E Irinaki Ainei Toou i Roto i te Mea Kare Koe e Kite Ana?

ME KARANGA atu tetai tangata e, ‘te irinaki nei au i roto ua i te mea taku e kite nei,’ kare aia e tuatua tika tikai ana. E tika, te irinaki ra tatou i roto i te au mea kare tatou e kite ana.

Ei akatauanga, penei kua rave ana koe i te apii i tetai angaanga timata anga kia akapapu i te vai anga o te mana taimana. Penei ka rave ia mei teia rai te tu: E pipi i te au potonga auri ki runga i tetai aenga pepa. E tuku i reira i te aenga pepa ki runga i te taimana. Me ruruia te aenga pepa, mei te tu manamana rai ka akaputuputu te au potonga auri e vaitata ki te nga pole o te taimana  e ka raveia te tu o te mana taimana. Me rave ana koe i te reira, ka kite ainei koe i te mana taimana? Kare, inara te kite meitakiia ra tona mana ki runga i te potonga auri, te orongaanga mai i te akapapu anga e te vaira te mana taimana.

Te ariki ekoko kore ra tatou i tetai atu au mea kare tatou e kite ana. Me akara tatou i tetai penianga manea tikai me kare i tetai tiki memeitaki, kare tatou e ekoko ana e te vaira tetai tangata peni me kare tetai tangata maani tiki. No reira me kite tatou i tetai vai topaanga me kare i tetai opunga ra, kare ainei tatou e tau kia manako e penei e angaanga te reira na tetai Tei Peni Maata me kare na Tei Maani Tiki?

Te Tumu i Kore ei Tetai Aronga e Irinaki

Ma te manako anga tuke tikai, kua akamutu tetai aronga i te irinaki i roto i te Atua no ta ratou i apii maira i roto i ta ratou akonoanga. Kua tika rai teia no tetai tangata Norway tei akakiteia atu e ka tau te Atua i te aronga kino i roto i tetai ai era. Kare teia tangata i marama e eaa te tumu i tamamae ei tetai Atua i te tangata na roto i te reira tu, no reira kua riro mai aia ei tangata irinaki kore i te Atua.

Inara, i muri mai, kua akatika taua tangata ra i te kimi matatio i te Pipiria, kua tauturuia e tetai o te Au Kite o Iehova. Kua umere tikai aia i te kite e kare te Pipiria i apii ana e ka tamamaeia te aronga kino i roto i tetai ai era. Kua akaaite te Pipiria i te mate ki te moe tinainai. I roto i te vaarua, kare tatou e kite i te mamae; kare tatou e kite akaou. (Koheleta 9:​5, 10) Kua kite katoa taua tangata ra e ko te au tangata ta te Atua i akava ei au tangata kino rava atu ka noo ratou ki roto i te vaarua e tuatau ua atu. (Mataio 12:​31, 32) Ko te toenga o te aronga mate ka akatuakaouia i to te Atua tuatau tau, ma te manakonako anga e kia rauka mai te ora mutu kore i raro ake i te au turanga Parataito. (Ioane 5:​28, 29; 17:3) Kua tano rai teia akataka anga. Kua rotai te reira ma te tata anga Pipiria e “ko te Atua oki te aroa.” (1 Ioane 4:8) Kua rave ua atu teia tangata ngakau tae i tana apii i te Tuatua a te Atua, e kare i roa ana, kua akaperepere mai aia i te Atua o te Pipiria.

