1-3. (a) Inaea a Salamo 147 i tataia ai? (e) Eaa ta tatou ka mou mai me apii ia Salamo 147?

E AKAPAAPAA ana tatou i tetai tangata me umere i tana i tuatua e i rave. Mei teaa atura i reira kia akapaapaa i te Atua ko Iehova! Akapaapaa tatou iaia no tona mana maata, tei kitea i roto i te au mea umere tana i anga, e ka akapaapaa iaia no tona aroa oonu, te kiteaia ra i roto i te atinga oko o tana Tamaiti.

² Me tatau ia Salamo 147, te taka meitaki ua ra e aka inangaro to te tata i te akapaapaa ia Iehova. Akamaroiroi katoa aia i tetai ke kia akapaapaa i te Atua.​—E tatau ia Salamo 147:1, 7, 12.

³ Kare tatou i kite naai i tata ia Salamo 147. Penei i ora ana aia i te tuatau i oki ei to Iseraela ki Ierusalema i muri ake te akaora anga a Iehova ia ratou mei te tuikaa i Babulonia. (Salamo 147:2) Kua akapaapaa te tata Salamo ia Iehova no te mea kua akamori akaou Tona iti tangata iaia i to ratou enua. I reira, kua oronga maata mai te tata Salamo i te au  tumu kia akapaapaa ia Iehova. Eaa te reira? Eaa te au tumu ka kapiki maata ei koe “Alelu Ia” koia oki e “Akapaapaa kotou ia Iehova”?​—Salamo 147:1, tataanga rikiriki i te pae.

4. Te akaora anga te Ariki ko Kuro i to Iseraela, eaa to ratou manako, e no teaa ra?

⁴ Akamanako ana mei teaa te turanga o te ngati Iseraela i to ratou tuikaa anga i Babulonia. Kua aviri te aronga e taki ra ia ratou ki reira i te na ko anga e: “E imene mai ana i tetai imene no Ziona.” Kare te ngati Iuda i inangaro i te imene. Kua takoreia a Ierusalema, to ratou rekareka maata. (Salamo 137:1-3, 6) Kua ati to ratou ngakau, e ka inangaro i te akapumaana. Mei ta te Atua i totou, kua tauturu a Iehova i tona iti tangata. Akapeea? Kua autu te Ariki o Peresia ko Kuro i to Babulonia e kua karanga no Iehova: “Kua ikuiku mai aia iaku e akatu i tetai are nona i Ierusalema.” Akakite katoa a Kuro ki te ngati Iseraela: “Koai tei toe i roto ia kotou na i tona au tangata katoa? Kia piri mai oki tona Atua ra ko Iehova iaia, e aere aia ki runga.” (2 Paraleipomeno 36:23) Papu tikai kua akapumaana teia i te ngati Iseraela i Babulonia!

5. Eaa ta te tata Salamo i karanga no to Iehova mana rapakau ia tatou?

⁵ Kare a Iehova i akapumaana ua i te iti tangata Iseraela mari ra i te au tangata Iseraela tataki tai. E pera katoa ana a Iehova i teia tuatau. Karanga te tata Salamo no te Atua e “kua rapakau aia i te aronga ngakau paruparu ra, e kua tākai i to ratou au puta.” (Salamo 147:3) Me maki tatou e te taitaia, ka papu ia tatou te manako maira a Iehova ia tatou. E inangaro maata to Iehova i te akapumaana ia tatou e te rapakau i to tatou au mamae. (Salamo 34:18; Isaia 57:15) Oronga aia i te pakari e te maroiroi no tatou kia akakoromaki i tetai ua atu manamanata.​—Iakobo 1:5.

