Te Au Evangeria​—Te Taumaroia Nei Rai

E tika ainei te au tataanga Evangeria no runga i te anau anga o Iesu Karaiti?

Kua oronga ainei aia i te Tuatua i te Maunga ra?

Kua akatuia ainei a Iesu?

Kua tuatua ainei aia:“Ko au te mataara, e te tuatua-mou e te ora”?​—Ioane 14:6.

KUA uriuriia teia au tumu manako e etai 80 aronga kite i te Jesus Seminar, tei raveia e rua taime i te mataiti mei te 1985 mai. Kua pau teia au pupu tangata kite i teia au ui anga na roto i tetai tu tuke ua ake rai. Kua voti te aronga i piri mai o te uipaanga i te au tuatua tataki tai no runga ia Iesu i roto i te au Evangeria. Te akakite maira tetai pepa iki anga muramura i te manako e kua tuatuaia taua manako e Iesu. Te aite anga o te pepa iki anga tarona e te aiteite ra tei tuatuaia mei ta Iesu  i tuatua ra. Te akaari ra te pepa iki anga reureu e penei te vaitata ra te au manako ki ta Iesu, inara kare e nana i tuatua. E tuke tikai te pepa iki anga kerekere e papu kore ia, te akakite maira e kua akaoia mai taua tuatua mei te peu i topa ra.

Te aru anga i teia ravenga, kua arai te aronga i piri mai o te Jesus Seminar i te au tumu manako e a tei taikuia mai na roto i te ui anga i te akamata anga. Te tika, kua iki ratou i te pepa kerekere no te 82 patene o te au tuatua kia Iesu i roto i te au Evangeria. Kia tau kia ratou, e 16 patene ua o te au tupu anga te akakiteia ra no runga ia Iesu i roto i te au Evangeria e tetai atu au tataanga kua akaraanga tika tikai.

Kare i ou taua akaraanga akakino anga i te au Evangeria. Kua tupu mai te maro anga no runga i te au Evangeria i te 1774 i te nenei angaia tetai 1,400 kapi tata anga a Hermann Reimarus, e poropeta o te au reo Orieni i Hamburg, Tiamani, i muri ake i te mate anga aia. I roto i reira kua akakite a Reimarus i te au manako ekoko anga oonu no runga i te tuatua enua o te au Evangeria. Kua akanooia tana au taopenga anga ki runga i te akara anga meitaki i te reo e te au tuke anga tei kiteia i roto i te au tataanga Evangeria e a o te oraanga o Iesu. Mei reira mai, e putuputu te taime kua manako ekoko te aronga akaapa no runga i te tu tika tikai o te au Evangeria, i tetai tuanga kua akakino i te irinaki anga papu o te au tangata papuriki no runga i teia au tataanga.

Te tu matauia i roto i taua aronga kite kua manako ratou i te au tataanga Evangeria ei tua akonoanga maani ua tei akakiteia mai e te au tangata tukeke. Ko te au ui anga matauia tei uiia e te aronga kite ekoko: Penei kua akakeu ta ratou au irinaki anga i te aronga tata o te au Evangeria e a e kia akameitaki i te tuatua tika tikai? Kua akakeu ainei te au poritiki o te ngai tangata Kerititiano mua ia ratou kia tata me kare kia tauru i roto i te tua o Iesu? Ko teea au tuanga o te Evangeria e akakite anga tika tikai kare i te mea maani ua?

Te irinaki ra te au tangata tei maata mai ei aronga irinaki kore i te Atua me kare ei au taiate tau e ko te Pipiria​—kapiti mai i te au Evangeria​—e puka kua ki i te au peu e te au tuatua maani ua. Noatu rai kua poitirere tikai tetai no runga i to Kerititome tuatua enua akamaringi anga toto, te takinga kino anga, te taokotai kore, e te tu kare i tau i te Atua. Kua kite taua aronga e kare o ratou tumu no te akarongo i te au tataanga tei akatapuia i roto ia Kerititome. Kua manako ratou e ko tetai apinga tei maani i tetai akonoanga pikikaa e au tua akakite anga puapinga kore ia.

Eaa toou manako? Ka tuku ainei koe i etai aronga kite tei uiui no runga i te tuatua enua o te au Evangeria kia akakeu ia koe kia ekoko katoa i roto i toou manako? Me akarongo koe i te au akakite anga no runga i te tua maani uaia e te aronga tata Evangeria, ka tuku ainei koe i teia kia akangaueue i toou irinaki anga i ta ratou au tataanga? Ka akariro ainei te au tata anga kare i tau i te Atua a Kerititome ia koe kia uiui i te tika anga tikai o te au Evangeria? Te pati atu nei matou ia koe kia akara meitaki i etai o te au manako.

[Tutu i te kapi 4]

Te ki ra ainei te au Evangeria i te au tuatua maani ua me kare te au tuatua tika tikai?

[Akameitakianga]

Jesus Walking on the Sea/The Doré Bible Illustrations/Dover Publications

[Akameitakianga no te Tataanga i te kapi 3]

Background, pages 3-5 and 8: Courtesy of the Freer Gallery of Art, Smithsonian Institution, Washington, D.C.