KUA anoanoia a Iosua kia arataki i te ngati Iseraela ki roto i te Enua Taputouia. E mea ngata tikai teia i te rave. Inara, kua akaketaketa e kua akamaroiroi a Iehova iaia na te tuatua anga: “Kia matutu ra koe, e kia maata rava te maroiroi.” Akakite aia kia Iosua e me tatau e me akarongo aia ki te Ture, ka rauka iaia i te rave i te au ikianga pakari e ka manuia tona aerenga.—Iosua 1:7, 8.

Te noo nei tatou i te tuatau “kino maata,” no reira ka ngata katoa rai to tatou oraanga. (2 Timoteo 3:1) Me inangaro tatou kia meitaki mei ia Iosua rai, ka anoanoia tatou kia aru i te ako anga ta Iehova i oronga kiaia. Ka anoanoia tatou kia tatau putuputu i te Pipiria e kia taangaanga i ta tatou i apii mai no te rave i te au ikianga meitaki.

Inara penei kare tetai pae ia tatou e kite akapeea me rave i te apii, me kore kare e reka ana i te apii. Tera ra, e mea puapinga tikai ta tatou uaorai apii Pipiria. Me akara koe i te pia “ E Tamata i Teia au Manako,” ka kite mai koe i tetai au ravenga ei tauturu ia koe kia puapingaia mei taau apii e kia mataora katoa i te reira.

Kua imene te tata Salamo: “E arataki koe iaku na te arataa ra o taau au akauenga; e mea mataora oki naku te reira.” (Salamo 119:35) Ka mataora katoa koe i te apii i te Tuatua a te Atua. E maata te au manako manea taau ka kite mai me apii ua rai koe i te Pipiria.

Noatu kare koe e arataki i tetai iti tangata mei ta Iosua rai i rave, ka vai rai toou au tu ngata. No reira, mei ia Iosua rai, e apii e e akarongo ki te Tuatua a te Atua. Me pera koe, ka rauka ia koe i te rave i te au ikianga pakari e ka manuia toou aerenga.