Tua Oraanga

Mei te Maanianga au Apinga Tamaki ki te Akaoraanga i te au Oraanga

AKAKITEIA E ISIDOROS ISMAILIDIS

Te tuturi ra au i te tae mai anga toku roimata i runga i toku nga paparinga. “Aue, e te Atua, te akakite mai nei toku akava ngakau kiaku e kare e rauka iaku i te maani i te au apinga tamaki,” i tuatuai au i roto i te pure. “Kua tauta pakari au i te kimi i tetai atu angaanga, inara kare i rauka iaku. Apopo, ka oronga au i taku pepa akaruke anga. E Iehova e, auraka e tuku i ta maua tamariki e a kia pongi i te varaoa.” Akapeea au i te tae anga ki teia turanga?

E AU tikai e te ngoie ua te oraanga i Drama, i Ereni i te tua tokerau, te ngai i anauiai au i te 1932. E tuatua mai ana toku Papa kiaku no runga i tana i inangaro iaku kia rave. Kua akamaroiroi mai aia iaku kia aere ki Marike e raukai te kite apii anga. I muri ake i te takinokino angaia a Ereni i te Tamaki II o te Ao, ko tetai tuatua maata i roto i te aronga Ereni koia oki: “Ka rauka ia koe i te keia i taku au apinga, inara kare e rauka ia koe te keia i to matou au manako.” Kua tauta au i te aruaru i tetai kite anga apii teitei kia rauka tetai apinga kare e rauka i tetai ke i te keia.

Mei tetai mataiti ou, kua piri ana au ki roto i etai au pupu mapu tuke tuke tei tutakiia e te Akonoanga Otototi Ereni. I reira kua akakiteia mai kia matou kia kopae i te au sect kino ra. Kua maara iaku tetai pupu okotai​—Au Kite o Iehova​—tei taikuia, i te mea te komono ra ratou i tei manakoia e ko te aronga patoi ia Karaiti.

I muri ake i te karatuatianga mei tetai apii apiipii apinga matini i Athens i te 1953, kua teretere atu au ki Tiamani i te kimi e me ka rauka rai iaku tetai angaanga e kia aere ki te apii i taua taime rai. Inara kare te reira i tupu ana, no reira kua teretere atu au ki tetai au enua. I muri mai i nga mea epetoma, kua kite mai au e kare aku moni i tetai uapu i Belgium. Te maara ra iaku i te aere anga ki roto i tetai are pure, te nooanga ki raro, e te aue  maata anga e kua topa te au roimata ki runga i te taua i mua iaku. Kua pure au me tauturu mai te Atua iaku kia tae ki Marike, kare au e aruaru i te au apinga materia mari ra kia rauka tetai apii anga e ka tauta e kia riro ei Kerititiano meitaki e ei tangata meitaki. I te openga iora i te 1957, kua tae atu au ki reira.

Tetai Oraanga Ou i Marike

Kua ngata tikai te oraanga i Marike no tetai tangata teretere tei kore i kite i te reo e kare e moni. Kua angaanga au e rua angaanga i te po e kua tauta pakari i te aere atu ki te apii i te ao. Kua aere au ki etai atu au kaoreti e kua rauka mai tetai pepa apii. I reira kua aere atu au ki te Apii Teitei o California i Los Angeles e kua rauka mai tetai pepa taineti o te apii physics. Kua akakeukeu te au tuatua a toku papa kia rauka tetai apii meitaki iaku kia rave ua atu i teia noatu te au tuatau ngata.

Tae mai ki teia taime, kua aravei au i tetai tamaine Ereni, ko Ekaterini, e kua akaipoipo maua i te 1964. Kua anauia mai ta maua tamaiti mua e toru mataiti i muri mai i te reira, i roto rai i te a mataiti kua tu maua e rua atu tamaroa e te tamaine okotai. E akaaoanga tikai kia turu i tetai pamiri e i taua taime rai te apii ra i te apii teitei.

