Ruruanga Ua No Te Tuatua Mou Patireia

“Ei te popongi ka ruru ei i taau ua, e ei te aiai auraka e tāpu ua i to rima.”​—KOHELETA 11:6.

1. I teea tu te ruru ua ra te au Kerititiano i teia tuatau?

E TUANGA puapinga maata te tanutanu i te taiate taito Epera ra. No reira ra a Iesu, tei akapou ra i tona oraanga katoa ei tangata ki roto i te Enua Taputouia ra, kua tauru katoa i te au tumu tanutanu ra ki roto i tana au akatutu anga. Ei akatauanga, kua akaaite atura aia i te tutu anga i te tuatua meitaki o te Patireia o te Atua ra ki te ruruanga ua. (Mataio 13:​1-9, 18-23; Luka 8:​5-15) Tae mai ki teia tuatau nei, me te noo ra tatou ki roto i tetai taiate tanutanu me kare ainei, ko te ruruanga i te ua vaerua na roto i teianei tu ko te angaanga puapinga maata ia ta te au Kerititiano ka rave.

2. Akapeea te puapinga maata o ta tatou angaanga tutu aere, e eaa etai au apinga te raveia nei i teia tuatau kia oti ei te reira?

² Ko tetai angaanga maata ia kia o atu ki roto i te ruruanga tuatua mou Pipiria i teia tuatau openga nei. Kua akakite meitaki maira Roma 10:​14, 15 i te puapinga maata o teianei angaanga: “Eaa oki ratou e kite ei i te akakite kore? Eaa oki ratou e tikaʼi kia akakite kia kore ratou e ungaia? Koia oki tei tataia ra e, ‘Ko te manea o te vaevae  o te aronga i apai mai i te tuatua reka o te au, ko tei apai mai i te evangelia o te meitaki ra e!’” Kare i tere atu te puapinga maata kia aere atu ki mua ma tetai tu manako papu i te akatupuanga i teianei angaanga orongaia maira e te Atua. No taua tumu ra te taruku puia nei te Au Kite o Iehova i te maani anga e te tua anga te au Pipiria e te au puka tauturu i te apiianga Pipiria i roto i te 340 reo. Ko te akapapa anga i teianei au apinga te umuumuia ra e tere atu i te 18,000 aronga rave angaanga i to ratou opati maata e i te au opati manga oki i te au enua ke ke. E vaitata i te ono mirioni Au Kite te piri atura ki te tuaanga i teianei au puka Pipiria takapini te ao katoa nei.

3. Eaa te raveia ra kia oti na te ruruanga i te tuatua mou Patireia?

³ Eaa te uua anga no teianei angaanga pakari? Mei to te tuatau uua mairai o te akonoanga Kerititiano, e manganui i teia tuatau te takave ra i te tuatua mou. (Angaanga 2:​41, 46, 47) Inara, e maata atu te puapinga, i to te numero maata te tauturu nei teianei akakite anga maata i te akatapu anga i te ingoa o Iehova e ki tona akatika anga ia ei Atua mou anake ra. (Mataio 6:9) Pera katoa, ko te kite i te Tuatua a te Atua ra te akameitaki maira i te au oraanga o te aronga e manganui e ka rauka kia taki atu ki te ora no ratou.​—Angaanga 13:47.

4. Eaa te maata te akamanako anga te au apotetoro ra no te au tangata ta ratou i tutu atura?

⁴ Kua kite meitaki te au apotetoro ra i te puapinga maata no te oronga i te tuatua meitaki ra, e kua manako ngakau oonu ratou no te aronga ta ratou i tutu atura. Te taka meitaki ra teia i te au tuatua a te apotetoro ko Paulo, i tana tata anga: “No te maata o to matou aroa ia kotou, kua tika rava ia matou i te oronga atu i te evangelia a te Atua ia kotou na, e auraka oki i te reira anake, ko matou katoa uaorai oki, no te mea kua riro kotou ei akaperepere na matou.” (1 Tesalonia 2:8) I te akakiteanga i taua manako tika ra no te au tangata, te aru ra Paulo ratou ko etai atu apotetoro ra ia Iesu e te au angera o te rangi ra, tei o tika atura i teia angaanga akaoraanga. E akamanako akaou tatou i te au tuanga puapinga maata a teia au tavini i te rangi ra i rave i te ruruanga i te tuatua mou Patireia, e kia kite tatou akapeea ta ratou akatauanga i te akamaroiroi anga ia tatou kia akatupu i ta tatou tuanga.