6. Akapeea tatou e puapinga ai mei te tuatua ia Salamo 147:4? (Akara i te tutu mua.)

⁶ Aru mai kua akara te tata Salamo ki te rangi e kua karanga “kua ope te au etu i te tatauia” e Iehova e “nana i tapa i to ratou katoa ra au ingoa.” (Salamo 147:4) Kua akara te tata Salamo i te au etu, kare ra aia i kite mei teaa te maata i te reira. I teia rā, kua kite te aronga taineti e pirioni ua atu etu i roto i to tatou vananga etu. E penei e manotini ua atu vananga etu i te ao katoa e pini ua ake! Kare e rauka i te tangata i te tare i te au etu, ka rauka ra i Tei Anga mai. Te tika, kua kite meitaki aia i te au etu tataki tai e kua tapa i to ratou ingoa. (1 Korinetia 15:41) Te Atua tei kite i te au etu ravarai, kua kite katoa ia koe. Kua kite aia teiea koe, toou manako, e taau e anoano ra!

7, 8. (a) Eaa ta Iehova i mārama no tatou? (e) Oronga mai i tetai akaraanga te akaari maira i to Iehova takinga meitaki.

⁷ Kua mārama a Iehova i taau e na roto ra, e tei iaia te mana i te tauturu ia koe i toou manamanata. (E tatau ia Salamo 147:5.)  Penei te manako ra koe e ngata roa toou turanga e kare e rauka i te akakoromaki. Kua mārama te Atua i to tatou kotinga, “te manako ra aia e, e one tatou nei.” (Salamo 103:14) E aronga apa tatou, e ka rave ua rai i te au tarevake noatu e ko taua mea rai, e penei ka taitaia tatou. Te tataraapa nei tatou i te au mea ta tatou i tuatua, to tatou au anoano tika kore, e te vareae! Kare o Iehova tu apikepike, inara kua mārama pu tikai aia i to tatou manako.​—Isaia 40:28.

⁸ Kua kite ainei koe i to Iehova rima mana te tauturu anga ia koe i te au timataanga? (Isaia 41:10, 13) Kua tupu teia ki tetai painia ko Kyoko. Te neke anga aia ki tetai ngai ou, kua taitaia tikai aia. Akapeea a Kyoko i kite ei kua mārama a Iehova i tona manamanata? I roto i tana putuputuanga ou, e maata te au taeake tei mārama i tona manako. Manako aia mei te mea rai e te karanga maira a Iehova: “Te inangaro nei au ia koe, kare no te mea e painia koe, mari ra e tamaine koe naku e kua akatapu i toou oraanga kiaku. Inangaro au kia mataora toou oraanga ei Kite noku!” Akapeea a Iehova te akaari anga kia koe e ko “tona kite, e mea kitea koreia kia kimi”?

9, 10 Eaa te mataara puapinga roa atu ka tauturu a Iehova ia tatou? Oronga mai i te akaraanga.

⁹ Ka anoano tatou pouroa i te kai, kakau e te ngai nooanga. Penei ka manata koe e kare e rava ana taau kai. Inara kua anga a Iehova i te enua kia akatupu ruperupe i te kai na tatou pouroa, kapiti mai “te orebi ou e kapiki atu iaia ra.” (E tatau ia Salamo 147:8, 9.) Me ka angai a Iehova i te orebi, papu i reira ka oronga mai aia i ta tatou e anoano ra i te pae kopapa.​—Salamo 37:25.