Te angaanga ra au na te U.S. Air Force i tetai kamupani no te ngai ravarai e te apinga aruru i Sunnyvale, California. Kua o atu au ki roto i tetai o te au angaanga o te mareva e te ngai ravarai, kapiti mai i te au porokaramu o Agena e Apollo. Kua rauka iaku i te au metera no taku angaanga i runga i te au tere anga Apollo 8 e te Apollo 11. I muri mai i te reira, kua apiipii ua atu au e kua o pakari atu ki roto i te au angaanga no te ngai vaeau tuke tuke. I teia atianga, kua manako au e kua rauka iaku te au mea​—tetai vaine tau, e a tamariki manea, e tetai angaanga meitaki rava, e tetai are manea.

E Taeake Akakeu Putuputu

I te akamata anga o te 1967, i te angaanga kua aravei au ia Jim, e tangata akaaka e te takinga meitaki. I te akaraanga e kata ua ana a Jim, e kare aia e patoi ana me patiia atu e kia inu kaope maua. Kua taangaanga aia i teia tuatau no te akakite mai i te tuatua mei te Pipiria kiaku. Kua akakite mai a Jim kiaku e apii ana aia i te Pipiria ma te Au Kite o Iehova.

Kua poitirere tikai au i te rongo atu e kua kapiti atu a Jim ki roto i teia pupu akonoanga. Akapeea oki i raukai i teia tangata meitaki ra kia kapiti atu ki roto i teia sect tei patoi ia Karaiti? Inara, kare e rauka iaku i te patoi i to Jim tu inangaro iaku e tona tu takinga meitaki. I te akara anga i te au ra tataki tai e apinga tuke tana naku kia tatau. Ei akaraanga, i tetai ra kua aere mai aia ki toku opati e kua karanga mai: “E Isidoros, te akakite nei teia atikara i roto i Te Punanga Tiaki e akapeea me akaketaketa i te oraanga pamiri. E apai i te reira ki te kainga e e tatau i te reira ma taau vaine.” Kua akakite atu au kiaia e ka tatau au i te itiu, inara i muri mai kua aere atu au ki te pia akaangaroi anga e kua vetevete rikiriki i te makatini e kua titiri i te reira ki roto i te pia teita.

E toru mataiti, kua vetevete au i te au puka e te makatini ta Jim i oronga mai kiaku. Te manako papaki tai ra i te Au Kite o Iehova, e te tauta ra i te akono ia Jim ei taeake, kua manako au e mea meitaki i te akarongo atu kiaia no runga i tana ka tuatua e ka akakore viviki i te reira.

Inara, mei te reira au uriurianga, kua kite mai au e ko te  maata anga o te au mea taku i irinaki e te rave ra kare ia i akanooia ki runga i te Pipiria. Kua kite mai au i te au apiianga Toru Tai, te ai era, te mate kore o te meta kare i roto i te Tuatua Tapu. (Koheleta 9:10; Ezekiela 18:4; Ioane 20:17) Ei Ereni Otototi ngakau parau, kare au i inangaro i te akatika e kua tano rai ta Jim. Inara i te mea kua taangaanga ua aia i te Pipiria e kare i oronga mai i tona uaorai manako, kua kite au i te openga ra e e tuatua puapinga ta teia tangata no roto mai i te Pipiria kiaku.

Kua kite mai taku vaine e te tupu ra tetai apinga, e kua ui mai aia me kua tuatua ana au ki toku taeake tei kapiti atu ki te Au Kite. I te pau anga au ae, kua tuatua mai aia: “E aere tatou ki tetai ua atu akonoanga auraka ra te Au Kite o Iehova.” Inara, kare i roaia kua aere putuputu atu maua ko taku vaine e ta maua tamariki ki te au uipaanga a te Au Kite.

Tetai Iki Anga Ngata

Iaku e apii ra i te Pipiria, kua kite atu au i teia au tuatua a te peroveta ko Isaia: “E tupaki oki ratou i ta ratou au koke ei auri arote, e ta ratou au korare ra, ei tipi tope ïa: kare tetai enua e tamaki mai ki tetai enua i te koke, kare oki ratou e apii akaou i te tamaki.” (Isaia 2:4) Kua ui au kiaku uaorai, ‘Akapeea tetai tavini o tetai Atua inangaro i te au i te angaanga anga i roto i te akapapa anga e te maani anga i te au apinga akapou anga?’ (Salamo 46:9) Kare i roa iaku i te taopenga anga e kia taui au i taku ngai angaanga.

