1, 2. (a) Akataka mai i ta Iesu akatutuanga no te tangata kainga vine. (e) Akapeea teia tua te akaari anga i te tu oronga ua e te aroa ua?

I TE popongi mamaiata, kua aere tetai tangata kainga vine ki te mākete i te kimi aronga angaanga nana. Kua akakite aia i ta ratou tutaki, e kua āriki ratou i te reira. Inara no te mea e maata te aronga angaanga ka inangaroia, kua oki ua rai aia ki te mākete i taua rā ra i te kimi aronga angaanga. Kua akakite aia e ka tau tana tutaki anga ia ratou. I te openga o te rā, kua akaputuputu mai te tangata kainga vine i te aronga angaanga kia tutaki ia ratou. Kua aiteitei tana tutaki anga ia ratou, noatu kua angaanga ratou i taua rā katoa ra me kore e tai ora. Inara, kua akamata te aronga angaanga i taua rā katoa ra i te kopekope, e kua na ko atu te tangata kainga vine: ‘Kare aina kotou i āriki i te tutaki taku i akakite atu? Kare ainei e tikaanga toku kia oronga i taku i inangaro ki te aronga angaanga? Te kino na toou mata i toku nei meitaki?’​—Mataio 20:1-15.

 ² Te apii maira ta Iesu tua i tetai apiianga puapinga no te “aroa ua” o Iehova. ^[1] (Akara i te manako poto.) (E tatau ia 2 Korinetia 6:1.) Eaa te reira? Penei ka manako tetai pae e kua tau te aronga angaanga roa kia maata atu ta ratou tutaki i ta tetai ke. Inara kua akaari te pu i te aroa ua ki te aronga kare i angaanga roa ana. Ko teia ta tetai tangata kite i karanga no runga i te tuatua “aroa ua” tei taikuia i roto i te Pipiria: “Te aiteanga tikai o teia tuatua koia oki e apinga aroa tei oronga uaia mai kare e tutaki, kua orongaia ki tetai tangata noatu e kare e tau ana kia orongaia kiaia.”

3, 4. No teaa ra e i akapeea a Iehova i te akaari anga i te aroa ua ki te tangata?

³ Te akakite ra te Pipiria e ko te aroa ua o te Atua “te meitaki i orongaia mai.” (Ephesia 3:7) No te mea kare e rauka ia tatou i te akarongo tikai kia Iehova, kare tatou e tau kia rauka mai te au meitaki no ko mai i te Atua. Mari ra, ka tau tatou kia mate. Akakite te Ariki ko Solomona e: “Kare takiri e tangata tuatua-tika i te enua nei, ko tei rave i te tuatua meitaki, e kare rava e ara.” (Koheleta 7:20) I muri mai, karanga a Paulo e: “Kua rave katoatoa oki i te ara, e kua ngere i te akameitaki a te Atua,” e “e utunga te mate no te ara.”​—Roma 3:23; 6:23a.

⁴ No to Iehova aroa maata i te tangata nei, kua tono aia i “tana Tamaiti anau tai” kia mate no tatou. Ko teia te akaari anga maata rava atu i te aroa ua. (Ioane 3:16) Karanga a Paulo no Iesu e kua “mate aia ei oko i te tangata katoa, no te aroa ua o te Atua ra, i te akakorona angaia i te kakā e te mana, koia i akakoromaki i taua mate ra.” (Ebera 2:9) Ae, ko “te ora mutu kore ra, e mea oronga uaia mai e te Atua i roto i to tatou Atu ia Iesu Mesia.”​—Roma 6:23e.

5, 6. Eaa te ka tupu me tutaraia tatou e te (a) ara? (e) aroa ua?

