peritane i te aere mei tera are ki tera are, no to raua turanga apikepike. No reira kua tuku raua i tetai kaingakai puka i vao ua ake i to raua are. E noo ana raua i te pae i te aua apii, no reira kua tuku raua i te au puka te ka rekaia e te au metua tei tiki mai i ta ratou tamariki. Kua apai te au metua i teia au puka, te Questions Young People Ask—Answers That Work, Volumes 1 e te 2. E piri ana tetai tuaine painia kia raua. Kua kite mai te au metua, e oaoa te tuaine e te inangaro tikai ra te nga tokorua i te tauturu i tetai ke. Kua akamata katoa tetai metua i te apii i te Pipiria.

7. Akapeea koe me tauturu i te au tuitarere i toou ngai?

⁷ I ou ake nei, e manganui tei akaruke i to ratou enua anau no te noo i te au enua ke ei au tuitarere. Eaa taau ka rauka i te rave i toou ngai ei tauturu i te au tuitarere kia kite ia Iehova? Te mea mua, e apii kia kite koe i te tuatua, kia orana, i to ratou reo. Pera katoa, na te taangaanga anga i te JW Language app, ka tamou koe i tetai au tuatua te ka reka ratou e ka inangaro i te tuatua mai kia koe. E oti, e akaari i te au vitio  e te au puka i to ratou reo i runga i te jw.org.—Deuteronomi 10:19.

8, 9. (a) Akapeea ta tatou uipaanga epetoma me tauturu ia tatou? (e) Akapeea te au metua me tauturu i ta ratou tamariki kia akamako mai i ta ratou pau anga uipaanga?

⁸ Te oronga maira a Iehova i ta tatou ka anoano kia uua ta tatou angaanga tutu aere. Ei akaraanga, ka riro ta tatou e apii maira i ko i te Uipaanga Oraanga Kerititiano e te Angaanga Orometua​, ei tauturu ia tatou kia mako i ta tatou atoro akaou anga e te akamata i te au apii Pipiria.

⁹ Me aere mai te manuiri ki ta tatou uipaanga, te maata anga o te taime ka umere ratou i te au pauanga a te tamariki. E apii i ta kotou tamariki kia paupau ki roto i ta ratou uaorai tuatua. Kua akakeuia tetai au tangata e te tuatua mou, te rongo anga i te tamariki te akakite i to ratou akarongo ma te tuatua māmā e te ngakau tae.—1 Korinetia 14:25.

10. Akapeea te akamorianga ngutuare me tauturu i te au ngutuare tangata kia taokotai?

¹⁰ Me tauta tatou i te tereni i to tatou ngutuare kia angaanga kapiti ma te taokotai e te ‘au, ka akakakā tatou ia Iehova. Ei akaraanga, me e metua koe, e akapapa kia rauka tetai Akamorianga Ngutuare tamou i te aiai. E manganui te au ngutuare tangata te akara kapiti ra i te JW Broadcasting, e oti ka uriuri ratou i ta ratou ka taangaanga e tei mou mai. Akamaara, e tuke te tauturu no te tamariki rikiriki e  te tauturu no te au mapu ou. E tauta i te tauturu i te au mema tataki tai o toou ngutuare kia puapinga ratou mei te akamorianga ngutuare.—Salamo 148:12, 13.

11-13. Akapeea tatou me tauturu i ta tatou putuputuanga kia taokotai tikai?

¹¹ Noatu e tamariki koe, ka rauka rai ia koe i te tauturu i te katoatoa i roto i te putuputuanga. Tetai mataara, na te akaoaoa anga i te au taeake e te au tuaine pakarikari. E ui kia ratou, eaa tei tauturu ia ratou kia tavini ua atu ia Iehova i te au mataiti i aereia mai. Ka apii mai ratou i te au apiianga puapinga tikai kia koe. Ka akamaroiroi teia ia ratou e koe katoa! Pouroa tatou, te au mapu e te pakarikari, e āriki ua i ta tatou au manuiri ki to tatou Are Uipaanga Patireia. E kia orana atu ia ratou, ma te katakata, te akanoo ia ratou ki raro, e te akapiri atu ia ratou ki tetai ke. E akono meitaki ia ratou.

¹² Me te rave ra koe i te au uipaanga tutu aere, ka rauka ia koe i te tauturu i te aronga pakarikari kia akakakā ua atu i to ratou mārama. E akapapu kia rauka te ngai tau no te tutu aere. E akapapa i te au mapu kia angaanga kapiti kia ratou. Te maata anga o te taime, e taitaia ana te au taeake e te au tuaine pakarikari e te aronga apikepike, no te mea kare e rauka akaou ana ia ratou i te tutu aere. Inara, ka marū mai ratou me kite e te manako maira koe ia ratou ma te mārama i to ratou turanga. Noatu te tu pakarikari e te tuatau roa ki roto i te tuatua mou, ka riro toou tu takinga meitaki ei akamaroiroi ia ratou kia tutu aere ua atu ma te maroiroi.—Levitiku 19:32.

¹³ Rekareka te ngati Iseraela i te akamori kapiti ia Iehova. Tata te tata Salamo: “Te meitaki e te mataora, kia noo katoa te au taeake ma te tau tikai!” (E tatau ia Salamo 133:1, 2.) Kua akaaite aia i teia tu taokotai ki te inu akatainu anga, tei akaoraora i te pakiri ma te kakara. Pera katoa, ka akaoraora tatou i to tatou au taeake e te au tuaine na te akono meitaki anga ia ratou. Ka taokotai atu te putuputuanga. Ka rauka ainei ia koe te piri vaitata atu ki te au taeake i roto i taau putuputuanga?—2 Korinetia 6:11-13.

