Taau ka Tau Kia Kite No te Angaanga Purepure

E NGATA tikai i te akataka i te angaanga purepure i teia tuatau. Teia oki te tumu ko te aronga te akono ra i te reira te tuke maata ra. Te kite ra ratou e kare e akaaere maata me kare e apiianga me kare e puka tapu kia taokotai i te irinaki anga. Te tuke katoa ra ratou i te peu, akaaerenga, te rave anga, e te manako e ko teea au atua kia akangateiteiia. Kua tuatua tetai tangata tata: “Te oronga ra te ao muna ki te tangata tataki tai i te ‘ngai makete rangatira’ te au manako.” I na tetai ei: “Kua patoi te maata anga o te au Peikani Ou vaitata rai i te au mea.”

No te manganui, kare e ko te au tuke anga te manamanata. Kua akakite tetai puka no runga i te au vaine tautau e: “Me akaaoia koe ma te akakite anga akara anga tuke tikai, e akara matatio i teia au akakite anga e e tuku i te iki anga e ko teea te ka aru. E akarongo i toou manako. Tera te aite anga, e akara ua e kia iriiri i roto i te au peu tei neneiia e te au puka tata no runga i te peu kia iki e ko teea te mea tau ra.”

No te aronga te kite ra i te tu natura o te tuatua mou, e manamanata ia te au tuke anga. E tika te tuatua mou, e mea tika tikai. Kare te au mea e tika ana no te mea kua manako ngakau tetai tangata me kare kua manakonako me kare kua irinaki e te tika ra ratou. Ei akaraanga, i tetai taime kua irinaki te au taote e ka rauka ia ratou te rapakau i te nimonia na te tipu anga i tetai moa ora i roto i nga tuanga e rua e kua tuku i nga tuanga ki runga i te umauma o tetai tangata maki. Kare e ekoko anga, e manganui te aronga maki tei irinaki ngakau tae e ka rapakau teia raverave anga ia ratou. Inara, kare to ratou au irinaki anga e te au manakonakoanga i rotai ma te tuatua tika​—kare taua raverave anga e rapakau i te nimonia. Kare te tangata e maani ana i te tuatua mou; te tauta ra ratou kia marama i te reira.

Kua akakite te Pipiria e kua ki i te tuatua mou no runga i te au mea pae vaerua. Kua tuatua a Iesu Karaiti, iaia i te enua nei, ki tona Metua na roto i te pure: “Ko te tuatua aau na te tuatua-mou.” (Ioane 17:17) Kua tata te apotetoro ko Paulo: “Te au tuatua tapu katoa i tataia ra, e mea akauruia mai e te Atua.” (2 Timoteo 3:16) E manganui te aronga te akono ra i te angaanga purepure kare e akatika ana. Mari ra, te akara ra ratou i te akauruanga e te arataki anga i roto i te peu, te au akonoanga taito, e pera te taineti manako ua. Inara, kare ainei i te mea tau kia akara e eaa ta te Pipiria e tuatua ra? I te mea e, kua kiteaia i te ao katoa ei puka tapu ra. Ko tetai katoa ia o te au tataanga akonoanga taito roa atu tei vai mai. Kua tataia te Pipiria e tere atu i te 1,600 mataiti, inara kua tamou te reira i tana au apiianga. Ka akaaite ana tatou i te au apiianga Pipiria ma etai au irinaki anga matauia te akakiteia nei e te aronga te akamaata ra i te angaanga purepure.

 Koai ma te Noo ra i te Ngai Vaerua?

Ko tetai ui anga mama ua i roto i te kimikimi anga e kia marama i te pae vaerua ko teia, Koai ma te noo ra i te ngai vaerua? Koi aru ei te maata anga o te au vaine tautau i teia tuatau i te akarongo maata te atua natura, te irinaki ra etai i te atua metua vaine maata, te manakoia ra e te rave ra e toru tuanga angaanga ei vaine mapu, te metua vaine, e te vaine ruau, te akatutu anga mai i te au turanga o te oraanga. Ko tona tokorua akainangaro ko tetai atua ma te au tara. Te akamori ra etai atu au vaine tautau ma te kapipiti i tetai atua e te atua vaine. Kua tuatua tetai tangata tata e: “Te kitea ra te Atua Vaine e te Atua ei akakiteanga i te tu vaine e te tu tane i te pae natura. E au tu umere tataki tai [tikai] to te reira me taokotaiia ka tupu mai te rotai anga o te au mea anga o te oraanga.” Kua tata mai tetai: “Ko tetai au iki anga puapinga i te Angaanga Purepure koia oki ko taau iki anga i te au atua (Au Atua/Atua Vaine) ka inangaro koe i te rave angaanga ma te reira. . . . Te oronga maira te Angaanga kia koe i te tu rangatira kia iki e kia akangateitei i taau uaorai au tu o te au tu-Atua.”

