Kare teia puka i te rapakau maki, mari ra te oronga maira te Pipiria i te au akoanga meitaki e te tau. Ka tauturu teia ia koe kia akakoromaki i teia au maki manako. Akamanako i teia au akaraanga.

“Kare no te aronga ora te [taote], no te aronga maki ra.”​—MATAIO 9:12.

Akatika te Pipiria e ka anoano rai tatou i te rapakau anga a te taote. E maata tei maru mai te rauka anga te kimikimi anga no to ratou maki manako e kua kimi atu i te tauturu a te aronga karape e te kite.

“E meitaki kia akaetaeta i te kopapa.”​—1 TIMOTEO 4:8, Contemporary English Version.

Na te akapou anga i tetai taime e te maroiroi kia rauka te oraanga kopapa meitaki, ka meitaki atu toou maki manako. Ka kapiti mai te akaetaeta anga putuputu i te kopapa, te kai i te au kai matutu, e kia rava te moe.

“E meitaki to te ngakau rekareka mei te vairakau ra: e marō ra te ivi i te ngakau taitaia.”​—MASELI 17:22.

Na te tatau anga i te au irava Pipiria akamaroiroi e kia tuku i te au akakoroanga tau, ka rauka tetai vaerua mataora. Ka riro te tu  papu e te oraora ei tauturu ia koe kia vai meitaki ua i te pae o te manako ngakau me akakoromaki koe i toou maki manako.

“Tei te aronga akaaka ra te pakari.”​—MASELI 11:2.

Penei ka kite mai koe e ngata te rave i te au mea ravarai mei to mua ana, no reira e āriki i te tauturu a te au taeake. Ka inangaro te au oa e te kopu tangata i te tauturu ia koe, inara penei kare ratou e kite eaa te reira. E akakite atu kia ratou taau tauturu e inangaro tikai ra. Kia manako tau i taau e tapapa atura, e kia akameitaki ua i te tauturu ta ratou e oronga atura.

“Kite mai au kare tetai mea e tano ana, e kua ui atu au ki te taote. Kua akakite mai aia i toku turanga. Kua tauturu teia iaku kia āriki i toku turanga e kia rauka te au ravenga rapakau kia meitaki atu toku oraanga pae kopapa.”​—Nicole, a e maki bipolar tona.

“Kite mai au na te tatau putuputu anga i te Pipiria maua ko taku vaine, tauturu te reira iaku kia rauka te manako meitaki, e te akamaroiroi. I tetai au rā me ngata iaku te akakoromaki, ka pakia toku ngakau te tatau i tetai irava.”​—Peter, e maki taitaia tona.

“E ngata iaku te akakite atu i toku tu ngata no toku akama. Kua mārama ra toku oa piri mou ma te akaaroa mai iaku. Kua tauturu mai aia iaku e kua noo ua i te pae iaku.”​—Ji-yoo, e maki akakore kai tona.

“Kua tauturu te Pipiria iaku kia rauka te manako tau i taku ngai angaanga e kia akangaroi. Kua tauturu te pakari o te Pipiria kia akakoromaki au i te au manako ngakau tei akataitaia iaku.”​—Timothy, e maki obsessive-compulsive disorder tona.