Rekareka i te Atua o to Tatou Ora

“E rekareka ra au ia Iehova e rere ua au i te rekareka i te Atua o toku nei ora.”​—HABAKUKA 3:18.

1. No runga i teaa ta Daniela orama i akara i mua ake i te topa anga o Babulonia i te 539 M.T.N.?

E MAATA i te ngauru mataiti i mua ake i te topa anga a Babulonia i te 539 M.T.N., kua akara atu te peroveta ruaine ko Daniela i tetai orama marekaanga. Kua totou mai ia i te au tupu anga i teianei ao tae roa ki te tamaki maata i rotopu i te au enemi o Iehova e tana ariki akataoongaia, koia Iesu Karaiti. Eaa te tupu anga kia Daniela? Kua tuatua aia: “Rere a mate ua iora au . . . e va ua iora au i taua orama ra.”​—Daniela 8:27.

2. Eaa te tamaki ta Daniela i kite i te orama ra, e akapeea to tatou manako ngakau no te vaitata anga o te reira?

² Ka peea oki tatou? Te noo nei tatou e mamao rava mai i te tuatau mei reira! Akapeea ra to tatou manako i to tatou kite anga e ko taua tamaki i kitea ra i te orama a Daniela​—koia te tamaki o te Atua ko Aramakito—​te vaitata rava maira? Akapeea oki to tatou manako i to tatou kite anga e ko te rave kino tei akakite ateaia i te totou a Habakuka ra kua kino rava no reira ka tupu ra te akapou anga i te au enemi o te Atua ra? Penei ake, ka aiteite to tatou manako ngakau ki to Habakuka uaorai, mei tei akatakaia mai i te pene toru o tana puka totou ra.

Kua Pure a Habakuka no to te Atua Aroa Ua

3. Kua pure a Habakuka noai ma, e penei akapeea te tupu anga kia tatou o tana au tuatua?

³ Te pene 3 o Habakuka e pure ia. Kia tau ki te irava 1, te akakiteia maira ia i roto i te au imene aue, au imene no te mamae ngakau. Te orongaia maira te pure a te peroveta ra mei te mea rai e nona uaorai. Inara, ko te tika, te tuatua ra Habakuka no te iti tangata ikiia o te Atua. I teia tuatau, e puapinga maata te aite anga o tana pure no te iti tangata o te Atua, te piri ra ki roto i  te angaanga tutuanga Patireia. Me tatau tatou ia Habakuka pene 3 ma teianei i roto i te manako, ka akaki mai tana au tuatua ia tatou ma te akairo momua mai inara ma te rekareka katoa oki. Te oronga maira ta Habakuka pure, me kare imene aue, i te tumu maroiroi no tatou kia rekareka ia Iehova, i te Atua o to tatou ora.

4. Eaa a Habakuka i riro ei kia mataku, e eaa te akono anga i te mana o te Atua ka tika tatou kia irinaki?

⁴ Mei ta tatou i kite i nga atikara e rua i mua akenei, e kino tikai te au tu i te enua o Iuda i te tuatau ia Habakuka ra. Inara kare te Atua i akatika kia vai mai taua turanga ra. Ka rave ra Iehova, mei tana i akono ra i mua ana. No reira ra te peroveta ra i kapiki ei: “I akarongo ana au i te rongo ia koe, E Iehova, mataku iora au; e Iehova e, e akatupu akaou koe i taau angaanga”! Eaa te aiteanga o tana tuatua? ‘Te rongo no Iehova,’ ko te tuatua enua tataia no ta te Atua ra au angaanga mana, mei to te Tai Muramura ra, i te metepara, e i Ieriko oki. Kua kite meitaki a Habakuka i teianei au angaanga, e kua akariro iaia kia mataku no te mea kua kite aia e ka taangaanga akaou a Iehova i tona mana maata ei takore i tona au enemi. Me akara tatou i te rave kino a te tangata i teianei, ka kite katoa tatou e ka rave a Iehova mei tana i rave ra i te tuatau taito. Te akariro ra ainei te reira kia mataku tatou? Ko te tika ia! Tera ra, ka pure tatou mei ia Habakuka rai: “E akatupu akaou koe i taau angaanga i rotopu i te au mataiti ra; i rotopu i te au mataiti e akakite mai koe: i te riri anga ra, e akamaara koe i te aroa.” (Habakuka 3:2) I te tuatau tau a te Atua, “i rotopu i te au mataiti,” kia apai mai aia i tona mana temeio kia rave angaanga. E i taua tuatau ra, kia maara aia i te akaari aroa ki te aronga tei inangaro ra iaia!

