E Mou Ngaueue Kore i te Apiianga Tau i te Atua

“E irinaki kia Iehova ma to ngakau katoa ra; auraka ra; e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”​—MASELI 3:​5, 6.

1. Akapeea tatou i te aro atuanga ki te au kite tangata nei tei kore i aiteia i mua ana?

I TEIANEI, e vaitata i te 9,000 nutipepa te tuaia ra i te ao katoa i te au ra takitai. I te au mataiti ravarai ko etai 200,000 puka ou te neneiia ra i Marike anake ua. Kia tau ki tetai manako tare anga, e tae mai kia Mati 1998, e vaitata i te 275 mirioni au kapi Web i runga i te Internet. Te tuatuaia ra teianei numero te tupu ra e 20 mirioni au kapi i te marama. Kare i tupu i mua ana, kua rauka i te au tangata te akakite anga e vaitata no tetai ua atu tumu. Noatu rai te vai nei teia turanga e tona au tuanga papu, kua akatupu taua akakite anga tini maata ra i etai au manamanata.

2. Eaa te au manamanata ka rauka kia tupu mai no te rauka anga te akakite anga maata roa?

² Kua riro tetai papaki tangata ei aronga anoano maata i te akakiteanga, te angai tamou marie ra i tetai inangaro noinoi kia kite i te au mea ou inara te manako kore ra i te au apinga maata atu te puapinga. Ko etai ke te kimi ra i te akakite anga tuanga ua no te au apinga tuke tuke no te kite e i reira ka manako ia ratou uaorai ei au karape. Me akatumuia ki runga i tetai kite kotingaia, penei ka rave ratou i te au iki anga maata te ka akakino ia ratou uaorai me kare ia etai ke ra. E te vai tamou marie ra te kino no te piri atuanga ki te akakite anga pikikaa e te tika kore oki. E putuputu kare e tu tau kia irinakiia kia akataka e ko teianei puke anga maata o te akakite anga e tika e te tau oki.

3. Eaa te au akamatakiteanga no te aruaru anga i te pakari tangata nei te kitea ra i te Pipiria?

³ Kua roa te riroanga te kimikimi anga manako ei tetai ravenga na te tangata. Ko te kino no te kaimoumou maata i te taime i te aruaru anga tau kore me kare i te akakite anga kino kua kiteaia i te tuatau o te Ariki ko Solomona. Kua tuatua aia: “E teianei kia akarongo koe, e taku tamaiti, ia ratou: kia akapapa tini i te buka ra, kare e akaeaanga, e roiroi te kopapa ra kia maata te kimi i te tuatua.” (Koheleta 12:12) I etai anere mataiti i muri iora kua tata te apotetoro ko Paulo kia Timoteo: “E akono meitaki i tei tukuia atu ia koe na, e ariu ke koe i te tuatua rikiriki mako kore kare e puapinga ra, e te tuatua taumāroia ra i tapikipikiia e e kite: Ko tei tāpuia e tetai pae ra, e tatipake rava akenei i te akarongo.” (1 Timoteo 6:​20, 21) Ae, ka tau te au Kerititiano i teia tuatau kia kopae ke i te pirianga tau kore ki etai manako kino ra.

4. Eaa tetai mataara e raukai ia tatou te akakite i to tatou irinaki ia Iehova e tana au apiianga ra?

⁴ Ka meitaki katoa oki te au tangata o Iehova kia akarongo i te au tuatua ia Maseli 3:​5, 6: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” Ko te irinaki anga ia Iehova te kapiti ra i te kopaeanga i tetai ua atu manako te patoi ra i te Tuatua a te Atua, me te tupu maira no to tatou uaorai manakoanga me kare mei ko mai i to tatou au oa ra. Kia paruru i to tatou pae vaerua, e mea puapinga maata e kia tereni tatou i to tatou mana kite kia raukai ia tatou te akataka i te au akakite anga kino e kia kopae ke i te reira. (Ebera 5:14) E uriuri manako tatou i etai tumu no taua akakite anga ra.