Ko Iesu​—Tei Ruru i te Tuatua Mou Patireia

5. Eaa te angaanga ta Iesu uaorai i rave maata iaia i te enua nei?

⁵ Ko Iesu, tetai tangata apa kore ua, iaia te mana kia oronga e manganui te au apinga meitaki i te tu apinga na te au tangata o tona tuatau ra. Ei akatauanga, ka rauka ua iaia te takore atu i te au rapakau anga tarevake o tona tuatau ra, me kare ka rauka iaia kia akatere atu i te kite o te tangata i etai atu tu taineti ra. Inara kua akataka meitaki atu aia i te tuanga mua o tana angaanga orometua ra e ko tana angaanga ko te tutuanga evangeria. (Luka 4:​17-21) E i te vaitata anga ki te openga o tana angaanga orometua, kua akataka atu aia: “I anau mai ei au nei, i aere mai ei au ki te ao nei, e akakite i te tuatua-mou.” (Ioane 18:37) No reira kua rave uaorai aia i te ruruanga te au ua no te tuatua mou Patireia. Te apiianga i te aronga o tona tuatau ra no te Atua e Tana au akakoroanga e mea maata atu te puapinga i tetai ua atu kite apiianga ta Iesu i oronga atu kia ratou ra.​—Roma 11:​33-36.

6, 7. (a) Eaa te angaanga maata ta Iesu i rave i mua ake i tona kake anga ki te rangi, e akapeea tana akaputuanga i te reira? (e) Akapeea to Iesu tu manako i te angaanga tutu aere i te akakeu anga ia koe uaorai?

⁶ Kua taiku a Iesu iaia uaorai ko Tei ruru i te tuatua mou Patireia ra. (Ioane 4:​35-38) Kua akatotoa aia i te au ua no te tuatua meitaki i te au tuatau ravarai. Noatu rai iaia e mate atura i runga i te rakau ra, kua akakite aia i te tuatua meitaki no te parataito i te tuatau ki mua i te enua nei. (Luka 23:43) Pera katoa, ko tona manako anga oonu e kia tutu aereia te tuatua meitaki auraka kia akaotiia i tona matenga ki runga i te rakau tamamae anga ra. I mua ake i tona kakeanga ki te rangi, kua akaue aia i te au apotetoro ra kia rave ua atu i te ruru anga ua no te tuatua mou Patireia ra e kia akariro te au tangata ei pipi. I reira kua oronga atura Iesu i tetai taputou meitaki. Kua na ko atura aia: “E i na, tei vaitata ua ra au ia kotou, e tae ua atu ki te openga o teianei ao.”​—Mataio 28:​19, 20.

⁷ Ma teianei au tuatua kua oronga mai a Iesu i tetai taputou kia turu, kia arataki, e kia paruru oki i te angaanga no te tutuanga i te tuatua meitaki “i te au rā ravarai e tae ua atu ki te openga o te akatereanga o te au mea nei.” Tae roa mai ki to tatou uaorai tuatau nei, te akono tamou marie ra Iesu i tetai manako anga i te angaanga tutu  evangeria. Koia to tatou Arataki, akaaere i te ruruanga i te tuatua mou Patireia. (Mataio 23:10) Ei Upoko no te putuputuanga Kerititiano, tei iaia te apainga ki mua ia Iehova no teianei angaanga i te ao katoa nei.​—Ephesia 1:​22, 23; Kolosa 1:8.

Te Akakite ra te Au Angera i te Evangeria Mataora

8, 9. (a) Akapeea ta te au angera akakite anga i te manako tikai i te au apinga no te au tangata nei? (e) I teea tu penei ka tuatuaia e e akaraanga teata tatou ki te au angera ra?

⁸ I ta Iehova anga maianga i te enua, “kua maeva ua te [au angera] a te Atua i te rekareka.” (Iobu 38:​4-7) Mei reira mairai, kua akakite teia au mea ora o te rangi ra i tetai manako anga aroa no te au apinga a te tangata nei. Kua taangaanga a Iehova ia ratou ei akakite atu i te au akakite anga tu-Atua ki te au tangata nei. (Salamo 103:20) Ko tetai tika maata teianei me kapitiia atu ma te akatotoaanga i te tuatua meitaki i to tatou tuatau nei. I te akakiteanga tei orongaia ra kiaia, kua akara atura te apotetoro ko Ioane i “tetai angela i te rere anga na rotopu i te mareva nei, ma te evangelia mutu kore, e tutu ki te aronga e noo i te ao nei, ki te  pa enua katoa, e te au kopu, e te au reo, e te au iti-tangata, i te na ko anga ma te reo maata, Ka mataku i te Atua, e akakakā iaia; kua tae oki ki te ora akautunga anga nana.”​—Apokalupo 14:​6, 7.

