Kua kite te apotetoro ko Paulo e e apinga kino tikai te pikikaa a Satani. Kare ra te au Kerititiano pouroa i kite i te reira. Ei akaraanga, kua manako tetai pae i Korinetia kua matutu ratou i roto i te tuatua mou e kare e akavareia e Satani. (1 Korinetia 10:12) Ko teia te tumu i akamatakite ei a Paulo e: “Te mataku nei ra au, ko te akakinoia aea to kotou ngakau kia kore atu te tavaitai ua e tau i te Mesia nei, mei ta te ovi i pikikaa atu ia Eva i tona pakari.”​—2 Korinetia 11:3.

Akaari mai ta Paulo tuatua e mea puapinga auraka tatou kia manako papu ia tatou. Kia autu i te tamaki i te pikikaa a Satani, ka anoanoia koe kia kite mei teaa rai te kino i te reira e oti kia paruru ia koe uaorai.

I roto i teia atikara, ko te pikikaa tona aiteanga e akakite anga tika kore tei taangaangaia kia akavare i te tangata e te akatere i ta ratou ka manako e ka rave. I roto i te puka Propaganda and Persuasion, ko te pikikaa “e ravenga tau kore, kino, e te tika kore.” E akataka ana te tangata i teia tu ma te tuatua “pikikaa, akatarevake, akavare, akanauru [e te] akaaere i te manako.”

E kino tikai te pikikaa no te mea ka akanauru marie ia tatou e kare tatou e kite. Aite rai te reira ki te reva poitini kare e kitea e kare e aunga. Ko Vance Packard, e tangata kite i te tu o te tangata, karanga aia e ka riro te pikikaa ei akakeu maata ia tatou kia rave “maata i ta tatou kare i manako.” Karanga  tetai atu tangata kite e ka akatupu te pikikaa i te tangata kia rave i te angaanga rikarika tikai no te tu tau kore tei taki atu ki te takore anga maata (koia oki me takore takiriia tetai katiri tangata), te tamaki, e te takinokinoanga no te iti tangata me kore te akonoanga.​—Easily Led—​A History of Propaganda.

Me ka rauka i te tangata i te akavare ia tatou ma te pikikaa, mei teaa atura a Satani? Kua apii ana aia i te tu o te tangata mei muatangana. Pera katoa, koia te akaaere i “to te ao ravarai,” no reira te taangaanga ra aia i tetai ua atu tuanga o teia ao kia akatotoa i tana pikikaa. (1 Ioane 5:19; Ioane 8:44) Ko Satani te “akapoiri nei i te manako” o te manganui e koia “tei pikikaa i to te ao katoatoa nei.” (2 Korinetia 4:4; Apokalupo 12:9) Akapeea koe me patoi i tana pikikaa?

Apii mai a Iesu i tetai ravenga māmā ua kia patoi atu i te pikikaa: “Ka kite ïa kotou i te tuatua-mou, e na te tuatua-mou kotou e akarangatira.” (Ioane 8:31, 32) I roto i te tamaki, ka anoanoia te vaeau kia kite i te ngai ka rauka mai te akakiteanga irinakiia no te mea ka akatotoa te enemi i te pikikaa ei akavare iaia. No reira ka aere koe kiea kia rauka mai te au akakiteanga irinakiia? Kua oronga mai a Iehova i tana Tuatua, te Pipiria. I roto i reira, ka kitea te au apinga taau e anoano ra kia patoi i ta Satani pikikaa.​—2 Timoteo 3:16, 17.

E tika, kua kite takere a Satani i teia. No reira ka taangaanga aia i teianei ao ei akavare e te tamanata ia tatou kia kore e apii i te Pipiria. Auraka e vare i te “ravenga pakari a te Diabolo.” (Ephesia 6:11) Kare e rava ua kia rauka te mārama anga no te tuatua mou. Ka anoanoia kia angaanga pakari e te akaoonu atu i to tatou kite i te tuatua mou. (Ephesia 3:18) Karanga te tangata tata ko Noam Chomsky e, “Kare tetai tangata e riringi i te tuatua mou ki roto i toou roro. Ka anoanoia koe kia kimi i te reira noou uaorai.” No reira e “akara noou uaorai” na “te kimi anga i te tuatua i tataia ra.”​—Angaanga 17:11.

Kare a Satani e inangaro ia koe kia akamanako meitaki e kia mārama i te tuatua mou taau i rongo. No teaa ra? No te mea “ka angaanga meitaki” te pikikaa me “kare te tangata e akamaroiroiia kia akamanako meitaki.” (Media and Society in the Twentieth Century) Auraka e irinaki i te au mea pouroa taau i rongo ma te kore e akamanako i te  reira. (Maseli 14:15) Kua oronga mai te Atua i te “akono meitaki” e te “kite i te akamanako,” no reira e taangaanga i te reira kia akamatutu i toou akarongo.​—Maseli 2:10-15; Roma 12:1, 2, NW.

Te au vaeau tei akanauruia e te pikikaa, ka mataku e kare e inangaro i te tamaki. Ka akakeu katoa te pikikaa ia ratou kia tamaki i tetai e tetai me kore kia akatakake ia ratou uaorai mei te nuku vaeau. Kia tau ki tetai tianara Tiamani, ko te pikikaa tetai tumu i ruti ei a Tiamani i te Tamaki I i te Ao. Karanga aia e kua vare te tangata i te pikikaa mei te mea rai e kua ngaro to ratou manako. Ka taangaanga a Satani i tetai au ereere ei akakore i te tu rotai o te au Kerititiano i teia tuatau. Ei akaraanga, ka tauta aia i te akatupu i te taumāro i rotopu i te au taeake. Me kore ka akavare aia ia ratou kia akaruke i ta Iehova akaaerenga e kia manako ratou e kare e tau ana e kua rave i te tika kore.

