E Akarongo Eaa Ta te Vaerua ka Tuatua Mai
E Akarongo Eaa Ta te Vaerua ka Tuatua Mai
“E na to kotou taringa e akarongo i tetai manga tuatua i muri mai ia kotou, i te na ko anga, teia te ara, e na reira te aere; kia anga kotou i te pae katau, e kia anga kotou i te pae kaui.”—ISAIA 30:21.
1, 2. Akapeea ta Iehova ra komunikeiti anga ma te au tangata i te tuatua enua katoa ra?
ITE enua o Puerto Rico ko te kainga ia o te teretikopu ratio okotai pa meitaki rava atu tei maata katoa oki i te ao nei. No etai rau ngauru mataiti, kua manakonako te au tangata taineti kia rauka mai etai tuatua akakite anga mei te oraanga mei vao mai i te reva o te enua nei na te taangaanga i teianei apinga maatamaata. Inara kare e tuatua akakite i rauka mai. Tera ra, te vaira te au tuatua akakite mei vao mai i to te tangata ngai te ka rauka ia tatou i tetai ua atu taime—ma te kore e taangaanga te apinga kare i matauia. Kua aere mai teianei no tetai Tumu e teitei roa atu i tetai apinga tamanakoia i vao ake i te reva o te enua nei. Koai te Tumu o taua au komunikeiti anga, e te rauka maira iaai ma? Eaa ta te au akakite anga e tuatua maira?
2 Te vaira etai tataanga i te Pipiria no etai atianga tei akarongoia ra e te au taringa tangata te au tuatua akakite anga no te tu-Atua maira. I etai tuatau kua akakiteia mai taua au tuatua ra e te au mea ora vaerua tei tavini ra ei au karere na te Atua. (Genese 22:11, 15; Zekaria 4:4, 5; Luka 1:26-28) I nga atianga e toru, kua akarongoia te reo o Iehova uaorai. (Mataio 3:17; 17:5; Ioane 12:28, 29) Kua tuatua katoa te Atua na roto i te au peroveta tangata nei, e manganui o ratou kua tata i tana i akauru ia ratou kia tuatua. I teianei tuatau, tei ia tatou te Pipiria, te kapiti ra i tetai tataanga no teia au komunikeiti anga e manganui, pera katoa te au apiianga a Iesu e tana au pipi. (Ebera 1:1, 2) Kua oronga katoa mai a Iehova i te akakite anga ki tana au mea ora tangata nei.
3. Eaa te akakoroanga o ta te Atua au tuatua anga maira, e eaa te manakoia maira ia tatou?
3 Pouroa teianei au tuatua akakite akauruia mai e te Atua te akakite meangiti ua ra i te ao kopapa katoa e pini ua ake. Te tou ra ratou ki runga i te au tumu puapinga maata atu, te akakeu ra ki runga i to tatou oraanga i teianei e i te tuatau ki mua oki. (Salamo 19:7-11; 1 Timoteo 4:8) Te taangaanga ra Iehova ia ratou kia komunikeiti i tona anoano e kia oronga oki i tana aratakianga kia tatou. Ko tera tetai mataara te akatupuia ra te au tuatua a te peroveta ko Isaia: “E na to kotou taringa e akarongo i tetai manga tuatua i muri mai ia kotou, i te na ko anga, Teia te ara, e na reira te aere; kia anga kotou i te pae katau, e kia anga kotou i te pae kaui.” (Isaia 30:21) Kare a Iehova e opara ia tatou kia akarongo ki tana “tuatua.” Tei runga ia tatou te aru i te ta te Atua arataki anga e te aaere na tona arataa. No tera tumu te akamaroiroi maira te au Tuatua Tapu ia tatou kia akarongo ki te au komunikeiti anga mei ko mai ia Iehova ra. I roto i te puka a Apokalupo, te mama maira te akamaroiroi anga kia ‘akarongo i ta te Vaerua e tuatua’ e itu taime.—Apokalupo 2:7, 11, 17, 29; 3:6, 13, 22.
