Kia Maroiroi te Akakitekite i te Tuatua Meitaki
Kia Maroiroi te Akakitekite i te Tuatua Meitaki
“Kia [kaka i te vaerua], i te tavini anga i te Atu.”—ROMA 12:11, akaaite ia NW.
1, 2. Eaa te tu manako ta te au Kerititiano e tauta ra kia tamou marie ei aronga tutu aere i te tuatua meitaki ra?
KUA akakeuia te manako ngakau o tetai tangata ou no tetai angaanga ou. I tona ra mua i te angaanga, kua tatari apiapi ua aia i te au ikuikuanga a tona pu. Kua akara atu aia ki tana angaanga mua e kua akamanako maata atu i te reira. Kua inangaro maata aia kia rave i te meitaki e rauka iaia.
2 Na roto i tetai tu aiteite, ka rauka ia tatou ei au Kerititiano kia manako ia tatou uaorai ei aronga angaanga ou. I te mea ko to tatou manakonako kia ora e tuatau ua atu, ka rauka kia tuatuaia e koi akamata ua akera tatou i te angaanga na Iehova. E mea tika e maata te au angaanga ta Tei Anga mai ia tatou i manako na tatou kia rave no te tuatau mutu kore. Inara ko te angaanga mua tikai i orongaia mai na tatou koia oki kia akakitekite i te tuatua meitaki o tona Patireia. (1 Tesalonia 2:4) Eaa to tatou manako no teia angaanga mei ko mai i te Atua ra? Mei te tangata ou tei taikuia, ka anoano tatou kia rave i te reira ma te meitaki katoa e rauka ia tatou, ma te maroiroi, ma te rekareka—ae, ma te inangaro maata oki!
3. Eaa te umuumuia ra kia autu ei e ei orometua no te tuatua meitaki ra?
3 E tika ra, ko te tamou marieanga i taua tu manako papu ra ka rauka kia riro ei akaaoanga. Kapiti atu ki ta tatou angaanga orometua, e manganui atu ta tatou au apainga ke, ko etai penei ka akateiaa mai ia tatou i te pae kopapa e te manako ngakau oki. No te maata anga o te tuanga, te rauka nei ia tatou te akono i teianei au apinga ia tatou e rave ra i te angaanga orometua. Inara, ka rauka kia riro teia e ko tetai apainga tamou marieia. (Mareko 8:34) Kua akaketaketa maira Iesu e ko to tatou uapou anga ei au Kerititiano ka umuumuia te tauta anga pakari.—Luka 13:24.
4. Akapeea te au apiapi o te au ra i te akakino anga i to tatou akakoroanga pae vaerua?
4 Ma te au apinga e manganui no te rave, e ngoie ua kia manako ngakau opue me kare kia akateiaaia i etai tuatau. “Te pekapeka o teianei ao” ka rauka kia pokia to tatou maroiroi e te ariki anga oki no te au angaanga teokaratiki. (Luka 21:34, 35; Mareko 4:18, 19) No to tatou tu apa ua, penei ka ‘vaoo tatou i to inangaro mua ra.’ (Apokalupo 2:1-4) Ka riro etai atu tuanga no ta tatou au tavini anga ia Iehova ei au angaanga ua nei. Akapeea ta te Pipiria oronga anga i te akamaroiroi umuumuia no tatou kia rave tamou marie i to tatou maroiroi kia ora te angaanga orometua.
Mei “te Ai Ka” i to Tatou Au Ngakau
5, 6. Akapeea ta te apotetoro ko Paulo manako no tana angaanga tutu aere?
5 Ko te angaanga orometua ta Iehova i oronga mai kia tatou e mamao roa te okomaata kia tukua kia riro ei apinga noa nei. Kua akamanako te apotetoro ko Paulo i te tutuanga i te tuatua meitaki e ko tetai angaanga maata rava, e kua manako aia iaia uaorai ei tau kore kia orongaia kiaia te reira. Kua tuatua ia: “Ko au nei rai, ko te iti rava i te iti i te aronga tapu ravarai, tei orongaia mai taua aroa ua nei, kia tutu aere au ki rotopu i te etene i te meitaki maata ope kore o te Mesia kia kimi ra; E ei akakite ki te au tangata ravarai i te kapitianga o te tuatua ngaro, i uunaia mei muatangana mai o teianei ao i roto i te Atua, ko tei anga i te apinga tini ravarai i te Mesia ra ia Iesu.”—Ephesia 3:8, 9.
