E Akangateitei i te Aronga tei Akataoongaia ki Runga ia Kotou

“E akangateitei atu i te tangata ravarai. E aroa atu i te au taeake. Ka mataku i te Atua. Ka akateitei i te ariki.”​—1 PETERO 2:17.

1, 2. Akapeea te manako o te au tangata no te mana taoonga i teianei tuatau? No teaa ra?

“TEI te au tamariki te au tika katoa. Kare e akangateitei no te au metua,” ta tetai vaine i koumuumu ra. “E akaao i te Mana Taoonga” te tuatua ra tetai pepa tei akapiriia ki runga i te motoka. E rua ua era akaata anga no tetai turanga te vai nei i teia tuatau, penei kua kite koe. Ko tetai tu akangateitei kore no te au metua, te au puapii, te pu angaanga, e te au opita kavamani e mea matauia i te ao katoa nei.

² Penei ka akapana ua tetai papaki i to ratou pakuivi e ka tuatua, ‘Ko te tika, kare e tau taku akangateiteianga no te aronga i te au turanga mana taoonga.’ I etai tuatau, ka rave anga ngata kia akakore atu i te reira manako. Te aro atu nei tatou ki tetai aere marieanga mai o te nuti no te au opita kavamani rave viivii, te au pu angaanga noinoi, te au puapii tau kore, e te au metua akono kino ra. E mea mataora ra, e tokoiti ua te au Kerititiano te akamanako ra i te aronga mana taoonga i roto i te putuputuanga na roto i taua tu ra.​—Mataio 24:​45-47.

3, 4. Eaa i tau ei te au Kerititiano kia akaari i te akangateitei no te aronga i roto i te au turanga mana taoonga ra?

³ No reira ei au Kerititiano ‘i tikai’ tatou kia kauraro i te aronga mana taoonga o te enua nei. Kua akamaroiroi maira Paulo i te au Kerititiano ‘kia kauraro marie ratou i te aronga mana taoonga ra, Kare rava oki e mana mari ra no ko mai i te Atua ra; te aronga mana e noo nei, kua akonoia ïa e te Atua.’ (Roma 13:​1, 2, 5; 1 Petero 2:​13-15) Kua akakite katoa maira Paulo i tetai tumu tau no te akarongoanga i te aronga mana i roto i te ngutuare tangata: “E te au vaine ra, e moraro marie kotou i ta kotou uaorai au tane, mei tei tau ïa i te Atu nei. E te au tamariki e, e akarongo i to kotou au metua i te au mea katoa nei, e mea mareka te reira ma te Atu.” (Kolosa 3:​18, 20) Te tau katoa ra te aronga pakari o te putuputuanga no ta tatou akangateitei anga no te mea ‘na te vaerua tapu i akariro ia ratou ei au akaaere, kia tiaki i te putuputuanga a te Atua ra.’ (Angaanga 20:28) No te akangateitei ia Iehova ra i kauraro ei tatou i te au tangata mana taoonga ra. E mea tika ra ko te akangateiteianga i to Iehova ra mana ko te mea mua ia i to tatou oraanga.​—Angaanga 5:29.

⁴ Ma te mana teitei rava o Iehova i roto i te manako, e akamanako tatou i te au akatauanga a tetai papaki tei kore ra i kauraro i te aronga turanga mana taoonga e to etai oki tei rave ra i te kauraro anga.

Ka Taki Atu te Kauraro Kore ki te Mareka Kore

5. Eaa te tu manako akangateitei kore ta Mikala i akaari atura kia Davida, e kua taki atura te reira ki teaa?

⁵ Mei te tuatua enua mai no te Ariki ko Davida, ka kite tatou akapeea to Iehova ra manako anga no te aronga te akara maira ki raro ki runga i te mana taoonga orongaia mai e te Atua ra. I ta Davida akauenga kia apaiia mai te aruna no te koreromotu ki Ierusalema, ko tana vaine ko Mikala kua “kite atura i te ariki ra ia Davida i te rere anga, e te ura anga, ki mua i te aroaro o Iehova; e kua akavaavaa atura aia iaia i roto i tona ngakau.” Kua tau ra a Mikala kia kite atu ia Davida kare ei upoko ngutuare anake mari katoa ra ei ariki o te enua ra. Inara, kua  tuatua atura aia i tona manako ngakau na roto i te tu aviri: “Aue te ngateitei o te ariki o Iseraela i nakonei, ko tei taratara i tona kakau i nakonei, ki mua tikai i te mata o te au tavini vaine nona e, mei tetai o te aronga tarevakaua e mātau i te taratara i tona kakau e!” Ko tetai tupu anga no teianei e kare rava a Mikala tamariki i anau mai.​—2 Samuela 6:​14-23.