Te Aere ra a Iehova!

5. I akapeea to ‘te Atua aere anga mai mei Temana’ e eaa ta teianei i akakite mai no Aramakito?

⁵ Eaa te ka tupu me ka akarongo mai a Iehova i ta tatou pure no te aroa? Ka kitea e tatou te pauanga ia Habakuka 3:3, 4. Te mea mua, kua tuatua te peroveta: “I aere mai te Atua mei Temana mai; e Tei Tapu ra mei te maunga rai i Parana.” I te tuatau i te peroveta ia Mose ra, i runga a Temana e Parana i te mataara o Iseraela na roto i te metepara atu ki Kanaana. I te aereanga te iti tangata maata o Iseraela i to ratou tere, i te akara anga te aere katoa ra a Iehova uaorai, e kare e apinga ei tapu iaia. I mua poto ake i to Mose mate anga, kua tuatua aia: “Mei Sinai mai a Iehova, e kua mama maira aia ia ratou i Seira: kua kakā maira i te maunga ra i Parana, ma te au uru tapu [au angera ra] i te aere mai.” (Deuteronomi 33:2) Me aere mai a Iehova e tamaki i tona au enemi ia Aramakito, ka riro mei te reira rai te tu akakite anga o tona mana maata.

6. Kapiti atu ki to te Atua ra kaka, eaa ta te au Kerititiano kite oonu ra i akara?

⁶ Kua tuatua katoa a Habakuka: “Kua kapi te rangi i [to Iehova] kakā, kua ki oki te enua i te paapaa iaia. Kua tau tona kakā ki to te marama.” Mei teaa ra tetai akakite anga meitaki! E tika, kare e rauka i te tangata kia ora me akara i te Atua ia Iehova ra. (Exodo 33:20) Inara, ko te au tavini tiratiratu o te Atua ra, ka poiri poto ua nga mata o to ratou ngakau me tamanako atu ratou i tona meitaki maata ra. (Ephesia 1:18) E ko te au Kerititiano kite oonu ra ka kite i tetai apinga kapitiia atu ki to Iehova kaka ra. Te taopenga maira Habakuka 3:4 e: “Puroro maira te verovero no roto i tona rima: i reira oki tona mana i te uuna angaia.” Ae, te kite nei tatou e kua papa a Iehova no te rave angaanga na te taangaanga i tona rima katau maroiroi e te mana oki.

7. Eaa te aiteanga o to te Atua ra aerenga autu no te aronga meameaau iaia ra?

⁷ To te Atua ra aere anga autu e tumatetenga ia no te aronga tei meameaau iaia ra. Te tuatua ra a Habakuka 3:5 e: “Kua na mua iaia te maki-mate i te aere; e te maki vera tei aru i tona au takainga vaevae.” I te vaitata anga to Iseraela ki te kotinga o te enua Taputouia ra i te 1473  M.T.N., e manganui to ratou tei meameaau, i te rave akaturi anga e te akamori itoro oki. Ei tetai tupu anga, e tere roa atu i te 20,000 tei mate i tetai maki mate tei tukuia mai e te Atua ra. (Numero 25:1-9) I te tuatau vaitata ki mua, me aere atu a Iehova ki “te tamaki i taua rā maata o te Atua mana katoatoa ra,” te aronga akameameaau kiaia ra ka mamae aiteite no ta ratou au ara. Penei ka mate tetai papaki na te maki mate tikai.​—Apokalupo 16:14, 16.

8. Kia tau ki ta Habakuka 3:6, eaa te vai maira no to te Atua au enemi?

⁸ E akarongo i teianei i te akataka anga tau a te peroveta ra i ta Iehova Sabaota raveanga angaanga. Ia Habakuka 3:6, ka tatau tatou: “Kua tu iora [te Atua ko Iehova], e kua akangaueue atura i te enua; kua akara aia, e kua akaruketekete atura i te au etene; e te au maunga taito ra, pueurikiriki iora, te au tuaivi vaoo-ngata ra, topa iora ki raro; te au aerenga taito nona.” Te mea mua kua “tu iora” Iehova, mei tetai rangatira vaeau te akara matatio ra i te ngai tamaki anga. Kua ruketekete Tona au enemi i te mataku. Kua kite ratou e koai ta ratou ka tamaki atu e kua poitirere oki, kua rererere i te mataku. Kua totou atu a Iesu i te tuatau e “ei reira te au kopu-tangata ravarai o te ao nei e aue ei.” (Mataio 24:30) Kua tu reiti kua kite ratou e kare e rauka i tetai kia tu atu kia Iehova. Te au akaaerenga tangata​—noatu ko tei manakoia e e tinamou mei “te au maunga taito ra” e “te au tuaivi vao-ngata ra”—​ka topa ki raro. Ei reira ka riro mei “te au aerenga taito” o te Atua ra, mei te tu tana i rave i te au tuatau taito ra.

