E Akono Meitaki i te Tuatua Totou a te Atua

“Tei ia tatou katoa te tuatua tika maata rava atura o te au peroveta; ko te mea meitaki ïa ia kotou kia akono i te reira.”​—2 PETERO 1:19.

1, 2. Eaa te akatauanga no tetai mesia pikikaa ka rauka ia koe kia akakite mai?

NO ETAI au anere mataiti, kua tauta etai mesia pikikaa kia totou mai i te tuatau ki mua. I te rima o te anere mataiti T.N., kua irinaki te au ngati Iuda i Kereta ra e ko te mesia tetai tangata tei tapa ra iaia uaorai ko Mose e ka akaora aia ia ratou mei te tu kino. I te ra i akanooia no to ratou matara anga, kua aru atura ratou iaia ki tetai ngai teitei te akara iora ki runga i te Tai Mediterranean. Kua tuatua aia e e rere ua atu ratou uaorai ki roto i te tai, e ka vaiia mai ia i mua ia ratou ra. E manganui te aronga tei rere atura ki roto i te vai kua maremoia, e kua oro ke atura taua mesia pikikaa i taua ngai ra.

² I te 12 anere mataiti, kua mama mai tetai “mesia” i Yemen. Kua pati atu tei mono, me kare te tutara kiaia no tetai akairo no tona taoonga mesia. Kua akaue teianei “mesia” i tei mono ra kia tipu atu i tona mimiti. Kua totou aia i tetai tuakaouanga viviki te ka riro ei akairo. Kua akatika tei mono ra i taua parani ra​—e ko te openga ia o taua “mesia” ra.

3. Koai te Mesia mou tikai, e eaa ta tana angaanga orometua i akapapu mai?

³ E puapinga kore anake te au mesia pikikaa ra e ta ratou au totou katoa oki, inara ko te akonoanga i ta te Atua ra tuatua totou kore rava ia e taki atu ki te mareka anga kore. Te Mesia mou, ko Iesu Karaiti, te akatupu anga ora o te au totou Pipiria e manganui. Ei akatauanga, i te taikuanga i ta Isaia i totou ra, kua tata a Mataio i tana Evangeria: “Te enua o Zebulona, e te enua o Naphatali, i tera pae Ioridana, i te pae roto ko Galilea i o te etene ra, te aronga i noo i te poiri ra, kua akara ïa i te mārama maata; e te aronga i noo i te ngai maru-mate ra, kua itiia ratou e te mārama. I reira to Iesu akamata anga i te ako, i te na ko anga e, Ka tataraara: te vaitata mai nei oki te basileia o te ao.” (Mataio 4:​15-17; Isaia 9:​1, 2) Ko Iesu taua “mārama maata” ra, e kua akapapu tana angaanga orometua e koia te Peroveta totouia maira e Mose. Ko te aronga kare e akarongo atu kia Iesu ka akapouia.​—Deuteronomi 18:​18, 19; Angaanga 3:​22, 23.

4. I akapeea ta Iesu ra akatupu anga ia Isaia 53:12?

⁴ Kua akatupu katoa a Iesu i te au tuatua totou ia Isaia 53:12: “Kua riringi aia i tona vaerua e tae ra atura ki te mate: e kua kapiti katoaia aia e te aronga rave ara ra; e kua apai aia i te ara a te tangata e manganui, e nana oki i pure no te aronga rave ara ra.” I te matakite e kare e roaia ka oronga aia i tona oraanga tangata ei oko, kua akamaroiroi atura Iesu i te akarongo o tana au pipi. (Mareko 10:45) Kua rave aia i teianei na tetai tu meitaki na roto i te akatu keanga ra.

