Eaa Taau i Kite No te Angaanga Purepure?

ANGAANGA PUREPURE! Eaa ta te reira tuatua e akamaara maira ia koe?

Ki te manganui, ko te au mea ia no te tamataku anga e te manako ua, auraka kia manako pakariia. Kia ratou, te vaira te angaanga purepure i roto ua i te ngai akamanako anga​—te au vaine ruau viivii te kakau ma te au pare tei kairo i te au peau moakirikiri ki roto i tetai pani pupu, kua taui i te tangata i roto i te au rana, e ka rere aere i te po na runga i te au purumu rakau ia ratou e kata tamataku ra.

Ki tetai ke, kare te angaanga purepure i te mea kata anga. Kua tuatua etai aronga akara matatio e maata atu i te apa o te katoa anga o te tangata te irinaki ra e aronga tika tikai te au vaine tautau e ka rauka i te akakeu i te au oraanga o tetai ke. E mirioni te irinaki ra e mea kino, tumatetenga, e kia mataku maata ia te angaanga purepure. Ei akaraanga, kua akakite tetai puka no te akonoanga i Aperika e: “Te irinaki anga i roto i te angaanga e te au mea kino o te angaanga manamana, akavare e te angaanga purepure kua aka oonuia i roto i te oraanga Aperika . . . Ko te au vaine tautau e te aronga manamana te aronga rikarika roaia atu e to ratou ngai tangata. E tae mai ki teia tuatau te vaira tetai au ngai e tetai au atianga kua papaia ratou kia mate e te katoa anga o te tangata.”

Inara, i te au enua Opunga, kua rauka i te angaanga purepure te akangateitei anga. E maata ta te au puka, te tivi, e te au teata i rave kia akameangiti i te mataku anga i te angaanga purepure. I akakite ei te tangata apii i te au mea tamataora ko David Davis: “I teianei, e au mapu ou e te manea tikai te au vaine tautau, e manea roa. E meitaki tikai a Hollywood no te akono i teia au tu. . . . Na te akariro anga i te au vaine tautau kia manea tikai e kia inangaroia, ka ariki uaia ratou e te maata anga o te aronga akarakara, kapiti mai te au vaine e te au tamariki mapu.” Kua kite a Hollywood e akapeea me akariro i tetai peu e kia puapinga i te pae moni.

Kua tuatua etai e kua riro te angaanga purepure e ko tetai akapupu anga pae vaerua tupu viviki roa atu i Marike. I te au enua kare e meitaki ana te tupu anga, e maata te numero o te tangata, te akauruia ra e te au akapupu anga a te vaine e kua akavareia e te au akonoanga maata, te kimi ra i te akatupuanga i te pae vaerua i roto i te au tu tukeke o te angaanga purepure. Ko te tika, e maata tikai te numero o te au tu angaanga purepure e kua patoi te tangata i te aite anga tikai o te tuatua “vaine tautau.” Inara, kua ariki te au vaine tautau i te maata anga o te taime i te tuatua a Wicca​—tei akatakaia i roto i tetai tikitinari e ko “tetai akonoanga natura peikani tei akaia mai mei te tuatau i mua ake i te Kerititiano i Europa opunga e te akaouia nei i te 20 anere mataiti.” * No reira, e manganui te taiku ra ia ratou uaorai ei au peikani me kare au peikani ou.

 I te tuatua enua i aereia mai, kua makitakitaia, kua takinokinoia, kua tamamaeia, e pera kua tamateia te au vaine tautau. No reira rai te aronga rave angaanga purepure i teia tuatau e tauta ra i te akamako mai i to ratou ingoa i teia tuatau. I roto i tetai tare anga, kua uiia te tatini ua atu au vaine tautau e eaa ta ratou au tuatua ka inangaro i te akakite ki te tangata. Ta ratou pau anga, tei tapotoia mai e tetai vaine kimikimi ko Margot Adler, e: “Kare matou e kino roa ana. Kare matou e akamori ana i te Tiaporo. Kare matou e akakino ana me kare e akavare ana i te tangata. Kare matou e kino ana. E au tangata noa ua matou mei ia kotou rai. E au pamiri to matou, e au angaanga, e au manakonakoanga, e te au moemoea. Kare matou i te cult. Kare matou e tuke roa ana. . . . Kare kotou e anoanoia kia mataku ia matou. . . . E aiteite ua matou kia kotou.”

Ma te maata mai, kua arikiia te reira akakite anga. Inara ko te aite anga ainei i teia e kare e anoanoia te manako anga no runga i te angaanga purepure? Ka akara ana tatou i te reira ui anga i te atikara ka aru mai.

[Tataanga Rikiriki i Raro]