Te au Tiaki Kerititiano, kia ‘Akamaora ua i to Kotou Ngakau’!

“KO Iehova toku tiaki; kare rava au e ngere.” Ma taua au tuatua, kua akakite atu a Davida i tona irinaki anga ki tikai ki roto i tona Atua. Kua arataki a Iehova iaia, i te tuatuaanga pae vaerua, ki te “au ngai ngangaere ruperupe” e “te pae i te vai taʼe marie,” te aratakianga iaia “na te au ara tuatua-tika.” I te koropini angaia e te au aronga patoi, kua rauka mai ia Davida te turu anga e te akamaroiroi anga, te akakeuanga iaia kia tuatua kia Iehova: “Kare rai au e mataku i te kino: tei vaitata katoao koe iaku.” Te rauka anga tetai Tiaki Teitei Rava, kua inangaro a Davida kia ‘noo i roto i te are o Iehova e roa ua atu ona puke rā.’​—Salamo 23:​1-6.

Kua kite katoa te Tamaiti anau tai a te Atua i te akono anga aroa a Iehova, e kua akaata apa kore ua aia i teia akono anga i roto i tana au rave anga ma tana au pipi i tona noo anga i te enua nei. No reira te au Tuatua Tapu i tapai iaia te “tiaki mamoe meitaki ra,” e “te tiaki mamoe maata.”​—Ioane 10:11; Ebera 13:​20, 1 Petero 5:​2-4.

Te tiaki ra a Iehova raua ko Iesu Karaiti i te aronga tei inangaro ia raua. Te akaataia ra ta raua tiakianga, i tetai tuanga, i roto i te akonoanga aroa o te au tiaki tauturu i roto i te putuputuanga. Kua tuatua Paulo ki taua au tiaki tauturu ra i te tuatuaanga aia e: “E teianei, e matakite ia kotou uaorai, e te anana katoa i akariroiaʼi kotou e te Vaerua Tapu ei tiaki i rungao ra, kia akaangai oki kotou i te ekalesia a te Atua, ko tana i oko i te toto o tana uaorai [tamaiti].”​—Angaanga 20:28, akaaite ia NW.

Kare i te mea mama ua te tiakianga i te anana kia tau ki te rave anga tei akanooia e Iehova raua ko Iesu Karaiti, inara e mea puapinga rava atu ia i teianei i to mua ana. E akamanako ana i te mirioni ua atu tei papetitoia i roto i te nga mataiti e toru i topa ake nei! Kare tei teia aronga ou te tu pae vaerua tei rauka maira mei te au mataiti o te angaanga. E akamanako, katoa oki, i te au Kite te vaira ei tamariki me kare ei au mapu. Ka anoano ratou i te akonoanga kare mei to ratou nga metua ua mari ra mei te au tiaki tauturu katoa i te putuputuanga.

Ae, ka kite te Kerititiano katoatoa i te au taomi anga o vao, kapiti katoa i te taomi anga a te oa. Ka tauta te katoatoa i te kopae i te utiuti anga pakari kia aru i te mataara akarekareka anga ia koe uaorai o teianei ao. I tetai au enua, penei kua manako paruparu tetai au papuritia o te Patireia no te ariki kore anga ki ta ratou tuatua. E manganui te au papuritia e au makimaki tikai to ratou. Penei te au manamanata no te pae moni te apai ke ra i te inangaro o etai atu kia kimi i te Patireia na mua. E tika, ko tatou katoatoa​—kapiti katoa te aronga tei roa i roto i te tuatua mou​—ka anoanoia e te tau ra no te tauturu a te au tiaki aroa ra.

Te Akakeu Anga Tau

Kua akamaroiroiia te au Kerititiano i te anere mataiti mua: ‘Kia akamaora ua i to kotou ngakau’! (2 Korinetia 6:​1-13) Ka tau te aronga pakari Kerititiano kia aru i teia akoanga i ta ratou akonoanga i te au angaanga tiaki. Akapeea ratou i te rave anga i te reira? E akapeea te au orometua tauturu, te maata anga o ratou ka riro mai ei au tiaki?

