KA TAMANAKO ana ia koe e aaere ra i te roa anga po na runga i te mataara. Kite viviki ake koe te aru maira tetai tangata ia koe. Me tāpu koe, kua tāpu katoa te tangata i muri ia koe. Me aere viviki koe, ka pera katoa aia. Kua akamata koe i te oro ki te kainga o tetai taeake i te pae mai. I toou taeake e vaʼi maira i te ngutupa, kua rekareka tikai koe no te mea kua ora koe.

Penei kare teia e tupu ana kia koe. Inara kua tupu tetai au taitaia o te oraanga kia koe. Ei akaraanga, te taitaia ra ainei koe no te tu paruparu e ka inangaro koe i te autu i te reira inara ka rave ua rai koe i te tarevake? Kua ngere ainei koe i te ngai angaanga no tetai tuatau roa e kua ngata i te kimi akaou i tetai ngai angaanga naau noatu te tautaanga? Ia koe e ruaine maira, te manata ra ainei koe i te apikepike o te oraanga kopapa? Me kore e apinga ke ainei tetai te tamanata ra ia koe?

Noatu toou manamanata, e mea meitaki kia rauka mai tetai oa noou ei akakite i te au manamanata e te inangaro i te tauturu ia koe. E oa piri ainei toou? Ae! Ko Iehova toou oa, mei iaia rai kia Aberahama, tei akakiteia e Isaia 41:8-13. I te irava 10 e te 13, te taputou maira a Iehova kia tatou tataki tai: “Auraka e mataku, te vaitata katoao au ia koe: auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe; koia ïa, e mou au ia koe i toku rima katau tuatua tika ra. Ko au oki to Atua ra, ko Iehova, ko tei akamaroiroi i to rima katau ra; ko tei tuatua atu ia koe e, Auraka e mataku, naku koe e tauturu.”

E pumaana tikai te tuatua a Iehova. Ka tamanako ana i ta Iehova e taputou maira kia tatou. Kare te irava e karanga ra e te aaere ra koe i te pae ia Iehova iaia e mou ra i toou rima. Me aaere koe i te pae iaia, te mou ra te rima katau o Iehova i toou rima kaui. Inara, te oronga ra a Iehova i tona “rima katau tuatua tika” ma te mou “i to rima katau” i te uuti anga ia koe mei roto i te turanga ngata. Me mou a Iehova i toou rima katau, ka akamaroiroi aia ia koe i te na ko anga: “Auraka e mataku, naku koe e tauturu.”

Te kite ra ainei koe ia Iehova ei Metua aroa e te Oa noou? Te irinaki ra ainei koe e ka tauturu aia ia koe me rokoia koe e te manamanata? Te manako tikai ra a Iehova ia koe ma te inangaro i te tauturu ia koe. Me rokoia koe e te manamanata, ka inangaro a Iehova kia kite koe i te akapuanga. No teaa ra? No te mea te inangaro tikai ra aia ia koe. “E tauturu vaitata roa ïa kia rokoia e te tumatetenga.”​—Salamo 46:1.

Ka maara ua rai i tetai pae to ratou tarevake i topa e me ka akakore rai te Atua ia ratou. Me kite koe i teia tu, e akamanako i te tangata tiratiratu ko Iobu. Kua akakite aia i tona tarevake i tona mapu anga. (Iobu 13:26) Kua akapera katoa a Davida e kua pati akatenga kia Iehova: “Auraka koe e manako mai i te kino, e te au ara, o toku ou anga ra.” (Salamo 25:7) No te mea e tu apa ua to tatou, “kua rave katoatoa oki i te ara, e kua ngere i te akameitaki a te Atua.”​—Roma 3:23.

Kua tataia te au tuatua akapumaana ia Isaia pene 41 no te ngati Iseraela. No tei kino roa ta ratou ara i karanga ei a Iehova e ka akautunga aia ia ratou na te tuikaa anga i Babulonia. (Isaia 39:6, 7) I taua taime rai, kua taputou te Atua e ka akarangatira aia i te aronga tei tataraara e kia oki kiaia! (Isaia 41:8, 9; 49:8) I teia rā, te akaari katoa ra a Iehova i te tu aroa ki te aronga tei tataraara e te inangaro i te akamareka iaia ma te ngakau tae.​—Salamo 51:1.

Ka akara ana ia Takuya, * tei tauta kia autu i te peu tau kore o te akara tutu ainga viivii e te peu amirimiri mero kopapa. E maata tona taime i te rave i teia peu. Eaa tana i manako? “Kua manako tau kore tikai au, inara kua pure akatenga au kia Iehova kia akakore mai i taku ara e kua akatu mai aia iaku ki runga.” Akapeea a Iehova te rave anga i te reira? Akakite te aronga pakari i roto i ta Takuya putuputuanga kia tereponi mai ia ratou me rave aia i teia peu. Karanga aia: “Kare i te mea māmā ua i te tereponi ia ratou, inara kua akamaroiroiia au.” E oti kua akanoo te aronga pakari kia atoro te akaaere kotinga ia Takuya. Akakite te akaaere kotinga kiaia: “E tumu tetai i tae mai ei au no te mea na te aronga pakari i tono mai iaku. Na ratou i iki ia koe no teia atoroanga tiaki.” Karanga a Takuya: “Ko au tei ara, inara na Iehova na roto i te aronga pakari i tauturu iaku.” I muri akera, kua akamutu a Takuya i teia peu kino, kua riro mai ei painia tamou, e te tavini nei i ko i te opati Betela. Mei ta Iehova tauturu anga i teia taeake, ka tauturu katoa aia ia koe i toou au tarevake.

