Maata Atu a Iehova i to Tatou Au Ngakau

“E TAU rā Iehova ki te aronga e mataku iaia ra,” i tata ei te tata taramo. E tikai, te rekareka ra Tei Anga i te akara mai i tona au tavini tangata tataki tai ia ratou e tauta ra no te akono i tana au turanga tuatua tika. Te akameitaki ra te Atua i tona aronga tiratiratu, te akamaroiroi ra ia ratou, e te akapumaana ra ia ratou i te tuatau taitaia. Kua kite aia e e aronga apa ua tona aronga akamori, no reira te manako tika tikai ra aia i tana e tapapa maira mei ia ratou.​—Salamo 147:11.

Penei kare e ngata ana ia tatou i te irinaki e e maata to Iehova inangaro no tona au tavini. Inara, i te akaraanga kua manako maata etai no runga i to ratou uaorai au tu apa ua e kua irinaki papu ratou e kare rava a Iehova e inangaro mai ia ratou. “E tu apa rava toku ka inangaro mai ei a Iehova iaku,” penei ka taopenga ratou. E tika, e manako papu kore ana tatou katoatoa i tetai au taime. Inara i te akaraanga te tamaki tamou putuputu ra etai i te au manako puapinga kore.

Te Au Manako Akaaka te Tu

I te au tuatau Pipiria e maata te au tangata tiratiratu tei mamae mei te au manako tu akaaka. Kua makitakita tikai a Iobu i te oraanga kua manako e kua akaruke te Atua iaia. I tetai taime kua taitaia oonu tikai a Hana, tei riro mai ei metua  vaine no Samuela, no runga i tona tu kare e rauka i te anau tamariki e kua aue maata ra. Kua ‘mingi rava ki raro’ a Davida, e kua taitaia maata tikai a Epaperodito no te mea kua akataitaiaia tona au taeake e te nuti e kua maki aia.​—Salamo 38:6; 1 Samuela 1:​7, 10; Iobu 29:​2, 4, 5; Philipi 2:​25, 26.

Akapeea te au Kerititiano i teia tuatau? Penei te arai ra te maki, te ruaine anga, me kare tetai atu au turanga i etai mei te rave maata atu mei ta ratou e inangaro ra i roto i te angaanga tapu. Penei ka taki atu teia ia ratou kia taopenga e te apa ua ra ratou ia Iehova e to ratou au taeake irinaki. Me kare ka akaapa putuputu etai ia ratou uaorai no te au tarevake i topa, te ekokoanga me kua akakore a Iehova ia ratou. Penei kua irinaki etai no roto mai i te pamiri ngata te oraanga e kare ratou e inangaroia mai. Akapeea teia i te tupu anga?

Kua maata mai etai i roto i tetai pamiri e ko te tu maata kare ko te inangaro mari ra ko te manako iaia uaorai, te tuatua kakati, e te mataku. Penei kare rava ratou e kite i tetai metua tane te inangaro oonu maira ia ratou, te kimi ra i tetai tuatau no te akapaapaa e te akamaroiroi, tei akangaropoina i te au angaanga rave kino e te papa ra no te akakore ua i te au tarevake maata atu, e te tu maana te akariro ra i te katoa anga o te pamiri e kia manako tinamou. I te mea kare i rauka ana ia ratou i tetai metua tane inangaro ra, penei ka ngata ia ratou i te marama e eaa te aite anga e kia rauka tetai Metua aroa ua i te rangi ra.

Ei akaraanga, kua tata a Fritz: “Kua akakeu maata ia toku tamariki anga mai e te mapu anga e te tu inangaro kore o toku papa. * Kare rava aia e akameitaki ua mai ana, e kare rava au i piri vaitata ana kiaia. Te tika, i te maata anga o te taime, e mataku ua ana au iaia.” Tei tupu mai, ko Fritz, teianei tei roto i tona 50 mataiti, te manako tau kore nei rai. E kua akamarama a Margarette: “E nga tangata oaoa kore e te aroa kore toku nga metua. I te akamata anga au i te apii i te Pipiria, kua ngata iaku i te akamanako e mei teaa rai te tu o tetai metua aroa.”

