1. No teaa tatou ka karanga ai e na Iehova te au mea ravarai? (Akara i te tutu mua.)

NA IEHOVA te au mea ravarai! Nana “oki te rangi, e te rangi o te au rangi ra, no to Atua ïa no Iehova, te enua nei oki e te au mea katoa i roto ra.” (Deuteronomi 10:14; Apokalupo 4:11) No te mea, na Iehova i anga i te tangata, nana pouroa tatou. (Salamo 100:3) Inara i roto i te tangata katoatoa, kua iki te Atua i tetai aronga nona na roto i tetai tu akaperepereia.

2. Kia tau ki te Pipiria, koai mā te aronga ta Iehova i akaperepere?

² Ei akaraanga, akataka a Salamo 135 i te aronga akamori tiratiratu o Iehova i Iseraela taito ei “apinga akaperepere” nana. (Salamo 135:4) Pera katoa, kua totou a Hosea e ka riro etai aronga kare i te ngati Iuda ei iti tangata no Iehova. (Hosea 2:23) Kua akatupuia teia totou, te akamata anga a Iehova i te iki i te tangata kare i te ngati Iuda kia tutara i te rangi ma Karaiti. (Angaanga 10:45; Roma 9:23-26) Kapikiia te aronga tei  akatainuia ki te vaerua tapu e “iti-tangata tapu.” E “aronga okoia” na Iehova. (1 Petero 2:9, 10) Inara akapeea te au Kerititiano tiratiratu katoatoa i teia tuatau tei manakonako atu i te ora e tuatau ua atu i te enua nei? Kapiki katoa a Iehova ia ratou ko “toku ra iti-tangata” e “tei ikiia e au ra.”—Isaia 65:22.

3. (a) Koai mā, e pirianga akaperepere to ratou kia Iehova i teia tuatau? (e) Eaa ta tatou ka uriuri i roto i teia atikara?

³ I teia tuatau ko te “anana iti” tei manakonako kia noo mutukore i te rangi, e te “mamoe ke atu” tei manakonako kia noo mutukore i te enua nei, ka akamori kapiti raua ei “okotai oki anana.” (Luka 12:32; Ioane 10:16) Ka inangaro tatou i te akaari kia Iehova e te mataora ra tatou e e pirianga akaperepereia to tatou kiaia. I teia atikara, ka uriuri tatou akapeea me akaari i to tatou mataora kia Iehova, no teia turanga ngateitei.

4. Akapeea tatou me akameitaki ia Iehova no tei akatika ia tatou kia rauka tetai pirianga kiaia, e akapeea a Iesu te rave katoa anga i teia?

⁴ Ka akameitaki tatou ia Iehova na te akatapu anga ia tatou uaorai kiaia e kia papetitoia. Ka kite i reira te katoatoa e no Iehova tatou e te puareinga ra tatou i te akarongo kiaia. (Ebera 12:9) Kua rave katoa a Iesu i teia i tona papetitoia anga. Noatu e, e tuanga takere aia no tetai iti tangata tei akatapuia kia Iehova, kua oronga aia iaia uaorai kia Iehova. Mei te mea te karanga ra aia: “E mea tau naku te rave i toou anoano, e taku Atua; te vai nei oki taau ture tei roto i toku nei ngakau.”—Salamo 40:7, 8.

5, 6. (a) Eaa ta Iehova i karanga te papetitoia anga a Iesu? (e) Eaa te akatutuanga te ka tauturu ia tatou kia mārama i to Iehova manako no to tatou akatapuanga?

⁵ Eaa to Iehova manako te papetitoia anga a Iesu? Karanga te Pipiria: “E oti akerā Iesu i te bapetizoia, kake maira aia ki runga mei raro mai i te vai; e i na, veveteia akera te rangi iaia, akara akera aia i te vaerua o te Atua i te eke anga mai mei te kukupa, e te to anga mai ki rungao iaia: E i na, ko te reo maira no te rangi, i te na ko anga mai e, Taku Tamaiti akaperepere teia, kua mareka rava au iaia.” (Mataio 3:16, 17) No Iehova takere a Iesu. Inara kua mataora a Iehova te kite anga ia Iesu ma te puareinga ua i te taangaanga i tona oraanga kia tavini anake Iaia. Ka mareka katoa a Iehova me akatapu tatou i to tatou oraanga kiaia, e ka akameitaki ia tatou.—Salamo 149:4.

⁶ Inara na Iehova takere te au mea ravarai! Eaa ta tatou ka oronga atu kiaia? Akamanako ana i tetai tangata e aua tiare manea tana. I tetai rā kua aaki mai tana tamaine meangiti i tetai tiare e kua oronga i te reira kiaia. Noatu e nana te tiare, rekareka tikai te papa i te apinga aroa. Te akaari ra te reira e te inangaro ra tana tamaine iaia. E tiare akaperepere ravaia atu te reira no ko mai i tana tamaine, i te au tiare katoatoa i roto i tana aua tiare. Pera katoa to Iehova mataora me puareinga ua tatou i te akatapu i to tatou oraanga kiaia.—Exodo 34:14.