⁹ Te taiku ra te Pipiria i te au angera ei au “tavini vaerua anake, i tonokia ei matuapuru i te aronga tuanga i te ora ra.” (Ebera 1:14) I te rave anga inangaro tikai te au angera i ta ratou angaanga akapapaia ra, kua rauka ia ratou te akara mai ia tatou e ta tatou angaanga. Mei te mea rai tei runga i tetai paata teata akara meitakiia, ka rave tatou i ta tatou angaanga ki mua i tetai aronga matakitaki mei te rangi maira. (1 Korinetia 4:9) Mei teaa ra te meitaki e te marekaanga kia kite e kare tatou e angaanga ko tatou anake ua ei aronga ruru no te tuatua mou Patireia ra!

Ka Inangaro Tatou kia Akatupu i ta Tatou Tuanga

10. Akapeea e raukai te apiianga tau ia Koheleta 11:6 ra kia akapiriia atu ki ta tatou angaanga evangeria ra?

¹⁰ Eaa ra a Iesu e te au angera i manako maata mai ei i ta tatou angaanga? Kua oronga mai a Iesu i tetai tumu i tana tuatua anga: “E karanga atu au kia kotou, mei te reira katoa te tu o to te au angela a te Atua ra rekareka, kia tataraara te tangata rave ara okotai ra.” (Luka 15:10) Te oronga katoa ra tatou i taua manako tika ra ki te au tangata. No reira, ka rave tatou i te meitaki e rauka ia tatou kia akatotoa i te au ua no te tuatua mou Patireia i te au ngai ravarai. Ka rauka te au tuatua ia Koheleta 11:6 kia kapitiia ki ta tatou angaanga. I reira te akamaroiroi maira te Pipiria ia tatou: “Ei te popongi ka ruru ei i taau ua, e ei te aiai auraka e tāpu ua i to rima: kare oki koe i kite i te ka tupu, me ko teia, me tera, peneiake ko te meitaki kapipiti katoa ra.” E tika oki, no tetai tangata okotai tei ariki i ta tatou tuatua penei e au anere ua atu me kare e au tauatini ua atu tei kopae ke i te reira. Inara mei te au angera rai, ka rekareka tatou me ariki mai “tetai tangata rave ara okotai” i te tuatua no te ora ra.

11. Mei teaa ra te meitaki no te taangaanga i te au puka akatumuia ra ki runga i te Pipiria?

¹¹ E maata te o atura ki roto i te tutuanga i te tuatua meitaki ra. Tetai tauturu puapinga maata i teia angaanga ko te au tumu Pipiria neneiia te taangaangaia ra e te Au Kite o Iehova. I etai au tu, ko teianei au puka te aite katoa ra mei te au ua te akatotoaia ra i te au ngai ravarai. Kare tatou e kite e ki ea ratou e tupu meitaki ei. I etai tuatau penei ka tauiia atu tetai puka i mua ake ka tatauiai te reira. Penei na Iesu ratou ko te au angera ra e arataki te au tupuanga i etai atianga kia akariro kia tupu teia no te puapinga o te aronga ngakau tika ra. E akamanako ana i etai au tupu anga te akatutu maira e akapeea a Iehova te rave anga i te au tupu anga meitaki e tei kore i manakoia i te taangaanga i te au puka tei akarukeia atura ki te au tangata.

