Oraanga Apa Kore Kare i te Moemoea!

Tetai ao apa kore​—eaa te aiteanga i te reira kia koe? E akamanako ana i tetai taiate tangata kare te ta ua, te takinga kino apinga akakona, te onge, te putaua, me kare te tika kore. Te rekareka ra te katoatoa i te meitaki tikai o te manako ngakau e te maroiroi i te oraanga kopapa. Kare te mii me kare mataora kore no te mea kua takoreia te mate. E mea tika tikai ainei i te umuumu i taua ao?

KOI kore ei e kopae i te au tere anga ki mua o te taineti e te apinga, kare te maata anga o te tangata e irinaki ana e ka apai mai te kite tangata me kare te apiianga i tetai ao apa kore ka noo au ua te katoatoa e te mataora. I tetai tua, ko te tu o te tangata kare e ekoko anga te inangaro ra i te akamako mai i te au mea e kia akatika i te au tu apa ua. E tikai, kare te moemoea tika kore e tauturu i te aronga kare e kainga e te putaua, kare katoa te reira e akamerengo i te aronga pirikoki e te aronga maki te umuumu ra i te maru anga mei to ratou mamaeanga. Kare tetai ao apa ua e tupu ua mai na roto i te manako anga a te tangata. Inara, noatu te taitaia e te taomi anga i teianei, te vaira te au tumu ngaueue kore no te irinakianga e ko tetai ao taau i kapiki ei mea apa kore te vaitata maira.

Me akamanako koe i te oraanga apa kore, penei ka mama mai te oraanga o Iesu Karaiti ki roto i toou manako. Kare ua e ko Iesu te tangata apa kore tei noo ana i te enua. Kua rekareka katoa a Adamu raua ko Eva tei angaia i to te Atua tu, i te oraanga apa kore i te parataito. Inara, kua ngere raua i teia turanga meitaki no to raua meameaau anga i to raua Metua i te rangi ra. (Genese 3:​1-6) Inara, kua tuku Tei Anga, ki roto i te au tangata i te anoano kia noo mutu kore ua atu. Te akapapu maira Koheleta 3:11 i teia: “Kua akamanea [te Atua] i te au mea katoa i te tuatau tikai ra, e kua tuku aia i te manako i to teianei ao ki roto i to ratou ngakau; i kore ei te tangata i kite i te angaanga a te Atua, mei te akamataanga mai e tae ua atu ki te openga.”

Koi taki ei te apa ua e te ara i te tangata katoatoa ki tetai oraanga “puapinga kore” e te “akatuikaa anga ki te pikikaa,” ka akamanako ana i te au tuatua pumaana a te apotetoro ko Paulo: “Te anoano maata o te au mea angaia nei ma te  aroro, te tatari nei ïa i te akakite angaia mai i te tamariki a te Atua: (Kua akariroia oki te au mea angaia nei ei puapinga kore ua, kare ra i te mea anoano, nana ra, na tei akariro ra;) Ma te tatarianga e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.” (Roma 8:​19-21) Te akataka meitaki maira te Pipiria e ko ta te Atua au apinga no te akaoki mai anga i te oraanga tangata apa ua te rauka ra na roto ia Iesu Karaiti.​—Ioane 3:16; 17:3.

Kapiti mai ki teia manakonakoanga umere no te tuatau ki mua, tei ia tatou te rauka anga kia tere ki mua i te pae vaerua, te akakite aere anga i to tatou tere anga ki mua i teianei.

E Tauta kia Tau Ua

Kua manako a Iesu Karaiti i te tu apa kore ei tumu puapinga e kua akakite aia ki tetai urupu maata: “Kia apa kore oki kotou, mei to kotou Metua i te ao ra e apa kore.” (Mataio 5:48) Kua tapapa ainei a Iesu ia tatou kia tiama i roto i teia akatereanga o te au mea kino i teianei? Kare. Kia tauta tatou i te tatanu i te au tu oronga ua, takinga meitaki, e te aroa ki to tatou au taeake, inara e putuputu te taime kua poka tatou i te rave i te mea tika. Kua tata tetai o ta Iesu au apotetoro: “Kia aaki tatou i ta tatou ara, e tuatua-mou tana e te tika i te akakore anga mai i ta tatou ara, e te tamā anga ia tatou i te au tuatua-tika kore ravarai. Kia karanga tatou e kare ua a tatou ara i rave, kua akariro tatou iaia ei pikikaa, e kare tana tuatua i roto ia tatou nei.”​—1 Ioane 1:​9, 10.

Noatu rai, ka rauka ia tatou i te akamako i ta tatou akara anga ia tatou uaorai e te akono anga i tetai, te kopaeanga i te manako pakari. Koai te ka kite atu i tetai tataanga meitaki atu no te raukaanga te tu tangata tau e te aiteite, e i roto i te Tuatua a te Atua, te Pipiria? Te tatanuanga i te au tu mei te rekareka e te tau ua ka tauturu ia tatou kia matau meitaki i tetai i te angaanga, to tatou tokorua akaipoipo, e to tatou nga metua me kare tamariki. Kua ako te apotetoro ko Paulo i te au Kerititiano: “E rekareka i te Atu ra, aua e tivata, e te tuatua akaou atu nei au, Kia rekareka rai kotou. Kia kitea meitakiia oki to kotou maru i te tangata katoa.”​—Philipi 4:​4, 5.

