Eaa ra ka Manako Tau ei i Roto i ta Tatou e Tapapa Ra?

TE ORONGA maira te tupu anga o te au manakonakoanga e te rauka anga o te anoano pakari kia tatou i te tu merengo anga. Inara, tei kiteia e manganui ta tatou au moemoea e te au tapapa anga kare i tupu mei tei anoanoia e tatou. Ka akariro te au tu maromaroa tupu akaou mai i te oraanga ia tatou kia manako taitaia ia tatou uaorai e tetai atu. Kua akakite ua tetai tangata pakari e: “Kia tavareia te apinga tapapaia ra, e aati te manava.”​—Maseli 13:12.

Eaa etai au tumu te ka taki atu ki te au manako ngakau maromaroa? Akapeea tatou i te angaanga anga e kia tau te manako i roto i ta tatou e tapapa ra? Pera katoa, eaa ra i riro ei ei mea puapinga kia tatou kia akapera?

Te Au Tapapa Anga e te Au Tu Maromaroa

Ma te viviki o te aerenga o te oraanga i teia tuatau, ko te maata atu i ta tatou tauta anga i te rave ua atu, ko te mamao atu ia i te akaraanga e kua topa tatou ki muri. Ka putuputu te au maro anga o to tatou taime e te maroiroi, e me poka tatou no te kore i rave i ta tatou i akanoo i te rave, te vaira te tu maromaroa ia tatou uaorai. Ka akamata tatou i te manako e te akamaromaroa ra tatou i tetai atu. Kua akakite a Cynthia, e vaine e e metua vaine tei kite i te au taomi anga ei metua, e: “No te kore i putuputu i te akatikatika i taku tamariki e te manakoanga e kare au e tereni meitaki ana ia ratou e mea reka kore tikai.” Te tuatua ra a Stephanie e mapu, no runga i tana kite apii anga: “Kare e maata ana toku taime no te rave pouroa i te au mea taku i inangaro i te rave, e te akatupu ra te reira i te au manako akakoromaki kore i roto iaku.”

Ka riro ngoie ua te au tapapa anga teitei tau kore ei tu apa kore, e ka riro teia ei mea taitaia tikai. Kua aaki a Ben, e tane akaipoipo ou, e: “Me akara au i taku au rave anga, au manako, me kare au manako ngakau, te kite ra au e akapeea te reira me akameitaki uaia atu. Te akara putuputu ra au i te tu apa kore, e te taki ra teia ki te tu akakoromaki kore, te apiapi, e te maromaroa.” Te akakite ra a Gail, e vaine Kerititiano, e: “Kare te manako anga tu apa kore e ariu ana i te tu poka. Te inangaro nei matou kia riro ei au mama meitaki tikai e ei au vaine meitaki tikai. Kia akatupu matou i te au tupu anga e mataora ei, no reira te akamanamanata ra te au tauta anga kaimoumou ia matou.”

Inara ko tetai tumu te ka taki atu ki to tatou uaorai tu maromaroa koia oki ko te kino i te oraanga kopapa e te ruaine anga. Te akamaata ra te kore e rauka i te raverave e te maroiroi i to tatou au kotinga e te akamaata ra i te au manako apiapi. “Kua manako akakoromaki kore au iaku uaorai no te kore i rauka i te akatupu i te au apinga ngoie e tei matauia i mua ake i toku maki angaia,” i akakite ei a Elizabeth.

E akaraanga tei taikuia i runga akenei no tetai apinga te ka rauka i te akatupu i te au manako ngakau maromaroa. Me kare e akaaereia, ka taki atu taua au tu ia tatou kia manako e kare tatou e arikiia mai e tetai atu. No reira, eaa te au takainga papu ka rauka ia tatou i te rave e autu ei i te au manako maromaroa e kia tatanu i te au tapapa anga tau?