6 E akatauanga meitaki to Paulo tu papu i tana angaanga orometua no tatou. I roto i tana reta ki to Roma, kua tata aia: “Kua tika roa iaku i te akakite atu i te evangelia ia kotou katoa.” Kare rava aia i akama i te evangeria ra. (Roma 1:15, 16) E tu manako tika tona e kua inangaro kia rave ua atu i tana angaanga orometua ra.
7. I tana reta ki to Roma, eaa ta Paulo i akamatakite atu?
7 Kua kite te apotetoro ko Paulo i te umuumu anga no te tamou marieanga i tetai manako maroiroi, no reira kua akamaroiroi atura aia i te au Kerititiano i Roma: “Eiaa e akatau i te angaanga; kia [kaka i te vaerua], i te tavini anga i te Atu.” (Roma 12:11, akaaite ia NW.) Ko te tuatua Ereni tei uriia e “akatau” te apai ra i te manako no te “taroaroa, e kope.” Ia tatou kare ra e akatau tikai i ta tatou angaanga orometua, ka tau ra tatou katoatoa kia matakite i etai ua atu au akakite anga mua no te akatau i te pae vaerua e kia rave akatikatika anga tau i to tatou tu manako me te kite ra tatou i aua tu ra i roto ia tatou uaorai.—Maseli 22:3.
8. (a) Eaa tei riro mei “te ai ka” ra i roto i te ngakau o Ieremia, e no teaa ra? (e) Eaa te apiianga ta tatou ka kite mei tei tupu kia Ieremia ra?
8 Ka rauka katoa i te vaerua o te Atua kia tauturu ia tatou me te paruparu ra tatou. Ei akatauanga, i tetai atianga kua kite te peroveta ko Ieremia iaia uaorai e kua paruparu te tu, e kua akamanako aia kia akamutu i tana angaanga totou anga. E kua tuatua aia no Iehova: “Kare au e akaiki iaia, e kare au e tuatua akaou i tona ra ingoa.” Ko tetai akakite anga ainei teia i tetai ngere anga kino no Ieremia i te pae vaerua? Kare. Ko te tika, no to Ieremia ririnui i te pae vaerua, tona inangaro no Iehova, e tona tu totomapu no te tuatua mou kua akamaroiroi iaia kia rave ua atu i te totouanga. Kua akataka maira aia: “Riro atura [te tuatua a Iehova] ra mei te ai ka i roto i toku ngakau ra, kua popaniia ki roto i toku ra au ivi; roiroi akera au i te akakoromaki ua anga, e kare atura e tika kia akatupua ua.” (Ieremia 20:9) E mea matauia ra e te au tavini tiratiratu o te Atua ra te kite anga i te tu paruparu i etai taime. Inara me pure ratou kia Iehova no te tauturu, ka tatau aia i to ratou au ngakau e ka oronga ua mai kia ratou i tona vaerua tapu, mei ia Ieremia ra, tei roto i to ratou ngakau tana tuatua.—Luka 11:9-13; Angaanga 15:8.
“Auraka e Tinai i te Vaerua Ra”
9. Eaa te ka rauka kia arairai i te angaanga a te vaerua tapu no tatou ra?
9 Kua akamaroiroi atura te apotetoro ko Paulo i to Tesalonia: “Auraka e tinai i te vaerua ra.” (1 Tesalonia 5:19) Ae, te au angaanga e te au tu manako tei tapae ke ra i te au kaveinga tau i te Atua ka rauka kia arairai i te angaanga a te vaerua tapu no tatou. (Ephesia 4:30) Tei te au Kerititiano te angaanga i teia tuatau kia tutu aere i te tuatua meitaki. Te akono ra tatou i teianei angaanga ma te tu ngateitei oonu. Kare i te mea poitirere kia tatou e ko te aronga kare e kite i te Atua te akono ra i ta tatou angaanga tutu aere ma te aviri. Inara me akakoro tetai Kerititiano kia rave tau kore i tana angaanga orometua, penei ka tupu te tavinianga i te ai akakeuanga i te vaerua o te Atua ra.