¹⁰ Mea puapinga roa atu, ka oronga mai a Iehova i ta tatou e anoano ra kia vai ketaketa to tatou akarongo, e ka oronga mai aia i “te au o te Atua, ko tei maata ua atu i te kite tangata.” (Philipi 4:6, 7) Kua kite te taeake a Mutsuo e tana vaine i ta Iehova tauturu. Te ū anga te tai akaki i Tiapani i te mataiti 2011, koi ora ua mai raua na te kake anga ki runga i te tauu o te are. I taua rā ra, vaitata rai kua takore pouroaia to raua apinga. Noo raua i te po katoa i roto i tetai pia poiri e te anu i runga i te rua o te taʼua i to raua are. E popongi iora, kua kimi raua i tetai apinga ei akamaroiroi ia raua. Te mea ta raua i kite mai ko te 2006 Yearbook of Jehovah’s Witnesses. Kua eeu a Mutsuo i te au kapi, e kua kite mai i te tumu tuatua “The Deadliest Tsunamis Ever Recorded.” Te akataka ra te reira tumu manako i te ngaruerue enua i Sumatra i te mataiti 2004 tei akatupu i te tai akaki kino roa atu. Kua aue a Mutsuo e tana vaine te tatau anga raua i tei tupu ki te au taeake e te au tuaine. Kite mai raua e te oronga maira a Iehova i te akamaroiroi anga ta raua e anoano ra. Kua akono katoa a Iehova ia raua na tetai atu mataara. Oronga mai te au taeake i te au ngai ke o Tiapani i te kai e te kakau no raua. Inara te mea akamaroiroi maata, ko te atoro anga a te au taeake tei tonoia mai e te akaaerenga a te Atua. Karanga a Mutsuo e: “Manako tikai au tei te pae ua a Iehova ia matou tataki tai e te akono ra ia matou. Aue te pumaana!” Te mea mua ta te Atua ka oronga mai, ko ta tatou e anoano ra kia vai ketaketa te akarongo, e oti ka oronga mai aia i ta tatou e anoano ra i te pae kopapa.

11. Eaa ta tatou ka rave kia puapingaia mei te tauturu a te Atua?

¹¹ “Te akateitei nei a Iehova i tei akaaka ra.” Akaperepere aia ia tatou e kua papa ua i te tauturu ia tatou. (Salamo 147:6a) Akapeea tatou e puapinga ai mei tana tauturu? Anoanoia tatou kia rauka tetai pirianga ketaketa kiaia. Ei akatupu i te reira, ka anoanoia te tu akaaka. (Zephania 2:3) Ka irinaki te aronga akaaka ia Iehova kia akatikatika i tetai ua atu tika kore e te akakore i to ratou mamae. Te mareka ra a Iehova ia ratou.

12, 13 (a) E puapinga ai mei te tauturu a te Atua, eaa ta tatou ka kopae? (e) Koai ma ta Iehova e mareka ra?

¹² I tetai tua, “te titiri nei ra [te Atua] i te aronga kino ki raro i te one.” (Salamo 147:6e) Kare tatou e inangaro kia tupu te reira kia tatou! Ka inangaro tatou i te  Atua kia akaari i tona aroa takinga meitaki kia tatou. No reira e rikarika tatou i tana e rikarika ra. (Salamo 97:10) Ei akaraanga, ka anoanoia tatou kia rikarika i te ainga tau kore. Tera te aiteanga, ka kopae tatou i tetai ua atu apinga te ka taki atu ki te reira, kapiti mai te akara anga i te au tutu ainga viivii. (Salamo 119:37; Mataio 5:28) Penei e tamaki ngata teia, noatu ra ka pauna te taime no te mea ka apai mai te reira i ta Iehova akameitakianga.

¹³ Kare tatou e autu i teia tamaki i to tatou uaorai maroiroi. Ka anoanoia kia irinaki tatou kia Iehova. Ka mareka ainei aia me irinaki tatou ki te maroiroi o te tangata? Kare, kare a Iehova “e rekareka i te maroiroi o te oroenua ra.” Ka tau ainei tatou kia irinaki ki to tatou uaorai maroiroi me kore i tetai tangata? Kare a Iehova “e mareka i te vaevae tangata.” (Salamo 147:10) Mari ra, e pure tamou tatou kia Iehova no tana tauturu e te pati akatenga kiaia kia akaora ia tatou mei to tatou tu paruparu. Kare rava a Iehova e akaroi i te akarongo mai i teia au pure. “E tau rā Iehova ki te aronga e mataku iaia ra, ki te aronga e irinaki ki tona aroa.” (Salamo 147:11) No tona tu tiratiratu e te aroa, kite tatou e ka tauturu aia ia tatou kia autu i te anoano tika kore.

