1, 2. I roto i teia akatereanga, eaa te tumu ka vai ua rai te aronga putaua?

I TEIA tuatau, te kino ua atura te akatereanga pae moni o teia ao. Ei akaraanga, e ngata tikai no te au mapu i te kimi ngai angaanga. Tetai pae, ka tuku i to ratou oraanga ki roto i te tumatetenga kia neke ki te pa enua apinganui. Pera katoa, i roto i te au enua apinganui, te vaira rai te aronga putaua. Takapini i teia ao, te maata ua atura te moni a te aronga apinganui e te iti ua atura te moni a te aronga putaua. I roto i tetai au kimikimianga, kua kitea mai e kua aite te moni a te aronga apinganui e 1 patene ki te katoaanga o te 99 patene tangata. Te taka meitaki ua ra, e maata roa te moni a tetai pae aronga no tetai tuatau roa, kareka te pirioni ua atu tangata e putaua ratou. Kua kite a Iesu i teia i te na ko anga: “Te noo tamou nei te putaua ki o kotou nei.” (Mareko 14:7) Eaa te tumu i pera ai?

² Kua kite a Iesu e ko te Patireia anake o te Atua te ka taui i te akatereanga moni o teia ao. Akaari mai te Pipiria ko te “aronga okooko,” koia te akatereanga apinga, kapiti mai te akatereanga poritiki e te au akonoanga, e tuanga ïa no to  Satani ao. (Apokalupo 18:3) Ka noo takake te iti tangata o te Atua mei te angaanga poritiki e te akonoanga pikikaa. Kareka te akatereanga pae moni o to Satani ao, kare te iti tangata o te Atua e akatakake takiri ia ratou mei te reira.

3. Eaa te au uianga ka akamanako tatou?

³ Ei au Kerititiano, ka inangaro tatou i te akara mei teaa to tatou tu ki te akatereanga moni o teia ao. Me rave i te reira, penei ka ui tatou: ‘Akapeea au me taangaanga i taku apinga ei akaari i toku tu tiratiratu ki te Atua? Akapeea au me akaiti i toku piri anga ki te akatereanga pae moni o teia ao? Eaa te au tupuanga te akaari maira i to te iti tangata o te Atua irinaki pu tikai iaia?

4, 5. (a) Eaa tei tupu ki te akaaere i roto i ta Iesu tua? (e) Eaa ta Iesu i akakite ki tana au pipi kia rave?

⁴ E tatau ia Luka 16:1-9. Ka tau tatou katoatoa kia tāpu ma te akamanako i ta Iesu tua no te akaaere tuatua tika kore. Kua akaapaia te akaaere no te kaimoumou apinga, e no reira kua akanooia aia e tona pu. * (Akara i te tataanga rikiriki i raro.) Noatu ra e “pakari maata” to te akaaere. I mua ake ka akaruke ei i tana angaanga, kua akataeake aia ki te aronga te ka tauturu mai iaia i muri mai. Kare a Iesu i akakite i teia tua kia rave tana au pipi i te tuatua tika kore e ora ai ratou. Ko teia te tu o te aronga o teia ao. Mari ra, kua apii a Iesu i tetai apiianga puapinga tikai i roto i te tua.

⁵ Kua kite a Iesu e mei te akaaere rai tei rokoia e te turanga ngata, ka ngata katoa i tana au pipi i te kimi i te oraanga i roto i teia ao kino. No reira karanga aia kia ratou: “E akataunga atu kotou i te taunga no kotou i te apinga pikikaa nei.” Te tumu? No te mea me puapinga kore taua au apinga ra, ka “ooia mai kotou e [te nga taunga me kore oa ko Iehova e Iesu] ki roto i te are piro kore.” Eaa ta tatou ka apii mai mei ta Iesu akoanga?

6. Akapeea tatou e kite ei e kare te akatereanga moni o teia tuatau i te akakoroanga o te Atua?

⁶ Noatu e kare a Iesu i akamārama ana i te tumu i kapiki ei aia i te apinga ei “apinga pikikaa,” te akakite tika maira te Pipiria kare te angaanga moni maata i te akakoroanga no te Atua. Ei akaraanga, kua oronga ua a Iehova kia Adamu e Eva i te apinga ravarai ta raua e anoano ra i roto i te kainga i Edene. (Genese 2:15, 16) Muri mai, te riringi anga te Atua i tona vaerua tapu ki runga i te aronga akatainuia, “kare rava tetai i tuatua i tona apinga e nona anake uaorai, kua kapiti uaia na ratou ravarai.” (Angaanga 4:32) Karanga te peroveta ko Isaia e ka tae mai tetai tuatau kare tetai ua atu e tutaki i te moni kia rauka te meitaki o te enua. (Isaia 25:6-9; 65:21, 22) Inara i teianei, ka anoano te au pipi a Iesu i te “pakari maata.” Anoanoia ratou kia kimi ravenga no te oraanga na te taangaanga i te apinga pikikaa o teia ao e i taua taime rai, kia tauta i te akamareka i te Atua.