Auraka e vavare! E aru i te akoanga a te Tuatua a te Atua kia vai taokotai ki te au taeake. Ei akaraanga, te akamaroiroi ra te Pipiria ia tatou kia “akakore tetai i ta tetai ara,” e kia viviki i te akatikatika i te au manamanata. (Kolosa 3:13, 14; Mataio 5:23, 24) Akamatakite katoa te reira auraka e akatakake ia tatou mei te putuputuanga. (Maseli 18:1) E akapapu e kua papa koe i te patoi atu i ta Satani pikikaa. Ui kia koe uaorai, ‘Te taime openga i akariri mai ei tetai taeake iaku, kua ariu ainei au na roto i te tu tei akamareka i te Atua me kore ia Satani?’​—Galatia 5:16-26; Ephesia 2:2, 3.

Me kare te vaeau e tiratiratu ki tona arataki, kare aia e tamaki meitaki. No reira te taangaanga ra te enemi i te pikikaa kia takore i te irinaki papu o te vaeau i tona arataki. Me rave te arataki i te tarevake, ka taangaanga te enemi i te reira e ka karanga e: “Auraka koe e irinaki ia ratou” e “Auraka koe e akatika ia ratou kia arataki ia koe ki roto i te tumatetenga!” E pera katoa ana a Satani. Ka akakore aia i toou irinaki papu i te aronga ta Iehova e taangaanga ra kia arataki i tona iti tangata.

Akapeea koe me paruru ia koe uaorai? Kia noo tamou ki roto i te akaaerenga a Iehova. Kia vai tiratiratu e kia turu i te aronga e arataki ra i te iti tangata o te Atua, noatu e aronga apa ratou. (1 Tesalonia 5:12, 13) Ka  tamaki mai te au aronga tei akaruke i te akarongo e te akavare i te akaaerenga. (Tito 1:10) Noatu e ka akara anga tika ta ratou tuatua, “kia kore to kotou ngakau e ngaueue vave.” (2 Tesalonia 2:2) E aru i te akoanga ta Paulo i oronga kia Timoteo: “Kia mou marie ra koe i taau i apii ra, kua kite oki koe i toou kite i kite ei koe ra.” (2 Timoteo 3:14, 15) E akamanako i te au akapapu anga pouroa e te taangaanga ra a Iehova i te tavini akono meitaki e te pakari no tetai anere mataiti kia apii i te tuatua mou kia tatou.​—Mataio 24:45-47; Ebera 13:7, 17.

Ka tauta katoa a Satani i te patoi pakari ia koe. Tetai taime ka tamataku aia ia koe. Ko te tamataku anga “tetai ravenga taito no te pikikaa.” (Easily Led​—A History of Propaganda) Kua tata a Philip M. Taylor, e tangata kite no Peritane e kua taangaanga to Asura i te tamataku anga e te pikikaa ei akatere i to ratou enemi. Ka taangaanga a Satani i te mataku, koia oki te mataku tangata, te takinokino, te mataku i te mate, kia tāpu ia koe mei te tavini ia Iehova.​—Isaia 8:12; Ieremia 42:11; Ebera 2:15.

Auraka e akatika ia Satani kia pera! Karanga a Iesu: “Auraka e mataku i te aronga e ta mai i te kopapa nei, e oti akera, kare atu ta ratou e rauka.” (Luka 12:4) E irinaki pu tikai i ta Iehova i papau kia akono ia koe, e te oronga i “te mana maata meitaki nei,” te ka tauturu ia koe kia patoi i ta Satani takinokinoanga.​—2 Korinetia 4:7-9; 1 Petero 3:14.

E tika, i tetai taime ka manako paruparu koe e ka mataku. Inara e akamaara i ta Iehova i tuatua kia Iosua: “Kia matutu, e kia maroiroi roa, auraka e mataku, auraka oki e ngarangara, tei vaitata katoao oki to Atua ko Iehova ia koe i to au aerenga katoa ra.” (Iosua 1:9) Me apiapi koe, e pure viviki kia Iehova no toou manamanata. Ka papu i reira ia koe e “na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako.” Ka maroiroi koe e ka patoi pakari i ta Satani pikikaa pouroa.​—Philipi 4:6, 7, 13.

Maara ainei ia koe te pikikaa a te apai karere o Asura ko Rabasake ei tamataku i te iti tangata o te Atua? Inangaro aia ia ratou kia irinaki e kare tetai ua atu e akaora ia ratou mei to Asura, kare katoa a Iehova. Karanga aia e na Iehova i akakite ki to Asura kia takore ia Ierusalema. Eaa ta Iehova i pau mai? “Auraka e mataku i te au tuatua taau i akarongo akenei, ta te au tavini o te ariki o Asura i akakino iaku ra.” (2 Ariki 18:22-25; 19:6) I reira, kua tono a Iehova i te angera kia tamate e 185,000 Asura i te po okotai!​—2 Ariki 19:35.

Kua akara ainei koe i tetai teata e kare te tangata i kite te akavareia ra aia? Inangaro ainei koe i te kapiki maata: ‘Auraka e irinaki i te reira! Te pikikaa ra ratou ia koe!’ Ka akamanako ana i reira te au angera te akakite ra kia koe: “Auraka e vavare i ta Satani pikikaa!”

Auraka e akarongo ki ta Satani pikikaa. (Maseli 26:24, 25) E akarongo kia Iehova ma te irinaki kiaia i toou aerenga katoa. (Maseli 3:5-7) E inangaro tona ia koe e te raurau ra ia koe: “E taku tamaiti, kia pakari koe, kia rekareka toku ngakau.” (Maseli 27:11) Me pera koe, ka autu koe i te tamaki o toou manako!