Te Patu ra te Akatuke Anga i te Akarongo

5. Na roto i taau uaorai au tuatua, akapeea koe me akataka i te akatu keanga ra?

⁵ E tupu anga totou te akatuke anga ra. Kua tuatua Iesu: “E tae mai oki te Tamaiti a te tangata ma tana au angela e te kakā o tona Metua . . . Tikai taku e karanga atu kia kotou nei, Kare tetai papaki o teianei aronga e tu mai nei, e rokoia e te mate, e kite ei ratou i te Tamaiti a te tangata i te aere anga mai i tona basileia.” (Mataio 16:​27, 28) I kite tikai ainei tetai papaki o te au apotetoro ra ia Iesu i te aere anga mai i tona basileia? Te akakite maira Mataio 17:​1-7: “E po ono akera, kua arataki aturā Iesu ia Petero, ia Iakobo, e tona taeake ia Ioane, ki runga i tetai maunga teitei ko ratou anake ra. E akatu keia aia ki mua ia ratou.” Mei teaa ra tetai tupu anga poitirere! “Kakā atura tona  mata mei te rā ra, teatea atura tona kakau mei te mārama ra. E i na, kua mama mairā Mose raua ko Elia ia ratou ra, i te tuatua anga mai kiaia.” Pera katoa, “tapokiia maira ratou e tetai tiao kakā,” e kua akarongo atura ratou i te reo o te Atua uaorai i te na ko anga: “Ko taku Tamaiti akaperepere teia, kua mareka rava au iaia; e akarongo kotou iaia. E kite akera te au pipi i te reira, kua tipapa iora ki raro te mata, mataku roa akera. Kua akavaitata mairā Iesu, kua akatukia maira ia ratou, tuatua maira, Ka tu, auraka e mataku.”

6. (a) Eaa ra a Iesu i tapai i te akatu keanga ra ei tetai orama? (e) E akakite anga momua te akatu keanga ra no teaa?

⁶ Penei kua tupu teianei mea umere ki runga i etai tuaivi o Maunga Heremona ra, te ngai i noo ei a Iesu e nga apotetoro e toru i taua po ra. I te akara anga kua rokoia taua akatu keanga ra i te po, i te akariro anga kia kaka maata ia. Ko tetai tumu i karangaiai a Iesu i te reira ei orama no te mea ko Mose raua ko Elia kua roa te matenga kare raua i reira tikai. Ko Karaiti anake i reira tikai. (Mataio 17:​8, 9) Kua oronga mai taua akakite anga kaka ra kia Petero, kia Iakobo e Ioane oki i tetai kiteanga momua i to Iesu ra parutia kaka i tona mana Patireia ra. Te kitea ra ia Mose raua ko Elia te au tu aiteite i te aronga akatainu akatuangaia ma Iesu ra, e kua akaketaketa ririnui maira taua orama ra i tana akakite anga no te Patireia e tona ariki anga i te tuatau ki mua.

7. Akapeea tatou i kite ei e e au akamaaraara anga taka meitaki ta Petero no te akatu keanga ra?

⁷ Kua tauturu te akatuke anga ra kia akamaroiroi i te akarongo o nga apotetoro e toru ko ratou ra te ka rave i te tuanga aratakianga i roto i te putuputuanga Kerititiano. Te mata kaka o Karaiti, tona kakau teatea mei te marama ra, e to te Atua uaorai reo i te tuatuaanga e ko Iesu Tana Tamaiti akaperepere e ka tau ratou kia akarongo atu kiaia​—pouroa teia kua rave meitaki i tana akakoroanga. Inara auraka nga apotetoro ra kia akakite ki tetai ua atu tangata tae roa kia akatuakaouia mai a Iesu. I etai 32 mataiti i muri iora, te vai taka meitaki ra taua orama ra i te manako o Petero. I te tou anga ki te reira e tona puapinga maata kua tata aia: “Kare oki ta matou i te tuatua taeke ua i akatupuia e te pakari ra, ka akakite atu ei matou ia kotou i te mana e te aerenga mai o to tatou Atu ra o Iesu Mesia, kua kite tikai ra to matou mata i tona tapunui. I rauka oki iaia i te Atua Metua ra te akangateitei e te kakā, ka tae mai ei iaia taua reo no roto mai i te kakā maata  ra e, ‘Taku tamaiti akaperepere teia, kua mareka rava au iaia.’ Kua akarongo matou i taua reo no te rangi maira, ia matou ma ia katoa ki runga i te maunga tapu ra.”​—2 Petero 1:​16-18.