⁵ No teaa ra tatou i ara ai e i mate ei? Te akakite maira te Pipiria “no te ara oki a te tangata okotai ra i manaʼi te mate.” No te mea e uanga tatou na Adamu, e tu apa ua to tatou e ka mate. (Roma 5:12, 14, 17) Inara ka rauka rai kia kopae i te tutaraia me kore te akaaereia e te ara. Akapeea ra? Me akatupu tatou i te akarongo ki roto i to Iesu atinga oko, ka puapingaia tatou mei te aroa ua o Iehova. Te na ko ra te Pipiria: “I te ngai ra i maataʼi te ara ra, kua maata rava atura te aroa ua i reira. Mei ta te ara i tupu akenei e kua mate, kia tupu katoa oki ta te aroa ua i te tuatua-tika, e tae ua atu ki te ora mutu kore, i to tatou Atu ra ia Iesu Mesia.”​—Roma 5:20, 21

⁶ Noatu e aronga ara ua tatou, kare tatou e tuku i te ara kia tutara ia tatou. No reira me rave tatou i te tarevake, ka pati tatou kia Iehova kia akakore mai i ta tatou ara. Kua akamatakite a Paulo ia tatou: “Kare oki te kino e autu ki runga ia kotou, kare oki kotou i raro ake i te ture, tei raro akera kotou i te aroa ua.” (Roma 6:14) Akapeea i reira tatou e puapinga ai mei te aroa ua o te Atua? Karanga a Paulo: “Ko te aroa ua  o te Atua . . . te apii anga mai ia tatou e, e kopae tatou i te akono kore i te Atua, e te anoano o teianei ao, kia noo tatou ma te tau meitaki, te tuatua-tika, e te akono i te Atua, i teianei ao.”​—Tito 2:11, 12

7, 8. Eaa te aiteanga o te “aroa ua tumatatini” o Iehova? (Akara i te tutu mua.)

⁷ Kua tata a Petero e: “Ka oronga te tangata katoa i te meitaki no tetai, mei tei rauka mai iaia ra, mei te tiaki meitaki i te aroa ua tumatatini a te Atua.” (1 Petero 4:10) Eaa te aiteanga o te “aroa ua tumatatini” o Iehova? Koia oki noatu eaa te au turanga ngata o te oraanga, ka tauturu mai a Iehova ia tatou kia akakoromaki. (1 Petero 1:6) Ka oronga mai aia i ta tatou e anoano tikai ra kia autu i te au timataanga ravarai.

⁸ Kua tata a Ioane: “E no tona ra ki i raukaʼi ia tatou katoa te aroa ua, e te aroa ua.” (Ioane 1:16) No te mea te akaari nei a Iehova i tona aroa ua na roto i te au mataara tukeke, e maata te akameitakianga ta tatou ka rauka mai. Eaa teia au akameitakianga?

9. Akapeea tatou e puapinga ai mei te aroa ua o Iehova, e akapeea tatou me akaari i to tatou āriki rekareka?

⁹ Ka akakore mai a Iehova i ta tatou ara. No tona aroa ua, ka akakore mai a Iehova i ta tatou ara. Inara ka rave ua aia i te reira me tataraara tatou e me tamaki ua atu i te au anoano tika kore. (E tatau ia 1 Ioane 1:8, 9.) Kua akamārama a Paulo ki te au Kerititiano akatainuia i tona tuatau akapeea a Iehova me akakore i te ara. Karanga aia e: “Ko [te Atua] tei akaora ia tatou i te mana o te poiri, e kua akaumu ia tatou ei roto i te basileia o tana Tamaiti akaperepere; Nona i raukaʼi to tatou ora, ko te ara i akakoreia, i tona toto.” (Kolosa 1:13, 14) Te āriki rekareka nei tatou i to te Atua aroa ua e ka inangaro i te akapaapaa iaia. No te mea ka akakore mai Iehova i ta tatou ara, e maata te au akameitakianga umere ta tatou ka rauka mai.

10. Eaa ta tatou i mareka no to te Atua aroa ua?

¹⁰ Ka rauka tetai pirianga au ki te Atua. E aronga apa ua tatou, no reira mei to tatou anauanga mai e enemi tatou no te Atua. Noatu ra kua karanga a Paulo: “I akaongiia oki tatou i te Atua, i to tatou vai enemi anga, i te mate o tana Tamaiti.” (Roma 5:10) No te atinga oko, kua akaongiia tatou ki te Atua, koia oki ka rauka ia tatou te akatupu i te au kiaia e kia riro mai ei oa nona. Kua akamārama a Paulo i te pirianga ki te aroa ua o Iehova i te akakite anga aia ki te au taeake akatainuia: “E  teianei kua akatikaia tatou i te akarongo, e au to tatou i te Atua ra, i to tatou Atu ia Iesu Mesia: Nona oki tatou i o ei ki roto i te akarongo i teianei aroa ua i nooia e tatou nei.” (Roma 5:1, 2) Te mataora nei tatou kia rauka tetai pirianga au kia Iehova!