7. Akapeea a Malaki te tauturu anga ia tatou kia mārama i to Iehova manako no te aronga tei puareinga ua i te tavini iaia?

⁷ E tatau ia Malaki 3:16. Eaa i puapinga ai kia akatapu tatou i to tatou oraanga kia  Iehova e kia papetitoia? E tika, mei te taime i anauia ai koe, na Tei Anga ia tatou, na Iehova koe. Inara, akamanako i to Iehova mataora me āriki koe iaia ei Tutara noou e kia akatapu ia koe uaorai kiaia! (Maseli 23:15) Kua kite a Iehova i te aronga tei puareinga ua i te tavini iaia, e ka tata i to ratou ingoa ki roto i tana “buka manakoanga.”

8, 9. Eaa ta Iehova e pati maira i te aronga kua tataia to ratou ingoa ki roto i tana “buka manakoanga”?

⁸ Me ka inangaro tatou i to tatou ingoa kia vai ki roto i ta Iehova “buka manakoanga,” ka anoanoia tatou kia rave i tetai apinga. Karanga a Malaki e kia mataku tatou ia Iehova e kia akamanako oonu i tona ingoa. Me akamori tatou i tetai ua atu me kore i tetai ua atu apinga, ka kiritiia to tatou ingoa mei roto i te puka a Iehova!— Exodo 32:33; Salamo 69:28.

⁹ No reira kare e rava ua kia taputou tatou i te rave i to Iehova anoano e kia papetitoia. Okotai rai taime ka raveia teia, inara ka akamori tatou ia Iehova i to tatou oraanga katoa. I te au rā ravarai, kia akapapu meitaki i ta tatou e rave ra, e te akarongo ra tatou kiaia.—1 Petero 4:1, 2.

10. Eaa tikai te tuke i rotopu i te aronga tei tavini ia Iehova e tei kore?

¹⁰ I te atikara i mua ake, kua apii tatou e kua inangaro a Kaina, a Solomona, e te ngati Iseraela i te akamori ia Iehova inara kare ratou i tiratiratu ana kiaia. Kua apii mai teia au akaraanga, e kare e rava ua i te karanga e ka akamori tatou ia Iehova. Ka anoanoia tatou kia rikarika i te kino e kia inangaro i te meitaki. (Roma 12:9) Karanga a Iehova e ka kiteaia te tuke “i te tangata tuatua-tika e te tangata kino, i te tangata i akamori i te Atua, e i tei kore i akamori iaia.”—Malaki 3:18

11. No teaa ka māmā ei no te katoatoa kia kite mai e te akamori anake ra tatou ia Iehova?

¹¹ Te mataora nei tatou no tei iki a Iehova ia tatou ei iti tangata nona! Kia māmā ua te reira i te kitea e no Iehova tatou. (Mataio 5:16; 1 Timoteo 4:15) E ui kia koe uaorai: ‘Te kiteaia maira ainei e te tiratiratu tikai ra au kia Iehova? Te ngakau parau ra ainei au i te akakite ki te tangata e ko au tetai o te Au Kite o Iehova?’ Akamanako ana i to Iehova maromaroa me akama tatou i te akakite ki tetai ke, e nona tatou.—Salamo 119:46; E tatau ia Mareko 8:38.

12, 13 Akapeea tetai pae me riro ei mea ngata no tetai pae kia akataka ia ratou ei Au Kite no Iehova?

¹² Ma te maromaroa, te aru ra tetai pae Au Kite i ‘te vaerua o teianei ao.’ Tei tupu mai, kare ratou e tuke tikai ana mei te aronga kare e akamori ana ia Iehova. (1 Korinetia 2:12) Ka riro ‘te vaerua o teianei ao’ ei akakeu i te tangata kia akamou ki runga i to ratou uaorai anoano noinoi. (Ephesia 2:3) Ei akaraanga, noatu  te au ako anga tei orongaia mai, te iki ra tetai pae i te aao i te kakau tau kore. Te aao ra ratou i te kakau pipiri e te akaariari, e ki te au tarekareka anga Kerititiano. Me kore, te iki ra ratou i te au tu rauru tau kore. (1 Timoteo 2:9, 10) Te ka tupu mai, penei ka ngata i tetai ke i te akara mai me e Au Kite ratou no Iehova.—Iakobo 4:4.

¹³ Te vaira tetai atu au mataara kare te Au Kite e tuke tikai ana mei teianei ao. Ei akaraanga, i ko i te au tarekarekaanga, kua uraura e kua marikonga kore tetai pae, kare to ratou tu e tau ana no te au Kerititiano. Kua tuku tetai pae i to ratou tutu e te au tuatua ki runga i te social media tei akaari i to ratou tu manako tangata. Penei kare ratou i akoia i roto i te putuputuanga Kerititiano no tetai ara kino, inara ka riro rai ei akakeu anga kino ki runga i to ratou au taeake e te au tuaine te tauta pakari ra kia tuke ratou mei teianei ao.—E tatau ia 1 Petero 2:11, 12.