8. (a) Te tou akamanako mai ra ta te Atua ra akakite anga no tana Tamaiti i teaa? (e) Eaa te akakiteia maira na te tiao rangi tei mama maira i te akatu keanga ra?

⁸ E mea puapinga maata rava atu ko ta te Atua ra tuatua anga e: “Ko taku Tamaiti akaperepere teia, kua mareka rava au iaia; e akarongo kotou iaia.” Te tou maira teia tuatua anga i te manako ki runga ia Iesu ei Ariki akateronoia a te Atua, ta te au mea anga katoaia ra ka tika kia akarongo atu. Te akakite maira te tiao tapokianga e kare e kitea kia akara mata i te tupu anga taua orama ra. Ka kitea anake te reira ma te au mata kite ngakau o te aronga tei kite ra i “te akairo” o to Iesu ra parutia akara koreia e te mata i tona mana Patireia ra. (Mataio 24:3) Ko te tika, te akoanga a Iesu e auraka e akakite i taua orama ra ki te tangata kia tae roa ki muri ake i tona akatuia maianga mei te mate te akaari ra e ko tona akateitei angaia e te akakaka anga oki ka tupu mai i muri ake i tona tuakaouanga.

9. Eaa i tau ei te akatu keanga ra kia akamaroiroi i to tatou akarongo?

⁹ I muri ake i te taikuanga i te akatuke anga, kua tuatua a Petero: “Tei ia tatou katoa te tuatua tika maata rava atura o te au peroveta; ko te mea meitaki ïa ia kotou kia akono i te reira, mei te lamepa e kakā ua i te ngai poiri ra, e kia makirata, e kake ei te etu popongi i roto i to kotou ngakau. Kua kitea ana oki e, te au totou ravarai i roto i te tuatua i tataia ra, kare ïa te mea kimiia e te tangata uaorai. Kare oki to te inangaro o te tangata i tae mai ei te totou i taito ra; ko te au tangata tapu ra o te Atua tei tuatua i ta te Vaerua Tapu i tuku mai ia ratou ra.” (2 Petero 1:​19-21) Te akaketaketa maira te akatu keanga ra i te irinaki anga no te tuatua totou a te Atua ra. Ka tau tatou kia akamanako tika atu i taua tuatua ra e eiaa ki te “tuatua taeke ua i akatupuia e te pakari ra” kare ra e turuanga tu-Atua me kare e mareka anga. Ka tau to tatou akarongo i te tuatua totouia ra kia akamaroiroiia na te akatu keanga no te mea ko taua orama momua maira no to Iesu kaka e te mana Patireia kua riro mai ei tika tikai. Ae, tei ia tatou te akakiteanga papu e kua tae mai a Karaiti i tona parutia i teia tuatau nei ei Ariki mana ririnui i te rangi ra.

Akapeea te Kake Anga Mai te Etu Ao Ra

10. Koai me kare eaa te “etu popongi” ra ta Petero i taiku mai, e eaa koe i pau pera mai ei?

¹⁰ Kua tata a Petero: “Ko te mea meitaki ïa ia kotou kia akono i te reira, mei te lamepa e kakā ua i te ngai poiri ra, e kia makirata, e kake ei te etu popongi.” Koai me kare eaa te “etu popongi” ra? Kua tapa a Apokalupo 22:16 ia Iesu Karaiti ko “te etu popongi kakā ra.” I etai tuatau o te mataiti ra, ko aua etu ra te au mea openga kia kake mai ki runga ake i te kotinga o te rangi ra. Ka kake mai i mua ua ake i te mama maianga te ra, e no reira na ratou e akakite mai te makirata no tetai ra ou ra. Kua taiku a Petero i te tuatua “etu popongi” ra ei akataka ia Iesu i muri ake i te rauka anga Iaia te mana Patireia. I taua tuatau ra, kua kake maira Iesu ki runga i te ao katoa e pini ua ake, kapiti katoa i to tatou enua nei! Ei Mesia Etu Popongi ra, kua akakite maira aia i te makirata anga o tetai ra ou, me kare tuatau, no te au tangata akarongo ra.