9, 10. Eaa te akamaaraaraia maira kia tatou ia Habakuka 3:7-11?

⁹ Kua ‘ka te riri’ o Iehova ki tona au enemi. Inara eaa tana au apinga tamaki ka taangaanga i tana tamaki maata? E akarongo i ta te peroveta akataka anga i te reira, i te na koanga: “I vai taka uaia to ana, kia tataki itu te korare, ko te tuatua ïa: Kua vavaʼi koe i te au kauvai i te enua nei. Kua akara te au maunga ia koe, e kua ngaueue; te maringi anga o te vai puke ra, riro ke atura ïa, kua tuku maira te moana i tona reo, kua apai i ona rima ki runga roa. Kua noo ua te rā e te mārama ki roto i to raua ngai i te kakā o to au kakao i rere ra, i te kakā kanapanapa o taau korare.”​—Habakuka 3:7-11.

¹⁰ I te tuatau ia Iosua ra, kua akariro a Iehova i te ra e te marama kia tu ua i tetai akaari anga mana umere roa. (Iosua 10:12-14) Te akamaara maira te totou a Habakuka kia tatou e ka taangaangaia taua mana ra e Iehova ia Aramakito. I te 1513 M.T.N., kua akaari a Iehova i tona mana ki rungao i te moana i tana taangaanga anga i te Tai Muramura ra kia akapou atu i te nuku o Pharao ra. E a ngauru mataiti i muri akera, te  vaipuke ki ra te kauvai i Ioridana kare i riro ei arai anga i te aerenga autu o to Iseraela ki roto i te Enua Taputouia ra. (Iosua 3:15-17) I te tuatau o te peroveta vaine ko Debora ra, na te ua vaipuke maata ra i apai ke atu i te au kariota o Sisera enemi o Iseraela ra. (Akava 5:21) Ka taangaangaia taua au mana vaipuke ua maata ra, e te moana oki e Iehova ia Aramakito. Te mangungu e te uira katoa oki tei roto i tona rima, mei te korare rai me kare tetai vairanga ki te kakao ra.

11. Eaa te ka tupu me tuku mai a Iehova i tona mana maata?

¹¹ E tika tikai, ka riro ei mea mataku me tuku mai a Iehova i tona mana maata. Te akakite maira ta Habakuka au tuatua e ka riro te po ei ao e ka maata atu te kaka o te ao i te ka rauka i te ra kia akatupu i te reira. Noatu rai e me teianei totou akataka anga ia Aramakito e mea tika tikai me kare e akatutu anga, ko tetai apinga papu e​—ka autu a Iehova, kare tetai enemi e akatikaia kia ora atu.

Te Ora Papu Tikai no te Iti Tangata o te Atua!

12. Eaa ta te Atua ka rave ki tona au enemi, inara koai te ka akaoraia?

¹² Kua rave ua te peroveta i te akataka i ta Iehova angaanga i te akapouanga i Tona au enemi. Ia Habakuka 3:12, ka tatau tatou: “Ma te riri akaoko i aere ei koe na roto i te enua, ma te riri i takatakai ei koe i te au etene.” Inara, kare a Iehova e akapou i te katoa. Ka akaoraia etai au tangata. “Kua aere koe ei ora no toou ra au tangata, ei ora no to aronga akatainuia ra,” ta Habakuka 3:13 i tuatua. Ae, ka akaora a Iehova i tona au tavini akatainuia tiratiratu ra. Ka riro te akapou anga o Babulonia Maata, koia te patireia akonoanga pikikaa o te ao nei, kia oti takiri i reira ra. Inara, i teia tuatau, te tauta nei te au pa enua kia takore atu i te akamori ma. Kare e roaia, ka aere mai te au nuku a Goga o Magoga kia takino i te au tavini o Iehova. (Ezekiela 38:1–39:13; Apokalupo 17:1-5, 16-18) Ka autu ainei taua tamaki anga a Satani ra? Kare ia! Ei reira a Iehova e takatakai riri atu ei i tona au enemi, ma te akapueuanga ia ratou mei te ua ra i runga i te taua papaanga. Inara ka akaora aia i te aronga tei akamori ra iaia ma te vaerua e te tuatua mou.​—Ioane 4:24.