4. Te tau ra ainei i to tatou tuatau nei kia manako atu i te Atua kia komunikeiti tika mai mei te rangi ra?
4 I teia tuatau, kare a Iehova e tuatua tika tika mai kia tatou mei te rangi maira. Noatu rai i te au Tuatau Pipiria ra, e taki tai ua akenei au tu komunikeiti anga, i etai taime e au anere mataiti atu te taka ke anga. I te tuatua enua katoa ra, e putuputu to Iehova ra komunikeiti anga ma tona au tangata na te tu kare i te tika tika atu. Ko tera katoa te tu i to tatou tuatau nei. E akamanako tatou e toru tu no ta Iehova ra komunikeiti anga mai kia tatou i teia tuatau.
“Te Au Tuatua Tapu Katoa e Mea Akauruia Mai”
5. Eaa ta Iehova ra apinga komunikeiti maata mai i teianei tuatau, e akapeea tatou ka puapingaiai mei te reira?
5 Ko te apinga maata no te komunikeiti anga i rotopu i te Atua e te au tangata ko te Pipiria ia. Kua akauruia mai ia e te Atua, e ko te au mea ravarai i roto i reira ka rauka kia akapuapinga mai ia tatou. (2 Timoteo 3:16) Te ki ra te Pipiria ma te akatauanga no te au tangata tikai tei akono i to ratou anoano tu rangatira i te ikianga me kia akarongo ki to Iehova reo me ka kore. Te akamaara maira tana au akatauanga ra kia tatou eaa i puapingai kia akarongo atu ki ta te vaerua o te Atua e tuatua maira. (1 Korinetia 10:11) Te oronga katoa maira te Pipiria i te pakari tau, i te orongaanga mai i te akoanga kia tatou no te au tuatau me aro atu tatou i te au ikianga i te oraanga. Mei te mea rai e tei muri ake te Atua ia tatou, te tuatua maira ki roto i to tatou taringa i te au tuatua: “Teia te ara e na reira te aere.”
6. Eaa ra te Pipiria i meitaki maata roa atu ei i etai atu au tataanga ke katoa ra?
6 E raukai kia akarongo i te tuatua a te vaerua na roto i te au kapi o te Pipiria, ka tika tatou kia tatau putuputu i te reira. Kare te Pipiria i tetai puka tei tata meitaki uaia, tei rekaia, ko tetai o te manganui te rauka maira i teia tuatau nei. Te Pipiria kua akauruia i te vaerua e tei roto i reira te au manako o te Atua. Te tuatua ra a Ebera 4:12: “E mea ora oki te tuatua a te Atua, e te ririnui, e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau, e te paunga e te uo ivi ra; e te akara matariki oki i te manako e te vananga o te ngakau ra.” Ia tatou e tatau ra i te Pipiria, ka ko atu tana au Tuatua ki roto roa i to tatou au manako e te au akakeu anga oki mei tetai koke rai, ma te akakiteanga i te maata te aru anga to tatou au oraanga i te anoano o te Atua ra.
7. Eaa ra i puapinga maatai te tatauanga i te Pipiria ra, e eaa te putuputu te akamaroiroi maira ia tatou kia rave i te reira?
7 Ka rauka kia tauiia te “manako e te vananga o te ngakau ra” me topa aere te tuatau e me ka akatupuia kia tatou ma ta tatou i kite i te oraanga—te mea mareka anga e te mea ngata oki. Me ka kore tatou e apii putuputu i te Tuatua a te Atua, kare to tatou au manako, te au tu akono, e te au manako ngakau oki e rotai ma te au kaveinga tau i te Atua ra. No reira, te ako maira te Pipiria ia tatou: “E kimi matatio ia kotou uaorai i to kotou akarongo; e akara matariki ia kotou uaorai.” (2 Korinetia 13:5) Me ka akarongo ua atu tatou i ta te vaerua e tuatua maira, ka tau tatou kia rave i ta te Tuatua a te Atua i ako maira kia tatau i te Pipiria i te au ra takitai katoa.—Salamo 1:2
8. Eaa te au tuatua a te apotetoro ko Paulo te tauturu ra ia tatou kia akara matatio ia tatou uaorai no runga i te tatau anga i te Pipiria ra?