Kare te Pipiria e turu ana i etai o teia au manako. Kua oronga a Iesu Karaiti i te katoa anga o tana angaanga orometua i te apiianga i tetai atu no runga ia Iehova, “te Atua mou.” (Ioane 17:3) Te akakite ra te Pipiria: “E maata oki a Iehova, e kia maata tona akameitaki angaia: kia matakuia oki aia, auraka te au atua katoa. Te au atua ravarai no te au etene ra e idolo ïa.”​—1 Paraleipomeno 16:​25, 26.

Akapeea te Tiaporo? Te akataka ra te Webster’s Ninth New Collegiate Dictionary i te angaanga purepure ei “komunikeiti anga ma te tiaporo.” E mea ngata i te kite i tetai vaine tautau i teia tuatau ka akatika i teia akataka anga, no te mea kare te manganui e ariki ana e te vai nei a Satani te Tiaporo. Ko tetai mapu vaine, tei akatakaia i roto i The Irish Times ei “vaine tautau teitei te turanga e e arataki no tetai o te au pupu vaine tautau maata i Ireland,” kua akamarama na teia tu: “Te irinaki anga i te Tiaporo te akakite ra i te ariki anga i te Akonoanga Kerititiano . . . kare e rauka i [Te Tiaporo] te noo ki roto i tetai ao katoa e pini ua ake te ngai kare e Atua.”

Te akapapu maira te Pipiria e te vai nei te Tiaporo e kua akaapa iaia no te maata o te mamaeanga e te kino i te enua. (Apokalupo 12:12) Kare a Iesu i apii ua e te vai nei te Tiaporo inara kua akaari katoa e ka rauka ma te kore i akakoroia te rave atu i te anoano o te Tiaporo. Ei akaraanga, kua tuatua te au arataki akonoanga manako tuatua tika o te anere mataiti mua e e au tamariki ratou na te Atua e kua irinaki e te rave ra ratou i te anoano o te Atua. Inara, ia Iesu tei kite e eaa to roto i to ratou ngakau kua tuke tana i kite atu. Kua akakite tika atu aia kia ratou: “Ko te diabolo to kotou metua, i akatikaʼi kotou i te anoano o to kotou metua ra.” (Ioane 8:44) Pera katoa, te akakite ra te puka Pipiria o Apokalupo e te “pikikaa [ra te Tiaporo] i to te ao katoatoa nei.”​—Apokalupo 12:9.

E Meitaki Ainei Etai Angaanga Manamana?

E tika, kua kapiti uaia ana te angaanga manamana ma te angaanga muna. * E manganui te au tangata i te tuatau taito e teianei te irinaki ra e ko te angaanga manamana tei raveia e te au vaine tautau kua raveia kia akatupu i te kino ki runga i tetai ke. Kua orongaia ki te au vaine tautau te mana kia akatupu i te mamae kino roa e pera katoa te mate na roto i te au angaanga  manamana. Tei matauia, kua akaapaia te au vaine tautau no te au tu manuia kore kare i kotingaia, kapiti mai te maki, te mate, e te puapinga kore o te one kai.

Kua patoi tikai te au vaine tautau o teia tuatau i taua au akaapa anga. Koi akatika ei i te vai anga o te vaine tautau pikikaa ua te aruaru ra i te angaanga kino, kua tuatua te maata anga e te taangaangaia ra ta ratou angaanga manamana kia apai mai i te au meitaki, kare te kino. Te apii ra te aronga aru ia Wicca e ka oki mai te tupu anga o te angaanga manamana e taki toru taime ki te tangata te rave ra i te reira e te tuatua ra e mea kino tikai no te tuatuaanga i te au taumaa. Te au akaraanga o teia angaanga manamana meitaki te raveia ra te kapiti maira i te au tuatua purepure kia paruru ia koe uaorai, kia rangatira i toou kainga mei te au mana ririnui kino tei akarukeia mai e te au tangata noo i mua ana, kia akatupu i tetai tangata kia akainangaro ia koe, kia akamaata i te rapakauanga e te oraanga kopapa, kia arai kia kore e ngere i taau angaanga, e kia rauka te moni. Ma te au mana maata tei rauka i te angaanga purepure, kare i te mea poitirere e kua rongonui te reira.

Inara, kare te Pipiria i akataka ke i rotopu i te raveanga manamana tei meitaki e tei kino. I roto i te Ture tei orongaia kia Mose, kua akataka meitaki te Atua i tona turanga. Kua tuatua aia: ‘Auraka kotou e akara ki te au tumurangi.’ (Levitiku 19:26) Ka tatau katoa tatou: “Auraka rava tetai e kitea i rotopu ia kotou . . . e te akara tumurangi, e te purepure, e te akarakara, e te kebere, e tei kimi i te vaerua kino.”​—Deuteronomi 18:​10, 11.

