Aruaruia te Pupu 108 o Gileada Kia Rave i te Angaanga Tapu

I ROTO i te Pipiria, kua taiku putuputuia te akamori anga i te Atua e te tuatua “akamori anga tapu.” No ko mai te reira i tetai tuatua Ereni te taiku ra i te rave anga i te angaanga a te Atua. (Roma 9:4, NW) Kua rongo atu te 5,562 tei tae atu ki te porokaramu karatuati anga o te pupu 108 o te Apii Pipiria Punanga Tiaki o Gileada i te au vaa tuatua i te oronga anga i te ako anga tau te ka tauturu i te aronga karatuati kia rave i te angaanga tapu arikiia ki te Atua ko Iehova. *

Kua tavini a Theodore Jaracz, e mema o te Pupu Akaaere o te Au Kite o Iehova, ei tiamana. Kua akamata te porokaramu ma te imene numero 52, “Te Ingoa o to Tatou Metua.” Te akakite ra te papa anga rua o taua imene: “Te kimi ra matou i te au tu e rauka katoa ei ia matou i te akatapu i toou ingoa aiteite kore.” Kua akakite tikai te reira i te anoano ngakau tae o te aronga apiipii o te pupu karatuatianga (mei te 10 au enua) kia taangaanga i ta ratou terenianga ki roto i ta ratou au angaanga mitinari, i roto i te 17 enua tukeke.

I roto i tana au tuatua akamata anga, kua tuatua te Taeake ko Jaracz no runga i te rima marama o te aronga apiipii i te apii pakari anga i te Pipiria tei akapapa ia ratou no te angaanga i roto i te au ngai ke. Kua tauturu teia ia ratou kia “akara matariki marie i te au mea katoa ra,” koia oki, kia akara makitoro i roto i te Tuatua a te Atua no runga i ta ratou i apii ke ana, e kia “meitaki ra e tāpu marie.” (1 Tesalonia 5:21) Kua akamaroiroi aia ia ratou kia vai tiratiratu ua atu kia Iehova, ki tana Tuatua, e ki te au angaanga tei tereniia ratou no te reira ra. Eaa te ka tauturu ia ratou, ia ratou e rave katoatoa ra i teia?

Ako Anga Tau no te Raveanga i te Angaanga Tapu

Kua tuatua a Lon Schilling, e mema o te Kumiti Rave Angaanga i Betela, no runga i te tumu manako “Ka Pati Ainei Koe i te Tarere Anga o te Tu Tau?” Kua tuatua maata aia no runga i te puapinga e kia tau ua, te akaata ra i te pakari tau i te Atua. (Iakobo 3:17) Te o maira ki roto i te tu tau te tuku ua anga, te manako papaki tai kore, te mako tikai, te manako meitaki, e te akakoromaki. “E parani te au tangata tau i te akono anga i tetai e tetai. Kare ratou e ariu ki te au mea pakari ra,” i na te Taeake ko Schilling ei. Eaa te ka tauturu i tetai mitinari kia manako tau ua? Na te akara mako anga i tetai uaorai, te akono meitaki anga i te au tuatau kia akarongo e te apii mei tetai atu, e te puareinga anga i te manako i te au manako o tetai koi kore ei e tuku ua i te au kaveinga tau i te Atua.​—1 Korinetia 9:​19-23.

“Auraka e Ngaropoina i te Kaikai!” ko te upoko umere o te  tuanga i aru mai o te porokaramu, tei orongaia e Samuel Herd, koia tetai atu mema o te Pupu Akaaere. Kua tuatua maata aia i te puapinga no te rauka anga te kaikai anga pae vaerua meitaki e raukai kia vai matutu i te rave i te angaanga tapu. “Ko ta kotou angaanga pae vaerua,” i na te Taeake ko Herd ei, “kare e roaia ka akamaataia ia koe e rave atura i taau angaanga tutuanga e te apiianga. No reira, te vaira te umuumu anga noou kia akamaata i taau kai anga i te kai pae vaerua e raukai i te parani e te akaaiteite i toou au tu maroiroi.” Ka tauturu tetai kai anga tau i te kai pae vaerua i tetai mitinari kia kopae i te tu taitaia e te mii anga i te enua i te pae vaerua. Te tauturu ra i te tu merengo anga e te akakoro anga kia vai ki ta tetai tuku anga angaanga tapu.​—Philipi 4:13.

Kua akamaroiroi tetai tangata ikuiku Gileada, ko Lawrence Bowen, i te aronga karatuati kia “Oki Akaou ki te Akamataanga.” Eaa te aite anga o tana tuatua? Kua pati aia i te katoa anga o te aronga tei tae atu kia uri kia Maseli 1:7, te na ko ra: “Ko te akamataanga o te kite ra, ko te mataku ïa a Iehova.” Kua akamarama te vaa tuatua e: “Ko tetai ua atu au apinga te kopae ra i te tika anga maata o te vai anga o Iehova kare rava e tau e ei kite tika tikai e kare e tupu mai te maramaanga tau.” Kua akaaite te Taeake ko Bowen i te au tuatua akataka o te Tuatua a te Atua, te Pipiria,  ki te au tuanga o te piri. Me tuku kapipitiia te au tuanga, kua akatupuia tetai tutu. Te maata o te au tuanga, te maata ia e te taka meitaki tikai o te tutu e te maata o te tu ariki anga ka akatupu tetai tangata. Ka tauturu teia i te katoatoa kia rave i te angaanga tapu ki te Atua.

