Ripoti a te Aronga Tutu Patireia

Akavaitata Maira te Oraanga Ngutuare Tangata Mataora i Etai Atu ki te Atua

KUA akameitaki a Iehova ia Iosepha ma te pakari maata e te kite. (Angaanga 7:10) Tei tupu mai, “e tuatua meitaki [te kite oonu o Iosepha] ia Pharao, e tona katoa ra au tavini.”​—Genese 41:37.

E pera i teia tuatau nei, kua oronga mai a Iehova ki tona iti tangata i te kite oonu e te kite na roto i ta ratou apii o te Pipiria. (2 Timoteo 3:​16, 17) Ka akatupu mai teia pakari e te kite i te ua meitaki i te rave anga i te akoanga akatumuia i te Pipiria. E putuputu ana ‘e meitaki to ratou tu meitaki ki te aronga tei kite ra,’ mei ta te au akakitekite anga te ka aru mai mei Zimbabwe i akatutu mai.

• E Au Kite o Iehova te noo ra i te pae mai i tetai vaine. Noatu e kare teia vaine i reka ana i te Au Kite, kua reka aia to ratou tu, i te maata anga to ratou oraanga kainga. Kua kite aia i te piri anga meitaki tikai o te tane e te vaine, e kua akarongo ta raua tamariki. Kua kite maata mai aia e kua akaperepere tikai te tane i tana vaine.

Ko te irinaki anga i roto i tetai au peu Aperika e me te aroa ra tetai tane i tana vaine, penei kua taangaanga te vaine i te apinga manamana kia “kauraro” aia. No reira kua akavaitata maira te vaine ki te vaine Kite e kua ui atu kiaia: “Ka akatika ainei koe i te oronga mai i te apinga manamana taau i oronga atu ki taau tane kia aroa mai taku tane iaku mei taau e aroa ra ia koe?” Kua pau mai te Kite e: “Ae, ka oronga atu au i te reira kia koe apopo i te aiai.”

I tera mai ra, kua atoro atu te tuaine i te vaine i te pae mai ma tana “apinga manamana.” Eaa te reira? Ko te Pipiria oki, e te puka Te Kite te ka Arataki ki te Ora Mutukore. I muri ake i te akarakara anga i te au akakitekite anga mei roto mai i te puka Kite no runga i te tumu “Te Patuanga i Tetai Ngutuare Tangata tei Akangateitei i te Atua,” kua karanga atu aia ki te vaine: “Ko teia te‘apinga manamana’ ta maua ko taku tane e taangaanga ana kia ‘kauraro’ maua i tetai e tetai, e no reira maua i aroa maata ei i tetai e tetai.” Kua akamata ia tetai apii Pipiria, e kua tere te vaine ki mua ki te akaarianga i tona akatapu anga kia Iehova na roto i te taruku anga ki te vai.

• Kare tetai nga painia takake tei tukuia ki tetai putuputuanga meangiti i vaitata ki te kotinga tokerau itinga o Zimbabwe e Mozambique i aere ana ki vao i te angaanga ngutupa no tetai nga epetoma e rua. No teaa ra? No te mea te aere maira te tangata kia raua kia akarongo i ta raua tuatua. Te akakite mai nei tetai o te nga painia i akapeea teia i tupu mai ei: “E aere ana maua e 15 kiro mita i te rave i tetai apii Pipiria i te kainga i te au epetoma takitai ma tetai tangata tei inangaro. Kare i ngoie ua no maua kia tae ki teia ngai. Kua aaere ua maua na roto i te vari, e kua tikoti maua i te kauvai vaipuke ra tei tae ki to maua kaki. Kua o mai ki teia i te paranianga i to maua kakau e to maua tamaka ki runga i to maua upoko, te aaereanga na roto i te kauvai, e te aao akaou anga i te kakau i tetai tua mai.

“Kua umere tikai te au tangata i te pae mai i te tangata inangaro i to maua maroiroi. I roto i te aronga tei kite mai ko tetai arataki i roto i tetai akaaerenga akonoanga i te reira ngai. Kua tuatua atu aia ki tana au pipi e: ‘Kare ainei kotou e inangaro kia maroiroi mai mei tera nga tangata e rua e Au Kite o Iehova?’ I tera mai ra, kua aere mai tana au pipi e manganui ki to maua kainga i te kimi i te tumu o to maua maroiroi. E pera katoa, i nga epetoma i aru mai, e manganui tikai te tangata i atoro mai ia maua e kare o maua taime i te akapapa i te kai na maua!”

Ko tetai tangata tei atoro i nga painia i roto i teia nga epetoma ko te tangata arataki akonoanga. E akamanako ana i te rekareka o nga painia i te ariki anga aia i tetai apii Pipiria i te kainga!