Na roto i tana peroveta ko Ezekiela, kua totou a Iehova e ka oki tona iti tangata ki te Enua Taputouia e ka taokotai ratou ei okotai iti tangata. Kua akakite katoa te reira totou e ko te aronga tei akamori i te Atua i te tuatau openga ka taokotai ratou ei okotai iti tangata.

Kua akakite a Iehova ki tana peroveta ko Ezekiela kia tata ki runga e rua rakau. Okotai rakau kia tata aia, “Na Iuda, e na te au tamariki a Iseraela, tona aronga oa,” e tetai rakau, “Na Iosepha, te rakau na Epheraima, e te ngutuare ravarai o Iseraela, te au oa nona ra.” Ka riro mai te rua rakau “ei okotai” i roto i te rima o Ezekiela.​—Ezekiela 37:15-17.

Eaa te aiteanga o te tuatua “Epheraima”? Ko te kopu Epheraima te kopu puapinga roa atu o te tino ngauru kopu o te patireia apatokerau o Iseraela. Ko Ieroboama no te kopu o  Epheraima, te ariki mua tei tutara ki rungao i te reira patireia. (Deuteronomi 33:13, 17; 1 Ariki 11:26) No roto mai te reira kopu ia Epheraima, e tamaiti na Iosepha. (Numero 1:32, 33) Kua rauka ia Iosepha tetai akameitakianga takake mei tona metua tane ko Iakoba. No reira i tau ei “te rakau na Epheraima” e ko te tino ngauru kopu o te patireia apatokerau. I te mataiti 740 i mua ake ia Karaiti, i mua roa ake i to Ezekiela totou anga, kua autu to Asura ki rungao i te patireia apatokerau o Iseraela e kua apai i te iti tangata ei tuikaa. (2 Ariki 17:6) Tetai au mataiti i muri mai, kua autu to Babulonia ki rungao i to Asura. No reira, te tata anga a Ezekiela i te totou no te rua rakau, kua takake aere te maata anga o te ngati Iseraela na roto i te Patireia o Babulonia.

I te mataiti 607 i mua ake ia Karaiti, kua autu to Babulonia ki rungao i te kopu patireia apatonga e rua o Iuda e kua apai i te iti tangata ki Babulonia. Penei kua apai katoa ratou i tetai ua atu mei te patireia apatokerau o Iseraela. No roto mai te au ariki o te patireia apatonga i te kopu o Iuda. Kua noo katoa te kau taunga ki ko ia Iuda no te mea kua tavini ratou i ko i te iero i Ierusalema. (2 Paraleipomeno 11:13, 14; 34:30) No reira ko te rakau “Na Iuda” ko te rua kopu ïa o te patireia apatonga.

I naea te nga rakau e rua i te taokotai anga? Kua tupu teia i te mataiti 537 i mua ake ia Karaiti, te oki anga te au komono tuikaa o te patireia apatonga e te apatokerau ki Ierusalema kia akatu akaou i te iero. Kare te iti tangata Iseraela i takake akaou ana. I reira, kua akamori taokotai akaou te ngati Iseraela ia Iehova. (Ezekiela 37:21, 22) Kua totou katoaia teia taokotai anga e te nga peroveta ko Isaia e Ieremia.​—Isaia 11:12, 13; Ieremia 31:1, 6, 31

Eaa ta te totou a Ezekiela i akakite no runga i te akamori anga mou? E ka taokotai mai a Iehova i te aronga tei akamori iaia “ei okotai.” (Ezekiela 37:18, 19) Kua tika ainei teia taputou i te tuatau i aereia mai? Ae. I te 1919 kua akamata teia totou i te akatupuia. I mua ake i te reira, kua tauta a Satani i te akatakake takiri i te iti tangata o te Atua. Inara i te 1919, kua akaaere marieia ratou, e kua taokotaiia.

I te reira taime, kua rauka i te maata anga o te iti tangata o te Atua kia riro mai ei au ariki e ei kau taunga i te rangi ma Iesu. (Apokalupo 20:6) Kua aite ratou mei te rakau o Iuda. E toko iti ua e manakonakoanga to ratou no te noo i te enua nei e tuatau ua atu. I te tuatau i aereia mai, kua maata mai to ratou numero. (Zekaria 8:23) Kua aiteia ratou ki te rakau na Iosepha.

I teia rā, te tavini taokotai nei teia nga pupu ia Iehova. E okotai o ratou Ariki ko Iesu Karaiti. I roto i te totou a Ezekiela, kua tuatuaia aia “e ko taku tavini ko Davida.” (Ezekiela 37:24, 25) Kua pure a Iesu ki tona Metua no tana au pipi: “Kia riro ratou katoa ei okotai; mei ia koe, e taku Metua, i roto iaku nei, e mei iaku oki i roto ia koe na.” * (Akara i te tataanga rikiriki.) (Ioane 17:20, 21) Akakite katoa a Iesu e ka riro mai tana au pipi akatainuia e “okotai oki anana” ma te “mamoe ke atu.” Ka aru ratou katoatoa i te “okotai oki tiaki.” (Ioane 10:16) Mei ta Iesu i akataka mai, kua taokotai pouroa to te Atua iti tangata i teia tuatau, noatu e to ratou manakonakoanga kia noo i te rangi me no te enua nei!