Au Uianga a te Aronga Tatau
Ka tau ainei tetai Kerititiano kia apai i te pupui, mei te pitara ei paruru iaia uaorai mei tetai ke?
Ka aru te au Kerititiano i te kaveinga Pipiria me iki ratou i te paruru ia ratou uaorai. Te akaari maira teia au kaveinga e mea tarevake no te au Kerititiano kia apai aere i te pupui ei paruru ia ratou uaorai mei tetai ke. Akamanako ana i te au kaveinga ka aru mai:
E tapu te oraanga tangata kia Iehova. Karanga te tata Salamo no runga ia Iehova: “Tei ia koe oki te tumu o te ora.” (Salamo 36:9) No reira, me paruru tetai Kerititiano iaia uaorai e tana apinga, ka tauta pakari aia i te kopae i te akamaringi anga toto, koia oki nana te apainga i mate ei tetai ke.—Deuteronomi 22:8; Salamo 51:14.
Tika rai, tetai ua atu apinga te ka taangaangaia ei paruru iaia uaorai, penei ka taki atu ki te akamaringi anga toto. Inara, e māmā ake i te tamate i te tangata me taangaanga i te pupui, noatu e e mea poitirere me kore e mea akakoro. * (Akara i te tataanga rikiriki i raro.) Tetai katoa, penei kua ru takere te tangata rave kino no reira me kite aia i te pupui, ka kino roa atu te turanga e penei ka tamateia tetai.
Te akakite anga a Iesu ki tana au pipi e apai i te koke i te po ka mate ei aia, kare te akakoro anga kia paruru ia ratou uaorai. (Luka 22:36, 38) Mari ra, inangaro a Iesu i te apii ia ratou: Auraka tana au pipi e rave kino, noatu e ka aro atu i tetai urupu tangata e taonga tamaki ta ratou. (Luka 22:52) I muri mai, kua tipu a Petero i te taringa o te tavini o te kau taunga, akaue a Iesu ia Petero: “Ka momono ana i taau koke ki roto i te vaî.” E oti, kua taiku a Iesu i tetai kaveinga ei arataki i te au Kerititiano i teia tuatau: “Ko tei rave i te koke ra, ka mate ïa i te koke.”—Mataio 26:51, 52.
Te totou ra a Mika 4:3, no te iti tangata o te Atua “e tupaki ratou i ta ratou au koke ei auri arote, e ta ratou au korare ei tipi tope ïa.” Kitea te au Kerititiano mou no te akatupu i te au. Aru ratou i te au akauenga a te Atua ta Paulo i akakite mai, “auraka te kino e tutakiia atu ki te kino i te tangata ravarai nei” e “kia noo au ua kotou i roto i te tangata katoa nei.” (Roma 12:17, 18) Noatu e kua na roto a Paulo i te turanga ngata, kapiti mai “te mate i te anana keia,” kare rava aia i patoi i te au kaveinga Pipiria ei paruru iaia. (2 Korinetia 11:26) Mari ra, irinaki aia i te Atua e kua kite e ko te akoanga a te Pipiria “e mea meitaki te pakari i te taoonga tamaki.”—Koheleta 9:18.
Te au Kerititiano, e puapinga te oraanga i te au apinga katoa ra. Kua kite tatou “kare oki tei taua apinga nona ra tona ora.” (Luka 12:15) No reira me tuatua maru atu ki te aronga keia e pupui ta ratou e kare aia e ariu mai, ka aru tatou i ta Iesu ako: “Auraka e akaoki atu i te kino.” Tera te aiteanga ka oake tatou i tetai ua atu apinga tana ka inangaro. (Mataio 5:39, 40; Luka 6:29) * (Akara i te tataanga rikiriki i raro mai.) E tika, e mea meitaki auraka kia riro ei takete no te aronga keia. Penei kare ratou e rave kino mai kia tatou me aru i te akoanga a te Pipiria kia kopae i “te akatietie o te ora anga nei.” (1 Ioane 2:16) Ka paruru katoa ia tatou me akatupu i te au ki to tatou tangata tupu ei Au Kite o Iehova.—Maseli 18:10.
Akangateitei te au Kerititiano i te akava ngakau o tetai ke. (Roma 14:21) Penei ka poitirere e ka turoriia tetai au taeake e te au tuaine me kite ratou e te apai ra tetai Kerititiano i te pupui ei paruru iaia mei tetai ke. Penei e tika anga to tatou kia rave i te pupui, inara no te inangaro i te au taeake, kare tatou e rave i tetai ua atu angaanga te ka akaturoriia ratou.—1 Korinetia 10:32, 33; 13:4, 5.
Inangaro te au Kerititiano kia riro ei akaraanga meitaki no tetai ke. (2 Korinetia 4:2; 1 Petero 5:2, 3) Me e pupui ta tetai Kerititiano ei paruru iaia mei tetai ke, ka oronga te aronga pakari i te akoanga Pipiria kiaia. Me apai ua rai aia i te pupui, kare aia i te akaraanga meitaki. Kare i reira aia e tau no tetai au angaanga me kore au apainga i roto i te putuputuanga. Ka tau katoa te reira no tetai Kerititiano tei apai aere i te pupui no tana ngai angaanga. E meitaki ake kia kimi aia i tetai angaanga ke. *—Akara i te tataanga rikiriki i raro.
Ka rave te Kerititiano i tana uaorai ikianga no te paruru iaia uaorai, tona ngutuare tangata, e tana au apinga, pera katoa tana ngai angaanga. Inara me rave aia i te ikianga, ka akatumu aia i te reira ki runga i te kaveinga Pipiria. Kua oronga mai to tatou Atua pakari i te au kaveinga no tona aroa ia tatou. No reira rai te au Kerititiano e pirianga ketaketa to ratou kia Iehova ka iki auraka kia apai i te pupui ei paruru ia ratou uaorai mei tetai ke. Kua kite ratou me irinaki i te Atua e me aru i te kaveinga Pipiria i roto i te oraanga, ka rauka ia ratou te turanga tinamou e tuatau ua atu.—Salamo 97:10; Maseli 1:33; 2:6, 7.
I te mate maata, ka irinaki te au Kerititiano kia Iehova e kare e paruru ia ratou uaorai
^ para. 3 Penei ka iki tetai Kerititiano kia rave i te pupui ei pupui manu ei kai nana me kore ei paruru iaia mei te au manu taetaevao. Inara me kare e taangaangaia te pupui, ka kiriti aia i te katiriti ki vao, ka tatara i te pupui, e ka roka i te reira ki tetai ngai. I te au ngai kare e akatikaia kia rave i te pupui, e me araiia te reira e te kavamani me kore ka retitaia te aronga e pupui ta ratou, ka akono te au Kerititiano i te ture.—Roma 13:1.
^ para. 6 Kia paruru ia koe mei te tauati, akara i te atikara “How to Prevent Rape” o Mati 8, 1993, makatini Awake!
^ para. 2 No tetai akakite anga maata atu no te ngai angaanga ka apai aere i te pupui, akara i Te Punanga Tiaki o Noema 1, 2005, kapi 31, e The Watchtower o Tiurai 15, 1983, kapi 25-26.