6. Akapeea ta Iehova ra manako anga i ta Kora akangateitei koreanga no Tana i akatainu ra?

⁶ Ko tetai akatauanga kino roa no te kore e akangateitei i ta te Atua ra akataoonga anga arataki anga teokaratiki ko Kora ia. Ei tamaiti na Kohata mei teaa ra tetai tika meitaki tana i rekareka i te tavinianga ia Iehova i te tapenakara ra! Inara, kua kitea e ia tetai akaapaanga ia Mose raua ko Aarona ra, ko raua nga arataki akatainuia o Iseraela ra. Kua kapiti katoa a Kora ma etai atu ui mataiapo o Iseraela e kua tuatua ketaketa atura kia Mose raua ko Aarona: “Te akamaata rava na korua, no te mea te tapu katoa nei te uipaanga katoa e pini ua ake, e tei roto a Iehova ia ratou ra; e tenana, eaa korua i akateitei ei ia korua uaorai, e akaaka io nei te uipaanga o Iehova nei?” Akapeea ta Iehova manako anga i te tu akono a Kora e tona aronga turu iaia? Kua akamanako atu te Atua i ta ratou i rave ra ei akangateitei koreanga ia Iehova uaorai. I muri ake i te kiteanga i te aronga katoa i to ratou tua ra i te apuku angaia ki roto i te one, kua akapouia atu a Kora e te 250 ui mataiapo katoa ra e te ai mei ko mai ia Iehova ra.​—Numero 16:​1-3; 28-35.

7. E tumu ainei ta te “au aposetolo mamaata” ra kia akaapa i to Paulo mana taoonga ra?

⁷ I te anere mataiti mua o te putuputuanga Kerititiano ra, i reira katoa tetai aronga tei manako kore ra i te taoonga teokaratiki ra. E tu akono akangateitei kore to te “au aposetolo mamaata” i roto i te putuputuanga Kerititiano i Korinetia ra ia Paulo. Kua akaapa ua ratou i tona kite i te tuatua anga, i te na koanga: “Te tu o tona kopapa, e mea apikepike, e te reo tarevakaua.” (2 Korinetia 10:10; 11:5) Me e vaa tuatua karape a Paulo me kare ainei, kua tau ra aia kia akangateitei ia ei apotetoro. Inara e tarevakaua tikai ainei ta Paulo tuatua anga? Te oronga maira tana au akoanga i te ngai tangata tei tataia ra i te Pipiria i te tika e te irinakianga oki iaia ei vaa tuatua. Eaa oki, ei tupu anga no te uriuri manakoanga ma te ariki ko Ageripa ra, koia tetai tangata ‘kua kite i te au peu ravarai, e te au tuatua katoa, a te ngati Iuda,’ kua taki atura Paulo i taua ariki ra kia tuatua e: “Kua vaitata au i te riro ei Kerisitiano ia koe”! (Angaanga 13:​15-43; 17: 22-34; 26:​1-28) Tera ra, kua akaapa taua au apotetoro mamaata i Korinetia ra iaia e ko tetai tei tarevakaua ra tana tuatua anga! Akapeea ta Iehova manako anga i to ratou tu akono? I roto i tetai tuatua no te au akaaere o te putuputuanga i Ephesia ra, kua tuatua akaperepere a Iesu Karaiti no te aronga tei kore ra i akatika kia arataki keia atu ratou e “te aronga e tuatua ra e, e aposetolo ratou, e kare.”​—Apokalupo 2:2.

Akangateitei Atu Noatu te Tu Apa Ua

8. Akapeea ta Davida akaari anga e kua akangateitei aia i te mana taoonga ta Iehova i oronga kia Saula ra?

⁸ E manganui te au akatauanga i te Pipiria no te aronga tei akangateitei atura i etai e mana taoonga to ratou ra, noatu rai i rave tarevake ratou me kare tau kore i to ratou mana taoonga. Ko Davida tetai o taua akatauanga meitaki ra. Kua tavini atura aia i raro ake i te ariki ko Saula, tei riro ra kia vareae i te au mea ta Davida i rave ra e kua kimi kia tamate iaia. (1 Samuela 18:​8-12; 19:​9-11; 23:26) Inara, noatu e kua va mai etai tuatau kia tamate atu aia ia Saula, kua tuatua a Davida: “Kia akakore mai oki a Iehova, auraka au kia pera ki toku pu, ki to Iehova ra tangata i akatainuia ra, auraka toku rima kia rave ua atu iaia, ko tei akatainuia oki aia e Iehova ra.” (1 Samuela 24:​3-6; 26:​7-13) Kua kite ra a Davida e kua apa a Saula, inara kua akaruke aia kia Iehova te tika kia akava atu iaia ra. (1 Samuela 24:​12, 15; 26:​22-24) Kare aia i tuatua akakino atu me kare i akaapa atu ia Saula ra.