Te apiapi ra tetai pae me ngere ratou i te ngai angaanga e kare e kitea akaouia tetai. E mea ngata me kopaeia ratou e te au pu angaanga. Me kite tetai pae i teia turanga ngata, ka taitaia ratou. Akapeea a Iehova me tauturu ia koe? Penei kare aia e oronga viviki mai i tetai ngai angaanga tau tikai, inara ka tauturu aia kia akamaara koe i te au tuatua a Davida: “I vai ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai.” (Salamo 37:25) Te akaperepere ra a Iehova ia koe, e te oronga maira i tona “rima katau tuatua tika” kia rauka ia koe i te tavini ua atu iaia.

Kua kite a Sara i Colombia, ta Iehova tauturu anga iaia. E moni maata tana i koʼi mei tana ngai angaanga na tetai kamupani rongonui e te akangateiteiia. Inara kua inangaro aia i te tavini  maata atu ia Iehova, no reira kua akamutu aia i tana ngai angaanga e kua akamata i te painia. Inara kua ngata iaia kia kitea tetai ngai angaanga no tetai tuatau poto. Kua akamata aia i tetai are toa ice-cream inara kua pou te moni e kua tapiri i te reira. Karanga aia, “E toru mataiti te roa toku akakoromakianga, inara kua akameitaki tikai a Iehova iaku.” Kua apii a Sara i te au mea tana i anoano tikai e kia kore e apiapi i to apopo. (Mataio 6:33, 34) I muri akera, kua akaoki mai tona pu angaanga i tana ngai angaanga i rave ana. Karanga aia e ka āriki ua aia i te ngai angaanga no tetai tuatau poto e kia akatikaia tetai tuatau no te au uipaanga, te au akaputuputuanga, e te au uruoaanga. I teia rā, kare e maata ana ta Sara moni mei tana i matau ana, inara ka rauka iaia i te painia ua atu. Karanga aia kua kite aia i te rima aroa o Iehova i te reira tuatau ngata.

E manganui te apiapi ra no te mea te ruaine ua atura kare e roa ka akangaroi i te ngai angaanga. Ka apiapi ratou me ka rava ta ratou moni no te oraanga. Ka manata katoa ratou i te apiapianga o te oraanga kopapa no te tuatau ki mua. Penei na te Ariki ko Davida i pati akatenga kia Iehova: “Auraka e akaruke iaku i te ruaine anga ra: me paruparu au ra, auraka e taka ke iaku.”​—Salamo 71:9, 18

Akapeea te aronga ruaine te manako papuanga no te tuatau ki mua? Ka anoanoia ratou kia akaketaketa i to ratou akarongo ki te Atua e te irinaki e ka oronga mai aia i te au mea ravarai tei anoanoia e ratou. Tetai aronga tei reka i te au apinganui o te oraanga i mua ana, ka anoanoia ratou kia apii i te oraanga tau ua ma te moni meangiti. Ka kite katoa ratou e ka meitaki atu te oraanga kopapa na te kai anga i te “kai kinaki kore” kare i “te puakatoro matu”! (Maseli 15:17) Me akamou koe ki runga i te tavini anga ia Iehova, ka akapapu aia i te akono ia koe i toou ruaine anga.

Akamanako ana ia José e Rose, tei tavini tamou ia Iehova no tetai 65 tuma mataiti. E maata to raua akaaoanga. Kua akono raua i to Rose papa tei anoano i te tauturu i te po e te ao. Kua akakoromaki katoa a José i tetai vaʼi e te rapakau anga cancer. Akapeea a Iehova i te oronga anga i tona rima katau ki teia tokorua tiratiratu? Kua taangaanga aia i tetai tokorua Kerititiano, ko Tony raua ko Wendy. Kua inangaro raua i te oronga i te ngai nooanga ki te au painia tamou kare e tutaki. Maara ia Tony iaia i te apii tua rua, ka kite ua rai aia ia José raua ko Rose e tutu aere ra. Kua umere a Tony i to raua tu maroiroi e kua riro ei akakeuanga maata kiaia. No te mea kua akapou maata a José raua ko Rose i to raua oraanga te tavini anga ia Iehova, kua oronga a Tony raua ko Wendy i te ngai nooanga no raua. No te 15 mataiti i topa, kua tauturu raua ia José e Rose, e 85 o raua mataiti i teianei. Manako a José raua ko Rose e e apinga aroa a Tony raua ko Wendy no ko mai ia Iehova.

Te taputou nei a Iehova kia koe: “Auraka e mataku, naku koe e tauturu.” Te oronga maira aia i tona “rima katau tuatua tika” kia koe. Ka mou ainei koe i tona rima?