11. (a) Eaa ra i kore ei te aiteanga ia 2 Petero 1:19 ra e ka kake mai “te etu popongi” ra i roto i te au ngakau tangata tikai? (e) Akapeea koe me akataka mai ia 2 Petero 1:19?

¹¹ E manganui te aronga uri reo Pipiria te akono ra i te manako e ko te au tuatua a te apotetoro ko Petero tei tataia ia 2 Petero 1:19 te taiku ra i te ngakau tangata kopapa tikai. Te paunu o te ngakau tangata tei pakari ra e 250 ki te 300 karama. Akapeea e raukai ia Iesu Karaiti​—ko tetai mea ora kaka mate kore i te rangi i teianei​—kia kake mai ki roto i teianei au mero tangata rikiriki ua? (1 Timoteo 6:16) Inara, ko to tatou au ngakau akatutuia te o atura ki teianei tumu, no te mea ma te reira ta tatou manako anga ki te tuatua totou a te Atua ra. Inara e akara matakite ia 2 Petero 1:19, e ka kite koe e te tataia ra e te New World Translation nga koma ei akataka keanga i te takiota tuatua “e kia makirata e kake ei te etu popongi” ra mei te au tuatua mua i taua irava ra e mei te tuatua “i roto i to kotou ngakau.” Penei ka rauka kia taikuia na roto i teianei tu: ‘Tei ia tatou te tuatua totou tei akatika papuia maira; e te rave meitaki maata ra kotou i te akamanako anga i te reira mei tetai ramepa kaka mai i te ngai poiri,  koia oki, i roto i to kotou ngakau, e kia makirata e kake mai ei te etu popongi ra.’

12. Eaa tikai te tu matauia no te au ngakau tangata ra, inara eaa te tika ra no te au Kerititiano tika tikai?

¹² Eaa tikai te tu matauia o te au ngakau akatutuia o te au tangata ara nei? Eaa oki, tei roto to ratou au ngakau i te tu poiri i te pae vaerua! Inara, me e au Kerititiano mou tatou, ka riro mei te mea rai e e ramepa kaka ta tatou tei roto i to tatou ngakau, e me kare ia ka poiri ra. Mei tei akakitea maira e ta Petero au tuatua, ka riro na te akamanako anga i te tuatua totou a te Atua e akamarama i te au Kerititiano tikai kia vai matakite e kia marama oki i te makirata no tetai ra ou. Ka matakite ra ratou i te tika e kua kake mai te Etu Popongi, kare i roto i te au ngakau kiko tangata nei, mari ra ki mua i te au mea angaia katoatoa ra.

13. (a) Eaa ka papu ei ia tatou e kua kake ke mai te Etu Popongi ra? (e) Eaa ra ka raukai i te au Kerititiano kia akakoromaki i te au tu ngata ta Iesu i totou no to tatou tuatau?

¹³ Kua kake ke mai te Etu Popongi ra! Ka papu ia tatou te reira na te akamanako anga i ta Iesu totou meitaki ra no tona parutia. I teia tuatau, te kite nei tatou i tona tupu anga i te au mea e tupu nei mei te au tamaki, te au onge kai, te au ngaruerue enua, e te tutuanga i te tuatua meitaki i te ao katoa nei. (Mataio 24:​3-14) Noatu ra e te tupu ra kia tatou ei au Kerititiano, te au tu ngata ta Iesu i totou, te rauka ra ia tatou kia akakoromaki ma te au e te ngakau rekareka. No teaa ra? No te mea te akamanako ra tatou i te tuatua totou a te Atua e te akarongo ra i tana au taputou no te tuatau ki mua. Kua kite tatou e tei runga tatou i te tapa no te au tuatau meitaki roa no te mea kua oonu roa tatou ki roto i “te tuatau openga”! (Daniela 12:4) Tei roto teianei ao i te au tu kino tei totouia ia Isaia 60:2: “I na oki, e tapokiia oki te enua nei e te poiri, e te au tangata i te poiri tangotango ra.” Akapeea e kiteai e tetai tona aerenga i roto i teianei poiri anga? Ka tika te tangata kia akamanako taakaaka ki te tuatua totou a te Atua i teianei, i mua ake ka tureiti ei. Ka umuumuia te au tangata ngakau tiratiratu kia ariu atu ki te Atua kia Iehova, koia te Tumu o te ora e te marama oki. (Salamo 36:9; Angaanga 17:28) Na te raveanga anake i teia ka raukai i tetai te marama anga mou e te manakonako no te rekarekaanga i te tuatau umere ki mua ta te Atua ra i akakoro no te au tangata akarongo ra.​—Apokalupo 21:​1-5.