Eaa ra te Atua i tuatuai i te reira? Kare e kua akakoro aia i te akakore ia tatou i tei meitaki. Kua oronga a Iehova i teia au ture ki tona iti tangata no te mea kua inangaro aia ia ratou e kare i inangaro ia ratou kia akatuikaaia e te mataku e te purepure. Mari ra, te pati ra aia i tona au tavini kia aere atu kiaia no te au mea ta ratou e anoano ra. Koia Tei Oronga i te “au mea memeitaki . . . e te au mea tika ravarai.” (Iakobo 1:17) Kua akapapu te apotetoro ko Ioane i te au taeake irinaki: “E ta tatou e pati atu [i te Atua] ra, e rauka ïa ia tatou, no te mea te akono nei tatou i tana au akauenga, e te rave nei i te au mea e marekaʼi aia ra.”​—1 Ioane 3:22.

Akapeea te Au Vaerua Kino?

E manganui te au vaine tautau te akatika ra ki ta te Pipiria no runga i teia manako: Te vaira te au vaerua kino. I roto i tetai tataanga kua akamatakite tetai tangata akamaata i te angaanga purepure: “Tei vao te au Ata: Te vaira ratou, i roto i te ao akara koreia te aiteite ra ki to tatou, au mea ora. . . . Te au tuatua ‘Temoni meangiti’, ‘Vaerua Kino’ e te ‘Temoni’ te tika ra. E ketaketa tikai ratou. . . . Te mea kite roa atu . . . ka rauka (me akatueraia e tetai tangata tauturu ua i te ngutupa kia ratou) te tomo mai ki to tatou ao. . . . Ka rauka ia ratou te  tomo ki roto i toou kopapa . . . , te akaaere anga ia koe. Ae, mei te au tua taito rai teia o te Temoni akauruia.”

I te tuatau Pipiria, kua takinokino te temoni tei uru i te tangata i te au tu tukeke. Ko etai o te aronga tei takinoia kare e rauka i te tuatua, kua akamatapoia etai, kua rave angaanga neneva etai, e kua rauka i etai te maroiroi ririnui pakari atu i to te tangata. (Mataio 9:32; 12:22; 17:​15, 18; Mareko 5:​2-5; Luka 8:29; 9:42; 11:14; Angaanga 19:16) I etai taime kua akamaataia te mamae me rauka i te au temoni e manganui te akauru i tetai tangata. (Luka 8:​2, 30) Papu, i reira, te vaira te au tumu meitaki e eaa ra a Iehova i akamatakite ei i te tangata kia akaatea mai mei te angaanga purepure e tetai atu au raveanga angaanga muna.

Akonoanga Akanooia ki Runga i te Tuatua Mou

E manganui tei piri atu ki te angaanga purepure i teia tuatau no te mea kua akara anga e akonoanga natura kare e kino roa ana e te meitaki ra. I etai au ngai tangata kua arikiia te reira. Kare i matakuia. Mari ra, kua akariro ia ei mea matauia. I roto i tetai reva te ngai te taki ra te akakoromaki anga i te au akonoanga i te manganui kia takave i te angaanga purepure tuke ua ake rai, kua rauka te akangateitei anga.

Ae, kua riro te ao o te au akonoanga ei ngai makete mei te reira te rangatira ra te tangata kia iki i tetai tei tau ki to ratou au anoano, mei tetai ka oko i tetai tamaka tau. Ei tuke anga, kua tuatua a Iesu e rua nga iki anga. Kua tuatua aia: “E tomo kotou na te ugutupa o iti; te atea maata nei te ngutupa, e te pararauare nei te ara, e tae atu ei ki te mate; e manganui te na reira i te tomo. Te kokota ua nei te ngutupa, e te piri oki o te ara, e tae atu ei ki te ora, e tokoia ua ake tei kite atu i te reira.” (Mataio 7:​13, 14) Tei matauia, kua rangatira ua tatou kia iki e ko teea ara ka aere ki runga. Inara i te mea e te o maira to tatou ora anga mutu kore, e puapinga tikai taua iki anga. E raukai te akamarama anga i te pae vaerua, kia aruaru tatou i te ara o te tuatua mou​—te mataara te kitea uaia ra i roto i te Tuatua a te Atua, te Pipiria.

[Tataanga Rikiriki i Raro]

[Tutu i te kapi 5]

E manganui i teia tuatau te manako ra i te angaanga purepure ei akonoanga natura kare e kino roa ana

[Tutu i te kapi 6]

Kua kapiti uaia ana te angaanga manamana ma te angaanga muna

[Tutu i te kapi 6]

Te rave akakoro kore ra ainei te aronga rave angaanga purepure i te anoano o te Tiaporo?

[Au Tutu i te kapi 7]

Te akaari maira te Pipiria i te ara o te tuatua mou