8 Ko tetai akamaaraara anga meitaki no te aronga tatau Pipiria koia oki: E tuku kia rava te taime kia tauruia taau i tatau ra! I tetai tauta anga kia akono i te akoanga kia tatau i te Pipiria i te au ra ravarai, kare tatou e anoano kia rave viviki ua na roto i etai au pene ma te kore ua e kite i te aiteanga o taau i tatau ra. I te mea e puapinga maata te tatauanga putuputu i te Pipiria, kare e tau kia riro ta tatou tatauanga kia aru anake i tetai papaanga; ka tau kia inangaro tikai tatou kia kite ia Iehova e tana au akakoroanga. No teianei tumu, ka meitaki tatou kia taangaanga i teia au tuatua a te apotetoro ko Paulo no te akara matatio anga ia koe uaorai. I te tataanga ki tona au oa Kerititiano, kua tuatua aia: “No reira au i akamingi atu ei i taku turi ki raro i te aroaro o te Metua, kia oronga aia ia kotou . . . kia noo te Mesia i roto i to kotou ngakau i te akarongo; kia akaia kotou, e kia akatumuia i te inangaro, kia kite kotou e te aronga tapu katoa ra, i te tipoto, e te tiroa, e te oonu, e te teitei, kia kite kotou i te aroa o te Mesia, ko te kore e taea e te kite tangata nei, kia akakiia kotou kia tae ki te ki katoa a te Atua ra.”—Ephesia 3:14, 16-19.
9. Akapeea ka raukai ia tatou kia tatanu e kia akaoonu atu i to tatou anoano kia kite mei ia Iehova maira?
9 E tika ra, kare tetai papaki o tatou e rekareka ana i te tatauanga, ko etai ke ra e maroiroi i te tatau anga. Inara noatu eaa to tatou turanga tataki tai, ka rauka ia tatou kia tatanu e kia akaoonu atu i to tatou inangaro kia apii mei ko mai ia Iehova ra. Kua akataka mai te apotetoro ko Petero e ka tau tatou kia kaki no te kite Pipiria, e kua kite aia e ko taua inangaro ra ka tau kia akatupuia. Kua tata aia: “Kia kaki tikai kotou mei te tamariki anau ou, i te u iro koreia ra, i te tuatua, kia pakari kotou i te reira.” (1 Petero 2:2) E mea puapinga te akoanga ia tatou uaorai me “kia kaki tikai” tatou no te apii Pipiria. Mei te rauka katoa ra ia tatou kia akatupu i tetai inangaro anga no tetai kai ou i muri ake i te tongianga i te reira no etai taime, ka rauka kia tauiia to tatou tu akono no te tatau anga e te apiianga kia meitaki mai me ka ako tatou ia tatou uaorai kia aru i tetai ravenga putuputu.
‘Te Kai i te Ora Mou Ra’
10. Koai ma “te pupu tavini akono meitaki e te pakari,” e akapeea ta Iehova taangaanga ia ratou i teia tuatau nei?
10 Tetai atu mataara ta Iehova e taangaanga ra ei tuatua mai kia tatou i teia tuatau te akatakaia maira e Iesu ia Mataio 24:45-47. I reira kua tuatua aia no te putuputuanga Kerititiano akatainuia i te vaerua—“tavini akono meitaki e te pakari” tei akataoongaia kia oronga i te ‘kai [vaerua] i te ora mou ra.’ Ei aronga takitai, te au mema o teianei pupu ko te aronga o to Iesu ra “ngutuare.” Ko teianei aronga, kapiti katoa ma “te aronga maata” o te “mamoe ke atu rai” ka rauka ia ratou te akamaroiroi anga e te arataki anga. (Apokalupo 7:9; Ioane 10:16) Te maataanga o te kai i te ora mou te aere maira i roto i te tu o te au puka neneiia, mei Te Punanga Tiaki, te Awake!, e etai atu au puka. Ko etai atu kai vaerua te orongaia maira na te au tuatua e te au nuku i te au uruoaanga, te au akaputuanga, e te au uipaanga putuputuanga.