11. Akapeea te aronga akatainuia te akaariu anga i te “mamoe ke atu” ki te tuatua tika?

¹¹ Ka riro mai tatou ei aronga tuatua tika i mua i te Atua. Kua tata te peroveta ko Daniela e i te tuatau openga ra, “te aronga i apii ra,” koia te aronga akatainuia, ko ratou “tei akaariu i te tangata e manganui ki te tuatua-tika.” (E tatau ia Daniela 12:3.) Akapeea te aronga akatainuia te rave anga i teia? Ka tutu aere ratou i te nuti meitaki e ka apii i te au ture a Iehova ki te “mamoe ke atu.” (Ioane 10:16) Ka tauturu te aronga akatainuia ia ratou kia riro mai ei aronga tuatua tika i mua i te Atua, tei rauka anake no to Iehova aroa ua. Akamārama a Paulo e: “I akatika uaia mai e [to te Atua] aroa ua, i te ora e vai i te Mesia ra ia Iesu.”​—Roma 3:23, 24

12. Eaa te pirianga o te pure ki to te Atua aroa ua?

¹² Ka rauka ia tatou te akavaitata atu ki te Atua na roto i te pure. No tona aroa ua, ka rauka ia tatou i te pure kia Iehova. Kua kapiki a Paulo i to Iehova terono e ko “te terono o te aroa ua,” e te pati nei Aia ia tatou kia akavaitata atu ki te reira “ma te mataku kore.” (Ebera 4:16a) Ka rauka ia tatou i te pure kia Iehova i tetai ua atu taime na roto ia Iesu. E tikaanga ngateitei te reira! Karanga a Paulo: “Nona tatou e tuatua uaʼi, e te o oki ma te mataku kore i te akarongo iaia.”​—Ephesia 3:12.

13. Akapeea te aroa ua me “tauturu mai ia tatou i te tuatau e tau ei ra”?

 ¹³ Ka rauka te tauturu i te tuatau tau. Kua akamaroiroi a Paulo ia tatou kia pure ua rai kia Iehova “kia rauka te meitaki ei tauturu mai ia tatou i te tuatau e tau ei ra.” (Ebera 4:16e) Me tupu te au timataanga e te au turanga ngata i roto i te oraanga, ka rauka ia tatou te pati akatenga kia Iehova no te tauturu. Ka pau mai aia i ta tatou pure noatu e kare aia e umuumuia kia pera. Maataanga i te taime ka taangaanga aia i te au taeake e te au tuaine ei tauturu ia tatou. Ka pau mai a Iehova i ta tatou pure e “tikaʼi ia tatou kia akamaroiroi, e kia karanga e, ‘Ko Iehova toku tauturu, kare au e mataku; eaa ta te tangata kia rave mai iaku?’”​—Ebera 13:6.

14. Akapeea to Iehova aroa ua te akakeuanga i to tatou ngakau?

¹⁴ Ka akapumaanaia to tatou ngakau. E akameitakianga manea tikai e ka akapumaana a Iehova ia tatou me rokoia e te ngakau taitaia. (Salamo 51:17) Te takinokinoia anga te au Kerititiano i Tesalonia, kua tata a Paulo: “E teianei, na to tatou Atu ko Iesu Mesia uaorai, e te Atua, ko to tatou Metua ra, ko tei aroa mai ia tatou nei, e kua oronga mai oki i te rekareka mutu kore, e te irinakianga meitaki i tona aroa ua, E akapumaana mai i to kotou ngakau, e e akatinamou oki ia kotou.” (2 Tesalonia 2:16, 17) E mea pumaana tikai i te kite e no tona aroa ua, te inangaro ra e te manako maira a Iehova ia tatou!