Kua taopenga a Wallace Liverance, te retita o te Apii Gileada, i te au tuanga tuatua. Ko tana tumu tuatua koia oki e “Oronga i te Akameitakianga ei Atinga Naau ki te Atua.” Kua tuatua aia no runga i te tataanga o Iesu i te rapakau anga i te au tangata repera e tai ngauru. (Luka 17:​11-19) Okotai ua i uri mai i te akapaapaa i te Atua e te akameitaki ia Iesu. “Kare e ekoko anga, kua rekareka tetai atu e kua ma. Kua manako meitaki ratou ia ratou uaorai, inara i te akaraanga e ko ta ratou i inangaro koia oki e kia tuatuaia e kua tamaia e te taunga,” i tuatuai te Taeake ko Liverance. Te tamaanga i te pae vaerua tei tupu mai mei te apiianga i te tuatua mou, kapiti mai i te akameitaki anga, ka tau kia akakeu i tetai kia akameitaki i te Atua no tona tu meitaki. Kua akamaroiroiia te aronga apiipii o te pupu 108 o Gileada kia manako maata i te au angaanga pouroa a te Atua e te tu meitaki e raukai i te akariro i ta ratou angaanga e te au atinga ei akaata anga o te tu akameitaki anga ki te Atua.​—Salamo 50:​14, 23; 116:​12, 17.

Au Kite Anga e te Au Uiui Anga e Akapeea me Rave i te Reira

Kua rave a Mark Noumair, tetai atu tangata ikuiku o Gileada, i te tuanga i aru mai o te porokaramu. Kua akara te reira i te au kite anga i roto i te angaanga koro o te pupu i te tuatau o to ratou terenianga. Kua pou i te aronga apiipii, i te avereti, vaitata e 12 mataiti i roto i te angaanga tamou i mua ake i te aere atu anga ki Gileada. Ia ratou i te apii, kua akamata ratou i tetai au apii Pipiria meitaki ma te au tangata tuke tuke te ngai i aere mai ei, te akaarianga e kua kite te aronga apiipii e akapeea me “akaarite au iaku uaorai i te au mea katoa i te tangata ravarai nei.”​—1 Korinetia 9:22.

Aru mai i te au kite anga o te aronga apiipii, kua uiui a Charles Molohan raua ko William Samuelson i etai o te au mema pamiri Betela e te au akaaere tutaka tei tae ana ki Gileada. Ko tetai o te au taeake tei uiuiia, ko Robert Pevy, tei tavini ana i te Philippines i muri ake i te karatuati anga mei te pupu 51 o Gileada. Kua akamaara aia i te pupu: “Me e manamanata tetai, ka oronga te katoatoa i tona manako tauturu e akapeea me akatikatika i te manamanata. Te vaira tetai tangata kite atu ia koe, tetai te ka manako mai i tetai taiku anga meitaki atu. Inara me akara koe ki roto i te Pipiria i te kimi i to te Atua au manako i runga i te au mea, kare e rauka i tetai i te autu atu i te reira. Ko te reira oki te pau anga tika tikai.”

Kia akaoti i te porokaramu pae vaerua meitaki, kua tuatua a John Barr, e mema o te Pupu Akaaere, no runga i te tumu tuatua “E Rave i te Angaanga Tapu Arikiia kia Iehova.” Kua akaari aia e akapeea te angaanga tapu me akaataia i roto i te angaanga orometua kia tauturu i te au tangata tataki tai e ngakau tika kia akamori i te Atua na roto i tetai tu arikiia. I muri ake i te uri anga ki te au tuatua a Iesu ia Mataio 4:10, kua tuatua te Taeake ko Barr e, “Me ko Iehova anake ta tatou ka akamori, kia kopae tatou i te au tu kikite o te akamori anga itoro, mei te morimori apinga, te anoano kia puapinga, e te akamaata anga i tetai uaorai. Mei teaa ra te mataora i te akariro anga ia tatou kia manako e kua akanoo to tatou au mitinari e tae mai ki teia tuatau mei te akamata anga o te 1940 mai i tetai rekoti meitaki na teia tu! E te papu nei matou e ka aru rai kotou te aronga karatuati o te pupu 108 o Gileada i to ratou akaraanga meitaki. Ka rave kotou i te angaanga tapu kia Iehova, koia anake tei tau i te reira.”

E tupu anga papu tikai o tetai porokaramu akamatutuanga. Kua tae te tuatau no te akarongo anga i te au turouanga mei te aronga akameitaki i te ao katoa, no te oronga anga i te tiporoma, e no te tatauanga i tetai reta mei te pupu, i te akakite anga i te tu ariki anga no te terenianga tei rauka ra. Kua raurauia te pupu karatuati kia akaari i te tu tiratiratu i roto ta ratou au angaanga e te tavinianga ia Iehova. Pouroa tei tae atu, kapiti mai i te au manuiri mei te 25 enua, kua kapiti atu ki roto i te akaope anga i te porokaramu ma te imene e te pure.

[Tataanga Rikiriki i Raro]

[Pia i te kapi 23]

TE AU TU O TE PUPU

Numero o te au enua tei komonoia: 10

Numero o te au enua tei tukuia: 17

Numero o te aronga apiipii: 46

Au mataiti avereti: 34

Te mataiti avereti i roto i te tuatua mou: 16

Au mataiti avereti i roto i te angaanga tamou: 12

[Tutu i te kapi 24]

Te 108 Pupu Karatuatianga o te Apii Pipiria Punanga Tiaki o Gileada

I te papaanga i raro ake, kua numeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.