Me ka riro mai te aronga pakari Kerititiano ei akameitakianga ki te anana, ka tau ratou kia akakeuia kia maata atu i te manako e e angaanga ua. Kua akoia ratou: “Ka angai i te anana a te Atua i roto ia kotou na, ka rave i te taoonga tiaki auraka ra no te akaueue, no te anoano ra; auraka no te apinga tika kore ra kia rauka, no te tae tikai ra o te ngakau.” (1 Petero 5:2) Ka kapiti katoa mai ki te tiakianga meitaki i reira te anoano e te  ngakau tae tikai kia tavini i etai atu. (Ioane 21:​15-17) Te aiteanga te kite anga i te au anoano o te mamoe e te oronga anga viviki i te tauturu. Ko te aite anga te akaarianga i te au tu Kerititiano memeitaki koia oki te ua o te vaerua a te Atua i te akonoanga i etai atu.​—Galatia 5:​22, 23.

I etai taime kua kapiti katoa te tiakianga i te atoroanga i te au taeake i to ratou au kainga. * Inara te au tiaki tei ‘maora ua i to ratou ngakau’ te oronga ua ra ia ratou uaorai. Koia oki, kua rave maata atu ratou i te au atoro anga tiaki ua. Kua rave ratou i te au atianga kia tiaki i etai atu i roto i te anana.

Terenianga i Etai Atu kia Riro ei Au Tiaki

Ko tetai taeake, noatu tona mataiti, tei ‘inangaro i te taoonga episekopo ra, ka inangaro aia i te angaanga meitaki.’ (1 Timoteo 3:1) Kua akaari mai te au orometua tauturu e manganui i te inangaro kia itae no etai atu au angaanga meitaki. No reira, ka tauturu rekareka te aronga pakari i teia au taeake kia rave i teia takainga puapinga i te ‘inangaro anga i te taoonga episekopo ra.’ Te aiteanga o teia te terenianga ia ratou kia riro mai ei au tiaki meitaki.

No te aru vaitataanga i te au turanga teitei o te Atua, kare ta Iehova putuputuanga Kerititiano e taparuparuia e te au tiaki pikikaa mei tei akatakaia maira ia Ezekiela 34:​2-6. Kua puapinga kore tikai ratou i te mata o Iehova e e tika tikai ia. Kare ratou i angai i te anana, mari ra kua angai ia ratou uaorai. Kare ratou i akamaroiroi i te maki, i tauturu i te apikepike, i tapeka i te mea atiati ra, me kare i akaoki mai i te aronga totoa me kare i tei ngaro ra. Kua angaanga ratou mei te au ruko rai i to te au tiaki, kua takinokino ratou i te mamoe. Kua totoa aere te mamoe akono koreia, te aere puapinga kore ua ra ma te kore e tiaki ei akono ia ratou.​—Ieremia 23:​1, 2; Nahuma 3:18; Mataio 9:36.

Kare mei te reira au tiaki tiratiratu kore ra, kua aru te au tiaki Kerititiano i to Iehova akatauanga. Ka tauturu ratou i te arataki i te mamoe ki te “ngai ngangaere ruperupe” pae vaerua e te “pae i te vai taʼe marie.” Kua tauta ratou i te arataki ia ratou ki te “au ara tuatua-tika” na te tauturuanga ia ratou kia marama meitaki i te Tuatua a Iehova e te rave anga i te reira. Ka rauka ia ratou i te rave tau tikai i teia no te mea kua ‘tau ratou kia apii.’​—1 Timoteo 3:2.

Te maata anga i te apiianga a te aronga pakari ka raveia mai mei te paata i roto i te au uipaanga a te putuputuanga. Inara, ka apii katoa te aronga pakari tetai ki tetai. Inara, kua meitaki tetai i te apiianga tetai ki tetai, e kua meitaki tetai atu i te rave anga i te au tuatua ki te katoatoa. Inara ko tetai kite iti ua i roto i tetai turanga o te apiianga kare i te tumu kia akaateaia te tangata ei puapii. Kua apii te aronga pakari, na roto i te au mataara tei tuera kia ratou, kapiti katoa mai te angaanga tiaki. Kua raveia tetai angaanga tiaki i te turanga tau, ei akatauanga, te au atoro anga akapapaia. Inara ka rave katoa ia te maata anga o te au angaanga tiaki na roto i tetai mataara kare i akapapaia, ka puapinga maata katoa te reira.