9. (a) Akapeea to Davida manako ngakau iaia e akono tau koreia ra e Saula? (e) Akapeea tatou e kite ei e e tika tikai ta Davida akangateitei ia Saula ra?

⁹ Kua pekapeka ainei a Davida iaia e takinga kinoia ra? “Kua tu mai oki . . . te aronga takinga-kino ra iaku kia mate,” ta Davida i kapiki atu kia Iehova. (Salamo 54:3) “E akaora mai koe iaku, e te  Atua . . . Kia ora au, e taku Atua, i toku nei au enemi . . . kua tu mai oki te au tangata ke e rave iaku, e te kimi maira te aronga takinga-kino ra iaku kia mate: kare ratou i tuku i te Atua ki mua ia ratou.” (Salamo 59:​1-4) Kua manako ngakau aiteite ainei koe mei tera te tu​—e kare koe i rave i tetai tarevake ki tetai tangata mana taoonga, inara kua rave ua aia i tetai tu ngata noou? Kare a Davida i akaari akangateitei kore kia Saula. I te matenga a Saula, kare i akateitei i te rekareka, kua akapapa ra a Davida i tetai imene tangi anga: “Ko Saula raua ko Ionatana, kua mataora raua e te taurekareka i to raua ora anga, . . . viviki maata to raua i to te aeto ra; e ririnui maata to raua i to te liona. E te au tamaine a Iseraela, ka aue kotou ia Saula.” (2 Samuela 1:​23, 24) Mei teaa ra tetai akatauanga meitaki no tetai akangateitei anga tikai no tei akatainuia ra a Iehova, noatu rai e kua takinga kinoia a Davida e Saula ra!

10. Eaa te akatauanga meitaki ta Paulo i akanoo i te akangateiteianga i te mana taoonga orongaia e te Atua no te pupu akaaere ra, e kia taki atu te reira ki teaa?

¹⁰ I roto i te tuatau Kerititiano, ka kite katoa tatou i etai akatauanga meitaki o te aronga akangateitei i tei akataoongaia e te Atua ra. E akara ia Paulo, ei akatauanga. Kua akaari aia i te akangateitei no te au ikianga a te pupu akaaere o te putuputuanga Kerititiano o te anere mataiti mua ra. I to Paulo tutaka anga openga ki Ierusalema, kua ako atura te pupu akaaere iaia kia tama iaia uaorai i te pae o te ture kia akaari atu kia etai ke ra e kare aia i akamoupuku atu i te Ture a Mose ra. Ka rauka ua ia Paulo kia akamanako atu e: ‘Kua akaue mai taua au taeake ra i mua ake kiaku kia akaruke ia Ierusalema i te akakoko angaia mai toku oraanga. I teianei kua anoano ratou iaku kia akakite i te ngai tangata e te akangateitei ra au i te Ture a Mose. Kua tata atu au i tetai pepa ki to Galatia ma te akakite anga kia ratou kia akaatea ke mai i te akonoanga i te Ture ra. Me ka aere atu au ki te iero, penei ka manako tarevake etai ra i taku rave anga, ma te manakoanga e te rave tuku ua ra au ma te aronga o te pupu peritomeia ra.’ I te akaraanga kare a Paulo i akamanako ana mei tera te tu. I te mea kare e tuku ua anga i te au kaveinga Kerititiano i raveia, kua akangateitei atu aia e kua akono oki i te akoanga a te pupu akaaere i te anere mataiti mua ra. Ko te tupu anga i muri ua akera kua akaoraia mai a Paulo e tetai pupu ngati Iuda ra, e kua akapou atu aia e rua mataiti i roto i te tapekaanga. I te openga ra, kua raveia to te Atua ra anoano. Kua akakitekite atura Paulo ki mua i te au opita teitei i Kaisarea ra e i reira kua apaiia atu e te tutaki anga a te kavamani ra ki Roma kia akakite atu ki mua ia Kaisara uaorai.​—Angaanga 9:​26-30; 21:​20-26; 23:11; 24:27; Galatia 2:12; 4:​9, 10.