Kua kopae ke tetai atu i te vai anga o tetai Tei Anga aroa no te mea kua maata te manamanata e te angaanga tau kore. Kua ariki ratou i ta tetai tangata Sweden tei tou ki te au rangi ra e kua ui atu: “Akapeea i vai ei tetai Atua mana katoatoa, e te apinganui i runga i ko mei te mea e e maata tikai te au manamanata e te au kino i raro i konei?” No tei kore tetai tangata i pau atu i tana uianga, kua riro katoa mai aia ei tangata irinaki kore i te Atua. I muri mai kua akamata aia i te apii i te Pipiria ma te Au Kite o Iehova. Kua apii aia e te oronga maira te Tuatua a te Atua i tetai pau  anga merengo ki te uianga taito ra, Eaa ra te Atua i Akatikai i te Kino? *

Kua apii teia tangata ngakau tae e kare te vai mai anga o te kino e akapapu mai e kare e vai ana tetai Atua. Ei akatutu mai: Penei kua maani tetai tangata i te matipi kia tipu i te kiko. Penei ka oko tetai tangata i te matipi kare no te tipu i te kiko, mari ra kia ta i te tangata. Ko te tika anga e kua rave tarevakeia te matipi kare e akaapaia anga i te vai anga o te tangata maani. Mei te reira katoa rai, noatu e kare i raveia te enua kia rotai ma tona akakoroanga kare mei te mea e kare ona Anga.

Te apii maira te Pipiria e ko te au angaanga a te Atua e apa kore. “E kino kore ra [aia], e tuatua-tika tana, e te tiratiratu.” (Deuteronomi 32:4) Kua oronga mai te Atua i te au apinga aroa ki te tangata, inara kua rave kinoia tetai o te au apinga aroa, te akatupuanga i te mamaeanga kino pakari. (Iakobo 1:17) Inara, ka akaope te Atua i te tamamaeanga. I muri mai, “kareka te aronga maru ra, ka noo ïa i te enua, . . . ka noo tamou rai ratou i reira.”​—Salamo 37:​11, 29.

Kua akakeuia te tangata Sweden i taikuia maira i mua ake nei i te kite anga aia i te tamamaeanga o te au tangata. Ae, kua akapapu mai tona ngakau tae no tetai atu i te vai anga o te Atua. Akapeea ra?

No te maata anga o te tangata, ko te ikianga toe no te irinaki anga i roto i te Atua ko te irinaki anga i roto i te tupu ua anga. Kua apii te au tangata irinaki i te tupu ua anga “te ora anga o te maroiroi rava atu”​—kua tarere te au tangata e te au manu i roto i to ratou uaorai tu no te ora. Ka ora tei maroiroi; e ka mate tei paruparu. Ko te reira te aerenga natura o te au mea nei, ta ratou ia e tuatua ra. Inara me e mea “natura” no tei paruparu kia mate kia va te ngai no tei maroiroi, akapeea tatou i te akataka anga i te tika e, mei te tangata Sweden, kua akakeuia etai au tangata maroiroi i te kite anga i te tamamaeanga o to ratou au oa tangata?

Te Kiteanga i te Atua

Kare tatou e kite i te Atua no te mea kare ona tu tangata. Inara, ka inangaro te Atua ia tatou kia kite iaia. Ko tetai mataara e kite ei tatou iaia na te akaraanga i tana au angaanga umere tikai​—te “au penianga” e te “au tiki” o te mea angaia. Ia Roma 1:20, te karanga nei te Pipiria: “Te au mea oki [o te Atua] tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao; koia oki, tona ra mana mutu kore anga, e te Atua anga.” Ae, mei te apiianga i tetai penianga me kare tetai tiki ka tauturu ia koe kia rauka mai te tu manako o te tangata karape, ka tauturu te akamanakoanga ki runga i te au angaanga umere a te Atua ia koe kia kite meitaki i tona tu manako.

E tika, kare e rauka ia tatou i te pau atu i te au uianga katoatoa no runga i te au manamanata o te oraanga na te akara ua anga i te au angaanga a te Atua. Inara ka kite tatou i te au pauanga ki taua au uianga na te kimikimianga i te Tuatua a te Atua, te Pipiria. Na te tatauanga i te Pipiria ma te manako tau kua rauka i taua nga tangata e rua tei taikuia i mua ake nei te kite e te vaira te Atua e te akamanako maira aia eaa te tupu ra kia tatou.

[Tataanga Rikiriki i Raro]

[Akameitakianga no te Tataanga i te kapi 28]

J. Hester and P. Scowen (AZ State Univ.), NASA