Ka riro taua manako anga, noatu e eaa te tumu, te aite anga e ko ta tatou angaanga ki te Atua i tetai taime kua akakeuia, kare ua e te aroa, mari ra i tetai tuanga maata e te tu apa me kare tu mataku. I te akaraanga kare e rava ana tei meitaki ia tatou. Te anoano kia akamareka ia Iehova e to tatou au taeake irinaki penei ka akariro ia tatou kia manako e kare e rauka ia tatou i te rave i ta tatou i inangaro i te rave. Tei tupu mai, penei kare e rauka ia tatou ta tatou au akakoroanga, ka akaapa ia tatou uaorai, e ka manako taitaia.

Eaa te ka rauka i te raveia? Penei ka anoano ia tatou kia akamaaraara ia tatou uaorai e e tu tangi aroa to Iehova. Ko tetai tei marama i teia tu aroa o te Atua koia oki ko te apotetoro ko Ioane.

“E Maata te Atua i to Tatou Ngakau”

I te openga o te anere mataiti mua T.N., kua tata a Ioane ki tona au taeake irinaki: “Ko te mea teia e kite ei tatou e, no te tuatua-mou tatou, e e kore ei to tatou ngakau e mataku i mua iaia. Kia akaapa mai oki to tatou ngakau ia tatou, e maata te Atua i to tatou ngakau, e kua kite aia i te au mea katoa nei.” Eaa ra a Ioane i tata ei i teia au tuatua?​—1 Ioane 3:​19, 20.

Kua kite meitaki oki a Ioane e ka rauka i tetai tavini o Iehova i te manako akaapa ua i te ngakau. Penei kua kite ana a Ioane i teia manako ngakau. Ei mapu tane ma te tu veravera, kua akoia a Ioane i tetai atianga e Iesu Karaiti no te manako pakari i te akonoanga i tetai atu. Te tika, kua tapa a Iesu ia Ioane raua ko tona teina ko Iakobo ko “Boanere, koia oki, te tamariki a te mangungu.”​—Mareko 3:17; Luka 9:​49-56.

I te 60 mataiti i aru mai, kua maru mai a Ioane e kua riro mai ei Kerititiano tau, aroa ua, e te akono tu aroa. I te tae anga ki te taime i tata ei aia, te apotetoro openga tei ora mai, i tana reta akauru muaia, kua kite aia e kare a Iehova e manako ana i tona au tavini no te tu tarevake i te au taime ravarai. Mari ra, e Metua pumaana aia, tangi aroa, oronga ua, e te akono aroa, e e aroa oonu tona no te katoatoa te inangaro ra iaia e te akamori ra iaia ma te tuatua mou. Kua tata a Ioane: “Ko te Atua oki te aroa.”​—1 Ioane 4:8.

Te Rekareka ra a Iehova no Runga i ta Tatou Angaanga Kiaia

Kua kite te Atua i to tatou au tu paruparu i roto roa e te au tu apa ua, e te manako ra aia i teia. “Kua kite oki aia i to tatou tu; te manako ra aia e, e one tatou nei,” i tata ei a Davida. Kua kite a Iehova i te pakari o to tatou tu i te akariro anga ia tatou e ko tatou tikai. Te tika, kua kite meitaki aia ia tatou e i ta tatou i kite ra.​—Salamo 103:14.

 Kua kite aia e manganui ia tatou te manako tuke ra, inara kare e rauka ia tatou i te autu i to tatou au tu apa ua. Penei ka rauka to tatou turanga kia akaaiteia ki to te apotetoro ko Paulo, tei tata: “Ko te meitaki oki taku e anoano ra, kare ïa au e rave; kareka te kino anoano koreia e au ra, ko taku ïa e rave nei.” Pouroa tatou tei roto i taua putoto anga. I tetai au atianga penei ka akatupu mai teia i te ngakau akaapa ua ia tatou uaorai.​—Roma 7:19.