14. Eaa ta te tata Salamo i irinaki papu?

¹⁴ Akapapu mai a Iehova e ka tauturu aia ia tatou me tupu te manamanata. Te oki anga te ngati Iseraela ki Ierusalema, kua manako te tata Salamo e akapeea a Iehova i te tauturu anga ia ratou. Imene aia e: “Koia tei akaketaketa i te au tea o toou ra au ngutupa; e kua akameitaki i taau au tamariki i roto ia koe. Nana i akatupu i te au i toou ra au kotinga.” (Salamo 147:13, 14) I te mea e na Iehova e akaketaketa i te ngutupa o te oire, kua manako tinamou te tata Salamo. Akapapu teia kiaia e ka paruru a Iehova i tona iti tangata.

15-17. (a) Eaa ta tatou ka manako i te au timataanga i tetai taime, e akapeea a Iehova me taangaanga i tana Tuatua i te tauturu ia tatou? (e) Oronga mai i tetai akaraanga akapeea te tuatua a te Atua me “oro viviki” i te tauturu ia tatou.

¹⁵ Penei te apiapi ra koe no toou au manamanata, inara ka oronga a Iehova i te  pakari noou. Karanga te tata Salamo e “kua akau [te Atua] i tana tuatua i te enua nei: te oro viviki nei tana tuatua.” Taiku mai te tata Salamo i te kiona, kephura, e te vai toka e oti kua ui e: “Koai tei mou ki mua i te anu nana?” I reira karanga aia e “kua tuku mai a [Iehova] i tana tuatua, e kua taravai iora ratou.” (Salamo 147:15-18) Ko te Atua tei kite e tei rave i te au mea katoa, tei akatere i te vai toka e te kiona, ka rauka i te tauturu ia koe kia autu i tetai ua atu manamanata.

¹⁶ I teia rā, te arataki nei a Iehova ia tatou ma tana Tuatua te Pipiria. Karanga te tata Salamo e ka “oro viviki” te tuatua a Iehova i te tauturu ia tatou. Te arataki nei te Atua ia tatou na te mataara tau e te taime tau. Akamanako ana i te puapinga taau i rauka mai no te Pipiria, te puka a “te tavini akono meitaki e te pakari,” te JW Broadcasting, jw.org, te aronga pakari, e toou au taeake e te tuaine. (Mataio 24:45) Kua kite ainei koe i roto i toou oraanga i to Iehova viviki i te arataki anga ia koe?

¹⁷ Kua kite tetai tuaine a Simone i te tauturu a te Tuatua a te Atua. Manako aia e kare ona puapinga, e kare te Atua e mareka ana iaia. Inara me manako taitaia aia, kua pure aia kia Iehova, e kua pati akatenga i tana tauturu. Pera katoa kua apii ua rai aia i te Pipiria. Karanga a Simone: “Kare e turanga taku i na roto e kare au i kite i to Iehova akamaroiroi anga e te aratakianga.” Tauturu teia iaia kia manako papu.

18. Eaa koe i manako ei te vaitata ra a Iehova kia koe, e eaa te tumu ka karanga ai koe e “Alelu Ia!”?

¹⁸ Kua kite te tata Salamo e kua iki a Iehova i te ngati Iseraela ei iti tangata nona mei roto i te au pa enua ravarai o te enua. Ko ratou anake te iti tangata tei rauka i “tana tuatua” e “tana au akonoanga.” (E tatau ia Salamo 147:19, 20.) I teia rā, e tika anga ngateitei to tatou kia kapikiia e te ingoa o te Atua. Mataora tatou i te kite iaia, kia aratakiia e tana Tuatua, e kia rauka tetai pirianga vaitata kiaia. Mei te tata o te Salamo 147, e maata te tumu kia karanga koe e “Alelu Ia!” e te akamaroiroi i tetai ke kia pera.