 “Ko te Marama kua Tae Mai ki te Ao Nei”

14. Eaa ta tatou ka tika kia rave kia kite ei i te tupu anga o te au totou memeitaki o te Pipiria ra?

¹⁴ Te taka meitaki ra i te au Tuatua Tapu e te tutara nei a Iesu Karaiti i teianei ei Ariki. No tona aerenga mai kia mana i te 1914, ka akatupu katoaia mai etai atu totou memeitaki. E kite ei i to ratou tupu anga, ka tika tatou kia akapapu ei aronga taakaaka tei akono i te akarongo ia Iesu Karaiti, ma te tataraara anga no te au angaanga apa ua e te au ara rave kamakuraia. Inara, ko te aronga inangaro i te poiri kare e rauka ia ratou te ora mutu kore. Kua tuatua a Iesu: “Teia taua akaapa ra, ko te mārama kua tae mai ki te ao nei, e i anoano akenei te tangata i te poiri, kare te mārama, no te mea te kino ua ra ta ratou tuatua. Ko te rave i te kino ra, kua makitakita anake ïa ki te mārama, kare oki e aere mai ki te mārama, ko te kitea aea tana tuatua. Ko te akono i te tuatua-mou ra, ka tae mai ïa ki te mārama kia kitea meitakiia e, te tau ra tana tuatua ki te Atua.”​—Ioane 3:​19-21.

15. Eaa te ka tupu me ka akono tau kore tatou i te ora ta te Atua ra i akariro kia rauka na roto i tana Tamaiti?

¹⁵ Kua tae mai te marama pae vaerua ki te ao nei na roto ia Iesu, e puapinga maata te akarongoanga kiaia. Kua tata a Paulo: “Ko te Atua, ko tei tuatua rikiriki mai i muatangana, e manganui te tu o te tuatua anga mai, ki te ui tupuna i te au peroveta; Ko tei tuatua mai ïa kia tatou i teianei tuatau openga i tana Tamaiti, ko tei akariroia e ia ei Atu no te au mea ravarai.” (Ebera 1:​1, 2) Eaa te ka tupu me ka kopae ke tatou i te ora ta te Atua i oronga mai na roto i tana Tamaiti? Kua tuatua maira Paulo: “E tuatua tinamou tikai tei tuatuaia mai e te au angela ra, e i tutaki naia te au ara e te akono kore katoa i te tutaki tika ra; Eaa oki tatou e oraʼi, kia kore tatou e akono i te ora maata mei teianei; i tei tuatua mai anaia e te Atu i muatangana, e i akatinamouia mai ia tatou nei e te aronga i akarongo iaia; Ko te Atua katoa oki i te akatika katoa anga mai i te au akairo, e te piri, e te ravenga mana e manganui te tu, e ta te Vaerua Tapu i oronga maira i tana uaorai i inangaro ra?” (Ebera 2:​2-4) Ae, ko Iesu te rotopu i te akakiteanga i te tuatua totou ra.​—Apokalupo 19:10.

