Akapeea te Angaanga a te Vaerua o te Atua i Teia Tuatau?

E PIRIKOKI aia mei te kopu mai o tona metua vaine. Kua noo aia ki te ngutupa o te iero tei tuatuaia ra e Manea kare e ra e tivata, e pati i te apinga aroa i te aronga e tomo ki roto i te iero ra. Inara, i tetai atianga, kua rauka mai i teianei tangata pirikoki pati pati tetai apinga tei tere roa atura te moni i etai mea tokoiti ua. Kua rapakauia aia!​—Angaanga 3:​2-8.

Noatu rai na nga apotetoro ko Petero raua ko Ioane ‘i akatu akera iaia ki runga’ e kua “ketaketa atura tona vaevae” kare raua i inangaro akameitaki anga no taua rapakauanga ra. Eaa ra i kore ei? Kua akataka atura Petero uaorai: “E te au tangata no Iseraela nei, eaa kotou i umere ei i teia? eaa kotou i tiroi matariki mai ei ia maua, mei te mea e, no maua te mana e te meitaki i aere ei teianei tangata?” E tika, kua kite a Petero raua ko Ioane e, kare no raua te mana, mari ra na te vaerua tapu o te Atua i raukai kia raveia taua apinga ra.​—Angaanga 3:​7-16; 4:​29-31.

I taua tuatau ra, kua orongaia mai taua au “ravenga mana” ra kia akaari e ko taua putuputuanga Kerititiano ou ra na te Atua te turuanga. (Ebera 2:4) Inara i muri ake i te rave anga i ta ratou akakoro anga, ka “akakoreia te reira” ta te apotetoro ko Paulo i tuatua. * (1 Korinetia 13:8) No reira, kare tatou i teianei e akono i roto i te putuputuanga Kerititiano mou i tetai ua atu au rapakauanga na te Atua, au tuatuaanga totou, me kore te tuaruanga te au temoni.

Inara, te riro ra ainei te aiteanga, e kua akamutu te angaanga a te vaerua tapu o te Atua? E mamao ke atu i te reira! E akamanako tatou i etai atu au tu i rave angaanga ei te vaerua o te Atua i te anere mataiti mua ra e te rave angaanga nei i to tatou tuatau.

“Te Vaerua Tuatua-Mou Ra”

Tetai angaanga a te vaerua tapu o te Atua ko te apii, te akamarama, te akakite te au tuatua mou. I mua poto ake i tona matenga, kua tuatua a Iesu ki tana au pipi: “E manganui ra taku tuatua e akakite atu kia kotou, kare ra e tika ia kotou i teianei. Kia tae maira aia, ko te Vaerua tuatua-mou ra, nana ïa e arataki ia kotou ki te tuatua-mou katoatoa.”​—Ioane 16:​12, 13.

Kua riringiia mai “te vaerua tuatua-mou” ia Penetekote 33 T.N. i te akaputu anga e vaitata i te 120 au pipi i tetai pia i runga i Ierusalema ra e kua papetitoia ratou ma te vaerua tapu ra. (Angaanga 2:​1-4) Ko te apotetoro ko Petero tetai i roto i te aronga i reira no taua oroa mataiti ra. I te ki anga i te vaerua tapu, “kua tu akera” Petero e kua tuatua akamaata mai, me kare kua akataka mai, i etai au tuatua mou no Iesu ra. Ei akatauanga, kua akakite mai aia, i akapeea a “Iesu no Nazareta” i teianei “kua akateiteiia aia i te rima katau o te Atua.” (Angaanga 2:​14, 22, 33) Kua akakeu katoaia a Petero e te vaerua o te Atua ra kia akakite mataku kore ua ki tona aronga ngati Iuda akarongo maira: “Kia kite tikai te kopu-tangata ravarai o Iseraela e, kua akariro mouia aia e te Atua ei Atu e ei Mesia, ko taua Iesu nei rai ta kotou i akasatauro nei.” (Angaanga 2:36) Ei tetai tupu anga no ta Petero tuatua akauruia e te vaerua ra, e vaitata i te toru tauatini au tangata “i āriki marie i tana tuatua” e kua papetitoia. Na teia tu, kua tauturu te vaerua tapu o te Atua kia arataki ia ratou ki roto i te tuatua mou.​—Angaanga 2:​37-41.