 Tetai Ao Tutaraia e Satani Ra

5. Eaa tetai tumu no te au manako akakino anga, e koai te turu ra i te reira?

⁵ Ko teianei ao tetai tumu akatupu maata i te au manako kikino. (1 Korinetia 3:19) Kua pure a Iesu Karaiti ki te Atua no tana au pipi: “Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou auraka ei kino.” (Ioane 17:15) Kua pure a Iesu e kia paruruia mai tana au pipi i te “kino” ra te akakite ra e e mana to Satani i teianei ao. Kare to tatou riroanga ei Kerititiano e paruru ua mai ia tatou i te au mana kikino o teianei ao. Kua tata a Ioane: “Kua kite oki tatou e no te Atua tatou, e te vai ua nei rai to te ao ravarai i raro ake i taua vaerua kino ra.” (1 Ioane 5:19) E maata oki i te tuanga openga o te tuatau openga nei, ka tika kia manakoia e ka akaki a Satani e tana au temoni i te ao nei ma te akakiteanga kino.

6. Akapeea ta te ao tamataora anga akariro i te taeke anga no te tu akono ra?

⁶ Ka tika katoa oki kia manakoia e ko etai o teianei akakite anga kino penei ka mama mai mei te mea rai e kare e kino. (2 Korinetia 11:14) Ei akatauanga e akamanako, i te ao o te tamataora anga, ma tana au akaari anga tivi, au teata, akatangi imene, e te kapi neneiia ra. E manganui te akatika ra e te maata atura te au tu no te tamataora anga te akakeu ra i te au ravenga taekeanga, mei te ainga tau kore ra, te ta ua, e te apinga akakona oki. I te akara anga mua i tetai tamataora anga tei tomo atura ki tetai tu akaaka ou, penei ka poitirere te aronga akara. Inara na te akara anga putuputu ka akariro ke i te manako o tetai. Auraka tatou e manako ei mea tau kia arikiia me kare e tamataora kino kore ua tei akakeu maira i te au manako kino ra.​—Salamo 119:37.

7. Eaa te tu pakari no te tangata te ka akakore atu i to tatou irinaki anga i te Pipiria ra?

⁷ E akamanako ana i tetai atu tumu no te akakite anga akakino ra​—te akapukeia maira te au manako neneiia e etai aronga taineti e te aronga apiipiiia tei akaao ra i te tika o te Pipiria. (Akaaite ia Iakobo 3:15.) Te mama putuputu maira taua tumu ra i roto i te au makatini e te au puka maata te totoa anga, e ka rauka i te reira te akakino i te irinaki anga i te Pipiria ra. Te mareka ra tetai papaki tangata i te akaparuparuanga i te mana o te Tuatua a te Atua ma te au manako anga ekoko openga kore. E tu aiteite te kino tei vai mai i te tuatau o te au apotetoro ra, tei taka meitaki ra i te au tuatua a te apotetoro ko Paulo: “E matakite ko te ou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei, tei tau i te apiianga mua o teianei ao, kare i ta te Mesia.”​—Kolosa 2:8.

Au Enemi o te Tuatua Mou

8, 9. Akapeea ta te akonoanga apoteiti akakiteanga iaia uaorai i teia tuatau nei?

⁸ Ka rauka i te aronga apoteiti te oronga mai i tetai atu akakoko anga ki to tatou pae vaerua. Kua totou mai a Paulo e ka tu mai te akonoanga apoteiti i roto i te aronga karanga ra e Kerititiano ratou. (Angaanga 20:​29, 30; 2 Tesalonia 2:3) I te akatupuanga i tana au tuatua, i muri ake i te matenga te au apotetoro ra, ka taki atu tetai akonoanga apoteiti maata ki te tupu anga o Kerititome. I teia tuatau, kare e akonoanga apoteiti maata i roto i te au tangata o te Atua. Inara, e tokoiti te aronga kua akaruke i to tatou au pupu, e ko etai i roto ia ratou te tamanako ra kia akakino atu i te Au Kite o Iehova na te akatotoaanga pikikaa e te akakite anga tarevake. E tokoiti te angaanga kapiti ra ma etai atu au pupu i te akaaere arai anga  i te akamori ma. I te raveanga i te reira, te kapiti ra ratou ma te apoteiti mua tikai, koia Satani.