Te Angaanga a te Atua Mou Ra

12. Akapeea tetai makatini takere ra i te tauturu anga i tetai ngutuare tangata kia riro kia kite ia Iehova ra?

¹² I te 1953, kua aere ke atura Robert raua ko Lila, e ta raua tamariki mei tetai oire maata ki roto i tetai are takere i tetai pama i te tuanga kare i maata te tangata i Pennsylvania, U.S.A. I muri  poto ake i te nooanga ki roto, kua iki a Robert kia maani i tetai pia paianga i raro ake i tetai arakakenga. I muri ake i te kiriti anga i etai papa rakau, kua kitea e ia i muri ake i te paruru, etai au aenga pepa, e te au ungaunga walnut na te au kiore rikiriki i akaputu ki reira ma etai atu teita. I reira, i roto i taua au apinga ra, te vaira tetai makatini The Golden Age. Kua mareka a Robert i tetai atikara no te tumu akonoanga tamariki ra. No tona manako maata e te taka meitaki, te arataki anga Pipiria i roto i taua makatini ra e kua tuatua atu aia kia Lila e ka kapiti atu raua ki “te akonoanga o The Golden Age.” E etai epetoma tokoiti ua, kua tae atu etai Au Kite o Iehova ki to raua ngutupa, inara kua karanga atura Robert e te inangaro ra tona ngutuare tangata i “te akonoanga o The Golden Age” anake ua. Kua akataka atura aua nga Kite ra e i teianei e ingoa ou to The Golden Age, ko te Awake! Kua akamata a Robert raua ko Lila i te apii putuputu i te Pipiria ma te Au Kite ra, e kua papetitoia raua i muri akera. Kua rave raua i reira i te ruru te au ua no te tuatua mou ki roto i ta raua tamariki e kua maata te kokoti anga. I teia tuatau, e tere atu i te 20 mema o teia pamiri, kapiti katoa oki nga tamariki e itu a Robert raua ko Lila, kua papetitoia ei au tavini no te Atua ko Iehova.

13. Na teaa i akakeu i nga tokorua i Puerto Rico kia akatupu i te inangaro i te Pipiria ra?

¹³ I etai 40 mataiti kua topa, ko William raua ko Ada, nga tokorua akaipoipoia no Puerto Rico, kare o raua manako kia apii i te Pipiria. Me topapa atu te Au Kite o Iehova i to raua ngutupa, kua akameamea ua aua nga tokorua ra e kare raua i te kainga. I tetai ra kua aere atu a William ki tetai ngai akaputu anga apinga kia oko i tetai apinga anoanoia ra no te ripea i tetai ngai i tona ngutuare. Iaia e akaruke atura i reira, kua kite atu aia i tetai puka matie te vaira i roto i tetai vairanga teita maata. Ko te puka Religion ia, tei neneiia ra e te Au Kite o Iehova i te 1940 maira. Kua apai atu a William i taua puka ra ki te kainga e kua marekaia i te tatau anga i te tuke anga i rotopu i te akonoanga tika e te pikikaa ra. I tetai atu taime i tae atu ei te Au Kite o Iehova, kua akarongo mataora atura William raua ko Ada i ta ratou tuatua e kua akamata i te apii i te Pipiria ma ratou ra. I etai marama i muri akera kua papetitoia raua i te Akaputuputuanga Pa Enua Anoano Tu-Atua i te 1958 ra. Mei reira mai rai, kua tauturu raua e tere atu i te 50 au tangata tataki tai kia riro mai ei tuanga no to tatou taeake anga Kerititiano nei.

14. Mei tei akaariia maira i tetai tupu anga, eaa te ka rauka i ta tatou au puka akatumuia ra ki runga i te Pipiria?

¹⁴ E 11 ua mataiti a Karl e manga tu kanga oki tona. I tana akara anga e putuputu tona o atu anga ki te taitaia. Ko tona metua, e tangata tutu i te akonoanga Methodist Tiamani, kua apii atu iaia e ka tutungiia te au tangata kikino ki era i muri ake i te matenga. No reira e mataku maata to Karl i te era. I tetai ra i te 1917, kua kite atura Karl i tetai aenga pepa neneiia ra i runga i te arataa e kua apai akera i te reira. I tana tatau anga i te reira, kua kite viviki atura ona mata i te uianga: “Eaa a era?” Ko taua pepa ra e patianga ki  tetai akoanga papuriki no runga i te tumu ko era, tei raveia e te Aronga Apiipii Pipiria, te matauia nei i teianei ko te Au Kite o Iehova. E vaitata i te mataiti i muri iora, i muri ake i etai au apiianga Pipiria e manganui kua papetitoia a Karl, e kua riro mai e ko tetai o te Aronga Apiipii Pipiria. I te 1925 kua patiia mai aia kia rave angaanga i te opati maata o te Au Kite o Iehova i teianei ao​—te ngai e tavini ra aia i teianei. Ko tetai angaanga Kerititiano tei totoa ra no te tere atu i te varu rau ngauru mataiti tei akamataia maira e tetai aenga pepa i runga i te arataa ra.