7. Eaa te akoanga ta Iesu i oronga mai ia Luka 16:10-13?

⁷ E tatau ia Luka 16:10-13. I roto i ta  Iesu tua, kua akataeake te akaaere ki te aronga te ka puapinga aia. Inara, kua inangaro a Iesu i tana au pipi kia akataeake ki te aronga i te rangi ma te akakoroanga noinoi kore. Inangaro aia ia tatou kia mārama ko te tu e taangaanga ra tatou i te apinga pikikaa ka akaari mai e e tiratiratu tatou ki te Atua. Akapeea tatou me rave i teia?

8, 9. Oronga mai i te au akaraanga akapeea tetai pae i te akaari anga i te tiratiratu me taangaanga i ta ratou apinga pikikaa.

⁸ Tetai mataara ka akapapu i to tatou tiratiratu me taangaanga i te apinga, na te oronga i te tauturu ki te angaanga tutu evangeria i te ao katoa ta Iesu i totou. (Mataio 24:14) Tetai tamaine i Initia, e manga pia moni tana e kua akaputu marie aia i te moni. Kare katoa aia i oko ana i te apinga kangakanga nana. Te ki anga te pia moni, kua oronga pouroa aia i tana moni ki te angaanga tutu aere. Tetai taeake i Initia e tanutanu anga akari tana. Kua oronga maata ua aia i te akari ki te opati uri reo o Malayalam. No te mea e oko ana te opati uri reo i te akari, kua manako aia e puapinga atu tana tauturu i te oronga i te moni. E “pakari maata” tikai teia. Mei te reira katoa, e oronga putuputu ana te au taeake i Greece i te inu orive, te titi, e tetai au kai ki te pamiri Betela.

⁹ Tetai akaou taeake i Sri Lanka, kua tapaʼo i tona ngai kia taangaangaia no te au uipaanga e te au akaputuputuanga pera katoa ei ngai nooanga no te au tavini tamou. E ākā moni tana i akaatinga, inara e ākā tauturu teia no te au papuritia i reira kare e maata ana ta ratou moni. I te au pa enua kua araiia ta tatou angaanga, ka akariro te au taeake i to ratou kainga ei Are Uipaanga Patireia. Ka akatika teia i te au painia e tetai ke kare e maata ta ratou moni kia rauka tetai are uipaanga kare e tutaki.

10. Eaa tetai puapinga ka rauka mai me oronga ua tatou?

¹⁰ Te akaari ra teia au akaraanga i te tu o te iti tangata o te Atua “te akono meitaki i te mea ngiti ra.” (Luka 16:10) Taangaanga ratou i te apinga kia puapinga tetai ke. Eaa te manako o teia au oa no Iehova i te rave i te akaatinga anga? Ka mataora tikai ratou i te kite me oronga ua ratou, ka akaputu ratou i te “mea mou tikai” i te rangi. (Luka 16:11) E oronga putuputu ana tetai tuaine i te moni ei turu i te angaanga Patireia. Karanga aia e kua tupu tetai mea umere kiaia i te au mataiti i aereia. Akamārama aia: “Kua kite mai au e te maata atu taku apinga i oronga, te maata atu toku takinga meitaki i tetai ke. Maata atu taku akakore anga i te ara, te akakoromaki i etai  ke, e te āriki ua i te turanga taitaia e te akoanga.” E manganui tei kite i te puapinga no to ratou tu oronga ua.​—Salamo 112:5; Maseli 22:9.

11. (a) Akapeea to tatou tu oronga ua te akaari anga i te “pakari maata”? (e) Eaa te tupu nei ki te iti tangata o te Atua i teia tuatau? (Akara i te tutu mua.)