Te Akaari Ngateitei ra Ainei Koe?

11. Akapeea e raukai ia tatou te akaari ngateitei no te mana taoonga o te enua nei?

¹¹ Te akaari ra ainei koe i te ngateitei tau no te aronga mana taoonga? Te akaueia ra te au Kerititiano kia “tuku atu i te mea tau i te tangata katoatoa ra, . . . ko tei akateiteiia ra, ka akateitei atu ïa.” E tika, ko to tatou kauraro i te “aronga mana taoonga” ra te kapiti ra kare e kia tutaki ua tatou i ta tatou tero mari ra kia akangateitei atu tatou i te aronga mana taoonga ra ma to tatou tu akono e te tuatua oki. (Roma 13:​1-7) Me aro atu ma te au opita kavamani e penei e tu riri maira, akapeea tatou me akono atu? I te Chiapas State, i Meiko, kua rave atu te aronga mana taoonga i tetai ngai ra i te enua no etai 57 pamiri Au Kite o Iehova no te mea kare teianei au Kerititiano i piri atu ki roto i te etai au oroa akonoanga ra. I te au uipaanga tei akanooia ei akatikatika i taua tumu ra, te Au Kite ra, e ma e te tau oki to ratou kakau anga, kua tuatua ma te tapunui e te ngateitei oki. E tere atu i tetai mataiti i muri akera, kua orongaia mai te tukuanga tika i te akaperepereanga ia ratou ra. Kua rauka te akangateitei anga a tetai papaki o te aronga i reira no to ratou tu akono, tae roa kia anoano katoa ratou ra kia riro mai ei Au Kite o Iehova!

12. Eaa ra i puapinga maatai kia “akangateitei oonu” tetai no tana tane akarongo kore ra?

¹² Akapeea koe me akaari i te akangateitei no te mana orongaia mai e te Atua i roto i te pamiri? I muri ake i te uriurianga manako i to Iesu ra mamaeanga i te kino, kua tuatua te apotetoro ko Petero: “Ko kotou oki, e te vaine tini e, e kauraro marie i ta kotou au tane ra; kare tetai pae e akarongo i te tuatua ra, kia rauka maira ratou i te akono meitaki o ta ratou au vaine, auraka atu rai te tuatua; I te akara anga mai ratou i to kotou aerenga viivii kore i kapiti katoaia i te [akangateitei oonu].” (1 Petero 3:​1, 2 akaaite ia NW; Ephesia 5:​22-24) Kua akaketaketa maira Petero i konei i te puapinga maata o te kauraro anga te vaine ki tana tane ma te “akangateitei oonu,” noatu rai me e mea ngiti ua te rave anga a etai au tane kia tau ei taua akangateitei ra. Penei ka rauka i te tu akono anga ngateitei o te vaine ra te ngakau o tana tane akarongo kore ra.

13. Akapeea ka raukai i te au vaine kia akangateitei i ta ratou au tane?

 ¹³ I roto katoa i teianei au tuatua tapu, te akamatakite maira Petero kia tatou i te akatauanga a Sara, ko tana tane ra, ko Aberahama, tetai akatauanga meitaki no te akarongo. (Roma 4:​16, 17; Galatia 3:​6-9; 1 Petero 3:6) Ka tau ainei te au vaine ma te au tane akarongo kia oronga kia mea ngiti mai te akangateitei i ta te au vaine ma te au tokorua akarongo kore ta ratou? Ka peea oki me ka kore koe e akatika ma taau tane no etai tumu ra? Kua oronga maira Iesu i etai apiianga te ka rauka kia akonoia i tetai turanga i konei: “E ko te akaue mai kia koe e aere i tetai maile, aere ua atu korua e rua maile.” (Mataio 5:41) Te akangateitei ra ainei koe i taau tane na te aereanga kapiti ma ia katoa i tana i anoano? Me e akara anga ngata roa teianei, e akakite atu i toou au manako ngakau no te tumu kiaia ra. Auraka e manako ua e te kite ra aia akapeea toou manako ngakau. Inara me akakite koe i toou au anoano kiaia, e rave i te reira ma te tu ngateitei. Te akamaroiroi maira te Pipiria kia tatou: “Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.”​—Kolosa 4:6.