11. Akapeea tatou me akapapu e te ariki ra tatou i ta te vaerua i tuatua mai na roto i “te tavini akono meitaki e te pakari”?
11 Te akakite anga orongaia mai e “te tavini akono meitaki e te pakiri” kua akapapaia kia akamaroiroi i to tatou akarongo e kia tereni i to tatou kite ngakau. (Ebera 5:14) Penei taua ako anga ra e mea matau uaia te tu kia raukai i te aronga tataki tai ra te akono. I tetai tuatau ki tetai tuatau, te rauka katoa ra ia tatou te akoanga te akono ra ma te au tu taka ke i to tatou tu akono. Eaa te tu manako tau no tatou me te akarongo tika atura tatou i te tuatua a te vaerua na roto i te pupu tavini ra? Kua pau maira te apotetoro ko Paulo: “E akarongo i to kotou au arataki, e kauraro atu kotou.” (Ebera 13:17) E tika, te katoatoa te o atura ki teianei akanoonoo anga e au tangata apa ua. Inara, te mareka ra Iehova kia taangaanga i te au tavini tangata, noatu rai te apa ua ra, kia arataki ia tatou i teia tuatau openga nei.
Arataki Anga Mei to Tatou Akava Ngakau Mai
12, 13. (a) Eaa tetai atu tumu no te aratakianga ta Iehova i oronga mai kia tatou? (e) Eaa tetai mana papu no te akava ngakau noatu ki runga i te au tangata kare ra o ratou kite tika i te Tuatua a te Atua ra?
12 Kua oronga mai a Iehova i tetai atu tumu no te arataki anga—koia to tatou akava ngakau. Kua anga mai aia i te tangata ma tetai tu kite i te tika e te tarevake no roto maira. Ko tetai tuanga ia no to tatou tu. I tana reta ki to Roma, kua akataka maira te apotetoro ko Paulo: “Te etene oki kare a ratou ture ra, kia rave ua ratou i ta te ture ra, kore ua atu rai to ratou ture, ko ratou uaorai ta ratou ture: Kua akakite ua oki ratou i ta te Ture i tataia i roto i to ratou ngakau, te akakite ra oki to ratou akava-ngakau, e to ratou manako, te akaapa ra, e te akatika ra, ratou ratou uaorai.”—Roma 2:14, 15.
13 E manganui te aronga kare ra i kite ia Iehova, te rauka ra, i tetai tuanga, kia apai mai i to ratou au manako e te au angaanga kia rotai ma te au kaveinga tau i te Atua no te tika e te tarevake. Mei te mea rai e te akarongo ra ratou i tetai reo meangiti i te arataki anga ia ratou ma te aerenga tika. Me ko te tika teia no te aronga kare ra i kite tika i te Tuatua a te Atua, mei teaa atu rai te maata ta te reo no roto maira i te tuatua anga ki te au Kerititiano mou ra! E tika ra, te akava ngakau Kerititiano tei tamaia ra ma tetai kite tika i te Tuatua a te Atua ra e te au angaanga oki tei rotai ra ma te vaerua tapu o Iehova ka rauka kia oronga mai i te arataki anga tau kia irinakiia.—Roma 9:1.
14. Akapeea te tauturu anga ia tatou a te akava ngakau tei tereniia i te Pipiria kia aru i te arataki anga a te vaerua o Iehova ra?
