Eaa te Taviri e Manuiai?

TE AKAPAPA ra e rua nga mapu tane angaanga maroiroi i tetai matini akara anga tuke ia ra no tetai tamata anga puapinga tikai. Ma te viviki ra, kua opu te matangi pakari i taua apinga ngaa ua, kua taviri i te reira i roto i te mareva, e ma te tangi anga pakakina kua akapueurikiriki i te reira. Ma te maromaroa, kua tu muteki ua nga tangata. Ta raua angaanga pakari e te matakite kua atiati ei putunga rakau e te auri.

No Orville e Wilbur Wright, ko tei tupu i taua ra ia Okotopa i te 1900 kare e ko te manamanata mua o ta raua tauta anga i te maani i tetai matini teiaa ka akarere i roto i te mareva. Kua pou ke ana ia raua etai au mataiti e te moni maata i te tamata ua anga.

Inara, i te openga ra, kua pauna to raua tuatau aruaru anga. Ia Titema 17, 1903, i Kitty Hawk, North Carolina, U.S.A., kua rauka i te nga taeake Wright i te taangaanga i tetai matini akaoro tutu mua tei rauka i te rere e 12 tekoni​—e poto ua me akaaiteia ki te au pairere e rere ra i teia tuatau, inara kua roa ua no te taui mutu kore i te ao!

Tei runga tikai te manuia anga o tetai au angaanga i te aruaru tamou marie anga. Me te apii ra i tetai reo ou, te apii ra i tetai angaanga, me kare te akatupu ra i te piri anga vaitata, ka rauka ua te au apinga puapinga na roto i te tauta pakari anga. “E iva taime i roto i te tai ngauru,” i na te tangata tata ei ko Charles Templeton, “kua tuatua tika uaia te manuia anga ki tetai apinga okotai: angaanga pakari.” Kua akakite te tangata tata pepa ko Leonard Pitts, Jr., e: “Ka tuatua tatou i te tu karape, ka akakite ua tatou e mea manuia ua, inara e putuputu te taime, kua kopae tatou i te apinga puapinga maata. Te angaanga pakari e te au poka anga e manganui. Te tae vave mai anga e te noo roa anga.”

Te akapapu maira teia i ta te Pipiria i tuatua kua roa akenei: “Te rima o te maroiroi ra, e mana ïa.” (Maseli 12:24) Te aite anga o te angaanga maroiroi koia oki kia aruaru tatou i roto i ta tatou e tauta ra. Te anoanoia ra teia me te inangaro ra tatou e kia rauka ia tatou ta tatou e aruaru ra. Eaa ra te tu aruaru? Akapeea e raukai ia tatou i te aruaru i ta tatou au akakoroanga, e eaa ta tatou ka tau kia aruaru? Ka pauia teia au uianga i roto i te atikara ka aru mai.

[Akameitakianga no te Tataanga i te kapi 3]

U.S. National Archives photo