16. Eaa ka raukai ia tatou te akarongo ki katoa i te au totou katoatoa a te Atua ko Iehova ra?

¹⁶ Mei tei tataia ra, kua tuatua a Petero: “Te au totou ravarai i roto i te tuatua i tataia ra, kare ia te mea kimiia e te tangata uaorai.” Kare e rauka i te tangata anake te akamata i te totou mou, inara ka rauka ia tatou te akarongo ki katoa i te au totou a te Atua ra. I akamata mai teianei ma te Atua ko Iehova uaorai. Na te vaerua tapu kua rauka iaia i te tauturu i tona au tavini kia kite e akapeea te akatupu anga i te au totou Pipiria. E tika, te akameitaki nei tatou ia Iehova e kua kite tatou i te tupu anga o taua au totou e manganui mei te mataiti 1914 maira. E te papu takiri ra ia tatou e ko te toenga atu o te au totou no te openga o teianei akatereanga kino o te au mea nei ka tupu katoatoa. E mea puapinga maata ra e kia akamanako ua atu tatou i te au totou tu-Atua ia tatou e tuku ra i to tatou marama kia kaka. (Mataio 5:16) Mei teaa ra ta tatou akameitaki anga e te akariro ra Iehova ‘i tona mārama iti mai i roto i te poiri’ te tapoki nei i te enua i teianei tuatau!​—Isaia 58:10.

17. Eaa ra tatou i umuumu ei i te marama pae vaerua mei ko mai i te Atua ra?

¹⁷ Na te marama natura i raukai kia kite tatou. Na te reira katoa i akariro kia tupu te au apinga tanutanuia te oronga maira i te kai tuke tuke na tatou. Kare tatou e ora me kare e marama tikai. Ka peea oki te marama pae vaerua? Te oronga maira ia i te aratakianga no tatou e te akaari maira kia tatou i te tuatau ki mua mei tei totouia maira i te Tuatua a te Atua, koia te Pipiria. (Salamo 119:​105) Te ‘akakite aroa ua mai ra te Atua ko Iehova i tona marama e tana tuatua mou.’ (Salamo 43:3) E mea tau kia akaari tatou i te ariki anga oonu no taua au apinga ra. No reira e rave  maata tatou kia tauru i te marama o “te kite i te kakā o te Atua” kia akamaramaia to tatou ngakau akatutuia ra.​—2 Korinetia 4:6; Ephesia 1:18.

18. Eaa ta te Etu Popongi a Iehova te papa ra i teianei kia rave?

¹⁸ Mei teaa ra to tatou akameitaki angaia kia kite e i te 1914, kua kake mai a Iesu Karaiti, te Etu Popongi ra, i te ao katoa e pini ua ake e kua akamata te akatupu i te orama akatu keanga ra! I teianei tei konei te Etu Popongi a Iehova ra, kua papa te rave i ta te Atua akakoro anga i te akatupu anga tere atu i te akatu keanga ra​—“te tamaki i taua rā maata o te Atua mana katoatoa ra.” (Apokalupo 16:​14, 16) I muri ake i te takore atuanga teianei akatereanga taito, ka akatupu mai a Iehova i tana taputou no “te au rangi ou e tetai enua ou” i te ngai e raukai ia tatou kia akapaapaa iaia e tuatau ua atu ei Atu ngateitei o te ao katoa e pini ua ake e ei Atua no te totou mou. (2 Petero 3:13) Kia tae roa atu ki taua ra meitaki ra, e rave tamou marie tatou i te aaereanga na roto i te marama tu-Atua na te akamanako anga i te tuatua totou a te Atua ra.

Akapeea Koe me Pau?

• Akapeea koe me akataka i te akatu keanga o Iesu?

• Akapeea ta te akatu keanga patu anga i te akarongo?

• Koai me kare eaa te Etu Popongi a Iehova ra, e i naea i kake mai ei te reira?

• Eaa ra tatou i tau ei kia akamanako atu i te tuatua totou a te Atua ra?

[Au Uianga Apii]

[Tutu i te kapi 13]

Ka rauka ainei ia koe te akataka i te puapinga maata o te akatu keanga ra?

[Tutu i te kapi 15]

Kua kaka ke mai te Etu Popongi ra. Kua kite ainei koe i akapeea e i naea?