Ripoti a te Aronga Tutu Patireia

Tauturuanga i te Au Tangata Tuketuke i te Netherlands

KO Aberahama tetai tangata akarongo matau koreia. I “tuatuaia mai ei aia,” i na te apotetoro Paulo ei, kua akarongo a Aberahama ki te tuatua a te Atua “e aere atura aia ma te kite kore i taua enua i aereia e ia ra.” I muri ake i te nekeanga tona pamiri katoatoa, kua noo a Aberahama ei ‘tuitarere i taua enua i tuatuaia maira’ no te toenga o te anere mataiti o tona oraanga.​—Ebera 11:8, 9.

E pera i teia tuatau nei, kua ariki te Au Kite o Iehova e manganui i te akaaoanga kia aere ki tetai atu enua ke kia tavini i te ngai anoano maataia. Kua apii tetai atu i te reo ke kia oronga i te akakitekite anga ki te au tangata enua ke tei neke maira ki to ratou enua. Mei ta te au akatauanga ka aru mai i akakite mai, kua akatueraia e teia vaerua memeitaki i te “ngutupa maata” i te Netherlands, tei reira e okotai mirioni o te 15 mirioni tangata no tetai enua ke mai.​—1 Korinetia 16:9.

□ Kua aere mai a Bahram, e puapii Kung Fu i mua ana, mei tetai enua i te Itinga Rotopu. Kua rauka mai iaia tetai kopi o te Pipiria e tetai au puka Punanga Tiaki. I roto i taua marama rai, kua kite a Bahram e kua kitea e ia te tuatua mou. Kua akamataia tetai apii nana raua ko tana vaine, inara te vaira tetai manamanata​—kare to raua puapii Pipiria e tuatua i to raua reo. Kua komunikeiti ratou ma te rima akairo, te tuatuaanga “ma to ratou rima e to ratou vaevae,” i akamaara ei raua. Kare i roa ana, kua kiteia mai e Bahram raua ko tana vaine tetai putuputuanga tei tuatua i to raua reo, e i muri mai kua tere atu raua ki mua. E Kite papetitoia Bahram i teia nei.

□ Kua aravei tetai tokorua painia no te Netherlands i tetai tangata Indonesia te tu ra ki mua i tetai are toa. Kua poitirere rekareka aia i te tuatua anga atu raua kiaia i roto i tona reo. Kua raveia tetai au akapapa anga kia aravei iaia i tona kainga. Kua kiteia e i noo ana aia i Rutia e tere atu i te 20 mataiti, i roto i taua tuatau ra kua riro mai aia ei taote gynecology. Kua akataka mai aia e koia tetai tangata tei irinaki e kare e Atua, inara kua karanga aia, i te au taime tataki tai e tauturu ana aia i te akaanau pepe, kua umere tikai aia, “I te mako anga tikai o te kopapa tangata! E temeio ia!” Kua akatika aia kia apii i te Pipiria, e kare i roa kua irinaki aia e te vaira tetai Tei Anga te akamanako maira i te tangata. (1 Petero 5:6, 7) I teianei koia tetai taeake papetitoia e te tavini nei aia ma te putuputuanga Indonesia i Amsterdam.

□ I Rotterdam, ko tetai uapu maata rava atu o te ao nei, kua maroiroi tetai pupu painia i te tutu aereanga ki te au pupu reo tuketuke tei tutau mai i te au ra tataki tai. Ei tupuanga no te angaanga maroiroi a teia pupu aronga tutu aere, kua ariki te au mataro, kapiti katoa tetai rangatira pai, tetai opita moana, e tetai tangata tiaki tangata i mua ana, i te tuatua mou. I teianei te tauturu katoa nei ratou i te akatotoa aere i te tuatua meitaki o to te Atua Patireia e kako rava ake te ao katoa nei.​—Mataio 24:14.

Mei tetai atu au tuanga o te ao nei, kua titau te Au Kite o Iehova i te Netherlands i te rave atu i ta ratou tuanga i te akakitekite anga i te tuatua meitaki mutu kore ki te au enua, te au kopu, te au reo, e te au tangata katoatoa.​—Apokalupo 14:6.