Tei maramaia, e akaaoanga maata teia. E ngai angaanga ngateitei tikai taku. Kua tauta tikai au no tetai au mataiti i te angaanga pakari, te apii anga, e te au akaatinga e tae mai ki teia. Kua taeria e au tetai turanga teitei, e kua aro atu au i teianei no te akaruke i taku angaanga. Inara, i te openga ra kua autu toku inangaro oonu ia Iehova e te umuumu i te rave i tona anoano.​—Mataio 7:21.

Kua iki atu au i te kimi angaanga ma tetai kamupani i Seattle, Washington. Inara, ma te maromaroa, kua kite atu au e te o ra au ki roto i tetai angaanga kare i rotai ki ta Isaia 2:4. Kua poka taku au tauta anga no te angaanga i tetai atu au angaanga, e kua tamanamanata akaou mai toku akava ngakau iaku. Kua kite mai au e kare e rauka iaku i te akono i taku angaanga i taua taime rai te akonoanga i tetai akava ngakau ma.​—1 Petero 3:21.

Kua taka meitaki mai e ka anoanoia matou kia rave i te au taui anga puapinga. I raro ua ake i te ono marama, kua taui matou i to matou tu oraanga e kua akameangiti mai i te au tutaki anga a te pamiri. Kua oko matou i to matou are manea e kua oko mai i tetai mea meangiti i Denver, Colorado. Kua papa au i teianei i te iki openga​—te akaruke anga i taku angaanga. Kua tata au i taku pepa akaruke anga, te akamarama anga i toku turanga tau i te akava ngakau. I taua po ra, i muri ake i te aerenga te tamariki ki te moe, kua tuturi au ma taku vaine e kua pure maua kia Iehova, mei tei akatakaia i te akamata anga o teia atikara.

I raro ua ake i te marama, kua neke atu matou ki Denver, e rua epetoma i muri mai, ia Tiurai 1975, kua papetitoia maua ko taku vaine. No te au ono marama kare i rauka iaku te kimi i tetai angaanga, e te akapou marie ra matou i ta matou moni akaputu. I te tae anga ki te itu marama, kua meangiti mai ta matou moni i te moni tutaki are o te marama. Kua akamata au i te kimi i tetai  angaanga tei rauka iaku, i muri mai i te reira kua rauka mai taku angaanga enitinia. E apa ua te tutaki anga mei taku i matau; noatu rai, e maata atu taku i pati kia Iehova. Mei teaa ra toku mataora anga e kua tuku au i te au anoano i te pae vaerua na mua!​—Mataio 6:33.

Utuutuanga Mai i ta Maua Tamariki kia Inangaro ia Iehova

I taua taime rai te angaanga maroiroi ra maua ko Ekaterini ma te akaaoanga no te utuutuanga mai i ta maua tamariki e a kia akono i te au kaveinga tau i te Atua. Ma te mataora, kua kite ana maua ia ratou pouroa, ma te tauturu o Iehova, i te riro anga mai ei au Kerititiano pakari, te oronga anga i to ratou au oraanga ki te angaanga puapinga o te tutuanga i te Patireia. Ko ta maua au tamaroa e toru, ko Christos, Lakes, e Gregory kua karatuati mei te Apii Terenianga Orometua e te tavini nei i ta ratou au tuku anga angaanga tukeke, te atoroanga e te akaketaketaanga i te au putuputuanga. Ko Toula, ta maua tamaine, te angaanga ra ei vaine oronga ua i te opati maata o te Au Kite o Iehova i New York. Kua pumaana tikai to maua ngakau i te kite anga ia ratou pouroa i te akaatinga anga i te au angaanga meitaki e te au angaanga e teitei te tutaki anga e raukai te tavini ia Iehova.