14. Akapeea koe me akakakā i toou mārama i te ngai taau e noo ra?

¹⁴ Ka kakā ua atu toou mārama i te au ngai ravarai. Ka riro toou tu takinga meitaki ei akakeu i te tangata i te pae mai kia inangaro i te kite ia Iehova. E ui kia koe uaorai: ‘Eaa to te tangata manako iaku? Te mako ra ainei toku kainga e te mā? Te riro ra ainei te reira ei akamanea atu i toku ngai tangata? E tauturu ana ainei au i te tangata i te pae mai?’ E ui ki tetai pae Au Kite, akapeea to ratou akaraanga takinga meitaki e te mako te akakeu anga i to ratou kopu tangata, te au oa angaanga, me kore te au oa apii.—Ephesia 5:9.

15. Eaa tatou ka anoanoia ai kia matakite?

¹⁵ Me ka inangaro tatou i te akakakā ua atu i to tatou mārama, ka anoanoia tatou  kia matakite i te tuatau e noo nei tatou. E maata to Iesu akakite anga ki tana au pipi: “Kia matakite oki.” (Mataio 24:42; 25:13; 26:41) Me manako tatou e te mamao ua atura te “mate maata,” kare tatou e matakite i te tauturu ua atu i tetai ke kia kite ia Iehova. (Mataio 24:21) Kare to tatou mārama e kakā ua atu, mari ra ka poepoe ua atu te reira e ka ngaro aere.

16, 17 Eaa taau ka rave kia vai matakite ma te rapurapu?

¹⁶ Ka anoanoia tatou kia matakite tikai i teianei. Te kino ua atura te turanga o teianei ao. Kua kite tatou e ka tae mai te openga i te rā tikai tei ikiia e Iehova. (Mataio 24:42-44) I teianei, ka anoanoia tatou kia akakoromaki e te akamou ki runga i to tatou tuatau ki mua. E tatau i te Pipiria i te au rā ravarai, auraka rava e akamutu i te pure kia Iehova. (1 Petero 4:7) E apii mei te au taeake e te au tuaine tei tavini ia Iehova no tetai tuatau roa. Ei akaraanga, e tatau i te au tua oraanga, mei te atikara “Itu Ngauru Mataiti te Mou Anga i te Tapa Kakau o te Ngati Iuda,” i roto i Te Punanga Tiaki o Aperira 15, 2012, kapi 18-21.

¹⁷ Kia vai maroiroi i te tavini ia Iehova. E rave i te au mea meitaki na tetai ke, e  akapou i te tuatau ki te au taeake e te au tuaine. I reira koe e mataora ai, e ka akara anga e te tere viviki ra te taime. (Ephesia 5:16) E maata tikai tei raveia e te au tavini o Iehova i te okotai anere mataiti i aereia mai. E i teia tuatau, te maroiroi ua atura tatou. Te tupu maata ua atura te angaanga a Iehova. Te kakā ua ra to tatou mārama.

18, 19 Akapeea te aronga pakari me tauturu ia tatou kia tavini maroiroi ia Iehova? Oronga mai i te akaraanga.

¹⁸ Noatu e maata to tatou au tarevake, ka akatika ua a Iehova kia tavini tatou iaia. Kua oronga mai aia i “te meitaki i te tangata nei” koia oki te aronga pakari o te putuputuanga ei tauturu ia tatou. (E tatau ia Ephesia 4:8, 11, 12.) No reira me atoro mai te aronga pakari ia koe, e akaperepere i te tuatau kia kite koe i to ratou pakari e te manako tau.

¹⁹ Ei akaraanga, kua rokoia tetai tokorua i Peritane e te au manamanata oraanga akaipoipo, e kua pati i te nga tangata pakari e rua kia tauturu ia raua. Karanga te vaine e kare tana tane e akanoo ana i te akaraanga no te tavini ia Iehova. Karanga te tane e kare aia i te puapii meitaki e kare aia e akanoo tamou ana i te akamorianga ngutuare. Kua tauturu te aronga pakari kia akamanako te tokorua i te akaraanga o Iesu. Kua akamaroiroi raua i te tane kia aru i to Iesu akaraanga te akono anga i tana au pipi. Kua akamaroiroi raua i te vaine kia akakoromaki i tana tane. Kua oronga katoa raua i tetai au manako ke ei tauturu i te akamorianga ngutuare a te tokorua e ta raua nga tamariki. (Ephesia 5:21-29) Kua angaanga pakari te tane kia riro mai ei upoko meitaki. Kua akamaroiroi te aronga pakari iaia, auraka e tuku i te ‘au e kia irinaki ua rai ki runga i te vaerua o Iehova. Kua riro te aroa e te tu takinga meitaki o te aronga pakari ei tauturu tikai i te reira ngutuare tangata!

20. Eaa te ka tupu me akakakā koe i toou marama?

²⁰ “E ao to te aronga katoa i mataku ia Iehova; ko tei aere na tona ra au arataa.” (Salamo 128:1) Ka mataora koe me akakakā koe i toou mārama. No reira, e apii i tetai ke no runga i te Atua, e tauta pakari i te tauturu i toou ngutuare tangata e te putuputuanga kia taokotai, e kia vai matakite. Ka kite tetai ke i toou akaraanga meitaki e ka inangaro katoa i te akakakā i to tatou Metua, ko Iehova.—Mataio 5:16.