¹¹ Ka akaari katoa tatou i te “pakari maata” me taangaanga i te apinga kia turu i etai ke i roto i te angaanga orometua. Tei tupu, noatu e kare e rauka ia tatou te tavini tamou e te neke ki te ngai e anoanoia ra te tauturu, ka puapingaia rai tetai ke. (Maseli 19:17) Ei akaraanga, ka riro ta tatou moni oronga ua ei tauturu i te nenei puka e te turu i te angaanga tutu aere ki te au ngai putaua, e e manganui tei aere mai ki roto i te tuatua mou. I teia au enua mei ia Congo, Madagascar, e Rwanda, e ākā moni tikai te Pipiria. Tetai taime, ka pou te tutaki no te epetoma me kore te marama i te oko i tetai Pipiria. No tetai tuatau roa, ka iki te au taeake me ka oko ratou i te kai no te ngutuare, me ka oko i tetai Pipiria. Teianei, no te moni oronga ua a tetai ke “kia aiteite” te turanga moni, ka uri e ka tuʼa aere ta Iehova akaaerenga i te au Pipiria kare e tutaki no te mema tataki tai o te ngutuare, pera katoa te aronga apii. (E tatau ia 2 Korinetia 8:13-15.) No reira ka rauka i te aronga oronga e te aronga tei rauka mai kia riro ei oa no Iehova.

12. Akapeea a Aberahama te akaari anga i tona irinaki ki te Atua?

¹² Ka riro katoa tatou ei oa no Iehova me akaiti i ta tatou angaanga i roto i te akatereanga moni e te kimi i te apinga “mou tikai.” Ko teia ta te tangata akarongo ko Aberahama i rave. Akarongo aia kia Iehova e kua akaruke i te oire apinganui ko Ura kia noo ki roto i te puakapa, no te mea inangaro aia kia riro mai ei oa no Iehova. (Ebera 11:8-10) Kua irinaki ua rai aia ki te Atua kare i te apinga pae kopapa. (Genese 14:22, 23) Akamaroiroi a Iesu i tetai ke kia aru i tona akarongo. Tetai atianga, kua akakite aia ki tetai tangata mapu apinganui: “Kia inangaro koe e kia apa kore, ka aere ka oko i taau apinga, ka apai atu ei na te putaua; e apinga taau i reira i te rangi; ka aere mai ei ka aru mai iaku.” (Mataio 19:21) Kare teia mapu tane i aru ana i te akarongo o Aberahama. Kua irinaki ra tetai aronga ke i te Atua.

13. (a) Eaa te akoanga ta Paulo i oronga kia Timoteo? (e) Akapeea tatou me akono i te akoanga a Paulo?

¹³ E tangata akarongo katoa a Timoteo. I te kapiki anga a Paulo ia Timoteo ei “toa meitaki ki o Iesu Mesia,” karanga a Paulo kiaia: “Kare rava te tangata e aere ki te tamaki ra e taii iaia uaorai i te peu rikiriki no teianei ao, kia akarekareka i tei iki iaia ei toa ra.” (2 Timoteo 2:3, 4) Te au pipi pouroa a Iesu i teia tuatau, kapiti mai e tai mirioni tuma tavini tamou, te tauta pakari nei i te akono i ta Paulo akoanga. Ka patoi ratou  i te au akaariari anga o teia ao noinoi. Maara ia ratou te kaveinga: “Kua riro te ori ei tavini no tei oriia.” (Maseli 22:7) Inangaro a Satani kia akapou takiri tatou i te taime e te maroiroi i te angaanga no te akatereanga moni o tona ao. Kua kaiou tetai pae i te ākā moni ei tutaki i te are, motoka, te apii, e te akaipoipo. Me kare tatou e matakite, ka pou tetai tuatau roa i te tutaki i te kaiou. Ka akaari tatou i te pakari maata me akamāmā i te oraanga, kopae i te kaiou, e te akarava i te moni. Me akapera tatou ka rauka i te tavini maata atu i te Atua, kare kia tuikaa no te akatereanga moni o teia ao.​—1 Timoteo 6:10.

14. Eaa ta tatou ka tauta i te rave? Oronga mai i tetai akaraanga.

¹⁴ Ei akamāmā i te oraanga, ka anoanoia tatou kia tuku ua rai i te Patireia o te Atua na mua. E ākā pitiniti ta tetai nga tokorua. Inara, kua inangaro raua i te tomo akaou ki roto i te angaanga orometua tamou. No reira kua oko te nga tokorua i ta raua pitiniti e te apinga. I reira kua oronga ua raua i te tauturu kia patu i te opati maata i Warwick, New York. Kua riro teia ei mea akaperepere tikai no raua, no te mea ka tavini kapiti raua e ta raua tamaine e te unonga i Betela, e no tetai au epetoma, ki te nga metua o te unonga, tei angaanga katoa i te patu are i Warwick. Tetai tuaine painia i Colorado, Marike, kua angaanga aia no tetai au rā i te epetoma i ko i te bank. Mareka tikai tona pu i tana angaanga e kua oronga i te angaanga tinamou nana e te akamaata i tana tutaki e toru taime. Inara, kare teia e akatika iaia kia rave tamou i te angaanga orometua, no reira kua patoi aia i teia timataanga tei orongaia mai. E nga akaraanga ua teia no te au akaatinga maata a te au tavini o Iehova. Me tauta tatou i te tuku i te au anoano o te Patireia na mua, te akaari ra e te akaperepere nei tatou i te pirianga oa ki te Atua e te apinga mou tikai kare i te apinga pae kopapa.