14. Eaa ta tatou ka rave no te paruru i to tatou pirianga taeake kia Iehova?

¹⁴ Kua akakoroia te au mea ravarai i teianei ao kia akamou ki runga i “te anoano tika kore o te kopapa nei, e te anoano tika kore o te mata nei, e te akatietie o te ora anga nei.” (1 Ioane 2:16) No Iehova tatou, no reira e tuke rai tatou. Ka “kopae tatou i te akono kore i te Atua, e te anoano o teianei ao,” e ka “noo tatou ma te tau meitaki, te tuatua-tika, e te akono i te Atua, i teianei ao.” (Tito 2:12) Ka riro to tatou oraanga katoa, me tuatua, me kai, me inu, me aao i te kakau, e me angaanga, kia taka meitaki ki te katoatoa e no Iehova tatou.—E tatau ia 1 Korinetia 10:31, 32.

15. No teaa tatou ka takinga meitaki ei e ka aroa ei i te au Kerititiano?

¹⁵ Ka akaari tatou e te akariro ra tatou i to tatou pirianga oa kia Iehova ei mea puapinga na te akono anga i to tatou au taeake e te au tuaine. No Iehova ratou, mei ia tatou katoa. Me akamaara tatou i teia, ka akono ua rai tatou ia ratou ma te takinga meitaki e te aroa. (1 Tesalonia 5:15) Mei teaa te puapinga i teia? Karanga a Iesu ki tana au pipi: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”—Ioane 13:35.

16. Eaa ta tatou ka apii mai mei te Ture a Mose no runga i to Iehova aroa no tona iti tangata?

¹⁶ Ka tauturu tetai akaraanga mei te Ture a Mose kia mārama tatou akapeea i te akono i tetai e tetai i roto i te putuputuanga. I te iero o Iehova, te vaira te au āriki tei taangaanga anakeia no te akamorianga. Te akataka meitaki ra te Ture, akapeea te ngati Levi me akono i te au āriki, e me kare tetai ua atu e aru i te au aratakianga, ka tamateia ratou. (Numero 1: 50, 51) Me kua inangaro a Iehova kia akono meitakiia te au āriki i roto i tana akamorianga, mei teaa atura tona inangaro kia akono meitakiia tona aronga akamori tiratiratu e tei akatapuia! Kua akakite mai aia i tona tu akaperepere ia tatou te karanga anga: “Ko tei akatukia atu oki ia kotou ra, kua akatukia ïa i tona koringo mata nei.”—Zekaria 2:8.

17. Eaa ta Iehova ‘e akarongo mairā, e kua kite’?

¹⁷ Karanga a Malaki e te “akarongo mairā Iehova, e kua kite” e akapeea tona iti tangata me akono i tetai e tetai.  (Malaki 3:16) Kua ‘kite a Iehova i tona uaorai.’ (2 Timoteo 2:19) Te kite meitaki ra aia i te au mea ravarai ta tatou e rave ra e e tuatua ra. (Ebera 4:13) Me kino tatou ki te au taeake e te au tuaine, te kite maira a Iehova. Inara ka papu ia tatou e ka kite katoa mai a Iehova i to tatou tu akamanuiri, oronga ua, akakore i te ara, e te takinga meitaki.—Ebera 13:16; 1 Petero 4:8, 9.

18. Akapeea tatou me akameitaki ia Iehova no te ikianga ia tatou ei iti tangata nona?

¹⁸ Ka inangaro tatou i te akaari i to tatou mataora kia Iehova e nona tatou e ei iti tangata nona. Kua kite tatou e me akatapu tatou i to tatou oraanga kiaia, e iki anga pakari roa atu te reira. Noatu e te noo ra tatou “i rotopu i te uki piko e te māro,” ka rauka rai “kia kakā kotou i rotopu ia ratou mei te rama i teianei ao.” (Philipi 2:15) No reira auraka tatou e rave i tetai ua atu apinga ta Iehova e rikarika ra. (Iakobo 4:7) Te inangaro ra e te akangateitei ra tatou i to tatou au taeake e te au tuaine no te mea, no Iehova ratou.—Roma 12:10.

19. Akapeea a Iehova me tutaki i te aronga tei iaia ra?

¹⁹ Taputou maira te Pipiria: “Kare oki a Iehova e akaruke i tona au tangata.” (Salamo 94:14) Ko te akapapu anga teia. Noatu eaa te ka tupu mai, ka vai ua rai a Iehova kia tatou. Noatu me ka mate tatou, kare e ngaropoina iaia tatou. (Roma 8:38, 39) “Te ora nei tatou, i ora ïa tatou ei akatupu i ta te Atu; e te mate nei tatou, i mate ïa tatou ei akatupu i ta te Atu: e teianei, te ora nei tatou, e te mate nei oki, no te Atu rai tatou.” (Roma 14:8) Ka akara tatou ki mua i te tuatau me akatuakaou mai a Iehova i te au taeake tiratiratu tei mate. (Matatio 22:32) Pera katoa i teianei, te rekareka ra tatou i te au apinga aroa manea mei ko mai i to tatou Metua. Mei ta te Pipiria e karanga ra, “E ao to te enua ko Iehova to ratou Atua; te au tangata i ikiia e ia ei tuanga nana.”—Salamo 33:12.