10. (a) Akapeea te akatupu anga o te manako o to tatou taeake ei akakeu ia tatou? (e) Eaa te manako teitei no ta tatou angaanga orometua te akakiteia maira ia 2 Korinetia 2:17?
10 Penei ka manako etai i vao ake i te putuputuanga Kerititiano ra e ko ta tatou angaanga orometua e tua anga au puka ua ia. Penei ko etai te manako tarevake ra e te aere ra tatou mei tera are ki tera are e koi moni ua. Me ka tuku tatou i taua au manako tau kore ra kia mana ki runga i to tatou tu manako, penei ka topa mai te puapinga o ta tatou angaanga orometua. Auraka e tuku i taua manakoanga ra kia tupu kia tatou, e tamou marie ra tatou i te manako o Iehova raua ko Iesu i ta tatou angaanga orometua. Kua taiku maira te apotetoro ko Paulo i taua manako teitei ra i tana akakite anga: “Kare oki matou mei tetai pae e iro i te tuatua a te Atua: te tuatua nei ra matou i te tuatua a te Mesia, no ko mai i te Atua ra, ma te pikikaa kore, e ki mua oki i te aroaro o te Atua.” —2 Korinetia 2:17.
11. Na teaa i raukai i te au Kerititiano mua ra kia vai maroiroi noatu i raro i te takinga kino, e eaa te akatupu anga tau no ta ratou akatauanga kia tatou?
11 I muri poto ake i to Iesu matenga, kua aro atura tana au pipi i Ierusalema i tetai tuatau takinga kinoanga. Kua akakokoia ratou e kua akaueia kia akamutu te tutuanga. Inara, te tuatua ra te Pipiria “e akakiia maira ratou ravarai i te Vaerua Tapu, kua tuatua ua iora i te tuatua a te Atua ma te mataku kore.” (Angaanga 4:17, 21, 31) Na ta Paulo au tuatua kia Timoteo i etai mataiti i muri iora i akakite i te turanga papu ka tau te au Kerititiano ra kia tamou marie. Kua tuatua a Paulo: “Kare oki i te ngakau kopē ta te Atua i oronga mai no tatou; te ngakau maroiroi ra, e te aroa, e te ngakau akono meitaki. Eiaa koe e akama i te tuatua-akakite a to tatou Atu, e eiaa katoa e akama iaku i tona tangata tapekaia nei, e āriki katoa ra koe i te mate o te evangelia nei i te maroiroi o te Atua ra.”—2 Timoteo 1:7, 8.
Eaa ta Tatou Kaiou ki to Tatou Tangata Tupu?
12. Eaa te tumu maata no ta tatou tutu anga i te tuatua meitaki?
12 E raukai tetai tu manako tika ki ta tatou angaanga orometua, ka tika kia tu tatou i te akakeu anga tika. Eaa tatou ka tutu aere ei? Te kitea ra te tumu maata i te au tuatua a te tata taramo ra: “E na toou aronga tapu e akameitaki ia koe [e Iehova]. E tuatua ratou i te kakā o toou ra basileia, e karangaranga ua oki toou ra ririnui, i te akakite anga ki te tamariki a te tangata nei i tona ra mana, e te mana kakā o tona ra basileia.” (Salamo 145:10-12) Ae, ka tutu aere tatou kia akapaapaa ei ia Iehova i te ngai tangata e kia akatapu i tona ingoa ki mua i te au tangata ravarai. Noatu rai me e tokoiti ua e akarongo kia tatou, na ta tatou akakitekiteanga tiratiratu i te tuatua ora ra e apai mai i te akapaapaaanga kia Iehova ra.
