Ripoti a te Aronga Tutu Patireia

“E Maata Oki to Kotou Kite no Runga i te Pipiria”

I TE 12 mataiti kua tuatua mataku kore a Iesu ki te au arataki akonoanga i Ierusalema, kua “umere anake iora te aronga katoa i akarongo iaia ra i tona kite e tana tuatua.” (Luka 2:47) Mei te reira rai i teia tuatau nei, e manganui te au tavini mapu o Iehova e akaari ra i te tu mataku kore i te tuatua anga ki to ratou au puapii e te au tauira no runga i te Atua e te Pipiria, e e putuputu te taime kua rauka mai ia ratou te au akakitekite anga mataora tikai.

Tei roto a Tiffany, e 14 mataiti, i tetai pupu apii tei uriuri no runga i te totou Pipiria o te 70 epetoma mataiti, te kitea ra ia Daniela 9:​24-27. Kua oronga mai te puapii i tetai au manako e iti ua no runga i te au irava e kua akara rapurapu ua i te tumu manako.

I te akamata anga, e manga ekoko rai a Tiffany i te takianga i tona rima. “Inara no tetai tumu,” i nanai, “kua tamanamanata tikai te reira iaku no te mea kare te au irava i akamarama meitakiia mai ana. Ina, i mua ake ka kite ei au kua taki takere au i toku rima.” Kua umere te puapii e tei reira tetai tangata ka inangaro i te tuatua no runga i te tumu, i te mea e ngata te reira i te maata anga o te au tauira i te marama.

I te oronga angaia te tuatau kia akataka mai i te totou, kua tu a Tiffany e kua tuatua matara atu. I te akaoti anga aia, kua muteki tikai te au tauira. E manga ru tikai a Tiffany. I reira kua pokarakara maata tikai te au tauira.

“E mako tikai te reira, e Tiffany, e mako tikai,” i na te puapii ei i te tuatua taokioki anga. Kua akakite mai aia e kua kite aia e te vaira te maata anga ki taua au irava ra, inara ko Tiffany te tangata mua tei akamarama meitaki mai i te reira kiaia. I te openga o te apii, kua ui aia kia Tiffany e noea mai tona kite maata no runga i te Pipiria.

“No te mea ko au tetai o te Au Kite o Iehova,” kua pau atu aia. “Kua akamarama mai toku nga metua i taua totou kiaku e maata te taime i mua ake ka mou meitaki ei te reira iaku.”

Kua umere katoa tona au taeake i tona kite no runga i te Pipiria. Kua tuatua maira tetai tauira kia Tiffany e: “Te kite nei au i teianei i te tumu i aere atu ei kotou te Au Kite o Iehova mei tera ngutupa ki tera ngutupa; no te mea e maata oki to kotou kite no runga i te Pipiria.” Kua taputou tetai atu e kare ratou e aviri akaou iaia no tona au irinaki anga.

I te akakite atu anga a Tiffany i tona nga metua no runga i tana akakitekite anga, kua karanga mai raua kia oronga aia i te puka Te Kite te ka Arataki ki te Ora Mutu Kore ki tona puapii. I te rave anga aia i te reira e te akaari anga atu ki te puapii i te tuanga tei akamarama mai i te totou a Daniela, kua ariki tikai aia i te puka e kua akameitaki iaia no te reira.

E tika, me tuatua mataku kore te au mapu Kerititiano no runga i te au apinga ta to ratou nga metua i apii ana ia ratou no runga i te Atua e te Pipiria, ka apai mai ratou i te akapaapaa anga ei akangateitei anga kia Iehova e te au akameitakianga kia ratou uaorai.​—Mataio 21:​15, 16.