E manganui tei ui e eaa tei muri i te utuutuanga i tetai tama ma te manuia. Ae, kare e papa anga tau no te utuutuanga mai i te tamariki, inara kua tauta maroiroi maua i te akatupu i te inangaro ia Iehova e te tangata tupu ki roto i to ratou ngakau. (Deuteronomi 6:​6, 7; Mataio 22:​37-39) Kua kite mai te tamariki e kare e rauka ia maua i te akakite kia Iehova e te inangaro ra maua iaia kia akaari roa ta maua au angaanga e te pera ra.

Okotai ra i te epetoma, i te Maanakai, kua piri atu matou ki roto i te angaanga orometua ei pamiri. E apii putuputu ana matou i te Pipiria ei pamiri i te au aiai Monite i muri ake i te kaikai anga, e e apii ana maua i te Pipiria ma te tama taki tai. I te ou anga te tamariki, kua apii maua ma te au tuatau poto i te tama tataki tai i tetai au taime i te epetoma, ia ratou e maata maira, kua roa ta maua apii i te epetoma ma ratou. I teia au apii, kua tuatua mai e kua uriuri ua mai ta maua tamariki i to ratou au manamanata kia maua.

Kua rekareka katoa matou i te tarekareka akamatutu anga ei pamiri. E reka ana matou i te akatangi i te au apinga akatangi imene kapipiti, e reka ana te au tama taki tai i te akatangi i tana au imene reka. I etai au openga epetoma, kua pati atu matou i etai au pamiri no tetai oaoa anga akamaroiroi. Kua rave katoa matou i te au terepu orote ei pamiri. I tetai o te reira terepu, kua pou ia matou e rua epetoma i te akarakara anga i te au maunga o Colorado e te angaanga anga ma te au putuputuanga i reira i roto i te angaanga orometua. Kua maara rekaia e ta maua tamariki te angaanga i te au uruoaanga tapere i roto i te au  tipatimani tukeke e te tauturuanga i te patu anga i te Are Uipaanga Patireia i te au ngai tukeke. I te apai anga maua i te tamariki ki Ereni kia aravei i to ratou au kopu tangata, kua rauka katoa ia ratou i te aravei i te Au Kite tiratiratu e manganui tei aere ana ki roto i te are auri no to ratou akarongo. Kua akatupu teia i te akara anga oonu ki runga ia ratou, te tauturuanga ia ratou kia akakoro e kia vai tiratiratu ua e te mataku kore no te tuatua mou.

Ae, i tetai taime kua taringa turi te tamariki kua iki i te au oaoa anga tarevake. I tetai atu taime, kua akatupu maua i te au manamanata no ratou na te arai pakari anga i tetai au ngai. Inara i te ariu anga e “kia pakari ma te ako a te Atu ra,” tei kiteia i roto i te Pipiria, kua tauturu i te akatikatika i te au mea no matou.— Ephesia 6:4; 2 Timoteo 3:​16, 17.

Te Tuatau Mataora Roa Atu o Toku Oraanga

I muri ake i te rave anga ta maua tamariki e a i te angaanga tamou, kua manako pakari maua ko Ekaterini no runga i te ka rauka ia maua i te rave kia akamaata atu i ta maua tuanga i roto i teia angaanga akaoraanga. No reira, i te 1994, i muri ake i te akaangaroi vave anga, kua akamata maua i te tavini ei nga painia tamou. Kua kapiti mai ki roto i ta maua angaanga orometua te atoroanga i te au kaoreti e te au apii teitei i reira, kua akakite aere maua ki te au tamariki apii e te rave anga i te au apii Pipiria ki etai ia ratou. No te mea ka rauka iaku i te tangi aroa atu ma to ratou au tu ngata​—i te mea i o ana au ki roto i to ratou turanga kare i roa te tuatau i topa​—kua manuia au i te tauturu atu ia ratou kia apii no runga ia Iehova. Mei teaa te rekareka i te apii anga ki tetai aronga apii no Bolivia, Brazil, Chile, Tinito, Aiphiti, Etiopia, Meiko, Thailand, e Turkey! Kua rekareka katoa au i te akakite anga na roto i te terepaoni, ki te au tangata tikai te tuatua ra i toku reo.