13. Eaa te akakeu ra ia tatou kia akakite atu ki etai ke ra i te manako anga no te ora?
13 Ka tutu aere katoa tatou no te aroa i te au tangata e kia kopae ke ei i te apa i te toto ra. (Ezekiela 33:8; Mareko 6:34) Akapiri katoaia ki teianei ko te au tuatua a Paulo i tana tuatuaanga no te aronga i vao ake i te putuputuanga Kerititiano ra: “E kai ou oki au na te Eleni, e na te tangata ke ke; na te aronga pakari, e na te kite kore.” (Roma 1:14) Kua manako ngakau a Paulo e e kaiou tana i te au tangata tana i akakite atu i te tuatua meitaki kia ratou ra, i te mea ko te anoano ia o te Atua “i te tangata katoatoa kia ora.” (1 Timoteo 2:4) I teia tuatau, te manako ngakau nei tatou i taua aroa rai no te apainga ki to tatou tangata tupu. No to Iehova aroa i te au tangata kua akakeu iaia kia tono mai i tana Tamaiti ki te enua nei kia mate no ratou. (Ioane 3:16) Ko tetai atinga maata te reira. Te aru ra tatou i to Iehova aroa ia tatou e akapou tuatua ra e te tauta anga i te tuatua anga ki tetai atu i te tuatua meitaki no te ora tei akatumuia ki runga i te atinga o Iesu.
14. Akapeea ta te Pipiria akataka anga i te ao i vao ake i te putuputuanga Kerititiano ra?
14 Kua manako atu te Au Kite o Iehova i to ratou au oa tangata penei ei au mana no te taeake anga Kerititiano ra. Ka tika tatou kia tutu aere ma te mataku kore, inara kare to tatou mataku kore i te tu akariri atu. Ko te tika, te taiku ra te Pipiria i etai au tuatua ketaketa i te tuatua anga no to teianei ao. Ko te tuatua “teianei ao” te taikuia ra e Paulo i roto i tetai tu tau kore i tana tuatuaanga no “te pakari oki o teianei ao” e te “anoano o teianei ao.” (1 Korinetia 3:19; Tito 2:12) Kua akamaara katoa atura Paulo i te au Kerititiano o Ephesia e i to ratou aaere anga “i muatangana ra ta to teianei ao ra,” kua “mate” ratou i te pae vaerua. (Ephesia 2:1-3) Ko teianei au tataanga e etai atu mei ia ratou ra te rotai ra ma te au tuatua a te apotetoro ko Ioane: “Te vai ua nei rai to te ao ravarai i raro ake i taua vaerua kino ra.”—1 Ioane 5:19.
15. No te aronga tataki tai i vao ake i te putuputuanga Kerititiano ra, eaa ta tatou kare e rave, e eaa ra ka kore ei?
15 Inara, kia maara, e ko taua au tataanga te taiku ra i te ao matauia nei tei takake ra mei te Atua, kare i te au tangata tataki tai ra. Kare te au Kerititiano e akava e ka akapeea tetai ua atu tangata i te akarongoanga i te tutuanga ra. Kare ia ratou tetai tumuanga no te akatakaanga i etai ua atu ra ei puakanio. Kare ia tatou te tika kia tuatua eaa te tupuanga me aere mai a Iesu e akataka i te au “mamoe” e te au “puaka-nio” ra. (Mataio 25:31-46) Ko Iesu te akava akataoongaia ra, kare ko tatou. Pera katoa oki, kua akaari mai te tupuanga e ko tetai papaki tei o oonu atura ki roto i te au tu akono kino rava kua ariki mai i te tuatua Pipiria, kua taui, e kua riro mai ei au Kerititiano ma te oraanga. No reira, noatu penei kare tatou i kimi i te pirianga oa ma tetai au tangata tataki tai ra, kare tatou e ekoko i te tuatua atu kia ratou no te manakonako anga Patireia me va mai tetai tuatau. Te tuatua ra te au Tuatua Tapu no etai aronga ia ratou e vaira ei akarongo kore, kua “akonoia no te ora mutu kore ra, kua akarongo anake ïa.” I te openga kua riro ei aronga akarongo. (Angaanga 13:48) Kare tatou e kite koai tei akonoia tae roa kia oronga atu tatou i te akakite anga—penei e manganui te au taime. Ma teianei i roto i te manako, ka akono tatou i te aronga kare ra i ariki ake i te tuatua no te ora ma te “maru marie” e “te kauraro marie,” ma te manakonakoanga e penei etai o roto ia ratou ra ka akarongo i te tuatua no te oraanga. —2 Timoteo 2:25; 1 Petero 3:15.