Kua akono katoa te vaerua tapu o te Atua ei tetai puapii e ei akamaaraara atu. Kua tuatua a Iesu: “Na te Akapumaana ra, na te Vaerua Tapu, ko ta te Metua e tono mai ma toku ingoa, nana e apii mai ia kotou i te au mea katoa, ka akakite akaou mai oki kia kotou i te au tuatua katoa, taku i karanga atu kia kotou na.”​—Ioane 14:26.

Akapeea ta te vaerua tapu rave anga ei tetai puapii? Kua akatuera te vaerua o te Atua i te au manako o te au pipi kia kite te au apinga ta ratou i akarongo i mua ana mei ia Iesu mari ra kare i kite tikai i te aiteanga. Ei akatauanga, kua kite te au apotetoro ra e i te tuatau o tona timataanga, kua tuatua a Iesu ki te kavana Roma o Iudea, ko Ponotio  Pilato: “Kare to teianei ao taku basileia.” Inara, i te tuatau i kake atu ei a Iesu ki te rangi e tere atu i te 40 ra i muri iora, te vaira te manako tarevake o te au apotetoro e ka akanooia te Patireia ki konei i runga i te enua. (Ioane 18:36; Angaanga 1:6) I te akaraanga, kare i mou tikai i te au apotetoro ra te aiteanga o ta Iesu au tuatua tae roa mai ki muri ake i te riringianga mai te vaerua tapu o te Atua ra ia Penetekote 33 T.N.

Kua akono katoa te vaerua o te Atua ei tetai akamaaraara mai na te apai akaouanga mai ki te manako i te au apiianga ke ke a Iesu ra. Te au totou no to Karaiti matenga e te tuakaouanga oki, ei akatauanga, kua rave mai i tetai aiteanga ou ma te tauturu a te vaerua tapu ra. (Mataio 16:21; Ioane 12:16) Na te maaraaraanga i te au apiianga a Iesu kua rauka i te au apotetoro ra kia paruru mataku kore i to ratou turanga ki mua i te au ariki, te au akava, e te au arataki akonoanga oki.​—Mareko 13:​9-11; Angaanga 4:​5-20.

Kapiti katoa, kua tauturu te vaerua tapu o te Atua kia arataki i te au Kerititiano mua ra ki te au ngai uua mai te angaanga orometua ra. (Angaanga 16:​6-10) Kua akakeu katoa te vaerua o te Atua i te au Kerititiano mua ra kia rave i te tataanga i te Tuatua a te Atua, koia te Pipiria, ei puapinga no te au tangata ravarai. (2 Timoteo 3:16) Te taka meitaki ra, i reira, kua rave te vaerua tapu na etai tu tuke tuke i te anere mataiti mua ra. Kare te reira i orongaia mai kia rave au temeio anake ra.

Vaerua Tapu i to Tatou Tuatau Nei

Pera katoa te angaanga nei te vaerua tapu ma te au Kerititiano mou i to tatou tuatau nei. Kua kitea teia i tetai pupu rikiriki o te Aronga Apiipii Pipiria i  Allegheny, Pennsylvania, U.S.A., i te apa openga o te 19 anere mataiti. Kua inangaro teia aronga apiipiiia i te Pipiria kia kite i “te tuatua-mou.”​—Ioane 8:32; 16:13.

Kua tuatua tetai mema o teianei pupu, ko Charles Taze Russell, no runga i tana patianga no te tuatua mou o te Tuatua Tapu: “Kua pure au . . . e kia rauka iaku i te akaatea atu i tetai ua atu manako tau kore i toku ngakau e te manako oki penei te arai maira i te mataara e kia aratakiia e tona vaerua ki roto i te kite tika.” Kua akameitaki mai te Atua i teianei pure taakaaka.

I ta Russell ratou ko tona au oa kimikimi anga akamaroiroi i te au Tuatua Tapu, kua riro mai kia marama etai apinga. “Kua kitea e matou e no etai anere mataiti,” ta Russell i akataka mai, “e tuke tuke te au akonoanga e te au pupu kua veevee i te au apiianga Pipiria i roto ia ratou ra, ma te kairoanga ia ratou ma te manakoanga e te tarevake o te tangata nei.” Na teia i akatupu i tana i tuatua ko “te akanoo tarevake anga i te tuatua mou.” E tika, kua tanumia te au tuatua mou Tuatua Tapu ki raro ake i te akaputu anga au apiianga peikani tei tauruia ra ki roto ia Kerititome i te au anere mataiti kua topa. Inara kua tamanako tikai a Russell kia kite e kia akakite i te tuatua mou.