Noatu e manganui toku au kotinga no taku tangi anga reo Ereni e te ruaine anga, kua tauta au i te akariro iaku e kia rauka te tu mei ia Isaia rai, tei akakite e: “I na, teia au; ko au taau e tono.” (Isaia 6:8) Kua rauka ia maua te rekareka no te tauturu anga e maata atu i te apa tatini tangata kia akatapu i to ratou au oraanga kia Iehova. Kua riro teia ei tuatau mataora tikai no maua.

I mua ana kua takapini toku oraanga i te maani anga i te au apinga tamaki no te tamate i te au taeake tangata. Inara, kua akatuera a Iehova na roto i tona tu takinga meitaki i te mataara noku e toku pamiri kia riro mai ei au tavini akatapuia e kia akono i to matou au oraanga i te apai anga ki te au tangata i te au tuatua meitaki o te ora mutu kore i runga nei i te enua parataito. Iaku e akaata nei ki runga i te au iki anga akaaoanga taku i akono, te maara nei te au tuatua a Malaki 3:10 e: “Ei timata anga te reira iaku nei i tenana, te tuatua mairā Iehova Sabaota ra; i te kore anga au i te kiriti anga i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.” Kua rave aia i teia​—e kia merengo tikai to maua ngakau!

[Pia/​Tutu i te kapi 27]

Lakes: E rikarika ana toku papa i te aronga pikikaa. Kua tauta pakari aia auraka ei tangata pikikaa, i te akanoo anga i te akara anga tau no tona pamiri. Kua akakite putuputu mai aia kia matou: “Me akatapu koe i toou oraanga kia Iehova, te anoanoia ra tetai apinga. Kia puareinga ua koe i te akono i te au atinga kia Iehova. Ko te reira te o maira ei Kerititiano.” Kua vai mai teia au tuatua ki roto iaku e kua akariro iaku kia aru i tana akaraanga i te raveanga i te au atinga kia Iehova.

[Pia/​Tutu i te kapi 27]

Christos: Kua ariki maata tikai au i te tu tiratiratu ma te meta katoa o toku nga metua kia Iehova e to raua akakoroanga pakari ki ta raua apainga ei nga metua. Ei pamiri, kua rave kapipiti matou i te au mea​—mei ta matou angaanga orometua ki to matou au tuatau orote. Noatu e ka rauka ia raua i te piri atu ki roto i etai au apinga e manganui, kua akono toku nga metua ma te ngoie ua i to raua oraanga e kua manako maata i te angaanga orometua. I teia ra, kua kite au e te mataora tikai nei au me piri pu tikai au ki roto i te angaanga a Iehova.

[Pia/​Tutu i te kapi 28]

Gregory: E maata atu i te au tuatua akamaroiroi anga a toku nga metua kiaku kia akamaata i taku angaanga orometua, to raua akaraanga e te kite anga o to raua tu rekareka i roto i ta Iehova angaanga kua akakeu iaku kia akara i toku au turanga, kia tuku ki tetai ngai ke i te au manamanata e te au manako anga no runga i te akamata anga i te angaanga tamou, e kia rave maata i te angaanga a Iehova. Te akameitaki nei au i toku nga metua no te tauturuanga mai iaku kia kimi i te rekareka te aere maira no te aruaruanga iaku uaorai.

[Pia/​Tutu i te kapi 28]

Toula: Kua tuatua maata toku nga metua e ko to matou pirianga kia Iehova te mea akaperepere roa te ka rauka ia matou e ko te mataara ua e mataora ei matou koia oki ko te orongaanga i to matou meitaki kia Iehova. Kua akariro raua e kia tika tikai a Iehova kia matou. E putuputu te taime kua akakite mai toku Papa kia matou te vaira te manako ngakau akataka koreia no runga i te aerenga i te moe i te po ma tetai akava ngakau ma, te kiteanga e kua tauta koe i tei rauka ia koe i te akariro ia Iehova kia mataora.

[Tutu i te kapi 25]

Iaku ei tangata vaeau i Ereni, i te 1951

[Tutu i te kapi 25]

Maua ko Ekaterini i te 1966

[Tutu i te kapi 26]

Ma toku pamiri i te 1996: (kaui katau, i muri) Gregory, Christos, Toula; (i mua) Lakes, Ekaterini, e au