E akamaara ua i teia: Te mea maata atu e i ta tatou akara anga ia tatou uaorai e akapeea a Iehova me akara mai ia tatou. Me kite mai aia ia tatou e tauta ra i te akamareka iaia, kare aia e akara ua mai ma te tu merengo ra inara ma te rekareka ra. (Maseli 27:11) Noatu e ko te ka rauka mai ia tatou i te akaraanga e mea meangiti uaia i to tatou nga mata, te akamareka ra to tatou tu puareinga e te akakoroanga meitaki iaia. Te akara mamao ra aia i te ka rauka ia tatou; te kite ra aia e eaa ta tatou e inangaro ra i te rave; te kite ra aia i ta tatou e umuumu ra e te anoano ra. Ka rauka ia Iehova i te akara i to tatou ngakau.​—Ieremia 12:3; 17:10.

Ei akaraanga, e manganui te Au Kite o Iehova e au tangata matakutaku e te takake ua e au tangata te inangaro ra i te akono i te oraanga muteki ua. No taua aronga, ka riro te tutuanga i te tuatua meitaki mei tera are ki tera are ei akaaoanga mataku anga. Inara, kua akakeuia e te inangaro kia tavini i te Atua e kia tauturu i to ratou au tangata tupu, kua apii te aronga matakutaku i te aravei i to ratou au tangata tupu e kia tuatua no runga i te Pipiria. Penei ka manako ratou e meangiti ua tei rauka ia ratou i te rave, e penei ka keia teia i to ratou tu rekareka. Penei ka taiku to ratou ngakau e e puapinga kore ta ratou angaanga orometua i te ngai tangata. Inara te rekareka ra a Iehova no runga i te angaanga maata ta taua aronga ra e tuku ra i roto i ta ratou angaanga. Pera katoa, kare e papu ia ratou e aea e iea te au ua o te tuatua mou e nionio mai ei, e tupu mai ei, e e ua mai ei.​—Koheleta 11:6; Mareko 12:​41-44; 2 Korinetia 8:12.

Te mamae ra tetai atu Au Kite i te maki tamou me kare te ruaine ua atura. No ratou, ka riro te aere putuputu anga ki te au uipaanga i te Are Uipaanga Patireia ei aka angaanga ma te mamae e te taitaia. I te akarongoanga i tetai ako anga no runga i te angaanga tutuanga penei ka akamaaraara ia ratou i ta ratou i rauka i te rave i mua ana e ta ratou e inangaro nei rai i te rave, inara te tapupu ra te maki ia ratou. Penei kua rauka i taua aronga te mamae anga apa ua no te mea kare e rauka ia ratou i te aru i te ako anga mei ta ratou e inangaro ra i te rave. Inara, te akaperepere ra a Iehova i to ratou tu tiratiratu e te akakoromaki anga. Koi vai tiratiratu uai ratou, kare aia e akangaropoina i to ratou tu tiratiratu.​—Salamo 18:25; 37:28.

“E Kore ei to Tatou Ngakau e Mataku”

I te tae anga a Ioane ki te mataiti ruaine anga, kua marama maata aia no runga i te tu tangi aroa o te Atua. E akamaara ana kua tata aia: “E maata te Atua i to tatou ngakau, e kua kite aia i te au mea katoa nei.” Pera katoa, kua akamaroiroi a Ioane ia tatou “e kore ei to tatou ngakau e mataku.” Eaa te aite anga o ta Ioane akakite anga i taua au tuatua?

Kia tau ki te Vine’s Expository Dictionary of Old and New Testament Words, te uri ra te verepa Ereni “akapapu” te aite anga “kia taangaanga i te akakeu anga, kia autu atu me kare kia rauka, kia akakeu.” I tetai tua, kia akapapu i to tatou ngakau, ka anoano ia tatou kia rauka i to tatou ngakau, kia akakeu i te reira kia irinaki e te inangaro maira a Iehova ia tatou. Akapeea?