⁹ Ko etai apoteiti te taangaanga maata atura i etai tu tuke no te komunikeiti anga maata, kapiti katoa i te Internet, kia akatotoa i te akakite anga pikikaa no te Au Kite o Iehova. Ei tupu anga, me rave etai aronga ngakau tae i te kimikimi anga no runga i to tatou au irinaki anga, penei ka kite ratou i etai pikikaa apoteiti. Noatu rai ko etai Au Kite kua piri akakoro kore atu ratou ki teianei tu kino. Kapiti katoa, i etai atianga kua rave tuanga te au apoteiti i te porokaramu mei te tivi kare ratio. Eaa ra te rave anga pakari kia aru i te manako anga i teia?

10. Eaa te raveanga pakari ki te pikikaa apoteiti ra?

¹⁰ Kua akakite te apotetoro ko Ioane i te au Kerititiano e auraka e ariki i te au apoteiti ki roto i to ratou au ngutuare. Kua tata aia: “Kia aere ua mai tetai tangata ia kotou na, e kare teia i tana tuatua i apai mai, auraka e akatomo mai iaia ki roto i to kotou au are, auraka e karanga atu iaia e, Kia ora na i te aerenga: Ko tei karanga atu oki iaia e, Kia ora na i te aerenga, kua kapiti atu ïa iaia i tana au tuatua kikino.” (2 Ioane 10, 11) Na te kopaeanga i te au pirianga ravarai ma teianei aronga enemi ka paruru ia tatou i to ratou manakoanga viivii ra. Te akaaro atuanga ia tatou ki te au apiianga apoteiti na roto i etai ravenga komunikeiti anga ou te aite ra te kino mei te arikianga i te apoteiti uaorai ki roto i to tatou au are. Auraka tatou e akatika i te kimikimi anga kia akavare ia tatou ki roto i taua aerenga tumatetenga ra!​—Maseli 22:3.

I Roto i te Putuputuanga

11, 12. (a) Eaa tetai tumu no te au manako kino i te putuputuanga i te anere mataiti mua ra? (e) I akapeea tetai papaki Kerititiano i ngaueue ei i te mouanga i te au apiianga tau i te Atua ra?

¹¹ E akamanako ana i tetai atu tumu no te au manako kino penei ka tupu. Noatu rai e kare e akakoro ana kia apii i te au pikikaa, ka rauka i tetai Kerititiano akatapuia kia akatupu i te tuatuaanga manako kore ua. (Maseli 12:18) No to tatou tu apa ua, pouroa tatou ka apa ua ma to tatou arero i etai tuatau. (Maseli 10:19; Iakobo 3:8) I te akara anga, i te tuatau o te apotetoro ko Paulo ra, i reira etai i roto i te putuputuanga tei kore ra i akatere meitaki i to ratou arero e kua o atu ki te taumaroanga no te au tuatua. (1 Timoteo 2:8) Ko etai atu tei manako maata rava ra i ta ratou uaorai i manako e kua aere mamao atu ki te akaaoanga i te mana taoonga o Paulo. (2 Korinetia 10:​10-12) No taua tu vaerua ra kua tupu te au maroanga tau kore ua.