16. Eaa tetai tumu i anoano ei tatou kia akatupu i “te apii marie anga atu”?
16 Na te akatupuanga i te au tu karape meitaki ei au orometua ka akapapa i to tatou inangaro kia akakitekite i te tuatua meitaki. Ei akatutu anga: Ko tetai tarekareka anga me kare tamataora anga penei kare e rekaia e tetai tangata kare ra i kite i taua tarekareka anga ra. Inara ki tetai tei kite meitaki ra, e mea rekareka ia. Mei te reira katoa, te au Kerititiano tei akatupu maata ra i “te apii marie anga atu” ka akamaata atu i to ratou rekareka i te angaanga orometua ra. (2 Timoteo 4:2; Tito 1:9) Kua apii atura Paulo ia Timoteo: “E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e tika oki i te tua i te tuatua-mou ra.” (2 Timoteo 2:15) Akapeea tatou me akatupu i to tatou tu karape i te apiianga?
17. Akapeea ka raukai ia tatou ‘te kakianga’ no te kite Pipiria, e akapeea e puapingai ta tatou angaanga orometua i taua kite ra?
17 Ko tetai mataara na te raveanga i etai kite tika. Kua akamaroiroi maira te apotetoro ko Petero ia tatou: “Kia kaki tikai kotou mei te tamariki anau ou, i te u iro koreia ra, i te tuatua, kia pakari kotou i te reira.” (1 Petero 2:2) Ko tetai pepe ora meitaki ka kaki ua rai i te u. Inara, ko tetai Kerititiano penei ka umuumu ‘kia akatupu i te kakianga’ no te kite Pipiria. Ka rauka te rave i teia na te tatanu anga i te apiianga meitaki e te au ravenga tatauanga. (Maseli 2:1-6) Te tauta anga e te akoanga ia koe uaorai te umuumuia ra me riro tatou ei au orometua karape no te Tuatua a te Atua, inara ka apai mai taua au tauta anga i te au tutaki. Te mareka anga te aere maira mei te akara matatioanga i te Tuatua a te Atua ka akariro ia tatou kia kaka ma te vaerua o te Atua, kia inangaro i te tua kia etai ke atu i te au apinga ta tatou i apii.
18. Akapeea te akapapa anga a te au uipaanga Kerititiano ra ia tatou kia akono tika i te tuatua no te tuatua mou ra?
18 E tuanga puapinga maata katoa ta te au uipaanga Kerititiano ka oronga mai i ta tatou taangaanga karape i te Tuatua a te Atua ra. Me tatauia te au irava Pipiria i te tuatau o te akoanga i te ngai tangata ra e i etai atu uriurianga Tuatua Tapu, ka meitaki tatou kia aru atu i ta tatou uaorai Pipiria. Ka pakari tatou me manako maata atu i te au tuanga o te uipaanga ra, kapiti katoa i tei akono taka meitaki ra i ta tatou angaanga tutuanga ra. Kare tatou e tau kia manako meangiti mai i te puapinga no te au akakitekite anga ra, penei na te tukuanga ia tatou uaorai kia aere ke te manako. Ei reira katoa ka tau te akoanga ia koe uaorai e kia tamanako tikai. (1 Timoteo 4:16) Te patu ra te au uipaanga Kerititiano i to tatou akarongo, te tauturu ra ia tatou kia akatupu i tetai kaki anga no te Tuatua a te Atua, e kia tereni oki ia tatou kia riro ei aronga inangaro i te akakitekite i te tuatua meitaki ra.