14 Te akava ngakau meitaki, tetai tei tereniia e te Pipiria ra, ka rauka kia akamaara mai ia tatou i te aerenga te anoano maira te vaerua ia tatou kia aaere. Penei te vaira etai au tuatau kare te au Tuatua Tapu kare katoa ta tatou au puka akatumuia ki runga i te Pipiria i tuatua taka meitaki mai no tetai turanga penei ka kite tatou ia tatou uaorai i roto ra. Inara, penei ka akakite mai to tatou akava ngakau, ma te akamatakiteanga ia tatou i tetai aerenga te ka akakino mai. I taua au tu ra, penei ko te manako koreanga i te akakite anga a to tatou akava ngakau, ka riro te aiteanga ei akakoreanga i ta te vaerua o Iehova ra i tuatua. I tetai pae, ma te apiianga kia irinaki ki runga i to tatou akava ngakau Kerititiano tereniia ra, ka rauka ia tatou kia rave i te au ikianga meitaki noatu rai e kare e arataki anga akatakaia i te tataanga. Inara, e mea puapinga kia tamouia i to tatou manako, e me kare e kaveinga tu-Atua orongaia mai, e tikaanga, me kare e Ture ka riro ei tau kore kia tuku i te au ikianga no to tatou uaorai akava ngakau ki runga i to tatou au oa Kerititiano ra i te au tumu no te au apinga nona uaorai te tika kia iki.—Roma 14:1-4; Galatia 6:5.
15, 16. Eaa te ka akariro i to tatou akava ngakau kia kore e angaanga tika, e akapeea ka raukai ia tatou kia akakore i te tupuanga te reira tu?
15 Ko tetai akava ngakau ma tei tereniia i te Pipiria, ko tetai apinga meitaki orongaia mai ia e te Atua. (Iakobo 1:17) Inara ka tika tatou kia paruru i teianei apinga orongaia mai i te au mana taviivii anga kia rave angaanga tikai ei tetai apinga akono tau i te meitaki. Te au peu, au ikuiku anga, e te au ravenga tei patoi ra i ta te Atua au turanga ka rauka, me aruia, ka akariro i to tatou akava ngakau kia kore e angaanga tika e kia kore e taki ia tatou na roto i te arataki anga tika. Penei kare e rauka ia tatou kia iki tika i te au apinga e ka rauka katoa kia akavare ia tatou uaorai te irinakianga e ko tetai ravenga kino e mea meitaki ra.—Akaaite ia Ioane 16:2.
16 Me ka rave ua atu tatou i te manako koreanga i te au akamatakiteanga a to tatou akava ngakau, ka riro tona reo kia paruparu tae roa mai kia manako ngakau tau kore ua tatou me kare kite kore ua. Kua tuatua te tata taramo no taua tu tangata ra i tana tuatua anga: “Kua matu to ratou ngakau mei te tongaua.” (Salamo 119:70) Tetai papaki tei manako kore ra i te au akakeuanga a to ratou akava ngakau kua ngere i te kite kia manako tika. Kare ratou e aratakiia e te au kaveinga tau i te Atua ra e kare e rauka kia rave i te au ikianga tika. Kia kopae ke i taua turanga ra, ka tau tatou kia manako atu i te au aratakianga a to tatou akava ngakau Kerititiano noatu rai e mei te au tumu e tamanakoia ra e akaraanga meangiti ua.—Luka 16:10.
E Ao to te Aronga Akarongo Atu e ka Akono
17. Ia tatou e akarongo atura ki ‘te tuatua i muri ia tatou’ e ka akono ei i ta to tatou akava ngakau tereniia i te Pipiria ra, akapeea tatou i te akameitaki angaia?
17 Ta tatou e akanoo ra i tetai akatauanga i te akarongo anga ki ‘te tuatua i muri ia tatou’—i te orongaanga mai na roto i te au Tuatua Tapu e te tavini akono meitaki e te pakari—e ia tatou e akono ra i te au akamaaraara anga a to tatou akava ngakau tereniia i te Pipiria, ka akameitaki mai a Iehova ia tatou ma tona vaerua. Na te vaerua tapu, i reira, e akatere atu i to tatou kite kia rauka e kia kite oki i ta Iehova e tuatua mai kia tatou.
18, 19. Akapeea ka raukai i ta Iehova arataki anga te akapuapinga ia tatou i ta tatou angaanga orometua e to tatou oraanga oki?