13. Akapeea te akatupu anga ia Habakuka 3:13?

¹³ E totouia maira te akapou takiri anga o te aronga kino i teianei au tuatua: “Kua paru ia [Iehova] te pu o te are o te aronga kino, kua eeu [aia] i te tumu e tae rava atu ki te kaki ra.” (Habakuka 3:13) Ko teianei “are” ko te akatereanga kino tei akatupuia i raro ake i te mana o Satani te Tiaporo ra. Ka akaparuia ia. Te “pu” me kare te au arataki patoi i te Atua, ka akapueuia. Ka takoreia taua patuanga ra, tae roa ki tona tango. Kare ia e vai mai. Mei teaa ra tetai ora anga meitaki mei te reira!

14-16. Kia tau ki ta Habakuka 3:14, 15, eaa te ka rokoia ki te au tangata o Iehova, e to ratou au enemi oki?

¹⁴ Ia Aramakito, te aronga te tauta ra kia akapou i tei “akatainuia” a Iehova ra, ka tiria atu ki roto i te oripu ua anga. Kia tau ki ta Habakuka 3:14, 15, te tuatua atura te peroveta ki te Atua i te na koanga: “Kua koia e koe tei maata i o tona ra au rangatira ra ki te rakau nana uaorai, tei tu a uriia ra i te aere anga mai ei akapueurikiriki iaku ra, i rekareka ratou mei te mea e kia pou ngaro ua ia ratou te aronga ao. Kua na raro koe i te tai ma to au oroenua ra, na roto i te auau anga o te moana maata ra.”

¹⁵ I ta Habakuka tuatua anga “au rangatira . . . tu a uriia ra i te aere anga mai ei akapuerikiriki iaku ra,” te tuatua ra te peroveta no te au tavini akatainuia no Iehova. Mei te aronga i te mataara te tapapa atura, ka rere atu to te pa enua ki runga i te aronga akamori ia Iehova ra kia akapou ia ratou. Ko teia au enemi o te Atua  e tona au tangata ka “rekareka ratou,” te irinaki ra ka autu ratou. Ka mama paruparu ua mai te au Kerititiano tiratiratu ra, mei te “aronga ao” ra. Inara me ka tamata atu te au nuku patoi i te Atua ra i ta ratou tamaki anga, ka akariro a Iehova kia akaariu atu ratou i ta ratou apinga tamaki kia ratou uaorai. Ka taangaanga ratou i ta ratou au apinga tamaki, me kare ‘au ko,’ kia ta i to ratou uaorai aronga tamaki.

¹⁶ Inara e maata atu te mama maira. Ka taangaanga a Iehova i tona au nuku vaerua mana ra kia akapou takiri i tona au enemi ra. Ma te “au oroenua” o tona nuku vaeau i te rangi i raro ake ia Iesu Karaiti ra, ka opara ua atu aia kia autu na roto i “te tai” e “te auau anga o te moana maata ra,” koia oki te au urupu tangata e oripu ra. (Apokalupo 19:11-21) Ei reira ka akaateaia atu te aronga rave kino mei te enua nei. Mei teaa ra tetai akakite anga ririnui i te mana tu-Atua e te tuatua tau oki!

Te Aere Maira te Ra o Iehova!

17. (a) Eaa ka raukai ia tatou kia irinaki i te tupu anga o te au tuatua a Habakuka? (e) Akapeea ka raukai ia tatou kia aite kia Habakuka ia tatou e tiaki ra i te ra maata o Iehova?

¹⁷ Ka papu ia tatou e kare e roaia ka akatupuia te au tuatua a Habakuka. Kare ratou e tavarevare. Eaa toou manako ki teianei kite momua? Kia maara e i tata a Habakuka i raro ake i te akauru anga tu-Atua. Ka rave ra a Iehova, e ka tupu te taitaia ki runga i te enua nei me rokoia mai te  reira. No reira rai te peroveta i tatai: “Akarongo akera au, ngarepurepu atura toku manava, i te rongo ra, kua ru ua oku ngutu; kua o maira te pe ki roto i toku au ivi, kua ruketekete iora i toku ra ngai: e akaangaroi ra au i taua rā tumatetenga ra, kia kake mai te au tangata e tamaki mai ia matou.” (Habakuka 3:16) Kua rapurapu maata ra Habakuka​—e mea matauia ia. Inara i ngaueue ainei tona akarongo? Kare ia! Kua mareka ua aia kia tatari marie no to Iehova ra maata. (2 Petero 3:11, 12) Kare ainei te reira i to tatou tu manako katoa? E mea tika koia ia! Te akarongo ki katoa ra tatou e ka tupu ta Habakuka i totou maira. Inara, tae roa kia tupu ia, ka tatari marie ra tatou.