15. Eaa ta Iehova ka rauka kia rave, me kite aia e te tau ra?

¹⁵ E tika ra, e mamao ke atu i te kite tangata kia akataka me koia ia e eaa oki te maata te o atu anga te au angera ki roto i teianei au tupu anga. Inara, kare tatou e tau kia ekoko e te rave ra a Iesu e te au angera i tetai tuanga angaanga i te tutuanga e ka rauka oki ia Iehova i te arataki i etai au tika mei tana i kite ra e te tau ra. Ko teianei e etai atu au tupuanga aiteite e manganui te akatutu maira i te manakoanga no te meitaki no ta tatou au puka penei i muri ake i te aerenga atu ki to tatou nga rima.

Kua Orongaia kia Tatou Tetai Apinga Okomaata Nei

16. Eaa ta tatou ka kite mei te au tuatua mai ia 2 Korinetia 4:7 ra?

¹⁶ Kua tuatua ra te apotetoro ko Paulo no tetai “apinga nei i te āriki karakaraea nei.” Taua apinga nei ko te angaanga tutu aere tei orongaia mai e te Atua ra, e ko te au ariki karakaraea ko te au tangata ta Iehova i oronga atura i teia apinga okomaata nei. I te mea e apa ua taua au tangata ra e te kotinga ra oki, kua tuatua ua atura Paulo e ko te tupu anga o taua angaanga orongaia ra kia ratou e “kia riro te mana maata meitaki nei ki te Atua, auraka ia matou.” (2 Korinetia 4:7) Ae, ka rauka ia tatou kia irinaki ia Iehova kia oronga mai i te mana anoanoia kia raukai ia tatou kia akaoti i te angaanga orongaia maira.

17. Eaa ta tatou ka kite ia tatou e ruru ra i te au ua tuatua mou Patireia ra, e eaa tatou i tau ei kia tamou marie i te tu manako papu ra?

¹⁷ E putuputu tatou i te tuku atinga. Penei e rave anga ngata me kare e manamanata kia angaanga i etai ngai. Te vaira etai ngai te akaraanga manako kore ua ra te maata o te tangata e te riri ua. E maata te tauta anga penei ka akapouia i taua au ngai ra ma te kore ua e autu anga. Inara kare te tauta anga i maata rava me te maata ra tei umuumuia. Kia maara, ko te ua taau e ruru ra ka rauka kia oronga te mataora ki te au tangata i teianei pera katoa oki e ora mutu kore i te tuatau ki mua. E manganui te au taime i kiteai te tika o te au tuatua ia Salamo 126:6 ra: “Ko tei aere oki ma te aue ra, i te apai aere anga i te ua e ruru aere ra, ka oki akaou mairai ïa ma te rekareka, i te apai katoa anga mai i tana ra au ruru.”

18. Akapeea e raukai ia tatou kia matakite i ta tatou angaanga orometua ra, e eaa tatou i tau ei kia pera?

¹⁸ E mou tatou i te au tuatau tau ravarai kia ruru maoraora i te au ua no te tuatua mou Patireia. Auraka e ngaropoina ia tatou e, noatu ko tatou te tanu ra e te tamauu ra i te au ua, na Iehova ra ia e akatupu mai. (1 Korinetia 3:​6, 7) Inara, mei ta Iesu e te au angera ra i rave kia oti ta ratou tuanga angaanga, te manako maira Iehova ia tatou kia rave kia oti tikai ta tatou angaanga orometua. (2 Timoteo 4:5) Kia matakite marie tatou i ta tatou apiianga, i to tatou tu manako, e to tatou inangaro i te angaanga orometua. No teaa ra? Te pau maira Paulo: “Tei te akapera oki e oraʼi koe, e te aronga katoa e akarongo mai ia koe ra.”​—1 Timoteo 4:16.

Eaa ta Tatou i Kite?

• Na roto i teea au tu ta tatou angaanga ruruanga i akatupu mai ei i te au tupu anga memeitaki?

• Akapeea te o atuanga a Iesu Karaiti ratou ko te au angera ra ki roto i te angaanga evangeria i teia tuatau?

• Eaa tatou i tau ei kia maoraora ua ei aronga ruru i te tuatua mou Patireia ra?

• Me rokoia mai tatou e te tu manako kore me kare te tu riri i ta tatou angaanga orometua, na teaa e akakeu ia tatou kia akakoromaki marie?

[Au Uianga Apii]

[Tutu i te kapi 15]

Mei te au pama i Iseraela taito, te akatotoa oronga ua ra te au Kerititiano i teia tuatau i te au ua tuatua mou Patireia

[Tutu i te kapi 16, 17]

Te maani ra e te tua aere ra te Au Kite o Iehova i te au puka tuke tuke maata tei akatumuia ra ki runga i te Pipiria i roto i te 340 reo