Au Mataara no te Tatanu i te Au Tapapa Anga Tau

Te mea mua, e akamaara e tu tau to Iehova e te marama. Te akamaara maira a Salamo 103:14 kia tatou: “Kua kite oki aia i to tatou tu; te manako ra aia e, e one tatou nei.” Te kite anga i te ka rauka ia tatou e te au kotinga, te tapapa maira a Iehova mei ia tatou i te ka rauka ia tatou i te  oronga. E okotai apinga te pati maira aia mei ia tatou “te aerenga akamako tikai i to [tatou] Atua ra.”​—Mika 6:8.

Te raurau katoa maira a Iehova ia tatou kia uri kiaia na roto i te pure. (Roma 12:12; 1 Tesalonia 5:17) Akapeea ra te reira i te tauturu anga ia tatou? Te akatamou ngaueue kore ra e te akaaiteite ra te pure i to tatou manakoanga. E akakite anga te pure ngakau tae e te anoano ra tatou i te tauturu​—e akairo ia no te tu tau e te tu akaaka. Te inangaro ra a Iehova i te pau mai i ta tatou au pure na te orongaanga mai kia tatou i tona vaerua tapu, te kapiti maira ki roto i te ua te aroa, te takinga meitaki, te meitaki, e te akatere-uaorai. (Luka 11:13; Galatia 5:​22, 23) Te akamaru katoa ra te pure i te tu taitaia e te apiapi. Na roto i te pure, “ka rauka ia koe te pumaana kitea koreia mei tetai atu tumu,” i na Elizabeth ei. Kua akatika a Kevin e: “E pure ana au no tetai ngakau maru e tetai manako taka meitaki e raukai iaku i te akono i tetai manamanata. Kare a Iehova e kore i te tauturu mai iaku.” Kua kite te apotetoro ko Paulo i te puapinga o te pure. No reira oki aia i tuatuai e: “E akakite ua ra ki te Atua i to kotou anoano . . . E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:​6, 7) Ae, te angaanga ra te komunikeiti anga kia Iehova no te tauturu ia tatou kia tatanu i te au tapapa anga tau ia tatou uaorai e tetai atu.

Inara, i tetai ati anga, te anoano ra tatou i te akapapu anga. E meitaki tikai tetai tuatua i te tuatau tau. Ka tauturu te tuatua muna ki tetai oa pakari e te irinakiia ia tatou kia manako e eaa te akakeu ra ia tatou kia manako maromaroa me kare apiapi. (Maseli 15:23; 17:17; 27:9) Ko te au mapu tei putoto ma te tu apiapi te apii ra e ko te kimi anga i te au tauturu a te metua te tauturu ra ia ratou kia rauka te aiteite anga. Kua akakite ariki ua a Kandi e: “Kua akariro te arataki anga aroa mei toku nga metua iaku kia manako tau e kia aiteite e kia reka ia ei oa tau tikai.” Ae, te tau ra te akamaara anga ia Maseli 1:​8, 9 e: “E akarongo mai, e taku tamaiti, ki te apii a to metua tane, e auraka e akaruke i te ture a to metua vaine ra: E riro oki te reira ei pare manea ki runga i to upoko ra, e ei pirianganaoa auro ki runga i to kaki na.”

Te au tupu anga o te manako anga tu apa kore te taopengaia ra i roto i te tuatua: “Kia tapapa i te oraanga e kia akatauia ki ta tatou au tapapaanga te pati ra i te tu apiapi.” E kopae ei i teia, te umuumuia ra te akatikatika anga i te manakoanga. Ka utuutu te tu akaaka e te tu mako tikai​—te manako anga tika tikai i to tatou au kotinga​—i roto ia tatou i te au tapapa anga aiteite e te tau ua. Tei tau ra, te akamatakite maira a Roma 12:3 ia tatou “eiaa e maata te manako [ia tatou] uaorai, i tei tau [ia tatou] kia manako ra.” Pera katoa, te akamaroiroi maira a Philipi 2:3 ia tatou e kia akaaka te manako e kia manako e e teitei atu tetai.