Ka Rauka ia Tatou kia Irinaki i ta Iehova Turu Anga
19. Eaa ra i puapinga maatai kia rave putuputu i te angaanga tutu aereanga?
19 Te au Kerititiano te “kaka ra i te vaerua” e te inangaro ra kia akakitekite i te tuatua meitaki ka tauta kia rave putuputu i te angaanga orometua. (Ephesia 5:15, 16) E tika te tuku tuke ra te au turanga, e kare te katoatoa e akono kia aiteite te tuatau i teianei angaanga akaoraanga. (Galatia 6:4, 5) Inara, penei e maata atu te puapinga o te tuatua no to tatou manakonakoanga kia etai ke ra i te maata o te tuatau akapouia e tatou i te angaanga tutuanga ra. (2 Timoteo 4:1, 2) Ko te maata atu ta tatou tutu anga ko te maata atu ia to tatou ariki anga i te puapinga maata o teianei angaanga. (Roma 10:14, 15) Ka tupu to tatou inangaro e te manako ngakau no te au oa ta tatou ka aravei putuputu ma te au tangata ngakau tae te aue ra e te ngunguru ra e kare ra oki o ratou manakonakoanga.—Ezekiela 9:4; Roma 8:22.
20, 21. (a) Eaa te angaanga te vaira ki mua ia tatou nei? (e) Akapeea ta Iehova ra turuanga i ta tatou au tauta anga?
20 Kua oronga irinaki mai a Iehova kia tatou i te tuatua meitaki. Ko teianei te angaanga mua i rauka ia tatou mei ko mai iaia ra “e oa rave angaanga” nona. (1 Korinetia 3:6-9) Te inangaro nei tatou kia akatupu i teianei apainga orongaia mai e te Atua ma te ngakau katoa ra, ki te meitaki te ka rauka ia tatou nei. (Mareko 12:30; Roma 12:1) Te vaira etai e manganui te aronga akonoia no te ora mutu kore i te ao nei tei kaki ra no te tuatua mou. E maata te angaanga no te rave, inara ka rauka ia tatou kia irinaki i ta Iehova turu anga ia tatou e rave ra kia oti meitaki ta tatou angaanga orometua.—2 Timoteo 4:5.
21 Te oronga maira Iehova i tona vaerua e te akapapa ra oki ia tatou ma “te koke a te vaerua ra,” koia te Tuatua a te Atua. Ma tana tauturu ka rauka ia tatou kia akatuera i to tatou vaa ‘kia tuatua atu te vaa ma te mataku kore, kia akakite atu i te tuatua ngaro ra i te evangelia.’ (Ephesia 6:17-20) Kia tuatuaia no tatou ta te apotetoro ko Paulo i tata ki te au Kerititiano i Tesalonia ra: “I te mea kare ta matou evangelia i tae tuatua vaa ua atu ia kotou na, ma te mana katoa ra, e ma te Vaerua Tapu, e ma te kite pu tikai.” (1 Tesalonia 1:5) Ae, e akakitekite tatou i te tuatua meitaki ma te inangaro tikai!
Tetai Akamanako Akaou Anga Poto
• No te au apiapi anga o te oraanga, eaa te ka rauka kia tupu ki to tatou maroiroi i te angaanga orometua?
• I roto i teea tu i tau ei to tatou inangaro kia akakitekite i te tuatua meitaki kia aite ki tetai “ai ka” i to tatou ngakau ra?
• Eaa te au tu manako tau kore ki te angaanga orometua te ka tau tatou kia kopae ke?
• Ei mea matauia, eaa te manako tau no tatou no te aronga kare ra i piri mai ki to tatou akarongo?
• Akapeea ta Iehova tauturu anga ia tatou kia tamou marie i to tatou tu totomapu i te angaanga tutu aere anga ra?
[Au Uianga Apii]
[Au Tutu i te kapi 9]
Te aru ra te Kerititiano i te maroiroi o Ieremia raua ko Paulo
[Au Tutu i te kapi 10]
Te akakeuia ra to tatou inangaro i te angaanga orometua na te aroa i te Atua e te tangata tupu