14. Eaa te o atura ki te akaari akangateitei anga ki te au metua ra?

¹⁴ Akapeea oki kotou e te tamariki? Te akaue maira te Tuatua a te Atua: “E te au tamariki ra, e akarongo atu i to kotou au metua i tei tau i te Atu ra; e tuatua-tika oki te reira. ‘E akangateitei i to metua tane e to metua vaine;’ ko te akauenga muatangana ïa i paʼuia i te meitaki i akakiteia mai.” (Ephesia 6:​1-3) E akara e ko te akarongo ki toou nga metua te akamanakoia ra e aiteite ma te ‘akangateiteianga i toou metua tane e toou metua vaine oki.’ Te tuatua Ereni tei uriia ra e “akangateitei” te apai ra i te aiteanga “kia akateitei” me kare “akanoo i tetai puapinga ki rungao.” No reira, ko te akarongo te umuumuia ra kia tere atu i te aruanga reka kore ua i te au ture a te metua ra penei te akara anga tau kore ra kia koe. Te akaue atura te Atua kia koe kia akono teitei i toou nga metua e kia manako maata i ta raua arataki anga.​—Maseli 15:5.

15. Akapeea ka raukai i te tamariki kia tamou marie i ta ratou akangateitei anga noatu rai me te manako ra ratou e kua rave tarevake to ratou nga metua ra?

¹⁵ Me rave toou nga metua i tetai apinga te ka akameangiti mai i taau akangateitei anga no raua, ka akapeea i reira? E tauta kia akara i te tika mei ta  raua ra manako anga. Kare ainei raua “i anau ei koe ra” e i akono mai oki noou ra? (Maseli 23:22) Kare ainei raua e akakeuia ana no te aroa ia koe? (Ebera 12:​7-11) E tuatua ngateitei atu ki toou nga metua, ma te akatakaanga i roto i tetai vaerua maru i toou manako ngakau. Noatu rai me ka pau mai raua na roto i tetai tu kare koe i reka, auraka e tuatua akangateitei kore atu kia raua. (Maseli 24:29) Kia maara i akapeea ta Davida ra tamou marie anga i tona akangateitei anga no Saula noatu rai i te aere keanga te ariki ra mei te aruanga i ta te Atua ra akoanga. E pati ia Iehova kia tauturu mai ia koe kia akono i toou au manako ngakau. “E riringi i to kotou ngakau ki mua iaia,” ta Davida i tuatua. “Ko te Atua anake ra to tatou akapuanga.”​—Salamo 62:8; Te Aue o Ieremia 3:​25-27.

Akangateitei i te Aronga Rave Arataki Anga

16. Eaa ta tatou ka kite mei te au akatauanga a te au orometua pikikaa ra e te au angera oki?

¹⁶ Na te vaerua tapu i akataoonga i te aronga pakari o te putuputuanga ra, inara te vai apa ua ra ratou e te rave tarevake ra. (Salamo 130:3; Koheleta 7:20; Angaanga 20:28; Iakobo 3:2) Ei tupu anga, penei ka merengo kore ua tetai papaki i roto i te putuputuanga ra i te aronga pakari. Eaa te akono tau na tatou me ka manako tatou e kare tetai apinga i roto i te putuputuanga ra i akono tikaia, me kare i te akara anga ua ra? E akara i te tuke anga i rotopu i te au orometua pikikaa o te anere mataiti mua ra e te au angera ra: “E mataku kore, e te māro i to ratou uaorai [au orometua pikikaa ra] anoano, kare i mataku kia akakino mai i te aronga teitei ra. Kareka te au angela, ko tei maata ua atu to ratou mana e te maroiroi, kare rava ïa i tapepe akakino ia ratou ki mua i te aroaro o Atua ra.” (2 Petero 2:​10-13) I te tapepe akakino anga te au orometua pikikaa ra i te “aronga teitei” ra​—koia te aronga pakari i orongaia ra te mana taoonga i te putuputuanga Kerititiano i te anere mataiti mua ra​—kare te au angera ra i tuatua akakino atu i te au orometua pikikaa tei akariro ra i te tatakake anga i roto i te au taeake. Ko te au angera, i te mea i roto i tetai turanga teitei atu e te tu meitaki atu no te tuatua tau i to te au tangata, kua kite eaa te tupu ra i roto i te putuputuanga. Inara, ‘no te akangateitei ia Iehova,’ kua akaruke atura ratou i te akavaanga ki te Atua.​—Ebera 2:​6, 7; Iuda 9.