Au Puapinga no te Tu Tau

Me e tu tau toou i roto i taau e tapapa ra e te kopaeanga i te tamamaeanga ia koe uaorai e te anoano anga i te tu apa kore autu ia koe uaorai, ka puapingaia koe uaorai e tetai atu. Te kiteanga i toou tu tikai te o maira te manako tika tikai e te tau ua no runga i taau ka inangaro i te rave. E akamaara, kua anga te Atua ia tatou kia noo ki runga i te enua e kia kitea te merengo anga i roto i te angaanga meitaki te ka akapuapinga ia tatou uaorai e tetai atu.​—Genese 2:​7-9.

Me i umuumu maata ana koe ia koe uaorai, eaa i kore ei e uri kia Iehova na roto i te pure? Te raukaanga to te Atua tu mareka anga ka apai mai i te maru anga maata kia koe. Kua kite a Iehova i to tatou tu e te turanga apa ua, no reira kare aia i e manako tau kore me kare e ngata i te akamareka. Te akapapu maira te tata taramo kia tatou: “Mei te aroa o te metua ki tana ra au tamariki, ko to Iehova ïa aroa ki te aronga i mataku iaia ra. Kua kite oki aia i to tatou tu; te manako ra aia e, e one tatou nei.” (Salamo 103:​13, 14) Mei teaa ra te rekareka e te akono ra te Atua i te au tangata na te reira tu tangi aroa! Kua kite aia i to tatou au kotinga, inara ka akaperepereia tatou i tona nga mata ei tamariki inangaroia.

 Koi kore ei e aruaru atu i te tu apa kore, mei teaa atura te pakari i te tatanu i te kite karape i te pae vaerua e te manako tau! Pera katoa, ka papu ia tatou e kare e rauka i tetai i te arai ia Iehova mei te akatupuanga i tana akakoroanga kia akateitei i te tangata ravarai ki te tu apa kore i raro ake i te Patireia o te Atua. Inara eaa tikai te aiteanga o te tu apa kore o te tangata?

Oraanga Apa Kore e Meitaki Atu i te Tu Apa Kore

Kare te aiteanga i te tu apa kore e kia riro ei tangata anoano i te tu apa kore. Ko te aronga te ka akameitakiia kia noo ki roto i te Parataito i te enua i raro ake i te Patireia o te Atua papu tikai e kare i te au tangata maro e te manako tuatua tika iaia uaorai. Ko tetai o te au umuumu anga e orai i te mate maata koia oki ko te ariki ngakau tae anga i te atinga oko, mei tei akakiteia e te urupu maata i te pa enua ta te apotetoro ko Ioane i akataka: “No to tatou Atua te ora, tei noo ki rungao i te terono, e no te Punua-mamoe.” (Apokalupo 7:​9, 10, 14) Ka mareka ua te aronga ka ora atu i te mate maata e vaitata maira e kua mate puareinga ua a Karaiti no ratou e no te aronga katoatoa tei akono i te akarongo i roto iaia. Te akanoo ra tana atinga aroa ua i te tumu anga no te apai mai anga i te maru anga mutu kore mei to ratou tu apa ua e te au tu paruparu.​—Ioane 3:16; Roma 8:​21, 22.

Mei teaa rai te oraanga apa kore? Kare i te taemoemo e te aruaru anga i te tu noinoi, ka akariro te aroa e te takinga meitaki i roto i te au tangata kia puapinga te oraanga, te akaateaanga i te taitaia e te manako akaaka i tetai uaorai. Inara, kare te oraanga apa kore e maromaroa. Kare te Tuatua a te Atua i oronga mai i te au mea no runga i te Parataito inara te akataka ra i te tu oraanga ka tapapa atu tatou: “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira. Kare ratou e patu, e na tetai ke e noo; kare ratou e tanu, e na tetai ke e kai: mei te au rā o te rakau nei te au rā o toku ra iti-tangata; e rekareka tei ikiia e au ra, i te angaanga a to ratou uaorai rima. Kare ratou e angaanga puapinga kore ua; kare e anau tamariki kia mate vave ua.”​—Isaia 65:​21-23.

Koi kore ei e akamanako atu no runga i te tu tarekareka anga, te au ngai okookoanga, te apinga, me kare te teretere anga ka oronga mai te Patireia, ka akamanako ana ia koe uaorai e rekareka ra i te tupu anga o teia au tuatua: “Ko te luko e te punua mamoe okotai rai kai katoa anga, e kai oki te liona i te ngangaere mei te puakatoro ra: kareka te ovi, ko te one-pueu tana kai. Kare ratou e kanga, kare oki e mea e mate ei i toku katoa nei maunga tapu, te tuatua mairā Iehova.” (Isaia 65:25) Mei teaa te tuke i te oraanga apa kore mei ta taau e kite nei i teia tuatau! Me ka riro e ko koe tetai o te aronga tei manako tauia kia noo i taua taime ra, ka rauka ia koe te au tumu no te irinaki papu e ka manako mai toou Metua aroa i te rangi ra ia koe e toou pamiri. “Kia mataora oki koe ia Iehova; e nana e oronga mai i ta to ngakau e anoano ra.”​—Salamo 37:4.

Kare te oraanga apa kore i te moemoea. Ka kiteia ta Iehova akakoroanga aroa no te tangata ra. Ka riro koe e toou pamiri e ko tetai te ka akaokiia mai ei au tangata apa kore kia noo mutu kore i te ao ou o te Atua. Te akakite ra te Pipiria: “Ka riro te enua no te aronga tuatua-tika, ka noo tamou rai ratou i reira.”​—Salamo 37:29.

[Tutu i te kapi 6]

Ka rauka ia tatou i te akamako i ta tatou akaraanga ia tatou uaorai e tetai atu, te kopae anga i te tu apa kore me kare tu iriiri

[Tutu i te kapi 7]

Eaa i kore ei e akamanako ia koe uaorai e rekareka ra i te au turanga au tikai e te tuatua tika i Parataito?