Ripoti a te Aronga Tutu Patireia

E Mea Akaperepere kia Iehova te Aronga Tei Inangaro Iaia

KUA kiteaia Lebanona no tona au apinga natura mei te tuatau Pipiria mairai. (Salamo 72:16; Isaia 60:13) E mea puapinga maata te au tumu arezi akaieie, kua kimiia ei apinga patuanga no tona manea, te kakara, e te pakari. I te anere mataiti mua, kua aere mai tetai apinga oko maata mei roto mai ia Lebanona. Kua ripoti te Evangeria a Mareko e mei Turia e Sidona, i te ngai taito ra o Lebanona “kua kite oki i te rongo o te au ravenga mana [a Iesu] ra, e kua aere maira iaia, e urupu maata.”​—Mareko 3:8.

E pera katoa i teia tuatau nei, kua tupu uua mai a Lebanona i te ua oko maata tikai i roto i te mata o Iehova. Te akakite mai nei i te au akakitekite anga te ka aru mai i teia.

• Kua patiia tetai mapu Kite ko Wissam tona ingoa kia rave i tetai tuatua e 30 miniti ki tona pupu apii. Kua manako a Wissam e e tuatau meitaki teia no te rave i tetai akakitekite anga. No reira kua rave aia i te puka Life​—How Did It Get Here? By Evolution or by Creation? e kua akapapa i tetai tuatua no runga i te tumu te anga mai anga. Inara, i te kiteanga i te au materia, kua karanga te puapii o Wissam e mei te mea e tumu manako puapinga tikai te reira, kua akatikaia Wissam kia akamaata atu i tana tuatua ki te 45 miniti.

I te akamata anga Wissam i tana tuatua, kua tapu tona puapii iaia e kua tikinaia atu te puapii maata. Kare i roa ana kua tae mai te puapii maata, e kua akamata akaou a Wissam. I te akarongo anga aia ki te au uianga ta Wissam i tuatua i roto i te akamata anga o tana tuatua, kua oraora tikai te puapii maata e kua karanga e ka tau kia rauka mai i te au tauira katoatoa tetai kopi o te tuatua.

I muri poto ua mai kua pati atu tetai puapii e kua kite i te tu oraora i roto i te pia apii e kua ui atu aia e eaa tei tupu. I te akakite anga ia atu kiaia, kua ui aia e me te akapapu ra Wissam i te anga mai anga me kore i te tupu ua anga. Kua pau ia mai e “te anga mai anga.” I te kiteanga e ko tetai Kite o Iehova a Wissam, kua karanga atu te puapii ki te pupu e: “Ka kite kotou i tana tuatua e ka turu te taineti i te anga mai anga, kare i te tupu ua anga.”

Kua rauka takere i teia puapii tetai kopi o te puka Creation e kua rave aia i te puka i roto i tana au tuatua i te apii teitei! I mua ake i te akarukeanga, kua pati aia me ka tika kia oki mai aia a tera mai ra ma tana au tauira e kia tuatua atu a Wissam ki tana pupu. Kua tupu akaou tetai akakitekite anga meitaki kia Iehova.

• Kua kaki tikai tetai tamaine ko Nina e 22 mataiti no te vai o te tuatua mou. I tetai ra kua oronga atu tona katini kiaia i tetai Pipiria e kua apai iaia ki te Akonoanga Penetekote. Kua tatau rekareka Nina i te Pipiria e kua kite aia mei tana tatauanga e ka tau te au Kerititiano i te tutu aere, no reira kua akamata aia i te tuatua ki tona au taeake. Pouroa te au tangata tana i tuatua atu kua ui mai kiaia: “Ko koe ainei tetai o te Au Kite o Iehova?” Kua umere aia.

E ono mataiti i muri mai, kua atoro atu te Au Kite o Iehova i te kainga o Nina e kua tuatua atu kiaia no runga i te Patireia o te Atua. I te akamata anga kua timata aia i te kimi tarevake ma ta ratou au apiianga. Inara, kua kite aia e pouroa ta ratou au pauanga e tau tikai e kua akatumuia ki runga i te Pipiria.

Ko te au mea ta Nina i apii maira​—te ingoa o te Atua, ko Iehova; te au akameitakianga o te Patireia; e te vai atura​—kua akapapu kiaia e kua kitea e ia te tuatua mou. Kua akatapu aia i tona oraanga ki te Atua e kua papetitoia. E itu mataiti i topa ki muri, kua tavini a Nina ei vaine evangeria tamou. E tika tikai, kua akameitaki a Iehova i te aronga tei inangaro tikai iaia.​—1 Korinetia 2:9.