¹² I etai tuatau kua tupu atu teianei au taumaroanga ei “māro anga tika kore,” i te akakinoanga i te tu au o te putuputuanga ra. (1 Timoteo 6:5; Galatia 5:15) No te aronga tei akatupu ra i teianei au taumaro anga, kua tata a Paulo: “E e tuatua ke ta tetai tangata e apii ra, kare i tau i te tuatua ora a to tatou Atu a Iesu Mesia, i te tuatua e tau i te akono i te Atua ra; E nengonengo ïa, e te kite kore, kua auouo ua i te ui e te māro anga tuatua, e tupu ei te vareae, te tamaki, te tuatua akakino, te manako kino.”​—1 Timoteo 6:​3, 4.

13. Eaa te tu akono o te maataanga o te au Kerititiano i te anere mataiti mua ra?

 ¹³ E mea mataora ra, i te tuatau apotetoro ra ko te maataanga o te au Kerititiano e tiratiratu e kua tamou marie i te angaanga akakiteanga i te tuatua meitaki o te Patireia o te Atua. Kua rave maata ratou i te akonoanga meitaki “i te matiroeroe e te au vaine takaua i to ratou mate anga” e kua tiaki ia ratou uaorai “auraka ei viivii i teianei ao,” kare i kaimoumou i to ratou taime ki runga i te au taumaro anga auouo no te au tuatua. (Iakobo 1:27) Kua kopae ke ratou i “te kapiti anga kikino ra” noatu i roto i te putuputuanga Kerititiano e paruru i to ratou tu i te pae vaerua.​—1 Korinetia 15:33; 2 Timoteo 2:​20, 21.

14. Me ka kore tatou e matakite, ka akapeea te tauianga te au manako matauia ra kia riro ei au taumaro anga akakino anga?

¹⁴ Mei te reira katoa, ko te au turanga akatakaia i te parakaoa 11 ra kare i te mea matauia no te au putuputuanga o te Au Kite o Iehova i teia tuatau nei. Tera ra, ka meitaki tatou kia akatika e ka rauka tetai tauianga no taua au taumaro anga auouo ra. Inara, e mea tau ua kia uriuri manako i te au tataanga Pipiria me kare kia akamanako no te au tu o te ao ou taputouia kare ra i akakiteia ake. E kare katoa oki e tarevake ma te taui anga au manako no te au tumu tangata ua nei, mei te kakau ra e te akamaneaanga me kare te ikianga tamataora anga. Inara, me ka ketaketa tatou no ta tatou au manako e ka riri ei me ka kore etai atu e akatika kia tatou, penei ka riro te putuputuanga kia tatakake no te au tumu rikiriki ua. Te mea tuatua rikiriki kino kore tei akamataia ra penei ka riro ei mea akakino tikai.

Paruruanga i to Tatou Irinaki Anga

15. Eaa te maata o te kino te ka rauka me tupu kia tatou i te “au apiianga a te au demoni,” e eaa te akoanga te orongaia maira i te au Tuatua Tapu?

¹⁵ Te akamatakite maira te apotetoro ko Paulo: “Te tuatua pu ua maira te vaerua, e kia tae ki te au tuatau a muri atu e akaruke ei tetai papaki i tei akarongoia nei, i te akono anga atu i te au vaerua pikikaa, e te tuatua o te au demoni ra.” (1 Timoteo 4:1) Ae, te akanoo maira te au manako kino i tetai akakoko anga tikai. No reira ra, kua pati akatenga atura Paulo ki tona oa akaperepere kia Timoteo: “E Timoteo e, e akono meitaki i tei tukuia atu ia koe na, e ariu ke koe i te tuatua rikiriki mako kore kare e puapinga ra, e te tuatua taumāroia ra i tapikipikiia e e kite: Ko tei tāpuia e tetai pae ra, e tatipake rava akenei i te akarongo.”​—1 Timoteo 6:​20, 21.

16, 17. Eaa ta te Atua i oronga mai kia tatou, e akapeea tatou me paruru i te reira?