Ko Fritz, tei taikuia i mua ake i teia atikara, kua tavini ana ei tangata pakari i roto i tetai o te au putuputuanga o te Au Kite o Iehova no etai atu 25 mataiti e kua kitea e ka rauka i te apii uaorai i te akapapu i tona ngakau i to Iehova inangaro. “E apii putuputu ana au ma te meitaki i te Pipiria e ta tatou au puka. Te tauturu maira teia iaku auraka kia irinaki ki runga i tei tupu i topa mari ra kia akono i tetai akaraanga taka meitaki o to tatou tuatau meitaki ki mua. I tetai taime, ka akataitaia mai toku tuatau i topa iaku, e kua manako  au e kare te Atua e inangaro mai iaku. Inara, kua kitea e au e te akamaroiroi ra te apii putuputu i toku ngakau, te akamaata ra i toku akarongo, e te tauturu maira iaku kia rekareka e kia manako tau.”

E tika, penei kare te tatauanga Pipiria e te akamanako anga e taui i to tatou turanga tikai. Inara, ka rauka i te reira i te taui i te tu me akamanako tatou i to tatou turanga. Te akono anga i te au manako mei te Tuatua a te Atua ki to tatou au ngakau te tauturu ra ia tatou kia akamanako mei iaia ra. Pera katoa, te akariro ra te apii anga ia tatou kia maata atu te marama anga i te tu tangi aroa maata o te Atua. Ka ariki marie tatou e kare a Iehova e akaapa ia tatou mei to tatou tamariki anga mai, e kare aia e akaapa mai ia tatou no to tatou au tu maki. Kua kite aia i te au apainga teiaa ta tatou e apai ra​—i te pae ngakau me kare kopapa​—e putuputu te taime kare na tatou uaorai i akatupu, e te manako aroa maira aia i teia.

Akapeea a Margarette, tei taikuia i runga akenei? I te kite anga aia ia Iehova, kua riro te apiianga i te Pipiria ei mea puapinga maata katoa kiaia. Koia, mei ia Fritz rai, kua akamanako akaou no runga i te tu o tona papa. Kua tauturu te pure ia Margarette kia taokotai i tana e kite ra na roto i te apii. “I te akamata anga kua manako au ia Iehova ei oa piri vaitata, i te mea e e maata atu toku kite ma te au oa inangaro ra i ta tetai metua tane aroa ra. Ma te marie, kua apii au i te riringi i toku manako ngakau, au ekoko anga, te au taitaia, e te au manamanata ki runga ia Iehova. Kua tuatua putuputu au kiaia na roto i te pure, i taua taime rai te tuku anga i te au mea ou taku e apii ra no runga iaia, mei tetai tutu rai. I muri mai no etai taime, kua tupu toku au manako ngakau no Iehova e teianei kare au e manamanata ana i te taiku iaia e ko toku Metua aroa,” i na Margarette ei.

Akarangatiraia mei te Taitaia Katoatoa

I teia akatereanga takere kino e vai nei, kare e rauka i tetai kia akarangatiraia mei te au taitaia katoatoa. No etai au Kerititiano te aite anga i teia ko te au manako taitaia me kare ekoko uaorai penei ka tupu akaou mai e ka akatupu akaou i te manamanata. Inara ka papu ia tatou e kua kite a Iehova i to tatou akakoroanga meitaki e te angaanga pakari ta tatou e tuku ra i roto i tana angaanga. Kare rava aia e ngaropoina i te aroa ta tatou e akaari ra no tona ingoa.​—Ebera 6:10.

I roto i te enua ou te vaitata maira i raro ake i te Patireia o te Mesia, ka rauka i te au tangata tiratiratu katoatoa i te tapapa e kia akarangatiraia mei te au apainga o te akatereanga a Satani. Mei teaa te akapumaana i te reira! I reira ka kite maata atu tatou i te kite anga e mei teaa te maata i to Iehova tu tangi aroa. Kia tae rava ki taua taime, ka akapapu tatou katoatoa e e “maata atu te Atua i to tatou ngakau, e kua kite aia i te au mea katoa nei.”​—1 Ioane 3:20.

[Tataanga Rikiriki i Raro]

[Tataanga i te kapi 30]

Kare a Iehova i tetai peretana kino mari ra e peretana maana, tangi aroa, e e Metua akono aroa

[Tutu i te kapi 31]

Te tauturu ra te apiianga i te Tuatua a te Atua ia tatou kia manako mei iaia rai