Na roto i te au kapi o te Zion’s Watch Tower and Herald of Christ’s Presence, kua akaapa mataku kore a Russell ratou ko tona au oa i te au apiianga pikikaa a te akonoanga tei tuatua tarevake ra i te Atua. Kua kite ratou e​—te tuke ra ki te manako matauia o te au akonoanga​—ko te meta e mea mate ua ia, e i te matenga ka aere tatou ki te vaarua, e ko Iehova anake te Atua mou e no reira kare i tetai tuanga no tetai Toru Tai ra.

Inara, mei taau ka tamanako, kua riri te au orometua o Kerititome i taua akakite ateaanga i taua au apiianga pikikaa ra. No te anoano maata kia mou i to ratou au turanga mana ra, e manganui te orometua Katorika e te Porotetani kua akanoo i te au ravenga tei akakoroia ei akatopaanga ia Russell. Inara kare aia e tona au oa i unui ki muri. Kua akara irinaki atu ratou ki te vaerua o te Atua no te arataki anga. “Te akapapu anga a te Atu,” ta Russell i tuatua, “koia oki . . . te vaerua tapu o te Metua ra, tei tonokia mai e no te anoano o Iesu to tatou Oko, Rotopu e te Upoko, ko to tatou puapii ia.” E kua apii maira ia! Kua rave ua te aronga apiiia ngakau tae ra i te Pipiria i te au vai ma o te tuatua mou mei te Pipiria mai e kua akakitekite ia ratou i te ao katoa nei.​—Apokalupo 22:17.

Kua vai papa ua te akaaerenga o te Au Kite o Iehova i teianei tuatau ki te au aratakianga a te vaerua tapu o te Atua ra tei tere roa atu i te anere mataiti i teianei. I te akamarama tereanga ki mua te vaerua o Iehova i ta ratou akaraanga pae vaerua, kua rave mareka ua te Au Kite i te au akatikatika anga umuumuia kia akatau atu ki te kiteanga akatikaia ra.​—Maseli 4:18.

“Ei Kite Oki Kotou Noku”

Kua akataka maira Iesu i tetai atu akakite anga o te vaerua tapu i tana tuatua anga ki tana au pipi: “Ka rauka ra to kotou mana i te Vaerua Tapu, kia aere mai aia i rungao ia kotou; e ei kite oki kotou noku . . . e tae ua atu ki te openga o te enua ra.” (Angaanga 1:8) Ta Iesu taputou kia tauru i te “mana” ki tana au pipi e te “vaerua tapu” oki kia  raukai te rave i ta ratou angaanga akaueia e te Atua ra te vai nei ra i teianei.

Ei tetai pupu, te matauia ra te Au Kite o Iehova no ta ratou au angaanga tutu aere. (Akara i te pia.) E tika, te tuatua nei te Au Kite o Iehova i te tuatua no te tuatua mou e te tere atu i te 230 enua e te au motu oki. I raro ake i te au tu manako katoaia, kapiti katoa te au tu kino no to ratou oraanga i te au ngai tamaki anga, te akateitei mataku kore nei ratou i to ratou reo i te turuanga i te Patireia o te Atua. To ratou maroiroi no te angaanga Kerititiano te oronga maira i te akakite anga ririnui e te angaanga ra te vaerua tapu i teia tuatau nei. E te kitea ra e te akameitaki ra te Atua ko Iehova i ta ratou au tauta anga.

Ei akatauanga, i te mataiti kua topa akenei, e tere roa atu i te tai pirioni ora i raveia te tutuanga i te tuatua meitaki o te Patireia o te Atua. Eaa te tupu anga? Ko etai 323,439 tangata tei akatutu i to ratou akatapuanga ki te Atua na te papetito anga ia ratou uaorai. Kapiti katoa e 4,433,884 apii Pipiria epetoma i te ngutuare tei raveia ma te aronga inangaro ou ra. Te katoa anga, e 24,607,741 puka, e 631,162,309 makatini, e 63,495,728 poroutia e te au puka rikiriki tei orongaia. Mei teaa ra tetai akakiteanga ririnui i te angaanga a te vaerua o te Atua ra!

Te Vaerua o te Atua e Koe Oki

Me ka akarongo meitaki tetai tangata ki te tuatua meitaki, e ka akatau i tona oraanga ki ta te Atua au turanga, e ka akakite akarongo i te atinga oko ra, kua tuera te mataara no te turanga ma ma te Atua. Kua tuatua atu te apotetoro ko Paulo ki taua aronga ra: “Ko te Atua . . . tei oronga mai i tona Vaerua Tapu ki roto ia koe.”​—1 Tesalonia 4:​7, 8; 1 Korinetia 6:​9-11.