¹⁶ Akapeea tatou e puapingaiai mei teianei akamatakiteanga aroa? Kua orongaia kia Timoteo tetai irinaki anga​—e apinga puapinga maata kia akonoia e kia paruruia. Eaa ia? Kua akataka maira Paulo: “E tāpu meitaki i te akonoanga tuatua tikai taau i kite iaku nei ra, ma te akarongo e te anoano i te Mesia ra ia Iesu. Taua tuatua meitaki i tukuia atu ia koe ra, e mou meitaki ïa i te Vaerua Tapu e noo ki roto ia tatou nei ra.” (2 Timoteo 1:​13, 14) Ae, te kapiti ra to Timoteo irinaki anga i te “tuatua tikai,” “te tuatua e tau i te akono i te Atua ra.” (1 Timoteo 6:3) Kia rotai ma teianei au tuatua, te tamanako ra te au Kerititiano i teianei tuatau kia paruru i to ratou akarongo e te kopapa o te tuatua mou tei oronga irinakiia ra kia ratou.

¹⁷ Te paruruanga i taua irinaki anga te kapiti ra i te tatanuanga i te au apinga mei te au ravenga apii meitaki i te Pipiria ra e te tamou marie i te pure, ma te raveanga “takinga-meitaki tatou i te tangata ravarai, kia maata atura ki to te ngutuare o te akarongo ra.” (Galatia 6:10; Roma 12:​11-17) Kua akamaroiroi katoa atu a Paulo: “E aruaru atu i te tuatua-tika, i te akono i te Atua, i te akarongo, i te anoano, i te akakoromaki, e te maru. Kukumi ua ïa i te kukumianga meitaki ra i te akarongo; e opu atu i te ora mutu kore, i kapikiiaʼi koe, e kua aaki oki i te aakianga tuatua meitaki ki mua i te aroaro o te au kite e manganui ra.” (1 Timoteo 6:​11, 12) Ta Paulo taiku anga i te takiota tuatua mei te “kukumi ua ïa i te kukumianga meitaki ra” e “e opu atu” te akataka meitaki ra e ka tika tatou kia rave marie e kia tamanako tikai kia arai atu i te au mana akakino pae vaerua ra.

Te Umuumu no te Kite Oonu Anga

18. Akapeea e raukai ia tatou te akakite i te tu tau Kerititiano i to tatou aravei anga i te akakite anga a te tangata?

¹⁸ Inara i te kukumianga i te kukumi meitaki no te akarongo, te umuumuia ra te kite oonu.  (Maseli 2:11; Philipi 1:9) Ei akatauanga, e tau kore kia irinaki kore i te au akakite anga ravarai a te tangata nei. (Philipi 4:5; Iakobo 3:17) Kare te au manako katoatoa a te au tangata nei e patoi ana i te Tuatua a te Atua ra. Kua tuatua a Iesu i tei umuumuia no te aronga maki kia aravei atu i tetai taote tau ra​—tetai tei kite karape ra. (Luka 5:31) Noatu rai te tu kamakura o te akono rapakau anga i to Iesu tuatau ra, kua kite aia e e puapinga tetai te rauka ra mei ko mai i te tauturu a te taote ra. Te akakite ra te au Kerititiano i teia tuatau i te tu tau i te tumu no te akakite anga a te tangata, mari ra te arai ra ratou i te akapiriangaia ki tetai ua atu penei ka akakino ia ratou i te pae vaerua.

19, 20. (a) Akapeea te rave a te aronga pakari ma te kite oonu i te tauturuanga i te aronga tuatua pakari kore ra? (e) Akapeea te akono a te putuputuanga ma te aronga akakeu i te au apiianga pikikaa?

¹⁹ Te puapinga maata katoa ra te kite oonu i te tuanga a te aronga pakari me patiia atu kia tauturu i te aronga tei tuatua pakari kore ra. (2 Timoteo 2:7) I etai taime, penei ka o atu te au mema o te putuputuanga ra ki roto i etai maroanga apinga rikiriki ua e te au taumaro anga tau kore ua. Kia paruru i te taokotai anga o te putuputuanga, ka tau te aronga pakari kia viviki i te akatikatika i aua manamanata ra. I taua taime rai, ka kopae ke ratou i te akaapaanga i to ratou au taeake no te au ravenga tarevake e kare e viviki roa i te manako ia ratou ei au apoteiti.