Ko Elizabeth, tei taikuia i mua akenei, kua akakoromaki kore iaia uaorai no tona maki. Nona, kua anoanoia te tuatau e raukai to Iehova manako ki runga i te au mea e kia akapumaanaia i te kiteanga e kare aia e akangaropoina i ta tatou angaanga. Kare e rauka ia Colin i te aaere tei tupu mai mei tetai maki paruparu. I te akamata anga, kua manako aia vaitata rai e mea puapinga kore tana angaanga orometua me akaaiteia ki tana i rauka i te rave koi meitaki ei tona kopapa. Na te tamanako anga i te au irava mei ia 2 Korinetia 8:12, kua rauka iaia i te akakore i teia au manako ngakau. Te na ko ra teia irava: “Te vai ra oki te tika i te ngakau, e ārikiia ïa ta te tangata i rauka ra, kare i tei kore i rauka iaia ra.” “Noatu e meangiti taku ka rauka i te oronga,” i na Colin ei, “ka rauka rai iaku i te oronga, e te arikiia ra te reira kia Iehova.” Ia Ebera 6:10, te akamaaraia maira tatou: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa.”

Akapeea i reira e raukai ia tatou i te akataka e me e tau rai to tatou au tapapa anga? E ui kia koe uaorai, ‘Te aere kapipiti ra ainei taku au tapapa anga ma ta te Atua e tapapa ra?’ Te akakite ra a Galatia 6:4: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.” E akamaara, kua tuatua a Iesu: “Te maru nei taku amo, e te mama nei taku apainga.” Ae, ei au Kerititiano, e amo ta tatou ka apai, inara te “maru” ra e te “mama,” ra te reira e te taputou maira a Iesu e ka riro te reira ei akaangaroianga me apii tatou i te apai meitaki i te reira.​—Mataio 11:​28-30.

 Apai Mai te Au Tapapa Anga Tau i te Au Tutaki Anga

Te aere maira te au tutaki anga mutu kore mei te akarongo anga e te taangaangaanga i te ako anga o te Tuatua a te Atua ia tatou e tatanu ra i te au tapapa anga tau. No tetai apinga, e tupu anga meitaki teia kia tatou i te pae kopapa. Kua akakite a Jennifer, tei puapinga mei te au akamaara anga a Iehova, e: “E maata toku tu maroiroi e te tu oraora o te oraanga.” Tei tau ra, te raurau maira a Maseli 4:​21, 22 ia tatou kia akarongo ki te au tuatua a Iehova ma to tatou nga mata e te ngakau, “ko te ora oki te reira ki te aronga i kite atu ia ratou ra, e ora oki to ratou au kopapa katoa i te reira.”

Ko tetai atu tutaki anga ko te meitaki anga i te pae manako e te ngakau. “Me akatuera au i toku manako e te ngakau ki te Tuatua a te Atua, te kite ra au e te mataora ra au,” i na Theresa ei. E tika, ka kite rai tatou i te au tu maromaroa i te oraanga. Inara, ka rauka ia tatou i te apai ua i te reira. “E akavaitata atu ki te Atua, e nana e akavaitata mai kia kotou na,” i raurau ei a Iakobo 4:8. Te taputou katoa maira a Iehova i te akaketaketa ia tatou i te aro atu anga i te au akaaoanga o te oraanga e kia akameitaki mai ia tatou ma te au.​—Salamo 29:11.

Te raukaanga te au tapapa anga tau te akariro ra ia tatou kia akono i te tu tamou i te pae vaerua. E akameitaki anga katoa teia. Ka rauka ia tatou i te akono taka meitaki i te au apinga puapinga i te oraanga. (Philipi 1:10) Te tika tika ra i reira ta tatou au akakoroanga, te apai maira i te rekareka maata e te merengo anga. Ka puareinga ua tatou i te tuku ia tatou uaorai kia Iehova, te kiteanga e ka akatupu aia i te au apinga ei meitaki rai no tatou. “E tenana, ka akamoraro ia kotou uaorai i raro ake i te rima mana o te Atua, kia akateitei aia ia kotou i te tuatau tikai,” i na Petero ei. (1 Petero 5:6) E apinga puapinga ke atu ainei tetai e kia akangateitei ia Iehova?

[Au Tutu i te kapi 31]

Ka tauturu te tatanuanga i te au tapapa anga tau ia tatou kia autu i te au tu apiapi e te au tu maromaroa