E Au Tiaki e e Au Puapii i te Au Taime Katoatoa

Ka anoano tetai taote i te kite kia rave i tana angaanga. Inara ka rekareka tana au tangata maki me akaari atu aia i te takinga meitaki, te aroa, te manako ngakau, e te ngakau tae. Ka tau teia au tu ei tuanga no tona tu tangata. Ko teia au tu rai ka tau kia riro mai ei tuanga no te tu o tetai puapii meitaki e te tiaki, e tuanga no tona tu i te au ra katoa. Ka papa tetai puapii tika tikai kia apii i te aronga takapini iaia i te au taime katoa. “Te tuatua ra i tuatuaia i te tuatau e tau ei, e meitaki roa ïa,” i na te Maseli 15:23. Penei ko te “tuatau e tau ei” ko te tuatau e tuatua mai ei aia mei te paata, i te tutu aereanga aia mei tetai are ki tetai are, me kare i te pukapuka anga aia i te Are Uipaanga Patireia me kare i runga i te terepaoni. E pera katoa, ka tauta tetai tiaki meitaki i te akaari atu i te au tu meitaki e te aroa i te au taime katoa, kare i te rave anga i te au atoro anga tiaki uaorai. I te ‘akamaora anga i tona ngakau,’ ka rave aia i te au tuatau tau kia tiaki i te mamoe, te oronga anga kia ratou i te akono anga ta ratou ka anoano i te tuatau tau. Ko teia ra te tumu e akaperepereiai aia i roto i te mata o te mamoe.​—Mareko 10:43.

Kua akamaara Wolfgang, ko tetai tangata pakari i teianei, i tetai atoro anga ki runga i tona ngutuare tangata e tetai orometua tauturu raua  ko tana vaine. Te karanga ra aia: “Kua rekareka tikai ta maua tamariki i te akono anga ta ratou i rauka mai e te tuatau ta matou e rekareka ana. Te tuatua nei rai ratou no runga i te reira.” Ae, kua akaari mai teia orometua tauturu e kua manako ngakau aia ia ratou; ‘kua akamaora ua aia i tona ngakau.’

Ko tetai atu atianga kia ‘akamaora ua i te ngakau’ na te atoroanga i te aronga maki, te tuku atu anga i tetai reta akamaroiroi anga, me kare na te terepaoni anga ia ratou​—tetai apinga kia akaari atu kia ratou e te aroa ra koe ia ratou! E oronga i te tauturu me anoanoia. Me inangaro ratou i te tuatua, e akarongo meitaki kia ratou. E tuatua no runga i te au mea tau, te au angaanga teokaratiki rekareka i roto i te putuputuanga i toou ngai e etai atu au ngai. E tauturu ia ratou kia akamanako no runga i te kaka anga o te tuatau ki mua tei tapapaia no te aronga tei inangaro ia Iehova.​—2 Korinetia 4:​16-18.

E Kapiti Atu ki te Au Atoro Anga Tiaki

I te akamanakoanga i te akakoroanga o te tiakianga, noatu e puapinga tikai te atoro anga akapapaia i te au taeake i to ratou kainga, e tuanga ua te reira no te angaanga tiaki. Ka ‘akamaora ua tetai tiaki aroa i tona ngakau’ na te akavaitata anga kiaia i te au atianga e te au taime katoatoa. Te pirianga maana tana i akatupu ma tona au taeake ka akapapu kia ratou e i te tuatau tumatetenga, kare ratou e mataku i tetai apinga  kino, te kiteanga e te aroa tikai ra to ratou taeake aroa, te tiaki Kerititiano, ia ratou.​—Salamo 23:4.

Ae, ko kotou e te au tiaki Kerititiano e ‘akamaora ua i to kotou ngakau.’ E akaari atu i te aroa ngakau tae ki to kotou au taeake​—e akamaroiroi ia ratou, e akaoraora ia ratou, e e akamaroiroi ia ratou i te pae vaerua i te au tu taau i kite. E tauturu ia ratou kia akatupu i te akarongo ngaueue kore. (Kolosa 1:23) Akameitakiia ma te au tiaki Kerititiano tei ‘akamaora ua i to ratou ngakau,’ kare rava te mamoe e ngere. Ka tauta ratou, mei ia Davida rai, kia noo ki roto i te are o Iehova e roa ua atu. (Salamo 23:​1, 6) Eaa atu ta tetai tiaki aroa ka inangaro?

[Tataanga Rikiriki i Raro]

[Pia i te kapi 30]

Te Au Tiaki Kerititiano

• E tavini ma te tu rekareka e te puareinga

• E angai e e akono i te anana

• E tauturu i etai ke kia riro mai ei au tiaki

• E atoro i te aronga maki e e akono ia ratou

• Te akara ra no te tauturu i to ratou au taeake i te au taime ravarai

[Au Tutu i te kapi 31]

Noatu i te tutu aere anga, i te au uipaanga, me kare i te au atianga tamataora, ko te aronga pakari e au tiaki i te au taime katoatoa