15. Eaa te apinga te ka apai mai te mataora mou tikai?

¹⁵ Me apinganui tatou, kare te aiteanga e ka rauka ia tatou ta te Atua marekaanga. Ka akameitaki a Iehova i te aronga i “apingaia ra i te angaanga meitaki.” (E tatau ia 1 Timoteo 6:17-19.) Ei akaraanga, kua apii tetai tuaine ko Lucia e ka anoanoia te aronga tauturu i Albania. * (Akara i te tataanga rikiriki i raro.) No reira, kua neke aia mei Itaria ki reira i te mataiti 1993. Kare ana angaanga, inara kua irinaki aia e ka akono a Iehova iaia. Apii aia i te reo Albania e kua tauturu i tetai 60 tuma tangata kia akatapu i to ratou oraanga. Penei kare e aiteite ana te au tupuanga i roto i ta tatou angaanga tutu aere. Inara tetai ua atu angaanga ta tatou ka rave ei tauturu i tetai ke kia apii no runga ia Iehova kia riro ei oa nona, ka akaperepere tatou e tuatau ua atu.​—Mataio 6:20.

16. (a) Eaa te ka tupu ki te akatereanga moni o teia ao? (e) Akapeea teia me akakeu i to tatou manako no te apinga pae kopapa?

¹⁶ Akapapu a Iesu e ka ope te akatereanga moni o teia ao. Karanga aia: ‘Kia tuku keia teia apinga,’ kare e ‘penei ka puapinga koreia.’ (Luka 16:9) I teia au rā openga, ka puapinga kore tetai au bank e i tetai au enua, ka tupu te manamanata kino i te pae  moni. Inara kare e roa atu ana, ka kino atu te reira. Ka puapinga kore te akatereanga poritiki, akonoanga, e te pae moni o to Satani ao. Kua totou te nga peroveta ko Ezekiela e Zephania e ka puapinga kore te auro e te ario, e nga apinga puapinga i roto i te akatereanga moni. (Ezekiela 7:19; Zephania 1:18) Eaa toou manako me tae ki te openga o to tatou oraanga i teia ao e kua kite mai tatou e kua akaatingaia te apinga mou tikai no te au apinga pikikaa o teia ao? Penei ka aite toou manako ki te tangata tei angaanga i tona oraanga katoa i te akaputu i te moni, e i te openga kua kite mai aia e moni pikikaa ua te reira. (Maseli 18:11) Ka puapinga kore te au apinga o teia ao. No reira, auraka tatou kia ngere i teia atianga no te taangaanga i te apinga pae kopapa kia rauka te au oa i te rangi. Ko ta tatou e rave ra no Iehova e tona Patireia te ka apai mai i te mataora mou kia tatou.

17, 18 Eaa ta te au oa o te Atua e tapapa ra?

¹⁷ Me tae mai te Patireia o te Atua, kare tetai e anoanoia kia tutaki are e te kaiou. Kare e tutaki i te kai e ka maata te reira, e kare e anoano akaouia kia tutaki i te taote e te vai rakau. Ka mataora te au oa o Iehova i te meitaki o te enua. Ka taangaangaia te auro, te ario, e te au toka kanapanapa no te akamanea anga, kare kia apinganui tetai tangata. Ka rauka ua mai te au rakau meitaki, te toka, e te auri ei akatu i te are manea. Ka tauturu te au oa ia tatou no te inangaro, kare no te tutaki. Ka oronga ua tatou i te mea meitaki o te enua ki tetai e tetai.

¹⁸ E manga tuanga ua teia no te au akameitakianga manea o te aronga tei rauka te oa i te rangi. Ka maeva te aronga akamori ia Iehova i te enua nei me rongo ratou i ta Iesu tuatua: “Ka aere mai kotou, te aronga i akaoraia e taku Metua, e noo ki te basileia i akonoia no kotou mei te maani anga mairai i te enua nei.”​—Mataio 25:34.