²⁰ Kua akataka maira Paulo i te vaerua oronga mai i te tauturu anga. Kua tuatua aia: “E te au taeake ra, kia rokoia tetai e te apa ra, ka akaora kotou ko tei akono i ta te Vaerua ra i te reira, ma te ngakau maru.” (Galatia 6:1) I te tuatuaanga tikai no te au Kerititiano tei pekapeka ra i te au ekoko anga, kua tata a Iuda: “Ka aroa atu i tetai pae, ei akonoanga ke ïa, e ka akaora oki i tetai pae ma te mataku, i te aō anga ia ratou no roto i te ai.” (Iuda 22, 23) Inara, me i muri ake i te akoanga putuputu ka rave ua atu tetai i te au apiianga pikikaa, ka tau te aronga pakari kia rave i tetai iki anga kia paruru atu i te putuputuanga ra.​—1 Timoteo 1:20; Tito 3:​10, 11.

Akakianga i to Tatou Manako ma te Au Apinga Akapaapaa Tau

21, 22. Eaa ta tatou ka tau kia iki marie, e eaa ta tatou ka tau kia akaki i to tatou manako?

²¹ Te akaruke ra te putuputuanga Kerititiano i te au tuatua te totoa ra “mei te maki kakai ra.” (2 Timoteo 2:​16, 17; Tito 3:9) Ko te tika teia me te akaata maira taua au tuatua ra i te “pakari” tarevake ra, te au pikikaa a te au apoteiti, me kare te tuatua tau kore i roto i te putuputuanga. Ka rauka te puapinga i te anoano meitaki kia kite i te au mea ou ra, ko te kimikimi anga manako tavaa koreia ka rauka kia taki atu ia tatou ki te au manako akakino. Kare oki tatou i te kite kore i ta Satani au ravenga. (2 Korinetia 2:11) Te kite nei tatou e te tauta pakari nei aia kia akaariu ke ia tatou kia tavarevare i ta tatou tavini anga i te Atua ra.

²² Ei au orometua meitaki, e mou ngaueue kore tatou i te apiianga tau i te Atua. (1 Timoteo 4:6) E akono pakari tatou i to tatou tuatau na te iki anga i te akakiteanga ta tatou ka tauru ki te manako. Ei reira ka kore tatou e ngaueue ngoie ua i te au pikikaa akauruia e Satani. Ae, e akamanako tamou marie tatou i “te au mea mou ra, te au mea tau meitaki ra, te au mea tika ra, te au mea viivii kore ra, te au mea rekarekaia ra, te au mea rongo meitaki ra, te vai ra tetai meitaki, te vai ra tetai mea paapaaia ra.” Me ka akaki tatou i to tatou manako e te ngakau ma taua au apinga ra, ka vai maira te Atua o te au ma tatou katoa oki.​—Philipi 4:​8, 9.

Eaa ta Tatou i Kite?

• Akapeea e raukai i te pakari o teianei ao kia akatupu i te akakoko anga ki to tatou pae vaerua?

• Eaa ta tatou ka rauka kia rave ei paruru ia tatou uaorai mei te akakite anga kino a te apoteiti ra?

• Eaa te tu tuatua anga te tau ra kia kopaeia i roto i te putuputuanga?

• Akapeea te akakite anga i te tu Kerititiano tau i te akonoanga i te akakite anga maata roa i teia tuatau nei?

[Au Uianga Apii]

[Tutu i te kapi 9]

E manganui te au makatini e te au puka rekaia te patoi ra i ta tatou au apinga Kerititiano

[Tutu i te kapi 10]

Ka rauka ua i te Kerititiano kia taui i te manako ma te kore e riro kia akaketaketa