Te au tupu anga o te vaerua o te Atua e manganui te au akameitakianga. Eaa te tu akameitakianga? Ko tetai apinga, te tuatua ra te Tuatua akauruia a te Atua: “Ta te Vaerua e akatupu, ko te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, te maru, [e] te akono meitaki.” (Galatia 5:​22, 23) No reira, e mana ririnui te vaerua tapu o te Atua no te meitaki, e raukai i tetai kia akakite i te au tu tau i te Atua ra.

Kapiti katoa, me ka tatau koe i te Pipiria e ka akono i taau i apii, ka rauka i te vaerua o te Atua te tauturu ia koe kia tupu ki te pakari, te kite, te kite oonu, te ikianga, e te kite manakoanga. Kua rauka i te Ariki ko Solomona “te karape, e te kite . . . e mea maata roa, e te maoraora maata o te ngakau” no te mea kua kimi aia kia akamareka i te Atua kare i te au tangata. (1 Ariki 4:29) I te mea kua oronga a Iehova i te vaerua tapu kia Solomona, e mea tika kare aia e tapu i tona vaerua tapu mei te aronga te kimi ra kia akamareka iaia i teia tuatau nei.

Te tauturu katoa ra te vaerua tapu o te Atua i te au Kerititiano kia maro atu ia Satani e te au temoni, i teianei akatereanga o te au mea kino nei, e te au manako rave ara o to ratou kopapa topa ra. Akapeea te reira e raukai? Te pau maira te apotetoro ko Paulo: “E tika iaku te au mea ravarai nei i te Mesia, ko tei akamaroiroi mai iaku nei.” (Philipi 4:13) Penei kare te vaerua tapu e takore atu i te au timataanga, ka rauka ra i te reira, te tauturu mai ia koe kia akakoromaki atu. Na te irinaki anga i te vaerua o te Atua, ka rauka ia tatou “te mana maata meitaki nei” kia akono atu ma tetai ua atu taitaia me kare pekapeka.​—2 Korinetia 4:7; 1 Korinetia 10:13.

Me akamanako kore i te au akapapu anga ravarai, e meangiti ua te ekoko anga e te angaanga nei te vaerua tapu o te Atua i teia tuatau. Te akamaroiroi maira te vaerua o Iehova i tona au tavini kia akakite i tana au akakoroanga memeitaki. Te rave ua atura ia kia akakite i te au kaka anga te marama pae vaerua, e te akaketaketa maira ia i to tatou akarongo, e te tauturu ia tatou kia vai tiratiratu ki Tei Anga mai ia tatou. Mei teaa ra to tatou akameitaki anga e kua vai mai ta te Atua tuatua mou ki tana taputou na te orongaanga mai i te vaerua tapu ki tona au tavini tiratiratu i teianei tuatau nei!

[Tataanga Rikiriki i Raro]

[Pia i te kapi 10]

Eaa ta Etai Ke Tuatua no te Au Kite o Iehova

“I te au akonoanga ke e tutaki nei i te aronga ako mai kia akavare i te au tangata kia aere ki te are pure me kore e taumaro ma te au itiu i teia tuatau nei mei te rave totoma ra e te titiri anga pepe, kare te Au Kite e tuku ua ki tetai ao tauianga. Te rave papa meitaki nei ratou i ta ratou tutuanga i te Enua katoa.”​—The Orange County Register of Orange County, California, U.S.A.

“No runga i te akatotoaanga i te akarongo, e tokoiti ua te au akonoanga tei aite atu te maroiroi . . . ki te Au Kite o Iehova.”​— The Republic of Columbus, Indiana, U.S.A.

“Ko ratou anake te aronga te aere ra mei tera ngutupa ki tera ngutupa ma ‘te tuatua meitaki,’ i te akonoanga i te au kaveinga Pipiria.”​—Życie Literackie, Poland.

“I te angaanga tutuanga maata roa tei matauia, kua apai atu te Au Kite o Iehova i ta Iehova tuatua takapini teianei ao.”​—News-Observer, Tamaqua, Pennsylvania, U.S.A.

[Au Tutu i te kapi 9]

Te akamarama maira te vaerua tapu o te Atua ia tatou i te pae vaerua,

. . . te akamaata ra i te au tu Kerititiano meitaki,

. . . e te turu ra ia tatou i te angaanga tutuanga i te ao katoa