Ka Kitea Ainei e Koe te Au i Roto Roa?

I te 1854, kua tata te tangata tata Marike ko Henry Thoreau e:“Te akono ra te maata anga o te au tangata i te au oraanga taitaia tikai e te muteki ua.”

Te akara anga, i tona tuatau kare te maata anga o te tangata i rekareka ana i te au i roto roa. Inara, vaitata rai e 150 mataiti i topa. E tuke ainei te au mea i teia tuatau? Me kare te tau ra ainei te au tuatua a Thoreau? Akapeea koe uaorai? Te merengo ua ra ainei koe, te au ua ra? Me kare te manako tinamou kore ra ainei koe, kare i papu tikai no runga i te tuatau ki mua, “te taitaia tikai ra e te muteki ua,” kia tuatua akaou i te au tuatua a Thoreau?

MA TE mataora kore, te vaira te au mea e manganui i te ao te keia ra i te tangata i te au i roto roa. Ka taiku atu matou i etai. I te au enua e manganui te apai maira te kore o te angaanga e te iti o te moni tutaki i te putaua e ma te reira te tauta anga pakari i te pae moni. I tetai atu au enua e manganui te akapou ra i te maata anga o to ratou tu maroiroi i te arumaki anga i te apinganui e te au apinga pae kopapa. Inara, e putuputu te taime, te apai maira te tu oraanga taemoemo i te apiapi, kare te au. Te keia katoa ra te maki, te tamaki, te ta ua, e te tu tika kore, e te takinga kino anga i te au mei te tangata.

Kua Kimi Ratou i te Au i Roto Roa

E manganui te puareinga kore ua ra i te akakoromaki i teia ao. E arataki angaanga a Antônio * i roto i tetai vakatori maatamaata i São Paulo, Brazil. Te manakonakoanga i te akameitaki i te au turanga oraanga, kua piri atu aia ki roto i te au akapupu anga patoi e te au orureau anga, inara kare teia i apai mai i te au o te manako kiaia.

Kua manakonako etai e ka apai mai te akaipoipo anga i tetai tu au tikai ki to ratou oraanga, inara penei ka akamaromaroaia ratou. E tangata pitiniti manuia tikai a Marcos. Kua o atu aia ki roto i te au poritiki e kua riro mai ei tangata maata o tetai oire maata te angaanga. Inara, kua tupu te tumatetenga ki tona ngutuare tangata. I te akaruke anga tana tamariki i te kainga, kua takake raua ko tana vaine no te au tu tukeke kare e rauka i te akatikatikaia.

Kua inangaro a Gerson, e tamaiti tei maata mai i runga i te mataara i Salvador, Brazil i te rave i te  au angaanga umere. Kua aere atu aia mei tetai oire ki tetai oire, te teretereanga ma te aronga akaoro toroka. Kare i roa ana kua riro mai aia ei tangata kai apinga akakona, te keiaanga i te au tangata e raukai te tutaki i tona tu oraanga kino. E maata te taime kua opuia aia e te akava. Inara, noatu te tu tangata ta ua e te kinokino, kua anoano a Gerson i te au i roto roa. Ka kitea ainei e ia te reira?

Koi ou ei a Vania, kua mate tona mama, e kua riro na Vania e akono i te kainga, kapiti mai i te akonoanga i tona teina makimaki. Kua aere a Vania ki te pure inara kua manako e kua akarukeia e te Atua. Papu tikai kare i rauka iaia te au o te manako.

E oti te vaira a Marcelo. Ko ta Marcelo ua i inangaro ko tetai taime rekareka tikai. E reka ana aia i te tamataora ma etai atu au mapu​—te urauraanga, te inuanga, e te rave tau kore anga i te apinga akakona. I tetai ra kua o atu aia ki roto i te ta e kua takino i tetai mapu. I muri mai, kua autuia aia e te manako tataraara no tana i rave e kua pure ki te Atua no te tauturu. Kua inangaro katoa aia i te au o te manako.

Te akatutu mai nei teia au kite anga i etai au turanga ka rauka i te takore i te au o te manako. E mataara ainei tetai ka rauka i te arataki angaanga, te tangata poritiki, te tamaiti i runga i te mataara, te tamaine rave angaanga, te tamaiti tamataora te au i roto roa ta ratou e kimi ra? Ko tei tupu kia ratou te apii maira ainei i tetai apinga kia tatou? Te pau anga ki nga ui anga e rua ae, mei ta tatou ka kite i roto i te atikara ka aru mai.

[Tataanga Rikiriki i Raro]

[Tutu i te kapi 3]

Te anoano ra ainei koe i te au i roto roa?