18. Noatu rai i tapapa atu a Habakuka i te au tu ngata, eaa tikai tona tu manako?

¹⁸ Te apai maira te tamaki i te tu ngata, noatu rai ki tei autu. Penei ka ngere i te kai. Penei ka riro ke te apinga. Ka topa te tu oraanga. Me ka rokoia te reira kia tatou, eaa ta tatou ka rave? E tu manako meitaki to Habakuka, no te mea kua tuatua aia: “Kore ua atu rai te pua anga o te suke; kore ua atu manga i runga te au vine, kore ua atu rai te olive i te ua mai, e kore ua atu e kai ki runga i te au kainga; pou ua atu rai te au anana i roto i te au koro ra, e kore ua atu te au puakatoro i roto i te vairanga ra: E rekareka ra au ia Iehova e rere ua au i te rekareka i te Atua o toku nei ora.” (Habakuka 3:17, 18) Kua tapapa tikai a Habakuka i te au tu ngata, penei e onge. Tera ra, kare i ngaro iaia tona rekareka ia Iehova, no reira maira oki tona ora.

19. Eaa te au tu ngata te vaira no te au Kerititiano e manganui, inara eaa te ka papu ia tatou me tuku tatou ia Iehova na mua i to tatou oraanga?

¹⁹ I teia tuatau, noatu rai i mua ake i ta Iehova ra tamaki anga i te aronga rave kino, e manganui te mamae ra i te taitaia. Kua totou mai a Iesu i te au tamaki, te onge kai, ngaruerue enua, e te au maki mate ei tetai tuanga no ‘te akairo no tona aerenga mai’ i te mana ariki. (Mataio 24:3-14; Luka 21:10, 11) E manganui to tatou au oa akarongo te noo nei i te au enua te mamae kino ra na te tupu anga te au tuatua a Iesu ra, e te mamae ra ratou i te au tu ngata maata ei tetai tupuanga ra. Penei ko etai atu au Kerititiano ka aiteite katoa te tupu anga i te tuatau ki mua. No etai atu o tatou e manganui, penei ka rauka ‘e kore te pua anga o te suke’ i mua ake ka tae mai ei te openga. Inara, kua kite tatou eaa i tupu ei teianei au mea, e ka akamaroiroi mai te reira ia tatou. Pera katoa, e tauturu anga to tatou. I ta Iesu i taputou maira: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” (Mataio 6:33) Kare te reira e akapapu mai ana i tetai oraanga pumaana, mari ra te akapapu maira ia ia tatou e me ka tuku tatou ia Iehova ki mua i to tatou oraanga, nana e tiaki ia tatou.​—Salamo 37:25.

20. Noatu rai te au tu ngata poto ua, eaa ta tatou ka tau kia tamanako i te rave?

²⁰ Noatu eaa te au tu ngata poto ua ta tatou ka aro atu, kare tatou e akakore i te akarongo i to Iehova ra mana akaora. E manganui to tatou au taeake e te au tuaine i Aperika, i Europa Itinga, e i etai atu ngai te aro atura i te au tu ngata roa, inara ka rave ua atu ratou i ‘te rekarekaanga ia Iehova.’ Kia akapera atu tatou mei ia ratou ra, auraka e akamutu te rave anga tau. Kia maara e ko te Atu ngateitei ko Iehova to tatou Tumu no te “maroiroi.” (Habakuka 3:19) Kare aia e pikikaa ia tatou. E mea papu ka tae mai a Aramakito, e e tika oki ka aru mai te ao ou taputouia ra a te Atua. (2 Petero 3:13) Ei reira “e akakiia oki te enua ki te kite i te kakā o Iehova, mei te moana i ki i te tai ra.” (Habakuka 2:14) Kia tae roa ra ki taua tuatau meitaki ra, e aru tatou i te akatauanga meitaki o Habakuka. E rave tamou marie tatou i te ‘rekareka ia Iehova e rere ua tatou i te rekareka i te Atua o to tatou ora.’

Maara Ainei ia Koe?

• Akapeea ta Habakuka ra pure te akakeu anga ia tatou?

• Eaa ra a Iehova i aere ei na tona aerenga?

• Eaa te tuatua totou a Habakuka ra no te ora?

• Ma teea tu manako tau no tatou kia tapapa atu i te ra maata o Iehova?

[Au Uianga Apii]

[Tutu i te kapi 23]

Kite ainei koe e eaa te au mana ta te Atua ka taangaanga i te tamaki atu i te aronga rave kino ia Aramakito?