15. No te aroa ua o te Atua, eaa to tatou manakonakoanga?

¹⁵ E manakonakoanga to tatou no te ora mutu kore. No te mea e aronga ara tatou, kare o tatou manakonakoanga me kare a Iehova e tauturu mai ia tatou. (E tatau ia Salamo 49:7, 8.) Noatu ra, kua oronga mai a Iehova i te manakonakoanga umere no tatou. Eaa te reira? Karanga a Iesu: “Ko teia oki to tei tono mai iaku nei anoano, ko te kite i te Tamaiti e te akarongo iaia ra, ei ora mutu kore tona.” (Ioane 6:40) No to Iehova aroa ua, e manakonakoanga to tatou kia ora e tuatau ua atu. Karanga a Paulo: “Ko te aroa ua o te Atua e oraʼi te tangata, kua kitea mai nei ïa i te tangata ravarai.”​—Tito 2:11.

16. Akapeea tetai au Kerititiano mua i te tarurike anga i te aroa ua o te Atua?

¹⁶ E maata ta tatou akameitakianga i rauka mai no to Iehova aroa ua. Inara auraka tatou e āriki puapinga kore ua i tona tu takinga meitaki, koia oki kia akariro i te reira ei kotoeanga no te ara. I rotopu i te au Kerititiano mua, kua tauta tetai pae i te “ruri ke i te aroa ua o te Atua ei kanga anga.” (Iuda 4) Te akara anga kua manako teia au Kerititiano akarongo kore e ka rauka i te rave i te ara e ka akakore ua rai a Iehova i te reira. Kua tauta katoa ratou i te akapiri atu i to ratou au taeake kia rave i te ara. I teia tuatau katoa, tetai ua atu tei akapera “kua akavaavaa i te Vaerua nona te aroa ua.”​—Ebera 10:29.

17. Eaa te akoanga pakari ta Petero i oronga mai?

¹⁷ Kua akavare a Satani i tetai au Kerititiano i teia tuatau kia manako e ka  rauka ia ratou i te rave ara e ka akakore ua mai a Iehova i te reira. E mea tika e ka puareinga ua a Iehova i te akakore i te aronga ara tei tataraara; inara te tapapa katoa ra aia ia tatou kia patoi i te au anoano tika kore. Kua akauru a Iehova ia Petero kia tata: “E tenana, e aku au akaperepere e, kua kite ana kotou i teianei au mea, kia matakite ia kotou, kia kore kotou e riro i te pikikaa a te tangata kikino ra, e inga iora kotou i to kotou maroiroi anga na. Kia tupu ra te aroa ua ia kotou, e te kite i to tatou Atu ra, i te Ora, ia Iesu Mesia.”​—2 Petero 3:17, 18

18. Eaa ta tatou au apainga no to Iehova tu aroa ua?

¹⁸ Te āriki rekareka nei tatou i to Iehova aroa ua. No reira, kia taangaanga i ta tatou au tareni ei akangateitei ia Iehova e te tauturu i tetai ke. Ka tau tatou kia rave i te reira no ratou. Akapeea tatou me taangaanga i teia au tareni? Karanga a Paulo: “E taoonga ke ke anake to tatou, e tau i te meitaki i orongaia mai kia tatou nei, . . . E taoonga diakono ra, ka rave i te taoonga diakono; e ko tei apii ra, ei te apii ïa; E ko tei akamaroiroi ra, ei te akamaroiroi ïa; . . . ko tei akakite ra, kia akakite ïa ma te akono meitaki; ko tei takinga-meitaki aere ra, kia pera ma te ngakau tae.” (Roma 12:6-8) No to Iehova aroa ua, e apainga ta tatou kia angaanga pakari i roto i te angaanga tutu aere, te apii i te Pipiria ki te tangata, te akamaroiroi i te au taeake e te au tuaine, e te akakore i te ara a tetai ua atu te ka akariri mai ia tatou.

19. Eaa ta tatou apainga ka uriuriia i roto i te atikara ka aru mai?

¹⁹ Ei aronga tei akameitakiia e te aroa ua o Iehova, ka tau tatou kia rave i tei rauka ia tatou ‘kia akakite ua atu i te evangelia o te aroa ua o te Atua.’ (Angaanga 20:24) Ka uriuri tatou i teia apainga i roto i te atikara ka aru mai.