17. Akapeea te akono anga o toou akarongo me te akono ra koe ma te au manamanata taau i manako ra e ko te aronga pakari te tarevake ra?

¹⁷ Noatu rai me kare tetai apinga i akono tikaia kia tau, kare ainei e tau kia irinaki tatou ia Iesu Karaiti ei Upoko te ora ra no te putuputuanga Kerititiano? Kare ainei aia e kite ana eaa te tupu ra i roto i tana uaorai putuputuanga i te ao katoa nei? Kare ainei tatou e tau kia akangateitei i tana akonoanga i te turanga e kia kite oki i tona kite kia akatere i te au tika ra? Te tika, ‘koai oki tatou ka akaapaʼi tatou i to tatou tangata tupu?’ (Iakobo 4:12; 1 Korinetia 11:3; Kolosa 1:18) Eaa koe ka kore ei e apai mai i toou au manako taitaia ki mua ia Iehova i roto i taau au pure?

18, 19. Eaa taau ka rave me te manako ra koe e kua tarevake tetai tangata pakari?

¹⁸ No te tu tangata apa ua nei, penei ka tu mai te au tu ngata e te au manamanata. Penei te vaira etai tuatau e tarevake tetai tangata pakari, ka akariro ia etai kia pekapeka. Kare a tatou raveanga poitirere  ua i raro ake i taua au turanga ra e taui i te reira. Penei ka riro ua te reira e kia akamaata atu i te manamanata. Te aronga e kite oonu to ratou i te pae vaerua ka tapapa atu ia Iehova kia akatikatika mai i te au apinga ra e kia akono i te akoanga penei te umuumuia ra i tana uaorai tuatau tau e te mataara oki.​—2 Timoteo 3:16; Ebera 12:​7-11.

¹⁹ Ka peea me ka manako pekapeka koe no tetai tumu? Mei te tuatua ua atu ki etai ke i roto i te putuputuanga, eaa ka kore ei e aravei ngateitei atu i te aronga pakari ra no te tauturu? Auraka e akaapa ua, e akataka atu i peea te tupu anga kia koe ra. Kia tamou marie “i te aroa katoa anga” no ratou ra, e kia akangateitei atu ia koe e tuatua irinaki atura kia ratou. (1 Petero 3:8) Auraka e tuatua aviri atu, mari ra e irinaki i to ratou tu pakari ei Kerititiano. E ariki atu i tetai ua atu akamaroiroi anga Tuatua Tapu ta ratou ka oronga aroa mai. E mei te akara anga e te anoanoia ra tetai atu akatikatika anga, e irinaki ra e ka arataki atu a Iehova i te aronga pakari kia rave i te meitaki e te tika.​—Galatia 6:10; 2 Tesalonia 3:13.

20. Eaa ta tatou ka uriuri manako i roto i te atikara te ka aru mai?

²⁰ Inara, te vaira tetai atu tu kia akamanakoia no runga i te akangateiteianga e te kauraroanga i te aronga mana taoonga ra. Kare ainei te aronga tei tukuia ra ki roto i tetai turanga mana taoonga e tau kia akangateitei atu i te aronga tei tukuia ra a ratou e utuutu? E akara matatio tatou i te reira i te atikara i muri akenei.

Akapeea Koe me Pau?

• Eaa ta tatou tumu meitaki no te akangateiteianga i te aronga e mana taoonga to ratou?

• Akapeea ta Iehova raua ko Iesu manako anga no te aronga kare e akangateitei i te mana taoonga orongaia mai e te Atua?

• Eaa nga akatauanga meitaki no tatou no te aronga tei akangateitei ra i te aronga i orongaia te mana taoonga?

• Eaa ta tatou ka rave me e akara anga kua tarevake tetai e mana taoonga tona i rungao ia tatou?

[Au Uianga Apii]

[Tutu i te kapi 12]

Kua akangateitei oonu a Sara i to Aberahama ra mana taoonga e kua mataora aia

[Tutu i te kapi 13]

Kua akangateitei kore a Mikala i to Davida ra mana taoonga ei upoko ngutuare tangata e ei ariki

[Tutu i te kapi 15]

“Auraka au kia pera ki toku pu, ki to Iehova ra tangata i akatainuia ra, auraka toku rima kia rave ua atu iaia”

[Tutu i te kapi 16]

Eaa ka kore ei koe e apai mai i toou au manako taitaia ki mua ia Iehova i roto i taau pure?