18 Ka akamaroiroi katoa mai te vaerua o Iehova ia tatou kia aro atu i te au turanga ngata ma te pakari e te mataku kore. Mei te tu o te au apotetoro ra, ka rauka i te vaerua o te Atua kia akamaroiroi i to tatou mana manako e kia tauturu ia tatou kia rave e kia tuatua rotai ma te au kaveinga Pipiria ra. (Mataio 10:18-20; Ioane 14:26; Angaanga 4:5-8, 13, 31; 15:28) Na te kapiti anga o te vaerua o Iehova e ta tatou uaorai au tautaanga ka apai mai i te autu anga ia tatou e tuku ra i te au iki anga puapinga maata i te oraanga, ma te orongaanga kia tatou i te maroiroi kia rave i taua au iki anga ra. Ei akatauanga, penei te akamanako ra koe kia akatikatika i toou tu oraanga e te akariroanga kia maata atu te tuatau no te au apinga pae vaerua. Me kare penei te aro atura koe ma te au iki anga puapinga, i te tauianga oraanga, mei te iki anga i tetai tokorua, te paunu anga i tetai angaanga orongaia maira, me kare te okoanga i tetai are. Kare e na te tukuanga i to tatou au manako ngakau tangata ua nei ei tumu maata i te tukuanga tika, e akarongo tatou i ta te vaerua o te Atua e tuatua mai e ka rave rotai ei ma tana ra arataki anga.
19 Te ariki tika ra tatou i te au akamaaraara anga takinga meitaki e te akoanga te rauka maira ia tatou mei to au oa Kerititiano, kapiti katoa te aronga pakari ra. Inara, kare tatou e tau kia tiaki na etai ke e akakite mai i etai au tumu ki to tatou manako anga. Me te kite ra tatou i te ravenga pakari kia aru e eaa te au akatikatika anga ka tau ia tatou kia rave i to tatou tu manako e te tu akono oki kia akamareka i te Atua, e rave tatou. Kua tuatua a Iesu: “E ao to kotou, te aronga i kite i teianei au tuatua, kia akono kotou i te reira.”—Ioane 13:17.
20. Eaa te akameitakianga te aere maira ki te aronga tei akarongo atu ki ‘te tuatua i muri ia ratou ra’?
20 Te taka meitaki ra, kia kite e akapeea te akamareka i te Atua, kare e anoanoia te au Kerititiano kia akarongo tika atu i tetai reo no te rangi maira, kare katoa oki e anoanoia kia aere mai tetai angera kia ratou ra. Kua akameitakiia ratou i te Tuatua tataia a te Atua e te aratakianga aroa na roto i tana pupu akatainuia i te enua nei. Me ka akarongo matakite ratou i teianei ‘tuatua i muri ia ratou’ e kia aru i te arataki anga a to ratou akava ngakau tei tereniia ra i te Pipiria, ka autu ra ratou i te raveanga i to te Atua ra anoano. Ei reira ka kite tikai ratou i te tupu anga te taputou a te apotetoro ko Ioane ra: “Ko tei akono ra i to te Atua ra anoano, e tika ia i te ora anga e tuatau ua atu.”—1 Ioane 2:17.
Akamanako Poto Akaou Anga
• Eaa ra Iehova i komunikeiti ei ma tana tangata i angai?
• Akapeea tatou ka puapingaiai mei tetai porokaramu no te tatau putuputu anga i te Pipiria ra?
• Akapeea te akono tau ma tatou i te arataki anga mei ko mai i te pupu tavini ra?
• Eaa tatou i kore ei e tau kia manako kore i te arataki anga no tetai akava ngakau tereniia i te Pipiria ra?
[Au Uianga Apii]
[Tutu i te kapi 13]
Kare te tangata e anoano i te apinga kite e raukai te au tuatua mei ko mai i te Atua
[Akameitakianga]
Courtesy Arecibo Observatory/David Parker/Science Photo Library
[Tutu i te kapi 15]
Te tuatua maira Iehova kia tatou na roto i te Pipiria e “te tavini akono meitaki e te pakari”